Author: ممتاز حیدر

استنبول میں پاکستان اور افغان طالبان رجیم کے درمیان مذاکرات ناکام ہوگئے، پاکستان نے دہشت گردوں، ان کے سرپرستوں اور معاونین کیخلاف کارروائی کا اعلان کردیا۔

ترکیہ اور قطر کی ثالثی میں 4 روز تک جاری رہنے والے مذاکرات کسی نتیجہ پر نہ پہنچ سکے۔ وزیر اطلاعات عطا تارڑ نے ایکس پر پیغام میں کہا کہ افغان طالبان نے دہشت گردوں کیخلاف کارروائی کی کوئی ضمانت نہیں دی، افغان وفد الزام تراشی، ٹال مٹول اور حیلے بہانوں کا سہارا لیتا رہا۔ان کا کہنا ہے کہ پاکستان نے افغان طالبان سے سرحد پار دہشت گردی پر احتجاج کیا، دوحہ معاہدے پر عمل درآمد کا مطالبہ کیا لیکن افغان طالبان اپنے عوام کو غیر ضروری جنگ میں دھکیلنا چاہتے ہیں۔عطاء تارڑ نے مزید کہا کہ حکومت پاکستان دہشت گردی کیخلاف ہرممکن اقدام کرتی رہے گی، دہشت گردوں، ان کے ٹھکانوں، سرپرستوں اور معاونین کو ختم کرنے کیلئے تمام وسائل استعمال کریں گے۔استنبول میں پاکستان اور افغان طالبان حکومت کے درمیان مذاکرات اکتوبر 2025 میں منعقد ہوئے، پاکستان نے افغان طالبان سے بھارتی حمایت یافتہ فتنہ الخوارج (TTP) اور فتنہ الہند (BLA) کی سرحد پار دہشت گردی پر بارہا احتجاج کیا۔، پاکستان نے افغان طالبان حکومت سے دوحہ معاہدے کے تحریری وعدوں پر عمل درآمد کا مطالبہ کیا۔، افغان طالبان کی جانب سے پاکستان مخالف دہشت گردوں کی مسلسل حمایت پر پاکستان کی کوششیں بے سود رہیں۔ طالبان حکومت افغان عوام کی نمائندہ نہیں اور اپنی بقا کے لیے جنگی معیشت پر انحصار کرتی ہے۔ افغان طالبان، افغان عوام کو غیر ضروری جنگ میں دھکیلنا چاہتی ہے۔ پاکستان نے ہمیشہ افغانستان کے عوام کے امن و خوشحالی کے لیے قربانیاں پیش کیں۔ پاکستان نے افغان طالبان کے ساتھ متعدد مذاکرات کیے مگر افغان فریق نے پاکستان کے نقصانات سے بے نیازی دکھائی۔ چار برسوں کی جانی و مالی قربانیوں کے بعد پاکستان کے صبر کا پیمانہ لبریز ہو چکا ہے۔ قطر اور ترکیہ کی درخواست پر پاکستان نے امن کے لیے ایک اور موقع دیا۔ دوحہ اور استنبول میں مذاکرات کا واحد ایجنڈا دہشت گردی کے لیے افغان سرزمین کے استعمال کو روکنا تھا۔ پاکستان قطر اور ترکیہ کا شکر گزار ہے جنہوں نے مذاکرات کی میزبانی اور مخلصانہ کوششیں کیں۔ مذاکرات کے دوران افغان طالبان وفد نے پاکستان کے منطقی اور جائز مطالبات تسلیم کیے۔ پاکستان نے دہشت گردوں کے خلاف ٹھوس اور ناقابلِ تردید شواہد پیش کیے۔ افغان طالبان اور میزبان ممالک نے پاکستان کے شواہد تسلیم کیے مگر کوئی یقین دہانی نہ کرائی گئی۔ افغان وفد نے مذاکرات کے بنیادی مدے سے انحراف کیا اور ذمہ داری قبول کرنے سے گریز کیا۔ افغان طالبان نے الزام تراشی، ٹال مٹول اور حیلے بہانوں کا سہارا لیا اور مذاکرات کسی قابلِ عمل نتیجے پر نہ پہنچ سکے۔ پاکستان قطر، ترکیہ اور دیگر دوست ممالک کا ان کی مخلصانہ کوششوں پر شکر گزار ہے۔ پاکستان کے عوام کی سلامتی قومی ترجیح ہے اور حکومت دہشت گردی کے خلاف ہر ممکن اقدام کرتا رہے گا۔ حکومت پاکستان دہشت گردوں، ان کے ٹھکانوں اور سہولت کاروں کو نیست و نابود کرنے کے لیے تمام وسائل بروئے کار لائے گی۔

اینٹی نارکوٹکس فورس (اے این ایف) نے ڈرونز کے ذریعے منشیات اسمگل کرنے والے، ایک انتہائی منظم گروہ کو ناکام بناد یا ہے-
مصدقہ اطلاع پر کارروائی کرتے ہوئے اے این ایف کی ٹیموں نے بھیڈیاں کلاں روڈ، قصور کے قریب ایک گاڑی کو روکا اور دو افراد کو گرفتار کیا۔ گاڑی کی تلاشی کے دوران 9 کلو گرام ہیروئن، ایک کواڈ کاپٹر ڈرون اور متعلقہ آلات برآمد کیے گئے۔ منشیات کو انتہائی مہارت کے ساتھ گاڑی کے خفیہ خانوں اور ملزمان کے ذاتی سامان میں چھپایا گیا تھا۔ابتدائی 2 گرفتاریوں کے بعد، اے این ایف نے بیک ٹریکنگ آپریشن شروع کیا، جس کے نتیجے میں لاہور کے علامہ اقبال ٹاؤن میں قائم ،ایک غیر قانونی ڈرون اسمبلی اور مینوفیکچرنگ یونٹ "روبوٹکس” کی نشاندہی ہوئی۔ اے این ایف ٹیم کی کارروائی کے دوران وہاں سے متعدد جدید ڈرون سسٹمز برآمد کیے گئے جن میں ہیگزا کاپٹرز، کواڈ کاپٹرز، فکسڈ وِنگ ہائبرڈ وی ٹول اور ڈرون ریموٹس شامل ہیں۔

آپریشن کے دوران کمپنی مالک کا رشتہ دار جو کمپنی کے ہیڈ آف فنانس کے طور پر کام کر رہا تھا ،کو موقع پر گرفتار کیا گیا مذکورہ افراد ،بغیر کسی قانونی اجازت یا لائسنس کے یہ یونٹ چلا رہے تھا۔ تحقیقات کے دوران یہ بھی انکشاف ہوا کہ ڈرونز منشیات اسمگلنگ میں ملوث ایک گروہ یا ڈی ٹی او (DTO) کے لیے کے لیے اسمبل اور مرمت کیے جا رہے تھے تاکہ ان کا استعمال سرحد پار منشیات اسمگلنگ میں کیا جا سکے۔

منشیات کی اسمگلنگ میں ٹیکنالوجی کا بڑھتا ہوا استعمال ایک تشویش ناک امر ہے، جس میں منشیات اسمگلرز ڈرونز کا استعمال کر کے سرحدی نگرانی سے بچنے اور نوجوان نسل کو ہیروئن جیسی تباہ کن منشیات کی فراہمی میں مصروف ہیں۔اے این ایف ،جدید انسدادی اقدامات کرتے ہوئے اس بات کو یقینی بنا رہی ہے کہ ایسے زہریلے مواد اپنی منزل تک نہ پہنچ سکیں اور پاکستان کی نوجوان نسل کو تباہی سے بچایا جا سکے۔ اے این ایف ٹیکنالوجی کے غلط استعمال کے خلاف اپنی جدوجہد جاری رکھے ہوئے ہے اور ایک منشیات سے پاک اور محفوظ پاکستان کے عزم پر کاربند ہے

وفاقی دارالحکومت کے مصروف ترین علاقے سیکٹر I-8 میں جمعرات کی دوپہر تین مسلح ڈاکوؤں نے ایک پیٹرول پمپ پر 55 لاکھ روپے کی نقدی لوٹ لی۔ پولیس کے مطابق یہ واردات انتہائی منصوبہ بندی کے تحت کی گئی، جب پیٹرول پمپ کے منیجر نے روزانہ کی آمدن کو بینک منتقل کرنے کی تیاری کی تھی۔

پولیس ذرائع کے مطابق ڈاکو دو موٹر سائیکلوں پر سوار تھے اور ان کی عمریں 25 سے 30 سال کے درمیان بتائی جا رہی ہیں۔ واردات کے دوران ملزمان نے اسلحہ تان کر اسٹیشن منیجر اور دیگر عملے کو یرغمال بنایا، کیش بیگ چھینا اور چند منٹوں میں موقع سے فرار ہوگئے،عینی شاہدین کے مطابق ڈاکو انتہائی پرسکون انداز میں کارروائی کر رہے تھے، جبکہ موٹر سائیکلوں پر نمبر پلیٹس نصب نہیں تھیں۔ واردات کے فوراً بعد پولیس کی بھاری نفری موقع پر پہنچ گئی اور علاقے کو گھیرے میں لے کر سرچ آپریشن شروع کر دیا،پولیس نے مقدمہ درج کر لیا ہے اور سی سی ٹی وی فوٹیجز حاصل کر لی گئی ہیں جن میں ملزمان کے چہرے واضح طور پر دکھائی دے رہے ہیں۔ تفتیشی ٹیموں کو فوٹیجز کی بنیاد پر مختلف زاویوں سے تحقیقات کرنے کی ہدایت کی گئی ہے۔

پولیس حکام کا کہنا ہے کہ ابتدائی شواہد کے مطابق یہ ایک پیشہ ور گروہ کی کارروائی معلوم ہوتی ہے جو اس سے قبل بھی شہر کے مختلف علاقوں میں وارداتیں کر چکا ہے،اسلام آباد پولیس نے شہریوں سے اپیل کی ہے کہ وہ کسی بھی مشتبہ شخص یا سرگرمی کی اطلاع فوری طور پر 15 ہیلپ لائن یا قریبی تھانے کو دیں تاکہ ملزمان کو جلد از جلد گرفتار کیا جا سکے۔

گزشتہ تین ماہ کے دوران بیرون ملک دوروں میں کس کو کیا کیا تحائف ملے ؟ وفاقی حکومت نےتوشہ خانہ کا مزید ریکارڈ پبلک کر دیا۔

کابینہ ڈویژن نے جولائی تاستمبر 2025کی سہ ماہی کا توشہ خانہ ریکارڈجاری کر دیا جس کے مطا بق صدر مملکت آصف علی زرداری اور وزیراعظم شہباز شریف کو تحائف ملے، وزیر اعظم تعداد کے اعتبار سے تحائف وصول کرنے والوں میں سر فہرست ہیں، نائب وزیراعظم اسحاق ڈار، وزیر دفاع خواجہ آصف، وزیر داخلہ محسن نقوی، وزیر ریلویز حنیف عباسی، وزیر بجلی اویس لغاری، چیئرمین سینیٹ سید یوسف رضاگیلانی، اسپیکر قومی اسمبلی ایاز صادق، سیکرٹری سینیٹ، وزیر اطلاعات عطاء اللہ تارڑ، وزیر آئی ٹی شزاہ فاطمہ اور معاون خصوصی طارق فاطمی کو تحائف ملے،وزیر مملکت برائے قانون بیرسٹر عقیل ملک، سیکرٹری داخلہ خرم آ غا اور ڈپٹی چیف آف پروٹوکول بھی فہرست کاحصہ ہیں،مالی سال کی پہلی سہ ماہی کے تحائف میں قیمتی گھڑیاں، ڈیکوریشن پیسز ، پینٹنگ، پرفیوم، شیلڈز، کارپٹ،ٹی سیٹ کےتحائف وصول کیےگئے۔ رائفل، وال کلاک، باول، پین اور ڈائری سمیت دیگر تحائف بھی شامل ہیں،جولائی تا ستمبر 2025 میں وصول کنندگان نے تمام تحائف توشہ خانہ میں جمع کروائے،کابینہ ڈویژن وصول شدہ تحائف کا تخمینہ کروا رہا ہے، اس سے قبل شہباز حکومت2002 سے لیکر جون2025 تک کا توشہ خانہ ریکارڈ پبلک کرچکی،توشہ خانہ کا 1997 سے لیکر 2001 کا ریکارڈ بھی جاری کیا جاچکا ہے۔ ذرائع کے مطا بق کابینہ ڈویژن نے اس سہ ماہی میں تحفہ دینے والی شخصیت کے نام کا کالم نکال دیا ہے جو گزشتہ سہ ماہی میں شامل تھا۔