Author: ممتاز حیدر

دھڑے بندی، اختلافات یا بانی کی ہدایات، تحریک انصاف میں بڑے پیمانے پر اکھاڑ پچھاڑ، نئی سیاسی کمیٹی تشکیل دیدی گئی۔

پاکستان تحریک انصاف سیاسی کمیٹی سے بڑے بڑے نام آؤٹ ہوگئے، نئے چہروں کی انٹری ہوئی ہے۔پی ٹی آئی نے سیاسی کمیٹی سے عارف علوی، سینیٹر علی ظفر، علی محمد خان اور اعظم سواتی کو نکال دیا، شاہ فرمان، قاسم سوری، زلفی بخاری اور شہباز گل بھی فارغ ہوگئے۔نئی سیاسی کمیٹی میں بیرسٹر گوہر، سلمان اکرم راجا، شیخ وقاص اکرم شامل ہیں جبکہ راجا ناصر عباس اور محمود خان اچکزئی کو بھی کمیٹی کا حصہ بنایا گیا ہے۔پی ٹی آئی سیاسی کمیٹی فیصلہ سازی کیلئے اعلیٰ ترین فورم کا کردار ادا کرے گی۔

سپریم کورٹ نے 8 سال کے بچے سے زیادتی کے کیس میں ملزم عاصم گُل کی اپیل خارج کردی ہے

ملزم عاصم گُل کی 14 سال قید اور 10 لاکھ روپے جرمانے کی سزا برقرار ہے۔ اس حوالے سے جسٹس ہاشم کاکڑ اور جسٹس اشتیاق ابراہیم نے کیس پر سماعت کی تھی،سپریم کورٹ کے فیصلے میں کہا گیا ہے کہ بچے کی گواہی، طبی اور ڈی این اے شواہد سے مطابقت رکھتی ہے، شواہد میں کوئی تضاد یا قانونی نقص ثابت نہیں ہوا، متاثرہ بچے کی والدہ نے بتایا بچہ گھر لوٹا تو گردن پر خراشیں تھیں اور بچہ پریشان تھا، متاثرہ بچے نے بتایا کہ ملزم پتنگ اور کنچے دینے کا جھانسہ دے کر لے گیا تھا، ملزم عاصم گُل بچے کو زیرِ تعمیر دکان میں لے گیا جہاں زیادتی کی گئی، بعدازاں اڈیالہ جیل میں شناخت پریڈ ہوئی جس میں متاثرہ بچے نے ملزم کی شناخت کی۔

سپریم کورٹ کے مطابق ٹرائل کورٹ نے 12 اپریل 2021 کو عاصم گُل فراز کو مجرم قرار دیا تھا اور 14 سال قید اور 10 لاکھ روپے جرمانے کی سزا سنائی تھی،بعدازاں اسلام آباد ہائیکورٹ نے 4 اگست 2021 کو دونوں اپیلیں مسترد کردی تھیں۔

پاکستان میں گزشتہ کئی ہفتوں سے جاری خشک اور سرد موسم کے حوالے سے محکمہ موسمیات نے خوش آئند پیشگوئی جاری کرتے ہوئے بارشوں اور برفباری کے دو مختلف اسپیلز کی اطلاع دے دی ہے۔

محکمہ موسمیات کے مطابق آج سے 15 دسمبر تک ملک کے بالائی علاقوں میں بارش اور برفباری کا امکان ہے، جس سے سردی کی شدت میں مزید اضافہ ہوگا اور خشک موسم کا تسلسل ٹوٹنے کی امید ہے،محکمہ موسمیات کے مطابق اس دوران مری، آزاد کشمیر اور گلگت بلتستان کے مختلف علاقوں میں برفباری متوقع ہے، جبکہ بعض مقامات پر بارش بھی ہو سکتی ہے۔ مری میں ہلکی برفباری کا امکان ظاہر کیا گیا ہے، جس کے باعث سیاحتی سرگرمیوں میں اضافہ متوقع ہے تاہم شہریوں اور سیاحوں کو محتاط رہنے کی ہدایت بھی کی گئی ہے۔

محکمہ موسمیات کے ڈپٹی ڈائریکٹر عرفان ورک کا کہنا ہے کہ اگرچہ بالائی علاقوں میں موسم کی صورتحال میں واضح تبدیلی آئے گی، تاہم جڑواں شہروں راولپنڈی اور اسلام آباد کے مکین زیادہ بارش کی امید نہ رکھیں۔ ان کے مطابق وفاقی دارالحکومت اور اس کے گردونواح میں زیادہ سے زیادہ بوندا باندی ہو سکتی ہے، جبکہ نمایاں بارش کا امکان کم ہے۔بالائی خیبرپختونخوا، گلگت بلتستان، آزاد کشمیر اور بلوچستان کے شمالی و مغربی علاقوں میں بارش اور ہلکی برفباری متوقع ہے، جس سے سردی کی شدت میں اضافہ ہوگا۔ دوسرے مرحلے میں 19 دسمبر کو مغربی ہواؤں کا ایک نیا سلسلہ ملک میں داخل ہوگا، جس کے نتیجے میں ایک بار پھر بارش اور برفباری کے امکانات پیدا ہوں گے۔

محکمہ موسمیات نے خبردار کیا ہے کہ آئندہ دنوں میں دن کے درجہ حرارت میں 5 ڈگری سینٹی گریڈ تک کمی واقع ہو سکتی ہے، جس کے باعث سردی کی لہر مزید شدت اختیار کر سکتی ہے۔ شہریوں کو ہدایت کی گئی ہے کہ وہ گرم لباس کا استعمال کریں، جبکہ پہاڑی علاقوں میں سفر کرنے والے افراد موسم کی تازہ صورتحال سے باخبر رہیں،ماہرین موسمیات کے مطابق یہ بارشیں نہ صرف موسم کو خوشگوار بنانے میں مددگار ثابت ہوں گی بلکہ فضائی آلودگی اور اسموگ میں کمی کا بھی باعث بن سکتی ہیں، تاہم سرد علاقوں میں رہنے والے افراد کے لیے احتیاطی تدابیر اختیار کرنا نہایت ضروری ہے۔

صحافی تنظیموں اور میڈیا کےنمائندہ اداروں پر مشتمل جوائنٹ ایکشن کمیٹی نے اخبارات اور ٹیلی ویژن چینلز پر سرکاری اشتہارات کی بندش کو ادارتی آزادی پر براہِ راست حملہ اور میڈیا کو کنٹرول کرنے کی خطرناک کوشش قرار دیتے ہوئے اس کی سخت مذمت کی ہے۔

جوائنٹ ایکشن کمیٹی، جس میں پی بی اے، سی پی این ای، پی ایف یو جے، اے پی این ایس اور ایمنڈ شامل ہیں، نے اپنے مشترکہ بیان میں کہا کہ حکومت کی جانب سے سرکاری اشتہارات کو میڈیا اداروں کے خلاف دباؤ کے ہتھیار کے طور پر استعمال کیا جا رہا ہے۔ یہ پالیسی اظہارِ رائے کو محدود کرنے اور آزاد صحافت کو کمزور کرنے کی ایک منظم حکمتِ عملی ہے۔کمیٹی نے واضح کیا کہ اس غیر جمہوری اقدام کا سب سے نمایاں نشانہ ڈان گروپ ہے، جہاں ادارتی پالیسیوں اور غیر جانبدارانہ صحافت کے باعث طویل عرصے سے اخبار اور اب ٹی وی و ریڈیو کےاشتہارات بند کیے گئے ہیں۔ یہ اقدام اس بات کا اظہار ہے کہ میڈیااداروں کو معاشی نقصان پہنچا کر ان کی ادارتی آزادی سلب کرنے کی کوشش کی جا رہی ہے۔ اشتہارات کی بندش کی یہ کارروائیاں مستقبل کے مزید خطرناک اقدامات کی طرف اشارہ کرتی ہیں جو نہ صرف صحافت بلکہ جمہوریت کے لیے بھی نقصان دہ ہیں۔

جوائنٹ ایکشن کمیٹی نے حکومت سے مطالبہ کیاکہ میڈیا اداروں کے خلاف سرکاری اشتہارات کو بطور دباؤ استعمال کرنے کا سلسلہ فوری طور پر بند کیا جائے۔بالخصوص ڈان گروپ پر لگائی گئی اشتہاری پابندیاں فی الفور ختم کی جائیں۔اورایسا ماحول پیدا کرنے سے گریز کیا جائے جس کے نتیجے میں میڈیا ادارے کسی انتہائی اقدام پر مجبور
ہوں۔ جوائنٹ ایکشن کمیٹی نے اس عزم کا اظہار کیا کہ وہ آزاد صحافت اور عوام کے حقِ معلومات کے لیے ہر سطح پر اپنی جدوجہد جاری رکھیں گے

الیکشن کمیشن آف پاکستان (ای سی پی) میں ایک نئی سیاسی جماعت ’قرآن و سنۃ تحریک پاکستان‘ باضابطہ طور پر رجسٹر ہو گئی ہے۔ الیکشن کمیشن کے مطابق جماعت کی جانب سے جمع کرائے گئے تمام قانونی تقاضے پورے کیے گئے، جس کے بعد اس کی رجسٹریشن منظور کر لی گئی۔

الیکشن کمیشن کے اعلامیے کے مطابق قرآن و سنۃ تحریک پاکستان کے چیئرمین ابتسام الہی ظہیر ہوں گے۔ اعلامیے میں مزید بتایا گیا ہے کہ جماعت کی جانب سے منعقد کیے گئے انٹرا پارٹی انتخابات کو بھی تسلیم کر لیا گیا ہے، جو کہ سیاسی جماعتوں کی رجسٹریشن کے لیے ایک لازمی شرط ہے۔ذرائع کے مطابق نئی جماعت کی رجسٹریشن کے بعد وہ مستقبل میں ہونے والے عام اور ضمنی انتخابات میں حصہ لینے کی اہل ہو گئی ہے، تاہم انتخابی نشان کے حصول سمیت دیگر مراحل آئندہ مکمل کیے جائیں گے۔

واضح رہے کہ ستمبر کے مہینے میں بھی الیکشن کمیشن نے دو نئی سیاسی جماعتوں کو باضابطہ طور پر رجسٹر کیا تھا۔ الیکشن کمیشن کی جانب سے اس وقت جاری کیے گئے نوٹیفکیشن کے مطابق ’آزاد عوام پاکستان پارٹی‘ اور ’تجدید نظام پارٹی‘ کو رجسٹریشن دی گئی تھی۔نوٹیفکیشن میں بتایا گیا تھا کہ آزاد عوام پاکستان پارٹی کے سربراہ محمد علی ہوں گے، جبکہ تجدید نظام پارٹی کے چیئرمین خالد زمان مقرر کیے گئے ہیں۔