Author: ممتاز حیدر

آئی ایس پی آر کا نیا نغمہ ’’قوم کے شہیدوں تمہیں سلام ‘‘ ریلیز کر دیا گیا

آئی ایس پی آر نےوطن پر جان نچھاور کرنے والے شہداء کو زبردست خراج عقیدت پیش کیا،قومی نغمہ کے ذریعے وطن عزیز کی بقاء اور دہشتگردی کے خاتمے کے لیے جان دینے والے شہداء کو پوری قوم کا سلام پیش کیا گیا ہے،وطن کی خاطر جان کا نذرانہ پیش کرنے والوں کی داستانیں قوم کے دلوں میں زندہ ہیں

نغمہ میں معصوم بچوں اور خواتین کی شہادت کو بھی خراج عقیدت پیش کیا گیا ،بزدل دشمن کے دہشت گرد حملوں میں شہید ہونے والے بہادروں کی قربانیاں پر ہر پاکستانی کو فخر ہے ،نغمہ میں خون کے آخری قطرے تک وطن کیلئے قربانیاں دینے کے عزم کا اعادہ کیا گیا،شہداء کا ہر قطرۂ لہو پاکستان کی بقا اور امن کی ضمانت ہے،

خیبر پختونخوا اور بلوچستان میں دہشت گردوں کے خلاف سیکورٹی فورسز کی کاروائیاں جاری ہیں،

ضلع شمالی وزیرستان کے علاقے میں 17 اکتوبر کو گل بہادر گروپ کے خودکش حملے میں ایک ہی خاندان کے پانچ افراد جاں بحق ہو گئے۔ مقامی صحافیوں کے مطابق جاں بحق افراد میں حسین اللہ، ان کا بیٹا، بیوی، بہن اور بھانجی شامل ہیں۔ واقعے کے بعد سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے تاکہ حملے میں ملوث سہولت کاروں کا سراغ لگایا جا سکے۔

ڈیرہ اسماعیل خان کے پانیالہ تھانے کی حدود میں عبدال خیل کے علاقے میں انٹیلیجنس بنیاد پر کی گئی کارروائی میں کالعدم تحریک طالبان پاکستان (TTP) کا انتہائی مطلوب کمانڈر "عقابی سردار” مارا گیا۔ پولیس ذرائع کے مطابق، ہلاک کمانڈر متعدد دہشتگردانہ کارروائیوں میں ملوث تھا۔ کارروائی کے بعد سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔

ضلع باجوڑ کے علاقے لوئی ماموند میں سیکیورٹی فورسز نے کامیاب آپریشن کے بعد علاقے کو کلیئر کر دیا ہے، جس کے بعد مقامی افراد کی گھروں کو واپسی کا عمل شروع ہو گیا ہے۔ لوئی خرکی ماموند میں کمانڈنٹ باجوڑ اسکاؤٹس بریگیڈیئر وسیم گھمن نے مقامی عمائدین سے ملاقات کی اور ان کے حب الوطنی اور امن کی حمایت کو سراہا۔ مقامی عمائدین نے بھی سیکیورٹی فورسز کے ساتھ مکمل تعاون جاری رکھنے کے عزم کا اعادہ کیا۔

ضلع بنوں کے مغل کوٹ سیکٹر میں انٹیلیجنس اطلاعات پر مبنی کارروائی میں سیکیورٹی فورسز نے کالعدم تنظیم تحریک طالبان پاکستان (TTP) کے دو اہم دہشتگردوں طارق کاکھی اور حکیم اللہ عرف ٹائیگر کو ہلاک کر دیا۔ یہ دہشتگرد دہشتگردی، بھتہ خوری، اغواء اور سرحد پار حملوں میں ملوث تھے۔ کارروائی کے دوران بڑی تعداد میں اسلحہ اور گولہ بارود بھی برآمد ہوا۔ ذرائع کے مطابق یہ گروہ افغانستان سے شدت پسندوں کو پاکستان میں داخل کرانے میں بھی ملوث رہا ہے۔

کوئٹہ میں 30 ستمبر کو فرنٹیئر کور کے ہیڈکوارٹر پر ہونے والے خودکش حملے کے ایک حملہ آور کی شناخت ہو گئی ہے۔ تحقیقات کے مطابق، حملہ آور "حبیب اللہ عرف طٰہ یا تکّل بدری” افغان صوبے لوگر کے محمد آغا ضلع کے حاجیانو کلی کا رہائشی تھا۔ حملے میں 8 شہری جاں بحق جبکہ 40 سے زائد زخمی ہوئے تھے۔

بلگتر کے کورکی علاقے میں سیکیورٹی اہلکاروں کو نشانہ بنانے کے لیے IED حملہ کیا گیا، جس کی ذمہ داری ایک کالعدم تنظیم نے قبول کر لی ہے۔ حکام نے علاقے میں سیکیورٹی بڑھا دی ہے۔بم ڈسپوزل اسکواڈ پر IED حملے کی بھی ذمہ داری ایک کالعدم تنظیم نے قبول کی ہے۔ حکام کا کہنا ہے کہ دعویٰ کی آزاد ذرائع سے تصدیق نہیں ہو سکی، تاہم سیکیورٹی فورسز نے گشت بڑھا دیا ہے۔چاغی کے تالو لنڈی علاقے میں نامعلوم موٹرسائیکل سواروں نے ایک ٹرالر پر فائرنگ کر دی، جس میں کنڈکٹر زخمی ہوا۔ واقعے کی تحقیقات جاری ہیں۔بلوچستان کے ضلع ڈیرہ بگٹی سے تین افراد کی گولیوں سے چھلنی لاشیں برآمد ہوئیں۔ پولیس نے لاشیں قبضے میں لے کر تحقیقات شروع کر دی ہیں تاکہ واقعے کے محرکات اور ملزمان کا تعین کیا جا سکے۔

سپریم جوڈیشل کونسل نے ججزکوڈ آف کنڈکٹ میں اہم ترامیم کردی گئیں۔

چیف جسٹس یحییٰ آفریدی کی زیر صدارت سپریم جوڈیشل کونسل کا اجلاس ہوا جس میں سپریم جوڈیشل کونسل نے ججوں کے ضابطہ اخلاق میں اکثریت رائے سے ترامیم کی منظوری دے دی،کوڈ آف کنڈکٹ میں ترمیم سے ججز میڈیا پر بات نہیں کرسکیں گے۔ چیف جسٹس ریٹائرڈ قاضی فائز عیسیٰ کے دور میں ترمیم سےججز کو الزامات کا جواب دینے کی اجازت دی گئی تھی،رول نمبر 5 میں دوبارہ ترمیم سے ججز کو پابند کردیا گیا کہ ججز الزامات کا جواب تحریری طور پر ادارہ جاتی رد عمل کیلئے قائم کمیٹی کو بھیجیں گے،ترمیم کے مطابق جج میڈیا پر ایسے کسی سوال کا جواب نہیں دے گا جس سے تنازع کھڑا ہو، سوال میں بے شک قانونی نکتہ شامل ہو، جج جواب نہیں دے گا،کوڈ آف کنڈکٹ میں کہا گیا ہے کہ جج کو ہر معاملے میں مکمل غیر جانب داری اختیار کرنی چاہیے، جج کسی ایسے مقدمے کی سماعت نہ کرے جس میں ذاتی مفاد یا تعلق ہو، جج کسی قسم کے کاروباری یا مالی تعلقات سے اجتناب کرے، جج کو اپنے عہدے کا ناجائز فائدہ اٹھانے سے اجتناب کرنا ہوگا۔

کوڈ آف کنڈکٹ کے مطابق سیاسی یا عوامی تنازع میں شامل ہونا جج کے لیے منع ہے، جج کسی بھی مالی فائدے یا تحفے کو قبول نہیں کرے گا، جج کو عدالتی کام میں تیزی اور فیصلوں میں تاخیر سے گریز کا پابند بنایا گیا، جج آئینی حلف کی خلاف ورزی کرنے والے کسی اقدام کی حمایت نہیں کرے گا، جج غیر ضروری سماجی، ثقافتی یا سیاسی تقریبات میں شرکت نہیں کرے گا،کوڈ آف کنڈکٹ میں کہا گیا کہ جج غیر ملکی اداروں سے ذاتی دعوت قبول نہیں کرے گا، جج کسی وکیل یا فرد کی طرف سے ذاتی عشائیہ یا تقریب میں شرکت نہیں کرے گا،کوڈ آف کنڈکٹ میں جج کو صرف میرٹ کی بنیاد پر فیصلے کرنے کی ہدایت کی گئی ہے اور جج پر ہر قسم کے اندرونی یا بیرونی دباؤ سے آزاد رہنے کی تاکید کی گئی ہے۔

دوسری جانب سپریم جوڈیشل کونسل نے ججز کے خلاف74 میں سے 70 شکایات مسترد، 3 مزید کارروائی کیلئے منظور جبکہ ایک پر کارروائی مؤخر کر دی،چیف جسٹس یحییٰ آفریدی کی زیر صدارت سپریم جوڈیشل کونسل کا اجلاس ہوا جس میں سپریم جوڈیشل کونسل نے ججوں کے ضابطہ اخلاق میں اکثریت رائے سے ترامیم کی منظوری دے دی،جوڈیشل کونسل کے دو الگ الگ اجلاس منعقد ہوئے اور پہلے اجلاس میں چیف جسٹس یحییٰ آفریدی، جسٹس منصور علی شاہ اور جسٹس منیب اختر شریک ہوئے، لاہور ہائیکورٹ کی چیف جسٹس عالیہ نیلم اور اسلام آباد ہائیکورٹ کے چیف جسٹس سرفراز ڈوگر شریک ہوئے،اعلامیے کے مطابق سپریم جوڈیشل کونسل کے دوسرے اجلاس میں اسلام آباد ہائیکورٹ کے چیف جسٹس سرفراز ڈوگرکی جگہ پشاور ہائیکورٹ کے چیف جسٹس شریک ہوئے،اعلامیے کے مطابق آئین کے آرٹیکل 209 کے تحت 67 شکایات کا جائزہ لیا گیا، 65 شکایات متفقہ طور پر مسترد، ایک مؤخر اور ایک کو اکثریتی فیصلے سے مزید کارروائی کیلئے منظور کیا گیا۔ اسلام آباد ہائی کورٹ کے چیف جسٹس کی عدم شرکت کے باعث کونسل کو دوبارہ تشکیل دیا گیا،سپریم جوڈیشل کونسل کے دوسرے اجلاس میں 7 شکایات کا جائزہ لیا گیا اور سپریم جوڈیشل کونسل نے اکثریتی رائے سے 2 شکایات پر مزید کارروائی کا فیصلہ کیا جبکہ کونسل نے 5شکایات داخل دفتر کر دیں، اکتوبر 2024 سے اب تک 155 شکایات پر غور کیا جا چکا ہے، 74 شکایات پر فیصلے کے بعد 87 شکایات ابتدائی غور کے لیے زیر التوا ہیں

ڈپٹی ڈائریکٹر سائبر کرائم انویسٹیگیشن ایجنسی (این سی سی آئی اے) محمد عثمان کو ان کی اسلام آباد کی رہائش گاہ سے اغوا کر لیا گیا،ہلیہ کی جانب سے ایف آئی آردرج کروا دی گئی.

پولیس کے مطابق واقعہ 14 اکتوبر کی شام سات سے آٹھ بجے کے درمیان زارا ہائٹس کی پارکنگ بیسمنٹ میں پیش آیا جہاں چار مسلح افراد نے افسر کی گاڑی روکی اور انہیں زبردستی اپنے ساتھ لے گئے، عثمان کو 14 اکتوبر کی شام ان کے فلیٹ کے نیچے سے اغوا کیا گیا۔سی سی ٹی وی فوٹیج سے تصدیق ہوئی ہے کہ ڈپٹی ڈائریکٹر عثمان کو اغوا کار ایک سفید رنگ کی کار میں لے گئے تھے۔ پولیس نے مقدمہ درج کر کے واقعے کی تحقیقات اور مغوی کی تلاش کا عمل شروع کر دیا ہے۔

ذرائع کے مطابق واقعے کی سی سی ٹی وی فوٹیج میں سفید کرولا گاڑی اور اغوا کے مناظر دیکھے جا سکتے ہیں۔پولیس نے اہلیہ کی درخواست پر تھانہ شمس کالونی میں مقدمہ درج کرلیا ہے تاہم پولیس کی جانب سے تاحال کوئی پیشرفت سامنے نہیں آسکی،