Author: ممتاز حیدر

ایران کے صدر نے کہا ہے کہ“ہم ہمسایہ ممالک پر حملہ نہیں کریں گے۔” مگر صرف 5 گھنٹے بعد ایرانی پاسدارانِ انقلاب نے اسے “غلطی” قرار دیا اور حملے جاری رکھے۔

ایک ایرانی ڈرون نے دبئی مرینا میں ایک رہائشی ٹاور کو نشانہ بنایا ، جو مکمل طور پر شہری عمارت تھی۔

اسرائیلی فوج نے ایران کی پارچین اور شاہرود میزائل فیکٹریوں کو تباہ کر دیا ، مقصد یہ بتایا جا رہا ہے کہ ایران کو مستقبل میں دوبارہ میزائل بنانے کی صلاحیت سے محروم کر دیا جائے۔

ایک بیلسٹک میزائل سعودی عرب کے پرنس سلطان ایئر بیس کے قریب گرا ، جہاں امریکی F-15 طیارے، THAAD اور پیٹریاٹ دفاعی نظام موجود ہیں۔

متحدہ عرب امارات نے ایران کو براہِ راست پیغام دیا “جارحیت فوری طور پر بند ہونی چاہیے۔”اور ایران کے میزائل پروگرام کو مکمل ختم کرنے کا مطالبہ کیا۔

امریکہ نے قشم جزیرے پر واقع ایک میٹھا پانی بنانے والے (ڈیسالینیشن) پلانٹ کو بمباری میں نشانہ بنایا،جس کے بعد 30 دیہات پانی کی فراہمی سے محروم ہو گئے۔

اسرائیل نے لبنان کی بقاع وادی پر حملہ کیا ، ایک ہی حملے میں 41 افراد ہلاک جبکہ مجموعی طور پر 339 لبنانی جانیں ضائع ہو چکی ہیں۔

ایران نے عبرانی زبان میں براہِ راست اسرائیلی شہریوں کو پیغام جاری کیا جس میں اسرائیل پر انسانی ڈھال استعمال کرنے کا الزام لگایا گیا۔

اٹلی نے قبرص کی جانب ایک جنگی جہاز بھیجنے کا اعلان کیا۔وزیراعظم نے کہا: “ہم اس جنگ کا حصہ نہیں ہیں۔” لیکن اس کے باوجود فوجی وسائل منتقل کیے جا رہے ہیں۔

عمان کے وزیر خارجہ نے کہا“اس جنگ کو روکنا تمام عرب ممالک کے لیے اعلیٰ ترین قومی مفاد ہے۔”

وہ باتیں جو سب سے زیادہ تشویشناک ہیں

ایران کے میزائل حملوں میں 90٪ کمی آئی ہے ، ماہرین کے مطابق یہ کمزوری نہیں بلکہ حکمتِ عملی میں تبدیلی ہے۔یعنی ایران طویل جنگ کے لیے گولہ بارود محفوظ کر رہا ہے۔ ایرانی پاسدارانِ انقلاب نے کھلے عام دنیا سے کہا کہ اپنے ہی صدر کی بات کو نظر انداز کریں ، جس سے ظاہر ہوتا ہے کہ حکومت کے اندر شدید تقسیم پیدا ہو چکی ہے۔ خلیجی ممالک پر حملے اب اسرائیل سے زیادہ بار ہونے لگے ہیں۔ اگر ایران میں حکومت کی تبدیلی کا منصوبہ ناکام ہو جاتا ہے تو امریکہ کے پاس متبادل منصوبہ نہیں ہے۔ امریکہ کے پانی کے پلانٹ پر حملے کے بعد ایران اب تمام شہری انفراسٹرکچر کو جائز ہدف سمجھ سکتا ہے۔ یہ صورتحال کم ہونے کے بجائے مزید سنگین ہو رہی ہے،صرف 8 گھنٹوں میں 8 ممالک اس بحران کی لپیٹ میں آ چکے ہیں، اور ہر گزرتے گھنٹے کے ساتھ حالات مزید خراب ہوتے جا رہے ہیں۔صورتحال انتہائی حساس اور خطرناک مرحلے میں داخل ہو چکی ہے۔

تہران: مشرقِ وسطیٰ میں جاری کشیدگی کے دوران ایران کے دارالحکومت تہران کے قریب آئل انفراسٹرکچر کو مبینہ طور پر فضائی حملوں کا نشانہ بنایا گیا ہے۔

رپورٹس کے مطابق اسرائیل اور امریکہ کی مشترکہ کارروائی میں اہم توانائی تنصیبات کو ہدف بنایا گیا،اطلاعات کے مطابق صوبہ البرز کے شہر کراچ میں واقع سہاران آئل ڈپو اور مشرقی تہران ریفائنری پر حملے کیے گئے۔ حملوں کے بعد متعدد مقامات پر آگ بھڑک اٹھی جبکہ زور دار دھماکوں کی آوازیں بھی سنائی دینے کی خبریں سامنے آئی ہیں۔عینی شاہدین اور سوشل میڈیا پر سامنے آنے والی ویڈیوز میں بعض علاقوں سے دھوئیں کے گھنے بادل اٹھتے دکھائی دے رہے ہیں۔ ابتدائی اطلاعات کے مطابق ان حملوں کا مقصد ایران کی توانائی اور اسٹریٹجک تنصیبات کو نشانہ بنانا تھا۔

ماہرین کا کہنا ہے کہ تہران کے قریب واقع فیول ڈپو اور ریفائنریوں پر حملے مقامی ایندھن کی فراہمی کو متاثر کر سکتے ہیں۔ ماضی میں بھی ایسے حملوں کے بعد بڑے پیمانے پر آگ لگنے اور فیول سپلائی میں رکاوٹیں پیدا ہونے کے واقعات سامنے آ چکے ہیں۔دوسری جانب ایرانی حکام کی جانب سے حملوں کے نقصانات یا ممکنہ جانی نقصان کے بارے میں فوری طور پر کوئی باضابطہ بیان جاری نہیں کیا گیا۔ تاہم سکیورٹی اور ہنگامی اداروں کو متاثرہ علاقوں میں بھیج دیا گیا ہے۔

ایران پر حملے کے نتیجے میں امریکی صدر ڈونلڈ ٹرمپ کے مواخذے کے امکانات بڑھ کر 67 فیصد ہوگئے ہیں ۔

یہ بات امریکی میڈیا نے سٹہ بازار کے اعداد و شمار کی بنیاد پر کہی ہے ،ماہرین کا کہنا ہے کہ سٹہ بازار سیاسی ماحول کی عکاسی تو کرتا ہے لیکن اُسے حتمی پیش گوئی نہیں سمجھا جا سکتا ۔،سیاسی تجزیہ کاروں کے مطابق فی الحال ٹرمپ کے مواخذے کا امکان کم ہے کیونکہ ری پبلکن پارٹی ایوانِ نمائندگان اور سینیٹ دونوں میں اکثریت رکھتی ہے اور پارٹی کے ارکان کی بڑی تعداد صدر کی حمایت کر رہی ہے ،تاہم اگر اس سال نومبر کے وسط مدتی انتخابات میں ڈیموکریٹس ایوانِ نمائندگان میں اکثریت حاصل کر لیتے ہیں تو صورتِ حال بدل سکتی ہے.

ایرانی صدر مسعود پزشکیان نے ہفتہ کی صبح عرب خلیجی ممالک سے غیرمعمولی خطاب میں معافی مانگتے ہوئے اعلان کیا ہے کہ ایران اب اپنے پڑوسی ممالک پر حملے نہیں کرے گا، جب تک ان ممالک کی سرزمین سے ایران کے خلاف کارروائی نہ کی جائے۔

ایرانی سرکاری ٹیلی وژن پر نشر ہونے والے خطاب میں صدر پزشکیان نے کہا “میں ذاتی طور پر ان پڑوسی ممالک سے معذرت خواہ ہوں جن پر ایران کی جانب سے حملے ہوئے۔ ہمارا ارادہ اپنے پڑوسی ممالک کو نشانہ بنانے کا نہیں ہے۔ جیسا کہ میں پہلے بھی کہہ چکا ہوں، وہ ہمارے بھائی ہیں۔”انہوں نے بتایا کہ ایران میں عارضی طور پر حکمرانی کرنے والی تین رکنی قیادت کونسل نے مسلح افواج کو واضح ہدایات دی ہیں کہ آئندہ کسی بھی پڑوسی ملک پر حملہ نہ کیا جائے، جب تک کہ وہاں سے ایران کے خلاف حملے نہ کیے جائیں۔“ہمیں اس مسئلے کو لڑائی کے بجائے سفارت کاری کے ذریعے حل کرنا چاہیے اور اپنے پڑوسی ممالک کے ساتھ تنازعات سے بچنا چاہیے۔”

انہوں نے خلیجی ممالک کو خبردار کرتے ہوئے کہا کہ وہ “سامراجی طاقتوں کے ہاتھوں کا کھلونا” نہ بنیں اور اپنی سرزمین ایران کے خلاف استعمال نہ ہونے دیں۔تاہم یہ واضح نہیں ہو سکا کہ صدر کے اعلان پر فوری طور پر عمل درآمد ہوگا یا نہیں۔ خطاب کے بعد بھی خطے میں کشیدگی برقرار رہی، اور متحدہ عرب امارات میں فضائی دفاعی نظام کی سرگرمیوں کی اطلاعات موصول ہوئیں جبکہ بحرین میں خطرے کے سائرن بجنے کی آوازیں سنائی دیں۔

ایرانی ڈرون نے دبئی ایئرپورٹ کو نشانہ بنایا۔ ویڈیو میں ایک دھماکے اور ڈرون حملے کے مناظر دکھائے جا رہے ہیں،دبئی ایر پورٹ کے قریب ہفتہ کی صبح زور دار دھماکے کی آواز سنی گئی جس کے بعد فضاء میں دھویں کا بادل بلند ہوتا دیکھا گیا۔

خبر رساں ادارے اے ایف پی کے ایک عینی شاہد کے مطابق دھماکے کی آواز براہِ راست ایئرپورٹ کے اوپر سنی گئی اور چند لمحوں بعد ایئرپورٹ کے قریب دھواں اٹھتا دکھائی دیا۔ سوشل میڈیا پر سامنے آنے والی ویڈیوز میں مبینہ طور پر ایک ڈرون یا اس کے ملبے کے گرنے کے بعد دھماکے کا منظر دکھایا گیا، جس کے بارے میں بعض صارفین کا کہنا ہے کہ یہ ایرانی ساختہ Shahed-136 ڈرون ہو سکتا ہے۔فلائٹ ٹریکنگ ویب سائٹ Flightradar24 کے مطابق واقعے کے فوراً بعد متعدد طیارے فضا میں چکر لگاتے یا ہولڈنگ پیٹرن میں نظر آئے جبکہ حفاظتی اقدامات کے تحت کچھ دیر کے لیے پروازوں کی آمد و رفت محدود کر دی گئی۔

بعد ازاں دبئی میڈیا آفس نے ایک بیان جاری کرتے ہوئے واقعے کو “معمولی نوعیت کا حادثہ” قرار دیا۔ حکام کے مطابق یہ دھماکہ کسی میزائل یا ڈرون کو فضا میں روکنے کے بعد گرنے والے ملبے کی وجہ سے ہوا اور ایئرپورٹ کے بنیادی ڈھانچے کو کوئی بڑا نقصان نہیں پہنچا۔بیان میں کہا گیا کہ صورتحال کو فوری طور پر قابو میں لے لیا گیا اور اس مخصوص واقعے میں کسی جانی نقصان کی اطلاع نہیں ملی۔ ایئرپورٹ ٹرمینلز یا دیگر اہم تنصیبات کو بھی کوئی بڑا نقصان نہیں پہنچا۔