Author: ممتاز حیدر

آزادکشمیر میں جوائنٹ ایکشن کمیٹی سے مذاکرات کرنے والی حکومتی کمیٹی کے رکن اور وفاقی وزیر برائے امور کشمیر امیر مقام نےکہا ہےکہ آزاد کشمیر میں مذاکرات کی کامیابی سے بھارت کے مذموم عزائم خاک میں مل گئے۔

آزادکشمیر میں جوائنٹ ایکشن کمیٹی سے کامیاب مذاکرات کے بعد اسلام آباد پہنچنے پر میڈیا سے گفتگو کرتے ہوئے وفاقی وزیر امیر مقام کا کہنا تھا کہ بھارت کی کشمیر میں خونریزی کی خواہش کبھی پوری نہیں ہوگی، آزادکشمیر میں معاملات خوش اسلوبی سے طے پاگئے ہیں، آزادکشمیر میں مذاکرات کی کامیابی پر وزیراعظم شہباز شریف کے مشکور ہیں، مقبوضہ کشمیر کے عوام سے بہن بھائی کا رشتہ ہمیشہ قائم رہےگا، پاکستان مقبوضہ کشمیر کے حق خودارادیت کے لیے حمایت جاری رکھےگا، آزادکشمیر میں مذاکرات کی کامیابی سے بھارت کے مذموم عزائم خاک میں مل گئے ، آزاد کشمیر میں پیش آنے والے واقعات پر افسوس ہے۔

وفاقی وزیر احسن اقبال کا کہنا تھا کہ آزاد کشمیر میں معمولات زندگی بحال ہوچکے ہیں، مذاکرات میں پاکستان اور آزاد کشمیر کے مفادکو مدنظر رکھا گیا، محدود وسائل میں مشکلات کو حل کرنے کی پوزیشن میں ہیں، مذاکرات میں کامیابی آزاد کشمیر کے عوام اور جمہوریت کی جیت ہے،انتظامی ڈھانچے میں کمی اورکوتاہی کو دور کیا جانا چاہیے، وفاقی حکومت نے جو وعدے کیے ہیں انہیں پورا کریں گے، معاہدے کی کامیابی پر آزاد کشمیر کے عوام مبارک باد کے مستحق ہیں،راجہ پرویز اشرف کا کہنا تھا کہ پاکستان اور آزاد کشمیر کے عوام میں کوئی دراڑ نہیں ڈال سکتا، آزاد کشمیر جوائنٹ کمیٹی سے کامیاب مذاکرات سے امن بحال ہوا، آزادکشمیر جوائنٹ کمیٹی کے مطالبات حل کیے جائیں گے۔

وزیرِخارجہ اسحاق ڈار اور سعودی وزیرِخارجہ شہزادہ فیصل بن فرحان کی ٹیلی فونک گفتگو ہوئی، دونوں وزرائے خارجہ نے غزہ کی صورتحال پر تبادلہ خیال کیا۔

ترجمان دفتر خارجہ کے مطابق دونوں رہنماؤں نے علاقائی صورتحال بالخصوص غزہ صورتحال پر تبادلہ خیال کیا،دونوں رہنماؤں نے نیویارک میں اسلامی ممالک کی امریکا سے مشاورت اور سفارتی کوششوں کا جائزہ لیا،ان کوششوں کا مقصد فوری اور پائیدار جنگ بندی، بلا رکاوٹ انسانی امداد اور غزہ میں دیرپا امن کا قیام ہے،اسحاق ڈار نے سعودی وزیرِخارجہ کے مثبت کردار اور سفارتی کوششوں کو سراہا،دونوں رہنماؤں نے امریکی صدر کی پیشکش اور حماس کے جواب پر بھی تبادلہ خیال کیا،دونوں ممالک کے وزرائے خارجہ کے درمیان فلسطینی کاز کے لیے اپنی غیر متزلزل حمایت کا اعادہ کیا گیا اور عالمی برادری کے ساتھ قریبی رابطے جاری رکھنے پر اتفاق ہوا۔

نیشنل پریس کلب پر حملے کے خلاف تمام صحافتی گروپ متحد، جوائنٹ ایکشن کمیٹی قائم کر دی گئی۔

نیشنل پریس کلب میں قائم مقام صدر احتشام الحق کی سربراہی میں کمیٹی کے پہلے اجلاس میں جوائنٹ ایکشن کمیٹی کو چارٹر آف ڈیمانڈ کی تیاری کا مینڈیٹ دیا گیا۔اجلاس میں متفقہ طور پر کمیٹی کی صدارت صدر نیشنل پریس کلب اظہر جتوئی کو سونپی گئی جبکہ سیکرٹری نیشنل پریس کلب نیر علی کو سیکریٹری کمیٹی کی زمہ داری دی گئی یے۔ کمیٹی ممبران میں صدر پی ایف یو جے افضل بٹ، صدر آر آئی یو جے طارق ورک، صدر پی ایف یو جے دستور حاجی نواز رضا، صدر آر آئی یو جے دستور رانا کوثر علی، صدر پی ایف یو جے ورکرز سعدیہ کمال اور جاوید ملک، سیکریٹری جنرل پی ایف یو جے (رانا عظیم گروپ) شکیل احمد، صدر آر آئی یو جے (رانا عظیم گروپ) طارق عثمانی، صدر آزاد گروپ شکیل قرار اور محبوب الرحمن تنولی، صدر پارلیمانی رپورٹرز ایسوسی ایشن ایم بی سومرو، جنرل سیکرٹری پی آر اے نوید اکبر پر مشتمل ہو گی۔

جوائنٹ ایکشن کمیٹی ارکان نے نیشنل پریس کلب پر حملے کے خلاف چارٹر اف ڈیمانڈ کی تیاری کے لیے اپنی تجاویز سے آگاہ کیا۔ اجلاس میں طے پایا کہ ان تجاویز کی روشنی میں چارٹر آف ڈیمانڈ کو جلد حتمی شکل دی جائیگی۔

قبل ازیں نیشنل پریس کلب اسلام آباد پر پولیس گردی کے خلاف لاہور پریس کلب کے باہر صحافیوں کا بھرپور احتجاجی مظاہرہ سیاہ پرچم لہرائے گئے۔دور آمریت میں بھر پولیس نے پریس کلب پر حملہ نہیں کیا ۔ واقعہ کے ذمہ داران اعلیٰ پولیس حکام کے خلاف مقدمہ درج کیا جائے۔جوڈیشل انکوائری کرائی جائے۔سیکرٹری جنرل پی ایف یو جے و صدر لاہور پریس کلب ارشد انصاری، صدر سی پی این ای کاظم خان، سینئر نائب صدر ایمنڈ ایاز خان، سابق صدر سی پی این ای سید ارشاد عارف، ہیومن رائٹس کمیشن آف پاکستان کی شریک چیئرپرسن منیرے جہانگیر، صدر پنجاب اسمبلی پریس گیلری کمیٹی خواجہ نصیر، سینئر نائب صدر پی یو جے یوسف رضا عباسی، جنرل سیکرٹری پی یو جے قمر الزمان بھٹی ، جنرل سیکرٹری پی یو جے (دستور) رحمان بھٹہ کا خطاب

نیشنل پریس کلب اسلام آباد پر پولیس گردی کے خلاف پی ایف یوجے کی کال پر ملک بھر کی طرح لاہور پریس کلب میں بھی بھرپور احتجاجی مظاہرہ کیا گیا۔ سیاہ پرچم لہرائے گئے۔ پی ایف یوجے کے سیکرٹری جنرل ارشد انصاری ،سی پی این ای کے صدر کاظم خان ، ایمنڈ کے سینئر نائب صدر ایاز خان ،سابق صدر سی پی این ای سید ارشاد عارف ، ایچ آر سی پی کی کو چیئرپرسن منیزے جہانگیر سمیت صحافی قائدین نے مطالبہ کیا کہ حکومت فوری طورپر نیشنل پریس کلب اسلام آباد پر پولیس گردی کے ذمہ دار اعلی پولیس حکام کے خلاف کارروائی کرے۔ سیکرٹری جنرل پی ایف یوجے و صدر لاہور پریس کلب ارشد انصاری نے اس واقعہ کا مقدمہ درج کرنے کا مطالبہ کیا اور کہا کہ اگر مقدمہ درج نہ کیا گیا تو ہم اس مقدمہ کے اندارج کے لئے ہائیکورٹ میں رٹ دائر کریں گے۔انہوں نے کہا کہ یہ عجیب بات ہے کہ ایک طرف اسلام آباد پولیس نیشل پریس کلب کے اندر گھس کر صحافیوں کو مارتی اور تشدد کا نشانہ بناتی ہے اور پھر وزیر مملکت طلال چودھری معافی مانگنے نیشل پریس کلب پہنچ جاتے ہیں اور غیر مشروط معافی مانگتے ہیں، انہوں نے کہا کہ اس سے زیادہ منافقت ہو نہیں سکتی،انہوں نے کہا کہ حکومت پیکا جیسے کالے قوانین کا نفاذ کر کے آزادی صحافت اور آزادی اظہار پر حملہ آوور ہے جس کے خاتمے کے لئے صحافی کھڑے ہیں،ہم لاٹھیوں اور گرفتاریوں سے گھبرانے والے نہیں، ہمارے بڑوں نے کوڑے اور قید و بند کی سزائیں برداشت کی ہیں اور ہم بھی جیل جانے اور جیل بھرو تحریک چلانے کےلئے تیار ہیں، ہم اسلام آباد میں پارلیمنٹ کے باہر دھرنا دیں گے یہ بھلے ہمیں گرفتار کریں، ہتھکڑی ہمارا زیور ہے، انہوں نے وزیراعظم شہباز شریف سے اس معاملہ کا مستقل حل نکالنے اور پیکا کے قانون کے خاتمے کا مطالبہ کیا۔سی پی این ای کے صدر کاظم خان نے کہا کہ پی ایف یوجے ، سی پی این ای اور ایمنڈ سمیت تمام صحافی تنظیمیں پیکا کے کالے قانون کے خاتمہ کےلئے متحد ہیں۔ سابق صدر سی پی این ای سید ارشد عارف نے کہا کہ پریس کلب آزادی صحافت اور آزادی اظہار رائے کے ادارے ہیں،ماضی کے دور آمریت اور مارشل لاءمیں بھی پولیس کو پریس کلب پر حملہ اور گھسنے کی جرات نہیں ہوئی،انہوں نے کہا کہ اس واقعہ میں اسلام آباد پولیس کے اعلی ذمہ داران کے خلاف کارروائی کی جائے۔ ایمنڈ کے سینئر نائب صدر ایاز خان نے کہا کہ آزادی صحافت پر کوئی حملہ برداشت نہیں کیا جائے گا،اب یہ بات ڈھکی چھپی نہیں رہی کہ پیکا جیسے قوانین یوٹیوبرز کے خلاف نہیں بلکہ صحافیوں کے خلاف ہیں جو کسی بھی صحافتی تنظیم کے لئے قابل قبول نہیں ۔ انسانی حقوق کمیشن پاکستان کی کو چیئرپرسن اور معروف صحافی منیزے جہانگیر نے کہا کہ نیشنل پریس کلب پر پولیس کا دھاوا ایک سنگین حملہ ہے، میڈیا کے ادارے آزادی صحافت اور آزادی اظہار کے ادارے ہیں۔مسائل کے شکار دور آمریت میں بھی عوام اپنے مسئلے پریس کلبوں میں صحافیوں کے سامنے رکھتے تھے مگر اب پولیس پریس کلب آنے والے لوگوں کو گرفتار کرنے کی آڑ میں پریس کلب پر حملہ آوور ہو جاتی ہے جو قابل برداشت نہیں ہے۔انہوں نے کہا اس افسوناک واقعہ کے خلاف پارلیمنٹ میں ایک قرار داد پاس کی جائے جس میں اس بات کی گارنٹی رکھی جائے کہ عوام کے حق اظہار اور پریس کلب میں پریس کانفرنس کرنے کا پورا اختیار ہوگا۔ان کا کہنا تھا کہ پریس کلب ملک میں آزادی اظہار کی علامت ہیں ان پر پولیس کے حملے شہری اور انسانی حقوق پر حملے ہیں۔انہوں نے کہا ماضی میں کوئی پریس کلب پر حملہ کیا اور اسے سیل کیا گیا اور اب معاملہ نیشنل پریس کلب اسلام آباد پر حملہ کی صورت میں سامنے آیا ہے۔ جس کے خلاف انسانی حقوق کمیشن پاکستان صحافی قیادت اور پی ایف یوجے کے ساتھ ہے۔ پنجاب اسمبلی پریس گیلری کے صدر خواجہ نصیر نے کہا کہ آزادی صحافت پر کسی بھی حملے کو روکنے کے لئے پنجاب اسمبلی کے تمام پارلیمانی رپورٹر اپنے قائد اور سیکرٹری جنرل پی ایف یوجے ارشد انصاری کے ساتھ کھڑے ہیں،ہم اس معاملہ میں اسمبلی کی کارروائی کے بائیکاٹ سے لے کر اسلام آباد پارلیمنٹ کے باہر دھرنے میں شرکت کے لئے تیار ہیں۔ پی یوجے کے سینئر نائب صدر یوسف رضا عباسی نے کہا کہ ہم اپنے صدر نعیم حنیف کی قیادت میں پی ایف یوجے کی اس تحریک کا ہراول دستہ ہیں، کاظم خان ، ایاز خان اور ارشد انصاری ہمیں اس جدوجہد کے حوالے سے جو ذمہ داری دیں گے ہم اس پر عمل کریں گے۔ پی یوجے ( دستور ) کے جنرل سیکرٹری رحمان بھٹہ نے کہا کہ کسی ایک صحافی اور صحافتی ادارے پر حملہ پوری صحافی کمیونٹی پر حملہ ہے اور اس معاملہ میں پی یوجے ( دستور ) اپنی صحافی برداری کے ساتھ کھڑی ہے۔ پی یوجے کے جنرل سکریٹری قمرالزمان بھٹی نے کہا کہ دنیا بھر میں عدالتیں اور پریس کلب ہی دو ایسے ادارے ہیں جہاں لوگ اپنے مسائل کے حل کے لئے جاتے ہیں اگر کوئی شہری یا شہری تنظیمیں یا مظاہرین کسی مسئلہ پر پریس کلب جاتے ہیں تو پولیس کا یہ کام نہیں کہ انہیں گرفتار کرنے کے نام پر پریس کلب پر حملہ کیا جائے اور انہیں کوریج دینے والے صحافیوں کو مار جائے، انہوں نے اس افسوناک واقعہ کی تحقیقات کے لئے جوڈیشل کمیشن بنانے کا مطالبہ بھی کیا۔ احتجاجی مظاہرے کے موقع پر جماعت اسلامی لاہور کے جنرل سیکرٹری قیصر شریف ، مرکزی مسلم لیگ کے مرکزی سیکرٹری اطلاعات تابش قیوم ،،پاکستان کسان اتحاد ( خالد کھوکھر ) کے ترجمان سعید جعفر ڈوگر ، سینئر صحافی رئیس انصاری ، پی ایف یوجے کے ممبر ایف ای سی شفیق اعوان ، اعجاز مقبول ، پی یوجے کے نائب صدر ندیم زعیم ، لاہور پریس کلب کے سینئر نائب صدر افضال طالب ، جوائنٹ سیکرٹری عمران شیخ، خزانچی سالک نواز ،، ممبران گورننگ باڈی سید بدر سعید، سرمد فرخ خواجہ، رانا شہزاد احمد، شاہدہ بٹ،سول سوسائٹی کے رہنما شیخ سلطان ، سینئر صحافی رفیق خان ، امجد عثمانی ، انیس گل ، ، شعیب سلیم ، منصور بخاری ، صلاح الدین بٹ ، عامر سلامت ، سید شاکر علی ، جاوید ہاشمی، سعید لودھی ، حارث مرغوب ، عامر نوید چودھری ، خالد قیوم ، ظہیر شہزاد ،ذالفقار علی مہتو، عطیہ زیدی ، فراز فاروقی ، عمر شریف ، عمر حفیظ ، محمد علی ،محسن بلال ، جمال احمد، عدنان شیخ ، ظہیر شیخ ، جمیل شیخ ،محسن اکرم ،غضنفر اعوان ، مجتبیٰ باجوہ ، ڈاکٹر شجاعت حامد، عندلیب اسد سمیت صحافیوں کی کثیر تعداد شریک ہوئی۔ اس موقع پر صحافیوں نے آزادی صحافت کے حق اور پولیس گردی کے خلاف شدید نعرے بازی کی۔