Author: ممتاز حیدر

یکم نومبر 1984، بھارت کی تاریخ کا وہ سیاہ باب ہے جب اندرا گاندھی کے قتل کے بعد پورے ہندوستان میں سکھوں کے خلاف ظلم و بربریت کا سلسلہ شروع ہوا۔ 31 اکتوبر 1984 کو اندرا گاندھی کے قتل کے فوراً بعد دہلی سمیت مختلف شہروں میں انتہاء پسند ہندو گروہوں نے منظم انداز میں سکھ برادری کو نشانہ بنایا۔

ان ہولناک واقعات کے دوران ہزاروں سکھوں کو بے دردی سے قتل کیا گیا جبکہ سینکڑوں خواتین کی عصمت دری کی گئی۔ عالمی میڈیا اور انسانی حقوق کی تنظیموں نے اس قتلِ عام کو بھارت کی تاریخ کا شرمناک واقعہ قرار دیا۔عالمی جریدے ڈپلومیٹ کے مطابق، انتہاء پسند ہندوؤں نے ووٹنگ لسٹوں کے ذریعے سکھوں کے نام اور پتے معلوم کیے اور رات کی تاریکی میں ان کے گھروں کی نشاندہی کی۔ اگلے دن منظم حملوں میں سکھ مکینوں کو نہ صرف قتل کیا گیا بلکہ ان کے گھروں کو بھی آگ لگا دی گئی،شواہد سے ثابت ہوا کہ یہ تمام کارروائیاں بھارتی حکومت کی خاموش حمایت اور سرپرستی میں کی گئیں۔ ہیومن رائٹس واچ کے مطابق سکھوں کے خلاف باضابطہ طور پر نسل کشی کی مہم چلائی گئی جو تین دن تک بلا روک ٹوک جاری رہی۔یہ ظلم و بربریت محض 1984 تک محدود نہیں رہی۔ بھارت میں اس سے قبل 1969 میں گجرات، 1984 میں امرتسر، اور 2000 میں چٹی سنگھ پورہ میں بھی سکھوں کے خلاف فسادات کیے گئے۔

2019 میں کسانوں کے احتجاج کے دوران نریندر مودی حکومت نے ہزاروں سکھ مظاہرین کو گرفتار کیا۔ بیرونِ ملک مقیم سکھ رہنماؤں کو بھی بھارتی ایجنسیوں کی ٹارگٹ کلنگ کا نشانہ بنایا جاتا رہا ہے۔18 جون 2023 کو سکھ رہنماء ہردیپ سنگھ نجر کو کینیڈا میں قتل کر دیا گیا، جس کے بارے میں کینیڈا کے سابق وزیراعظم جسٹن ٹروڈو نے بھارتی حکومت کے ملوث ہونے کی تصدیق کی،ان حقائق سے واضح ہوتا ہے کہ سکھوں کے خلاف بھارتی ریاستی مظالم صرف بھارت کے اندر نہیں بلکہ عالمی سطح پر بھی جاری ہیں، جس سے بھارت کا چہرہ ایک بار پھر اقلیت دشمن ملک کے طور پر دنیا کے سامنے بے نقاب ہوا ہے۔

اسرائیلی فوج کی اعلیٰ قانونی افسر (چیف ایڈووکیٹ جنرل) میجر جنرل یفات ٹومر یروشلمی نے جمعہ کے روز اپنے عہدے سے استعفیٰ دے دیا ہے۔ ان کا استعفیٰ اس مجرمانہ تحقیقات کے بعد سامنے آیا ہے جو اس ویڈیو کے لیک ہونے پر کی جا رہی تھی جس میں اسرائیلی فوجی ایک فلسطینی قیدی کو مبینہ طور پر تشدد کا نشانہ بناتے دکھائی دیتے ہیں۔

میجر جنرل یفات ٹومر یروشلمی نے اپنے استعفے میں لکھا کہ انہوں نے اگست 2024 میں اس ویڈیو کے افشا ہونے کی منظوری دی تھی، جس کے باعث اب وہ مزید اس عہدے پر کام نہیں کر سکتیں۔ویڈیو کے منظرِ عام پر آنے کے بعد اسرائیلی فوج نے پانچ فوجیوں کے خلاف مجرمانہ کارروائی شروع کی، جس کے بعد ملک میں ایک بڑی ہلچل پیدا ہو گئی۔ دائیں بازو کے سیاستدانوں اور قوم پرست گروہوں نے اس کارروائی کی مخالفت کرتے ہوئے احتجاج کیا۔ کچھ مظاہرین نے اس واقعے کے بعد دو فوجی اڈوں پر دھاوا بھی بولا جب تحقیقاتی ٹیم نے فوجیوں کو تفتیش کے لیے طلب کیا۔

لیک ہونے والی ویڈیو اسرائیل کے صدی تیمن (Sde Teiman) حراستی مرکز کی ہے جہاں ان فلسطینیوں کو رکھا گیا ہے جو یا تو 7 اکتوبر 2023 کے حماس حملے میں ملوث تھے یا بعد ازاں غزہ کی لڑائی میں گرفتار کیے گئے۔ویڈیو میں دیکھا جا سکتا ہے کہ چند فوجی ایک فلسطینی قیدی کو ایک طرف لے جا کر اس کے گرد جمع ہو جاتے ہیں، ایک فوجی کتے کو قیدی پر چھوڑا جاتا ہے جبکہ باقی اپنی ڈھالوں سے منظر چھپانے کی کوشش کرتے ہیں۔

اسرائیلی وزیرِ دفاع اسرائیل کاتز نے رواں ہفتے بتایا کہ ویڈیو کے لیک ہونے پر جاری مجرمانہ تحقیقات کے دوران میجر جنرل یروشلمی کو جبری رخصت پر بھیج دیا گیا تھا۔یروشلمی نے اپنے دفاع میں کہا کہ انہوں نے یہ اقدام اس لیے اٹھایا تاکہ فوج کے قانونی شعبے کو ’’جھوٹے پروپیگنڈے‘‘ سے بچایا جا سکے، کیونکہ جنگ کے دوران فوج کے قانونی ادارے کو جان بوجھ کر بدنام کیا جا رہا تھا۔انہوں نے اپنے استعفے میں لکھا "صدی تیمن کے قیدی یقیناً بدترین دہشت گرد ہیں، مگر اس حقیقت سے یہ ذمہ داری ختم نہیں ہوتی کہ کسی بھی قیدی کے ساتھ غیر انسانی سلوک نہیں کیا جا سکتا۔ افسوس کے ساتھ کہنا پڑتا ہے کہ اب یہ بنیادی اصول سب کو قائل نہیں کرتا۔”

وزیرِ دفاع کاتز نے ان پر تنقید کرتے ہوئے کہا کہ "جو کوئی اسرائیلی فوجیوں کے خلاف جھوٹے الزامات لگاتا ہے وہ اسرائیلی فوج کی وردی پہننے کا اہل نہیں۔”دوسری جانب اسرائیلی پولیس کے وزیر ایتمار بن گویر نے ان کے استعفے کو خوش آئند قرار دیا اور فوجی قانونی افسران کے خلاف مزید تحقیقات کا مطالبہ کیا۔بن گویر نے اپنی ایک ویڈیو بھی شیئر کی جس میں وہ فلسطینی قیدیوں کے اوپر کھڑے نظر آ رہے تھے، جو بندھے ہوئے حالت میں فرش پر لیٹے تھے۔ انہوں نے کہا کہ "یہ وہ حملہ آور ہیں جو 7 اکتوبر کے قاتلانہ حملوں میں شامل تھے، اور انہیں سزائے موت ملنی چاہیے۔”

غزہ جنگ بندی کے تحت رواں ماہ تقریباً 1,700 فلسطینی قیدی رہا کیے گئے، بدلے میں 20 اسرائیلی یرغمالیوں کو آزاد کیا گیا۔ کچھ رہائی پانے والے اسرائیلی قیدیوں نے دعویٰ کیا کہ حماس کے جنگجوؤں نے ان پر بن گویر کے بیانات کے بدلے تشدد کیا۔بن گویر نے ان الزامات کو مسترد کرتے ہوئے کہا کہ "یہ سب حماس کے مفاد میں پھیلائی گئی کہانیاں ہیں۔”

بین الاقوامی انسانی حقوق کی تنظیموں نے صدی تیمن کیمپ اور دیگر اسرائیلی حراستی مراکز میں فلسطینی قیدیوں پر بدترین تشدد، بھوک اور غیر انسانی رویے کی رپورٹس جاری کی ہیں۔اسرائیلی فوج کا کہنا ہے کہ ایسے واقعات کی "درجنوں تحقیقات” جاری ہیں، تاہم وہ اسے "نظامی مسئلہ” تسلیم کرنے سے انکار کرتی ہے۔

عالمی مالیاتی دنیا میں بھارتی نژاد بزنس مین کی جانب سے فراڈ کہانی سامنے آئی ہے، بھارتی نژاد ٹیلی کام ایگزیکٹو بانکم برہم بھت پر الزام ہے کہ اس نے بلیک راک کی پرائیویٹ کریڈٹ یونٹ اور کئی بڑے مالیاتی اداروں کو 500 ملین ڈالر (آدھا ارب ڈالر) کے قرض فراڈ میں الجھا دیا۔

یہ انکشاف امریکی جریدے وال اسٹریٹ جرنل کی خصوصی رپورٹ میں ہوا ہے، جس کے مطابق بلیک راک کی ذیلی کمپنی HPS انویسٹمنٹ پارٹنرز سمیت متعدد قرض دہندگان نے الزام عائد کیا ہے کہ برہم بھت نے اپنی کمپنیوں براڈ بینڈ ٹیلی کام (Broadband Telecom) اور بریج وائس (Bridgevoice) کے ذریعے جعلی انوائسز اور جھوٹے اکاؤنٹس بنا کر بینکوں سے بھاری قرضے حاصل کیے، اور پھر رقوم کو بھارت اور ماریشس کے آف شور اکاؤنٹس میں منتقل کر دیا۔رپورٹ کے مطابق برہم بھت کی کمپنیوں پر قرض دہندگان کا واجب الادا قرضہ 500 ملین ڈالر سے تجاوز کر چکا ہے۔مقدمے میں کہا گیا ہے کہ یہ فراڈ نہایت منظم انداز میں کیا گیا، جہاں کمپنیوں کے مالی گوشوارے محض کاغذی خوشحالی کا دھوکہ تھے۔

فرانسیسی بینک BNP Paribas نے بھی HPS کے ذریعے دئیے گئے قرضوں کی فنانسنگ میں کردار ادا کیا تھا، تاہم بینک نے اس معاملے پر کوئی تبصرہ کرنے سے انکار کر دیا۔یہ اسکینڈل ایسے وقت میں سامنے آیا ہے جب بلیک راک نے رواں سال HPS انویسٹمنٹ پارٹنرز کو خرید کر پرائیویٹ کریڈٹ مارکیٹ میں اپنی توسیع شروع کی تھی۔ HPS نے ستمبر 2020 سے برہم بھت سے وابستہ کمپنیوں کو قرض دینا شروع کیا، جو بعد میں بڑھ کر 385 ملین ڈالر سے 430 ملین ڈالر (2021–2024) تک پہنچ گیا۔ذرائع کے مطابق BNP Paribas نے برہم بھت کے نیٹ ورک کی کمپنیوں، بالخصوص Carriox Capital اور اس کی ذیلی اداروں، کو دیے گئے قرضوں کا تقریباً آدھا حصہ فنانس کیا۔

وال اسٹریٹ جرنل کے مطابق جولائی 2025 میں HPS کے ایک ملازم نے کمپنی کے کلائنٹس کے ای میل ایڈریسز میں مشکوک مماثلت دیکھی۔تحقیق سے پتا چلا کہ یہ ای میلز جعلی ڈومینز سے بنائی گئی تھیں، جو اصلی ٹیلی کام کمپنیوں سے مشابہ دکھائی دیتی تھیں۔مزید جانچ پر یہ بھی سامنے آیا کہ کئی ای میلز اور دستاویزات مکمل طور پر جعلی تھیں۔جب HPS کے حکام نے بانکم برہم بھت سے رابطہ کیا تو اس نے پہلے تشویش کو نظرانداز کیا اور پھر فون کالز کا جواب دینا بند کر دیا۔ایک HPS اہلکار نے جب گارڈن سٹی (نیو یارک) میں کمپنی کے دفاتر کا دورہ کیا تو دفاتر بند اور سنسان پائے گئے۔قریب کے کرایہ داروں نے بھی تصدیق کی کہ کئی ہفتوں سے کوئی ملازم دفتر میں داخل نہیں ہوا۔

برہم بھت کی رہائش گاہ پر دو BMW، ایک Porsche، ایک Tesla اور ایک Audi کھڑی دیکھی گئیں، جبکہ دروازے کے باہر ایک بند پیکج گرد سے اٹا ہوا پایا گیا۔فراڈ کے انکشاف کے بعد HPS نے امریکی لا فرم Quinn Emanuel اور اکاؤنٹنگ فرم CBIZ کی خدمات حاصل کیں۔تحقیقات سے معلوم ہوا کہ گزشتہ دو سالوں میں جمع کیے گئے تمام کسٹمر ای میلز جعلی تھے، اور کئی کانٹریکٹس 2018 سے جعلی دستاویزات پر مبنی تھے۔ایک نمایاں مثال بیلجیئم کی ٹیلی کام کمپنی BICS کی تھی، جس نے جولائی میں باقاعدہ تحریری طور پر تصدیق کی کہ ہمیں برہم بھت کی کمپنی کی جانب سے موصولہ ای میلز سے کوئی تعلق نہیں، یہ ایک واضح فراڈ کی کوشش تھی۔

مقدمے کے مطابق برہم بھت نے ایک ایسا مالیاتی تاثر پیدا کیا جس میں تمام اثاثے محض کاغذی تھے، حقیقت میں ان کا کوئی وجود نہیں تھا۔،مزید الزامات کے مطابق اس نے ان جعلی اثاثوں کے نام پر حاصل کی گئی رقم بھارت اور ماریشس کے بینک اکاؤنٹس میں منتقل کر دی۔

یہ اسکینڈل عالمی مالیاتی مارکیٹ میں ایک بڑا دھچکا سمجھا جا رہا ہے، خاص طور پر اس وقت جب بلیک راک جیسی بڑی کمپنی پرائیویٹ کریڈٹ مارکیٹ میں اپنے اثر و رسوخ کو بڑھا رہی تھی۔مالیاتی ماہرین کا کہنا ہے کہ یہ واقعہ ڈیجیٹل دستاویزات پر اندھا اعتماد اور کمزور مالیاتی جانچ کے خطرات کو اجاگر کرتا ہے۔رپورٹ کے مطابق امریکی عدالت میں دائر مقدمہ ابھی ابتدائی مراحل میں ہے، تاہم اگر الزامات درست ثابت ہوئے تو یہ امریکی مالیاتی تاریخ کے بڑے بین الاقوامی قرض فراڈز میں سے ایک قرار دیا جائے گا۔

امریکی صدر کے دفتر، وائٹ ہاؤس، نے صحافیوں کے داخلے سے متعلق نئی اور سخت پابندیاں عائد کر دی ہیں۔

غیر ملکی میڈیا رپورٹس کے مطابق اب کسی بھی صحافی کو پریس سیکرٹری یا دیگر اعلیٰ حکام کے دفاتر میں بغیر اجازت داخل ہونے کی اجازت نہیں ہوگی۔ نئی پالیسی کے تحت وائٹ ہاؤس کے "اپر پریس روم” میں داخلہ صرف پیشگی اپائنٹمنٹ کے ذریعے ممکن بنایا گیا ہے۔وائٹ ہاؤس کی جانب سے جاری اعلامیے میں کہا گیا ہے کہ یہ فیصلہ فوری طور پر نافذ العمل ہوگا۔ حکام کے مطابق اس اقدام کا مقصد حساس معلومات کے تحفظ اور سیکیورٹی کو مزید مضبوط بنانا ہے۔اعلامیے میں مزید کہا گیا ہے کہ صحافیوں کو اب ملاقات یا بریفنگ کے لیے پہلے سے وقت لینا ہوگا، تاکہ دفتر میں موجود افسران اور سیکیورٹی اہلکار انتظامات کو بہتر طور پر یقینی بنا سکیں۔

یاد رہے کہ گزشتہ ماہ پینٹاگون میں بھی اسی نوعیت کی پابندیاں عائد کی گئی تھیں، جن کے تحت میڈیا نمائندوں کی آزادانہ رسائی محدود کر دی گئی تھی۔ ماہرین کا کہنا ہے کہ وائٹ ہاؤس کا حالیہ فیصلہ میڈیا اور حکومتی اداروں کے درمیان تعلقات پر اثر انداز ہو سکتا ہے، جب کہ صحافتی تنظیموں نے اس پالیسی پر اظہارِ تشویش کیا ہے۔کچھ تجزیہ کاروں کے مطابق امریکی حکومت کی یہ نئی پالیسی معلومات کے بہاؤ کو محدود کرنے کا باعث بن سکتی ہے، تاہم وائٹ ہاؤس کا مؤقف ہے کہ یہ اقدام قومی سلامتی اور داخلی نظم و ضبط کے تحفظ کے لیے ناگزیر ہے۔

ڈنمارک نے ایک انقلابی تجویز پیش کر کے دنیا بھر میں ڈیجیٹل حقوق کے حوالے سے نئی بحث چھیڑ دی ہے۔ نئی کاپی رائٹ قانون سازی کے تحت ہر شہری کو اپنی شناخت، چہرے، آواز اور جسمانی ڈیٹا پر مکمل قانونی ملکیت دی جائے گی۔ اس کا مطلب ہے کہ کوئی بھی کمپنی یا مصنوعی ذہانت (AI) سسٹم کسی شخص کے خدوخال، آواز یا جسمانی انداز کو بغیر اجازت استعمال نہیں کر سکے گا۔

یہ تجویز ایسے وقت میں سامنے آئی ہے جب دنیا بھر میں ڈیپ فیک (Deepfake) ٹیکنالوجی تیزی سے عام ہو رہی ہے۔ اس ٹیکنالوجی کے ذریعے کسی شخص کی مشابہت پر مبنی جعلی ویڈیوز یا آوازیں بنائی جاتی ہیں، جنہیں دھوکہ دہی، جعلی خبروں اور سیاسی مہمات میں استعمال کیا جا رہا ہے۔ڈنمارک کی حکومت کے مطابق، کسی فرد کا ظاہری خدوخال اور آواز بھی دانشورانہ ملکیت کے زمرے میں آنا چاہیے۔ اس طرح اگر کسی کی شناخت کا غلط استعمال کیا جائے تو متاثرہ شخص قانونی طور پر معاوضہ یا ویڈیو ہٹانے کا مطالبہ کر سکے گا۔ماہرین کا کہنا ہے کہ اگر یہ قانون منظور ہو گیا تو یہ دنیا بھر کے لیے ڈیجیٹل انسانی حقوق کا ایک نیا نمونہ ثابت ہو سکتا ہے۔ یہ قدم واضح پیغام دیتا ہے کہ "انسانی شناخت محض ڈیٹا نہیں، بلکہ قابلِ احترام ملکیت ہے۔”

ڈنمارک کی اس تاریخی کوشش سے یہ بات بھی ابھر کر سامنے آتی ہے کہ جدید ٹیکنالوجی کے اس دور میں اپنی شناخت کا تحفظ پہلے سے کہیں زیادہ ضروری ہو گیا ہے۔