Author: ممتاز حیدر

الیکشن کمیشن بلوچستان نے بلدیاتی انتخابات کا شیڈول جاری کردیا، کوئٹہ میں بلدیاتی انتخابات 28 دسمبر کو ہوں گے۔

الیکشن کمیشن نے بلوچستان میں بلدیاتی انتخابات کا شیڈول جاری کردیا، ای سی پی کے مطابق کوئٹہ میں بلدیاتی انتخابات 28 دسمبر 2025ء کو ہوں گے۔شیڈول کے مطابق 13 نومبر سے 17 نومبر تک کاغذات نامزدگی جمع ہوں گے، نامزد امیدواروں کی فہرست 18 نومبر کو جاری کی جائے گی، کاغذاتِ نامزدگی کی جانچ پڑتال 19 سے 24 نومبر تک ہوگی۔الیکشن کمیشن کے مطابق اپیلیں دائر کرنے کی آخری تاریخ 28 نومبر مقرر کی گئی ہے، اپیلوں پر فیصلے 3 دسمبر تک کیے جائیں گے، امیدواروں کی حتمی فہرست 4 دسمبر کو شائع ہوگی۔ای سی پی کا کہنا ہے کہ امیدواروں کی واپسی اور نشانات کی الاٹمنٹ 5 اور 6 دسمبر کو ہوگی، کوئٹہ میں پولنگ 28 دسمبر بروز اتوار کو ہوگی۔

انسداد دہشتگردی عدالت نے علیمہ خان کے ساتویں مرتبہ ناقابل ضمانت وارنٹ جاری کردیے۔

راولپنڈی کی انسداد دہشتگردی عدالت نے علیمہ خان سمیت 11 ملزمان کے خلاف 26 نومبر احتجاج کیس کی سماعت کی جہاں علیمہ خان اور ان کے وکلا آج بھی پیش نہیں ہوئے،علیمہ خان کی عدم حاضری پر عدالت نے ان کے ساتویں مرتبہ ناقابل ضمانت وارنٹ جاری کردیے جب کہ علیمہ خان کے بینک اکاؤنٹ منجمدکرنے سے متعلق رپورٹ بھی عدالت میں پیش کی گئی، رپورٹ کے مطابق متعلقہ بینکوں میں علیمہ خان کے نام سے نمل یونیورسٹی سمیت فلاحی اداروں کے اکاؤنٹس ہیں اور جن بینکوں نے رپورٹ جمع نہیں کرائی عدالت نے ان کو نوٹس جاری کردیا ہے،بعد ازاں عدالت نے ساتویں مرتبہ علیمہ خان کے وارنٹ گرفتاری جاری کردیے اور مقدمے کی سماعت 6 نومبر تک ملتوی کردی،علیمہ خان سمیت 11 ملزمان کے خلاف کے خلاف تھانہ صادق آباد میں مقدمہ درج ہے۔

اسلام آباد ہائی کورٹ میں زیرِ سماعت آڈیو لیک کیس میں اہم پیشرفت سامنے آئی ہے

آڈیو لیک کیس کو جسٹس بابر ستار کی عدالت سے منتقل کر کے جسٹس اعظم خان کی عدالت میں مقرر کر دیا گیا ہے، مقدمے کی یہ منتقلی جسٹس بابر ستار کا سنگل بنچ ختم ہونے کے باعث عمل میں آئی ہے،کیس میں سابق چیف جسٹس ثاقب نثار کے بیٹے نجم ثاقب اور سابق خاتونِ اول بشریٰ بی بی کی آڈیو لیکس کے خلاف دائر درخواستوں پر سماعت کل 4 نومبر کو جسٹس اعظم خان کریں گے، یاد رہے کہ سپریم کورٹ نے اس آڈیو لیک کیس کے خلاف حکمِ امتناع جاری کرتے ہوئے اسلام آباد ہائیکورٹ کو مزید کارروائی سے روک دیا تھا، یہ درخواستیں بشریٰ بی بی اور نجم ثاقب کی جانب سے دائر کی گئی تھیں۔

تحریک انصاف کے سابق رہنما رکن قومی اسمبلی شیر افضل مروت کا کہنا ہے کہ انہیں متعدد بار خواتین کی جانب سے جنسی ہراسگی کا سامنا کرنا پڑا۔

شیر افضل مروت کا کہنا تھا کہ انہیں بار بار پھول بھیجے گئے، ویڈیو کالز کی گئیں اور اکیلے ملاقات کی دعوت دی گئی، ایک خاتون لندن سے اسلام آباد آئی جو شادی شدہ اور 3 بچوں کی ماں ہے۔ وہ اُن کے دفتر پہنچی اور اس سے اکیلے ملنے کی ضد کی،خاتون پہلے سے نصب کیمرہ لے کر آئیں اور ان کے پاس شراب بھی تھی۔ صورتحال سنگین ہوئی تو مجھے سکیورٹی کو بلانا پڑا۔

جب میزبان نے شیر افضل مروت سے پوچھا کہ جن خواتین نے آپ کو ہراساں کیا ان کا تعلق پاکستان تحریک انصاف سے ہے،جس پر شیر افضل مروت نے واضح جواب دینے کے بجائے کہا کہ کسی کے چہرے پر یہ نہیں لکھا کہ ان کا تعلق پی ٹی آئی سے ہے،رکن قومی اسمبلی نے مزید بتایا کہ اُن کو بھی ہنی ٹریپ کا نشانہ بنایا گیا اس دوران ان کے دفتر، گھر اور ہوٹل کے کمروں سے خفیہ کیمرے برآمد کیے گئے۔