Baaghi TV

Author: ممتاز حیدر

  • وزیراعلیٰ پنجاب کا بیواؤں کے قبضہ کیس فوری حل کرنے کا حکم

    وزیراعلیٰ پنجاب کا بیواؤں کے قبضہ کیس فوری حل کرنے کا حکم

    وزیراعلیٰ پنجاب مریم نوازشریف نے بے سہارا بیواؤں کے قبضہ کیس فوری حل کرنے کا حکم دے دیا۔

    وزیراعلیٰ مریم نواز شریف نے آرڈیننس 2025ء کے مکمل نفاذ کی ہدایت دے دی، جائیدادوں پر ناجائز قبضے کے خلاف ہر دن کی مانیٹرنگ ہوگی، وزیراعلیٰ مریم نواز شریف کو روزانہ رپورٹ پیش کی جائے گی،تمام اضلاع کے ڈپٹی کمشنرز روزانہ اجلاس کریں گے، وزیراعلیٰ مریم نواز خود مانیٹرنگ کریں گی۔پنجاب میں ناجائز قبضے کے خلاف فوری حکومتی اقدامات کی اطلاع عوام تک پہنچانے کے لئے مساجد میں اعلانات کئے جائیں گے۔ وزیراعلیٰ پنجاب مریم نواز نے ہر تحصیل میں اسسٹنٹ کمشنر آفس میں بھی قبضے کے بارے میں درخواستیں وصول کرنے کی ہدایت کی، گجرات، لیہ، حافظ آباد اور دیگر اضلاع میں قبضے کے جلد فیصلے نہ ہونے پر ناپسندیدگی کا اظہار کیا ہے۔

    وزیراعلیٰ پنجاب مریم نواز کا کہنا ہے کہ ناجائزقبضہ کیس کے جلد حل سے عوام کو فوری ریلیف دینا چاہتے ہیں، تمام ڈپٹی کمشنر ناجائز قبضہ کیس پر روزانہ اجلاس کریں، خود مانیٹر کروں گی۔

  • انکم ٹیکس کیسز میں نجی بینک کی درخواست منظور،سندھ ہائیکورٹ کا حکم کالعدم قرار

    انکم ٹیکس کیسز میں نجی بینک کی درخواست منظور،سندھ ہائیکورٹ کا حکم کالعدم قرار

    وفاقی آئینی عدالت نے انکم ٹیکس کیسز میں نجی بینک کی درخواست منظور کرتے ہوئے سندھ ہائی کورٹ کا حکم کالعدم قرار دے دیا۔

    انکم ٹیکس کیسز میں سندھ ہائی کورٹ کے آئینی بینچ کے اسٹے آرڈر کے خلاف درخواست پر سماعت جسٹس عامر فاروق کی سربراہی میں 2 رکنی بینچ نے کی،دوران سماعت نجی بینک کے وکیل فیصل صدیقی نے دلائل دیتے ہوئے کہا کہ میرے کیس میں ہائی کورٹ کے آئینی بینچ کے پاس کسی آرڈر کا دائرہ اختیار نہیں تھا، پہلے سپریم کورٹ کے پاس آئینی مقدمات آتے تو کوئی الگ طریقہ کار نہیں تھا،جسٹس عامر فاروق نے وکیل سے استفسار کیا کہ آپ کا کیس آئینی بینچ کے پاس تھا، جب یہ آرڈر پاس ہوا تب 26ویں آئینی ترمیم نافذ العمل تھی، آئینی بینچ ریگولر مقدمات بھی سنتا تھا، جب قانون بنا تو واضح ہوگیا کہ آئینی مقدمات آئینی بینچ میں جائیں گے، دوسرے کیسز ریگولر بینچ میں جانے چاہیے تھے،جسٹس عامر فاروق نے ریمارکس دیتے ہوئے کہا کہ جب ایک الگ نظام بن گیا تو اس کا کوئی نہ کوئی مقصد تو ہوگا، دائرہ اختیار سے باہر فیصلہ غیر قانونی ہوتا ہے۔

  • میرانشاہ میں پاک فوج کے زیرِ انتظام ملک و مشران اور قبائلی عمائدین کا جرگہ

    میرانشاہ میں پاک فوج کے زیرِ انتظام ملک و مشران اور قبائلی عمائدین کا جرگہ

    میرانشاہ میں پاک فوج کے زیرِ انتظام ملک و مشران اور قبائلی عمائدین کے اہم جرگہ کا انعقاد کیا گیا۔ جنرل آفیسر کمانڈنگ (جی او سی) میرانشاہ نے جرگہ میں موجود شرکاء کا خیرمقدم کیا۔

    جنرل آفیسر کمانڈنگ میرانشاہ نے قیام امن کے حوالے سے قبائلی عمائدین کے کردار کو سراہا۔ جرگہ میں شمالی وزیرستان کی سیکیورٹی صورتحال، انسداد دہشتگردی اور فلاحی کاموں پر تفصیلی بات چیت کی گئی۔ اس موقع پر جی او سی کا کہنا تھا کہ عوام، سول انتظامیہ اور پاک فوج کے باہمی تعاون سے ہی دہشتگردی کا مکمل خاتمہ ہوسکتا ہے۔ اس موقع پر قبائلی رہنماؤں نے امن و امان کے حوالے سے اپنی تجاویز پیش کیں۔جرگہ کے دوران قبائلی عمائدین کی ریاستی اداروں کے ساتھ مکمل تعاون کی یقین دہانی کرائی۔ جرگہ کا اختتام قومی یکجہتی اور سلامتی کی دعاؤں کے ساتھ کیا گیا۔

  • ایف سی ہیڈ کوارٹر حملہ،موٹر سائیکل چوری کی نکلی

    ایف سی ہیڈ کوارٹر حملہ،موٹر سائیکل چوری کی نکلی

    ایف سی ہیڈکوارٹرز پر حملے میں استعمال ہونے والی موٹرسائیکل چوری کی نکلی۔

    محکمہ انسداد دہشتگردی کی جانب سے ایف سی ہیڈکوارٹرز پر حملے کی تحقیقات جاری جاری ہیں جس میں پیشرفت سامنے آئی ہے،خیبر پختونخوا پولیس کا بتانا ہے کہ حملہ آوروں کی جانب سے استعمال کیا جانے والا موٹر سائیکل چوری کی تھی، موٹرسائیکل راولپنڈی سے چوری کی گئی جس کی چوری کی ایف آئی ار متعلقہ تھانے میں درج تھی،حملے سے متعلق کئی مشتبہ افراد کو حراست میں لیا گیا ہے جن سے تفتیش کا عمل جاری ہے۔

    واضح رہے کہ 24 نومبر کو پشاور میں ایف سی ہیڈ کوارٹر پر ہونے والے خودکش حملے میں 3 اہلکار شہید اور 10 افراد زخمی ہوئے تھے جب کہ 3 دہشتگرد مارے گئے تھے،

  • چین میں ٹرین حادثہ، ٹریک پر کام کرتے 11 ریلوے ملازمین جاں بحق

    چین میں ٹرین حادثہ، ٹریک پر کام کرتے 11 ریلوے ملازمین جاں بحق

    چینی صوبے یونان میں تیز رفتار آزمائشی ٹرین کے خوفناک حادثے نے ملک بھر کو افسردہ کر دیا، جہاں ٹریک کی مینٹیننس پر کام کرنے والے 11 ریلوے ملازمین ٹرین کی زد میں آکر موقع پر ہی جان کی بازی ہار گئے، جبکہ 2 ورکرز زخمی ہوئے جنہیں اسپتال منتقل کر دیا گیا ہے۔

    میڈیا رپورٹس کے مطابق حادثہ اس وقت پیش آیا جب ایک ہائی اسپیڈ ٹیسٹ ٹرین، جو زلزلہ پیمائی کے آلات کی جانچ کے لیے چلائی جا رہی تھی، ٹریک کے ایک موڑ (Curve) پر پہنچ کر اچانک وہاں موجود ورکروں سے ٹکرا گئی۔ واقعہ اتنا اچانک پیش آیا کہ ورکرز کو خود کو محفوظ کرنے کا موقع تک نہ مل سکا۔حادثے کے فوراً بعد ریسکیو ٹیمیں جائے وقوعہ پر پہنچ گئیں، جہاں زخمیوں کو ابتدائی طبی امداد دینے کے بعد قریبی اسپتال منتقل کیا گیا۔ حکام کے مطابق دونوں زخمیوں کی حالت اس وقت مستحکم بتائی جاتی ہے۔

    چینی ریلوے حکام نے بتایا کہ متاثرہ ریلوے لائن کو عارضی طور پر بند کر کے بحالی کا کام فوری طور پر شروع کیا گیا،تقریباً چند گھنٹوں کے اندر ٹریک کو دوبارہ بحال کر دیا گیا،حادثے کی اعلیٰ سطح کی تحقیقات جاری ہیں تاکہ یہ جانچا جا سکے کہ حفاظتی پروٹوکول میں کہاں کمزوری رہ گئی

    چین میں ریلوے نظام دنیا کا سب سے وسیع اور جدید تصور کیا جاتا ہے، تاہم اتنے بڑے حادثے نے ایک بار پھر ورک پلیس سیفٹی اور ہائی اسپیڈ ٹرین آپریشنز کے سیکیورٹی پروٹوکول پر سوال اٹھا دیے ہیں۔ حکام کا کہنا ہے کہ تحقیقات مکمل ہوتے ہی ذمہ داروں کے خلاف کارروائی کی جائے گی۔

  • بلاول ہاؤس کے قریب سیف سٹی سسٹم کے سافٹ ویئر باکس چوری، ملزم گرفتار

    بلاول ہاؤس کے قریب سیف سٹی سسٹم کے سافٹ ویئر باکس چوری، ملزم گرفتار

    کراچی:بلاول ہاؤس چورنگی کے قریب سیف سٹی پروجیکٹ کے سافٹ ویئر باکس کی چوری میں ملوث مرکزی ملزم کو پولیس نے کارروائی کرتے ہوئے گرفتار کرلیا ہے۔

    پولیس کے مطابق یہ واردات 6 نومبر کو پیش آئی تھی، جس میں سیف سٹی سسٹم کا اہم سافٹ ویئر باکس چوری کیا گیا تھا۔ اس واقعے کے بعد علاقے میں نصب سیف سٹی کیمروں کو بھی اتار لیا گیا تھا، جس سے مانیٹرنگ کا عمل متاثر ہوا تھا۔پولیس حکام کا کہنا ہے کہ واردات میں ملوث مفرور ملزم کو اس کے ایک ساتھی سمیت گرفتار کیا گیا ہے، جب کہ اس کیس میں پہلے ہی تین ملزمان کو گرفتار کیا جاچکا تھا۔ اس طرح چوری میں ملوث مجموعی طور پر چھ افراد میں سے پانچ گرفتار ہوچکے ہیں۔ اس سامان کو خریدنے میں ملوث کباڑی کو بھی حراست میں لیا جاچکا ہے۔

    حکام کے مطابق ڈسٹری بیوشن باکس سیف سٹی کیمرہ نیٹ ورک کا اہم حصہ ہوتا ہے، جو کیمروں کو بجلی اور دیگر تکنیکی سہولیات فراہم کرتا ہے۔ اس باکس میں نصب آلات کی مالیت لاکھوں روپے تک ہوتی ہے، اور اس کی چوری سے نگرانی کے نظام پر نمایاں اثر پڑتا ہے۔

  • امریکا نے افغان شہریوں کی امیگریشن درخواستیں روک دیں

    امریکا نے افغان شہریوں کی امیگریشن درخواستیں روک دیں

    امریکا نے افغان شہریوں کی امیگریشن کی تمام درخواستیں غیر معینہ مدت کے لیے روک دیں۔

    امریکی میڈیا کے مطابق افغان شہری کی جانب سے واشنگٹن میں نیشنل گارڈ کے 2 اہلکاروں کو گولی مارنے کے بعد ٹرمپ انتظامیہ نے افغان شہریوں کی امیگریشن درخواستیں فوری طور پر روک دی ہیں،سوشل میڈیا سائٹ ایکس پر پوسٹ کرتے ہوئے امریکی سیٹیزن شپ اینڈ امیگریشن سروس نے کہا کہ افغان شہریوں کے لیے امیگریشن کی تمام درخواستیں غیر معینہ مدت کے لیے روک دی گئی ہیں، افغان شہریوں کے لیے امیگریشن کی درخواستوں کی سکیورٹی اور جانچ پروٹوکول کا مزید جائزہ لیا جائے گا۔

    واضح رہے کہ 26 نومبر کو امریکی دارالحکومت واشنگٹن میں وائٹ ہاؤس کے قریب نیشنل گارڈ کے 2 اہلکاروں کو گولی مار دی گئی اور اہلکاروں کی حالت اس وقت تشویشناک بتائی جارہی ہے۔

    امریکی حکام کے مطابق ایک مشتبہ شخص کو حراست میں لیا گیا ہے جس کی شناخت 29 سال کے افغان شہری رحمان اللہ لکنوال سے کر لی گئی۔

  • وائٹ ہاؤس کے قریب فائرنگ،2 زخمی،حملہ آور افغان نکلا

    وائٹ ہاؤس کے قریب فائرنگ،2 زخمی،حملہ آور افغان نکلا

    امریکی ریاست واشنگٹن میں وائٹ ہاؤس کے قریب نیشنل گارڈ کے 2 اہلکاروں کو گولی مار دی گئی

    امریکی میڈیا کے مطابق وائٹ ہاؤس کے قریب ایک شخص نے نیشنل گارڈ کے اہلکاروں پر فائرنگ کردی جس کے نتیجے میں وہ شدید زخمی ہوگئے،رپورٹ کے مطابق فائرنگ کے واقعے کے بعد پولیس کی بھاری نفری جائے وقوعہ پہنچ گئی۔ فائرنگ سے زخمی ہونے والے دونوں اہلکاروں کو فوری طور پر اسپتال منتقل کردیا گیا جن کی حالت تشویشناک بتائی جارہی ہے۔پولیس نے بتایا کہ فائرنگ کرنے والے ایک مشتبہ شخص کو حراست میں لے لیا گیا۔ امریکی حکام کے مطابق مشتبہ شخص کی شناخت 29 سال کے افغان شہری رحمان اللہ لکنوال سے کر لی گئی ۔ رحمان اللہ 2021 میں امریکا آیا تھا۔

    امریکی میڈیا کی رپورٹ کے مطابق فائرنگ کے واقعے کے بعد وائٹ ہاؤس کو عارضی طور پر بند کردیا گیا۔ جائے وقوعہ کے اطراف کے علاقے کو بھی گھیرے میں لے لیاگیا، پولیس نے شہریوں کو آئی اسٹریٹ کے قریب جانے سے گریز کی ہدایت کی ہے،امریکی ہوم لینڈ سکیورٹی کی سیکرٹری نے کہا کہ ہم قانون نافذ کرنے والے اداروں کے ساتھ مل کر معلومات اکٹھی کر رہے ہیں۔

    امریکی صدر ڈونلڈ ٹرمپ نے واقعے کو دہشت گردی قرار دے دیا،انہوں نے خطاب کے دوران بائیڈن دور میں افغانستان سے امریکا میں داخل ہونے والے ہر غیر ملکی کی دوبارہ جانچ پڑتال کا حکم بھی دیدیا۔امریکی صدر نے واقعے سے متعلق سوشل میڈیا پر بھی بیان جاری کیا، انہوں نے پیغام میں فائرنگ کرنے والے شخص کو جانور قرار دیتے ہوئے خبردار کیا کہ نیشنل گارڈ کے اہلکاروں پر فائرنگ کرنے والے کو بھاری قیمت چکانی ہوگی۔

    زخمی دونوں اہلکاروں کا تعلق ریاست ویسٹ ورجینیا سے تھا، ویسٹ ورجینیا کےگورنر نےکہا کہ وہ وفاقی حکام کے ساتھ مسلسل رابطے میں ہیں اور تحقیقات کی جاری ہیں۔دوسری جانب فائرنگ کے واقعے کے بعد واشنگٹن کے رونالڈ ریگن ائیرپورٹ پر پر وازوں کو سکیورٹی کی وجہ سے گراؤنڈ کیا گیا تاہم کچھ دیر کی بندش کے بعد ائیرپورٹ پر معمول کی کارروائیاں دوبارہ شروع کردی گئیں۔

  • بھارتی میڈیا پر عمران خان کی موت کی جھوٹی خبریں،مبشر لقمان برس پڑے

    بھارتی میڈیا پر عمران خان کی موت کی جھوٹی خبریں،مبشر لقمان برس پڑے

    سینئر صحافی و اینکر پرسن مبشر لقمان نےبھارتی میڈیا کے جھوٹ کو ایک بار پھر بے نقاب کر دیا

    ایکس پر مبشر لقمان نے ایک پوسٹ میں بھارتی میڈیا کی جانب سے سابق وزیراعظم عمران خان کی موت سے متعلق پھیلائی جانے والی افواہوں کو سختی سے مسترد کیا اور اسے بھارت کی روایتی جھوٹی مہم قرار دیا،مبشر لقمان کا کہنا تھا کہ بھارت میں بیٹھ کر چند عناصر عمران خان کی صحت اور زندگی کے بارے میں بے بنیاد کہانیاں گھڑ رہے ہیں۔عمران خان کی موت سے متعلق جعلی خبریں ہمیشہ کی طرح بھارت کی گھڑی ہوئی سازش ہے۔ بھارتی میڈیا پاکستان کے خلاف محض پروپیگنڈہ پھیلانے کا مشن بنا چکا ہے،ایسے عناصر پاکستان کے سیاسی حالات پر جھوٹا تاثر قائم کرنے کی کوشش کرتے ہیں، جب کہ حقائق سے ان کا کوئی تعلق نہیں۔عام ہندوستانی جو گائے کا پیشاب پیتے ہیں اور اپنے دماغ کو گائے کے گوبر سے ملاتے ہیں وہ صرف سازشی تھیوری بنا سکتے ہیں

    پاکستان کے سیاسی منظرنامے، فوجی معاملات اور حساس واقعات سے متعلق بھارتی میڈیا کا تاریخی کردار شدید متنازع رہا ہے۔ بھارتی میڈیا کی ایک بڑی تعداد پاکستان کے خلاف بغیر تصدیق کے خبریں جاری کرتی ہے،اپنے بیانیے کے مطابق جھوٹی کہانیاں گھڑتی ہے،بریکنگ نیوز کی دوڑ میں صحافتی اصولوں کی خلاف ورزی کرتی ہے،پاکستان کے اندرونی معاملات کو مسخ شدہ زاویے سے پیش کرتی ہے،

    این ڈی ٹی وی سمیت بھارتی میڈیا کے کچھ حلقے دعویٰ کر رہے تھے کہ عمران خان جیل میں انتقال کر گئے ہیں۔یہ افواہیں بغیر کسی ثبوت،بغیر کسی سرکاری تصدیق،اور بغیر کسی آزاد ذرائع کےتیزی سے بھارت میں پھیلائی گئیں، جس کا مقصد پاکستان میں سیاسی بے چینی کو بڑھانا تھا۔حالانکہ عمران خان اڈیالہ جیل میں قید ہیں اور سزاکاٹ رہے ہیں.

  • یاسین ملک کیخلاف مقدمات ، پرانے گواہ بدلتے ہوئے بیانات کے ساتھ پیش

    یاسین ملک کیخلاف مقدمات ، پرانے گواہ بدلتے ہوئے بیانات کے ساتھ پیش

    جموں کشمیر لبریشن فرنٹ نے غیرقانونی طور پر نظربند اپنے چیئرمین محمد یاسین ملک اور ان کے ساتھیوں کے خلاف جموں کی ٹاڈا عدالت میں 35 سال پرانے مقدمات کی حالیہ عدالتی سماعت کے دوران پرانے گواہوں کو بدلتے ہوئے بیانات کے ساتھ غیر منصفانہ طریقے سے دوبارہ عدالت کے سامنے پیش کرنے کی شدید مذمت کی ہے۔

    کشمیر میڈیا سروس کے مطابق جموں کشمیر لبریشن فرنٹ کے ترجمان محمد رفیق ڈار کا کہنا ہے کہ عدالتی سماعت کے دوران مودی حکومت نے سی بی آئی کے ذریعے ایک بار پھر ایک پرانے گواہ کو سامنے لایا جس نے 1990ء میں اسی عدالت میں بیان دیا تھا کہ وہ کسی بھی ملزم کو پہچاننے سے قاصر ہے۔ رفیق ڈار نے کہا کہ یہ ستم ظریفی ہے اور اسے بھارت کے عدالتی نظام پر ایک بڑا سوالیہ نشان کھڑا ہوتا ہے کہ 35 سال کے بعد حکومت اور ایجنسیوں کے دبائو میں لا کر کس طرح پرانے گواہان سے اپنا بیان تبدیل کرنے اور یاسین ملک اور ان کے ساتھیوں کی شناخت کرنے کا دعویٰ کیا جاتا ہے۔انہوں نے کہا کہ یہ بھارت کی موجودہ انتہاپسند حکومت کی جانب سے جموں کشمیر کے مقبول ترین آزادی پسند سیاسی رہنماؤں کے خلاف انسانی حقوق کی کھلی خلاف ورزی ہے جنہیں حکومت اور اس کی ایجنسیاں جعلی ، من گھڑت اور سیاسی انتقام پر مبنی مقدمات کے تحت جیلوں میں ڈال رہی ہیں۔ رفیق ڈار نے مقبوضہ جموں کشمیر میں بھارتی فورسز کی طرف سے گرفتاریوں اور عام لوگوں کو ہراساں کرنے کا نیا سلسلہ شروع کرنے کی مذمت کی ہے۔ اُنہوں نے کہا کہ قابض بھارتی حکام نے عام لوگوں کے خلاف اپنی ظالمانہ کارروائیوں کے ذریعے علاقے میں خوف و دہشت کا ماحول قائم کر رکھا ہے۔ اُنہوں نے عالمی برادری بالخصوص انسانی حقوق کی عالمی تنظیموں سے اپیل کی کہ وہ مداخلت کریں اور بھارت کو مقبوضہ جموں کشمیر میں انسانی حقوق کی سنگین خلاف ورزیاں بند کرنے پر مجبور کریں۔