Author: ممتاز حیدر

سینیٹر فیصل واوڈا نے کہا ہے کہ مولانافضل الرحمان سے عزت و احترام کا رشتہ ہے، کراچی میں میرے گھر آئے تھے،میں بھی آتا رہتاہوں۔

جمیعت علماء اسلام کے سربراہ مولانا فضل الرحمان سے ملاقات کے بعد میڈیا سے گفتگو کرتے ہوئے فیصل واوڈا کا کہنا تھا کہ27ویں ترمیم کو مولانا فضل الرحمان پہلے دیکھیں گے، مولانافضل الرحمان سے نمبرز کی بات نہیں ہوتی، نمبرز زیادہ ہی ہیں، نمبر کا مسئلہ نہیں،مولانافضل الرحمان کا ہونا ضروری ہے، ان کا اہم کردار ہےاور رہے گا، ریاست کی رٹ کوچیلنج پر ری ایکٹ کرنا پڑتا ہے، سہیل آفریدی آئے ہیں، 27ویں ترمیم کو آسانی سے منظورہوتے دیکھ رہا ہوں، پی ٹی آئی کو اچھی سیاست کرنی ہے تو اعتماد میں لینا چاہیے، اگر روایتی سیاست کرنی ہےتو موسم اچھا ہے،چھلنی اور پکوڑے کھائیں، پیپلزپارٹی جمہوری پارٹی،بلاول بھٹوجمہوریت پسند ہیں، پیپلزپارٹی نظام کی ضامن جماعت ہے۔27ویں ترمیم میں 18ویں ترمیم کا کوئی عمل دخل نہیں ہے۔

فیصل واوڈا کا مزید کہنا تھا کہ مولانا فضل الرحمان اگر ترمیم کے وقت آجاتے ہیں تو اچھی بات ہے، میں حکومت کا کام نہیں کر رہا، اپنا کام کرنے آیا ہوں، 27 ویں آئینی ترمیم سے متعلق جہاز نے اڑان بھرلی ہے، آصف زرداری سیاست کے بڑے کھلاڑی ہیں، باپ بیٹے کا زبردست کمبینیشن ہے،آپ ستائیسویں ترمیم کے لیے بے قرار کھڑے ہیں، وہ تو اٹھائیسویں کی تیاری کر رہے ہیں، ستائیس ویں آئینی ترمیم منظور ہوتی نظر آرہی ہے، اٹھارہویں ترمیم کو ختم نہیں کیا جا رہا ،سیاستدان سیاست کر سکتا ہے تو جج، پولیس والا کیوں نہیں کام کر سکتا، اٹھارویں ترمیم کو ختم نہیں کیا جا رہا، ایک دوسرے سے مشاورت کے ساتھ ترمیم پر نظرثانی ہوجاتی ہے، 243 میں صرف زمینی جنگ نہیں، سائبر گلوبل اکنامک جنگ بھی شامل ہے،پی ٹی آئی کو 27 ویں آئینی ترمیم پر اعتماد میں لینا چاہیے، پی ٹی آئی اگر اچھی سیاست کرتی ہے تو بالکل اعتماد میں لینا چاہیے، افواجِ پاکستان کو مضبوط کریں گے تو پاکستان کا دفاع مضبوط ہوگا،پی ٹی آئی نے اچھی سیاست کرنی ہے تو ترمیم پر بات کریں، اگر پی ٹی آئی نے منفی سیاست کی تو پھر چھلیاں کھائیں، ٹی ایل پی پر ایک مسئلے کی وجہ سے پابندی عائد ہوئی ہے، پولیس کے سامنے کچھ ہوگا تو ری ایکشن پر پھینٹا بھی لگے گا۔

وفاقی وزیر اطلاعات عطاء اللہ تارڑ سے پی ایف یو جے, آر آئی یو جے اور پریس کلب کے وفد کی ملاقات ہوئی ہے

وفد میں پی ایف یو جے کے صدر افضل بٹ، سیکریٹری نیشنل پریس کلب نیئر علی، آر آئی یو جے کے سیکریٹری آصف بشیر چودھری، صحافی رہنماء مظہر عباس اور شہزادہ ذوالفقار شامل تھے،ملاقات میں جرنلسٹس پروٹیکشن کمیشن کے قیام سمیت صحافیوں کی غیر قانونی برطوفیوں سمیت دیگر مسائل پر تبادلہ خیال کیا گیا، وفاقی وزیر اطلاعات عطا تارڑ کا کہنا تھا کہ جرنلسٹس پروٹیکشن کمیشن کے قیام کا عمل آخری مراحل میں ہے،صحافیوں کے حقوق کا تحفظ یقینی بنایا جائے گا، وفاقی وزیر اطلاعات نے میڈیا ہائوسز سے صحافیوں کی برطرفی پر تشویش کا اظہار کیا،اور کہا کہ میڈیا مالکان کے ساتھ اس ایجنڈے کو باقاعدہ طور پر اٹھایا جائے گا، حکومت نے میڈیا ہائوسز کو تاریخی واجبات ادا کئے ہیں اس کے باوجود ملازمین کی برطرفیاں قابل تشویش ہیں،صحافیوں کے لئے ہیلتھ انشورنس کے نظام کو مزید موثر اور وسیع کیا جائے گا، حکومت آزادی صحافت اور صحافیوں کے معاشی تحفظ کے لئے عملی اقدامات جاری رکھے گی،نیشنل پریس کلب پر حملے کے حوالے سے چارٹر آف ڈیمانڈ پر عملدرآمد کروائیں گے،صحافی برادری کے مسائل حل کرنا حکومت کی اولین ترجی ہے، وفد نے مسائل کے حل کی یقین دہانی پر وفاقی وزیر اطلاعات کا شکریہ ادا کیا،ملاقات میں ایڈیشنل سیکرٹری وزارت اطلاعات اشفاق خلیل، اور پرنسپل انفارمیشن افیسر مبشر حسن بھی موجود تھے

پارلیمنٹ سے 27 ویں آئینی ترمیم کی منظوری کے معاملے پر وزیراعظم شہباز شریف نے اتفاق رائے کے لیے اسپیکر قومی اسمبلی ایاز صادق کو اہم ٹاسک دے دیا۔

ذرائع کے مطابق اسپیکر قومی اسمبلی نے آج تمام پارلیمانی رہنماؤں کا اجلاس بلا لیا۔ اجلاس شام 4 بجے اسپیکر لاؤنج پارلیمنٹ ہاؤس میں شروع ہوا،ذرائع کا کہنا ہے کہ اجلاس میں پی ٹی آئی اور جے یو آئی ایف ، اتحادی جماعتوں کے چیف وہپس اورپارلیمانی لیڈرز کو بھی شرکت کی دعوت دی گئی،ذرائع کے مطابق اجلاس میں آئینی ترمیم کی منظوری سے متعلق حکمت عملی طے ہوگی، شرکاء کو آئینی ترمیم کے خدوخال سے آگاہ کیا جائے گا،ذرائع کا کہنا ہے کہ اسپیکر پارلیمانی رہنماؤں سے چیمبر میں الگ الگ بھی ملیں گے، اتفاق رائے نہ ہوا تو حکومت اپنی نمبرز گیم پر انحصار کرے گی۔

خیال رہے کہ وفاقی حکومت نے 27 ویں آئینی ترمیم کی تیاری شروع کردی ہے، 27 ویں آئینی ترمیم میں آرٹیکل 243 میں ترمیم ہوگی جس کا مقصد آرمی چیف کو دیے گئے فیلڈ مارشل کے عہدے کو آئین میں شامل کرنا اور اسے تسلیم کرنا ہے،مجوزہ ترمیم میں آئینی عدالتوں کا معاملہ بھی شامل ہے، ايگزيکٹو کی مجسٹریل پاور کی ڈسٹرکٹ لیول پر ترسیل بھی مجوزہ ترمیم میں شامل ہوگی، اس کے ساتھ پورے ملک میں ایک ہی نصاب کا ہونا بھی ستائيسویں ترمیم کی تیاری میں زیر غور آنے کا امکان ہے۔ذرائع کا مزید بتانا ہے کہ 27 ویں آئینی ترمیم کا بل آئندہ ہفتے منظور کیا جائےگا۔

پی ٹی آئی کے سابق سیکرٹری اطلاعات احمد جواد کو گرفتار کر لیا گیا ہے۔
این سی سی آئی اے نے پی ٹی آئی کے سابق سیکریٹری اطلاعات احمد جواد کو اسلام آباد کے سیکٹر G-13 سے پیکا قانون کے تحت گرفتار کیا۔ذرائع کے مطابق، احمد جواد کو نیشنل سائبر کرائم انویسٹی گیشن ایجنسی نے گرفتار کیا۔ واضح رہے کہ احمد جواد پر پاک بھارت جنگ کے دوران منفی پروپیگنڈا کرنے کا الزام ہے۔احمد جواد کو مزید تفتیش کے لیے متعلقہ ادارے کے حوالے کر دیا گیا ہے۔ یاد رہے کہ وہ ماضی میں پاکستان مسلم لیگ (ن) سے بھی وابستہ رہ چکے ہیں۔