Author: ممتاز حیدر

متحدہ قومی موومنٹ (ایم کیو ایم) کے بانی مقتول رہنما ڈاکٹر عمران فاروق کی بیوہ شمائلہ عمران فاروق لندن میں وفات پا گئیں

ایم کیو ایم ذرائع کا کہنا ہے کہ شمائلہ عمران فاروق کینسر کے باعث لندن کے اسپتال میں زیرِ علاج تھیں ،ایم کیو ایم کی جانب سےجاری اعلامیہ میں کہا گیا ہے کہ ہم انتہائی افسوس کے ساتھ تحریک کے تمام کارکنان اورعوام کویہ خبردے رہے ہیں کہ شہید انقلاب ڈاکٹرعمران فاروق شہید کی بیوہ شمائلہ عمران فاروق طویل علالت کے بعد آج مورخہ 19دسمبر2025ء بروز جمعہ انتقال فرما گئی ہیں۔ اناللہ واناالیہ راجعون۔شمائلہ عمران کینسر کے مرض کے باعث بہت علیل تھیں اوروہ لندن کے مقامی اسپتال میں زیرعلاج تھیں جہاں ان کاانتقا ل ہوگیا۔ ہم تمام اراکین رابطہ کمیٹی متحدہ قومی موومنٹ شمائلہ عمران کے انتقال پر ان کے صاحبزادوں عالی شان فاروق، وجدان فاروق اورتمام اہل خانہ سے انتہائی دکھ اور تعزیت کااظہارکرتے ہیں۔

ایم کیو ایم کے رہنما فیصل سبزواری نے ایکس پر لکھا کہ خدا شمائلہ عمران باجی کی مغفرت فرمائے اور دونوں صاحبزادوں کو یہ صدمہء عظیم سہنے کی ہمت دے۔ ڈاکٹر عمران فاروق بھائی کی شہادت کے بعد یہ گھرانا روز نئے صدمے سہتا رہا، کاش مجھ سمیت پوری تنظیم ان کے دکھوں کو کچھ کم کرنے کے لیے کارآمد ثابت ہو پاتی۔ ۲۰۱۶-۱۷ میں ان سے آخری ملاقات میں جو کرب دیکھا تھا وہ وقت کے ساتھ ناقابل بیان ہوتا رہا۔

بنگلادیش کے معروف طالب علم رہنما اور سیاسی پلیٹ فارم انقلاب منچہ کے ترجمان شریف عثمان ہادی کی میت سنگاپور سے ڈھاکا پہنچا دی گئی ہے۔

بنگلادیشی میڈیا رپورٹس کے مطابق بنگلادیش ائیرلائن کا خصوصی طیارہ آج شام سنگاپور سے روانہ ہو کر ڈھاکا ایئرپورٹ پر اترا، جس میں شریف عثمان ہادی کی میت لائی گئی۔ایئرپورٹ پر ان کی میت کو مکمل سرکاری اعزاز کے ساتھ بنگلادیش کے قومی پرچم میں لپیٹ کر وصول کیا گیا۔ اس موقع پر سیاسی، سماجی اور طلبہ تنظیموں کے نمائندوں سمیت مرحوم کے اہلِ خانہ بھی موجود تھے۔

بنگلادیش کے چیف ایڈوائزر کے پریس ونگ کی جانب سے جاری کردہ بیان کے مطابق شریف عثمان ہادی کی نمازِ جنازہ کل دوپہر 2 بجے بنگلادیشی پارلیمنٹ کے ساؤتھ پلازا میں ادا کی جائے گی۔ بیان میں سیکیورٹی خدشات کے پیش نظر جنازے میں شرکت کرنے والوں کو ہدایت کی گئی ہے کہ وہ اپنے ساتھ کسی قسم کے بیگ یا بھاری اشیا نہ لائیں۔اس کے علاوہ پارلیمنٹ ہاؤس اور اس کے گردونواح میں ڈرون اڑانے پر مکمل پابندی عائد کر دی گئی ہے جبکہ سیکیورٹی کے سخت انتظامات کیے جا رہے ہیں۔

دوسری جانب بنگلادیش کے چیف ایڈوائزر محمد یونس نے شریف عثمان ہادی کے انتقال پر گہرے رنج و غم کا اظہار کرتے ہوئے ہفتے کے روز ایک روزہ قومی سوگ کا اعلان کیا ہے۔ اس موقع پر سرکاری عمارتوں پر قومی پرچم سرنگوں رہے گا۔

واضح رہے کہ شریف عثمان ہادی جمعرات کی شب سنگاپور جنرل اسپتال میں زخموں کی تاب نہ لاتے ہوئے انتقال کر گئے تھے۔ انہیں 12 دسمبر کو ڈھاکا کے علاقے پرانا پلٹن میں انتخابی مہم کے دوران نامعلوم حملہ آوروں کی فائرنگ کا نشانہ بنایا گیا تھا، جس کے نتیجے میں ان کے سر پر شدید زخم آئے تھے۔

واقعے کے فوراً بعد انہیں ڈھاکہ میڈیکل کالج اسپتال منتقل کیا گیا، بعد ازاں ایور کیئر اسپتال میں بھی علاج کیا گیا، تاہم حالت تشویشناک ہونے کے باعث 15 دسمبر کو بہتر علاج کے لیے سنگاپور منتقل کیا گیا تھا، جہاں وہ زندگی کی بازی ہار گئے۔شریف عثمان ہادی کے انتقال کو بنگلادیشی طلبہ سیاست اور جمہوری جدوجہد کے لیے ایک بڑا نقصان قرار دیا جا رہا ہے، جبکہ ان کے قتل کے واقعے نے ملک میں سیاسی ماحول کو مزید کشیدہ کر دیا ہے۔

ہادی اسکوائر ، شاہ باغ میں عثمان ہادی کی شہادت پرمظاہرین کا شدید احتجاج اب بھی جاری ہے،بنگلہ دیشی سیاسی کارکن عثمان ہادی کی ڈھاکہ میں قاتلانہ حملہ میں شہادت کے بعد حالات کشیدہ ہیں،مظاہرین نے بھارتی وزیراعظم نریندر مودی کیخلاف شدید نعرے بازی کی، احتجاج کے دوران مودی مخالف سخت نعروں نے فضا کشیدہ کردی،مظاہرین نے نریندر مودی کو ’’گجرات کا قصاب‘‘ قرار دے دیا،مظاہرین کا کہنا تھا کہ مودی انسانیت کے جرائم کا ذمہ دار ہے،ہمارے بھائی ہادی نے ایک جنگ لڑی ہے اور انقلاب کلچرل سنٹر قائم کیا، اس انقلاب کلچرل سنٹرنے مودی کے سینے میں آگ لگادی ہے، ہم چاہتے ہیں کہ نریندی مودی اس آگ میں جلے، اب ہم شیخ مجیب کے گھر کو انقلاب کلچرل سنٹر بنادیں گے، شیخ مجیب کے گھرکی ایک اینٹ بھی نہیں بچے گی،

آسٹریلیا کے شہر سڈنی میں 14 دسمبر کو ہونے والے فائرنگ کے افسوسناک واقعے سے متعلق نئی تفصیلات سامنے آ گئی ہیں،

حملے کا مرکزی ملزم ساجد اکرم گزشتہ تقریباً تین دہائیوں کے دوران چھ مرتبہ بھارت کا سفر کر چکا تھا۔ بھارتی میڈیا رپورٹس کے مطابق یہ دورے زیادہ تر خاندانی جائیداد سے متعلق تنازعات کے حل کے لیے کیے گئے تھے۔تلنگانہ پولیس کے مطابق 50 سالہ ساجد اکرم بھارتی پاسپورٹ کا حامل تھا اور اتوار کے روز اپنے بیٹے کے ہمراہ سڈنی کے علاقے بونڈی بیچ پر فائرنگ کے واقعے کے دوران پولیس کارروائی میں ہلاک ہو گیا۔ اس واقعے میں کم از کم 15 افراد جان سے گئے، جبکہ ساجد اکرم کا بیٹا نوید شدید زخمی ہو کر کومے میں چلا گیا تھا۔ پولیس کا کہنا ہے کہ دو روز بعد نوید کو ہوش آ گیا ہے اور اس کا علاج جاری ہے۔

تلنگانہ کے ڈائریکٹر جنرل پولیس بی شیوادھر نے بتایا کہ ساجد اکرم کی پیدائش حیدرآباد میں ہوئی تھی۔ وہ 1998 میں اعلیٰ تعلیم کے حصول کے لیے آسٹریلیا منتقل ہوا اور اس کے بعد وہیں مستقل طور پر مقیم رہا۔ پولیس ریکارڈ کے مطابق ساجد اکرم نے 2000، 2004، 2009، 2012، 2016 اور 2022 میں حیدرآباد کے دورے کیے، جبکہ ایک دورہ 2006 میں اپنے والد کی وفات کے ایک ماہ بعد بھی کیا گیا تھا۔پولیس حکام کا کہنا ہے کہ ساجد اکرم کے خاندانی تعلقات برسوں قبل جائیداد کے تنازعات کے باعث خراب ہو چکے تھے، جس کے نتیجے میں اہلِ خانہ نے اس سے قطع تعلق کر لیا تھا۔ اگرچہ وہ تقریباً تین دہائیوں سے آسٹریلیا میں مقیم تھا، تاہم اس نے اپنا بھارتی پاسپورٹ برقرار رکھا۔ دوسری جانب، آسٹریلیا میں پیدا ہونے والے اس کے بچوں کو وہاں مستقل رہائش حاصل تھی۔

سرکاری ذرائع کے مطابق ساجد اکرم نے آسٹریلیا میں مستقل رہائش حاصل کرنے کے لیے 27 مرتبہ درخواست دی، تاہم اسے کامیابی نہیں مل سکی۔ البتہ اسے ریزیڈنٹ ریٹرن ویزا جاری کیا گیا تھا، جس کے تحت وہ آسٹریلیا میں قیام کر رہا تھا۔تلنگانہ پولیس نے واضح کیا ہے کہ اس واقعے کے حوالے سے آسٹریلوی حکام یا کسی بھی غیر ملکی ایجنسی نے براہِ راست رابطہ نہیں کیا۔ مقامی سطح پر کی جانے والی تحقیقات مرکزی بھارتی ایجنسیوں سے موصول ہونے والی معلومات کی بنیاد پر مکمل کی گئیں۔حکام کے مطابق واقعے کی وجوہات اور پس منظر سے متعلق مزید پہلوؤں کی جانچ جاری ہے، تاہم اب تک کی تحقیقات میں کسی بین الاقوامی نیٹ ورک یا تنظیم سے تعلق کے شواہد سامنے نہیں آئے۔

تائیوان کے دارالحکومت تائی پے میں واقع ایک مصروف سب وے (میٹرو) اسٹیشن پر دھواں چھوڑنے والے بم کے حملے اور بعد ازاں مسافروں پر حملے کے نتیجے میں کم از کم 9 افراد زخمی ہو گئے، جن میں سے چار کی حالت تشویشناک بتائی جا رہی ہے۔

تائیوان کے سرکاری خبر رساں ادارے سینٹرل نیوز ایجنسی کے مطابق حملہ آور نے پہلے سب وے اسٹیشن کے اندر دھواں چھوڑنے والا بم پھینکا، جس سے پورا پلیٹ فارم دھوئیں سے بھر گیا۔ دھوئیں کے باعث مسافروں میں بھگدڑ مچ گئی، اسی دوران مبینہ طور پر حملہ آور نے متعدد مسافروں پر حملہ کیا، جس کے نتیجے میں کئی افراد زخمی ہو گئے۔پانچ افراد کو چاقو کے وار اور جسم کے مختلف حصوں پر کند ضربوں سے چوٹیں آئی ہیں،عینی شاہدین کے مطابق دھماکے جیسی آواز اور دھوئیں کے اچانک پھیلنے سے لوگ شدید خوف کا شکار ہو گئے اور جان بچانے کے لیے مختلف سمتوں میں دوڑنے لگے۔ بعض مسافروں نے اسٹیشن سے باہر نکلنے کے لیے ایمرجنسی راستے استعمال کیے جبکہ سیکیورٹی اہلکاروں اور ریسکیو ٹیموں نے فوری طور پر کارروائی شروع کی۔

واقعے کی اطلاع ملتے ہی پولیس، فائر بریگیڈ اور طبی امدادی ٹیمیں موقع پر پہنچ گئیں۔ زخمیوں کو فوری طور پر قریبی اسپتالوں میں منتقل کیا گیا، جہاں چار افراد کی حالت نازک قرار دی جا رہی ہے۔ حکام کے مطابق زخمیوں میں مرد اور خواتین دونوں شامل ہیں۔

تائیوان کے وزیرِاعظم چو جنگ تائی نے سوشل میڈیا پلیٹ فارم فیس بک پر جاری اپنے بیان میں واقعے کی تصدیق کی، تاہم انہوں نے اس مرحلے پر مزید تفصیلات فراہم نہیں کیں۔ ان کا کہنا تھا کہ متعلقہ ادارے صورتحال پر قابو پانے اور تحقیقات میں مصروف ہیں۔سینٹرل نیوز ایجنسی کے مطابق حملہ آور کے بارے میں شبہ ظاہر کیا جا رہا ہے کہ اس نے حملے کے بعد خودکشی کر لی، تاہم اس حوالے سے بھی سرکاری سطح پر حتمی تصدیق کا انتظار کیا جا رہا ہے۔