شکارپور کے قریب قومی شاہراہ بائی پاس کے مقام پر ٹرک حادثے میں 7 افراد جاں بحق اور 6 افراد زخمی ہو گئے۔
پولیس کے مطابق سبزی سے لدے ٹرک نے سڑک کنارے سوئے ہوئے افراد کو روند ڈالا، جاں بحق افراد کی لاشوں اور زخمیوں کو سول اسپتال منتقل کر دیا گیا ہے،پولیس حکام کا کہنا ہے ابتدائی طور پر حادثہ تیز رفتاری کا نتیجہ معلوم ہوتا ہے، تاہم ٹرک کو تحویل میں لیکر تحقیقات کا آغاز کر دیا گیا ہے اور مکمل تحقیقات کے بعد ہی کسی حتمی نتیجے پر پہنچ سکتے ہیں۔
حماس دائمی امن کیلئے تیار ہے، امریکا کے صدر ڈونلڈ ٹرمپ نے حماس کی جانب سے جاری بیان کی بنیاد پر بیان جاری کردیا۔
مختصر ویڈیو پیغام میں صدر ٹرمپ نے کہا کہ ان ممالک کا شکریہ جنہوں نے اس کام کو ممکن بنانے میں مدد کی، ڈونلڈ ٹرمپ نے اسرائیل سے مطالبہ کیا ہے کہ غزہ پر بمباری فوری طور پر روکی جائے تاکہ یرغمالیوں کی محفوظ اور جلد رہائی ممکن بنائی جائے،اس صورتحال میں یرغمالیوں کی رہائی بہت زیادہ خطرناک ہوگی،تفصیلات طے کی جارہی ہیں، یہ صرف غزہ کی حد تک نہیں ہے، یہ مشرق وسطیٰ میں طویل عرصے سے جاری امن کی کوششوں سے متعلق ہے۔
دوسری جانب قطر کی جانب سے حماس کے بیان کا خیر مقدم کیا گیا ہے، مصر نے بھی حماس کے ردعمل کے بعد مثبت پیش رفت کی امید ظاہر کی ہے۔قطری وزارت خارجہ نے کہا ہے کہ غزہ جنگ کے خاتمے تک پہنچنے کے منصوبے پر بات چیت جاری رکھنے کے لیے ثالث مصر اور امریکا کے ساتھ رابطہ کاری شروع کر دی ہے۔دوسری جانب مصر کا کہنا ہے کہ ٹرمپ کے غزہ پلان پر حماس کے ردعمل کے بعد مثبت پیش رفت کی امید ہے۔ مصر کی وزارت خارجہ کا کہنا ہے کہ عرب ممالک، امر یکا اور یورپی ممالک کے ساتھ جنگ زدہ علاقے میں مستقل جنگ بندی تک پہنچنے کے لیے تمام کوششیں بروئے کار لائی جائیں گی۔
واضح رہے کہ حماس نے امریکا کے صدر ڈونلڈ ٹرمپ کا بیس نکاتی غزہ امن منصوبہ بڑی حد تک قبول کرلیا ہے،حماس نے یرغمال اسرائیلی قیدیوں کی رہائی اور غزہ کا کنٹرول فلسطینی اتھارٹی کے سپرد کرنے پر آمادگی ظاہر کردی،حماس کا کہنا ہے کہ وہ ہتھیار مستقبل کے فلسطینی حکمرانوں کے حوالے کرے گی۔
کراچی ائیرپورٹ پر کسٹمز نے بغیر ڈیوٹی ادا کیے 10 کروڑ 30 لاکھ روپے مالیت کے لیپ ٹاپس، آئی پیڈز، آئی فونز، میک بُکس، پلے اسٹیشنز اور میموری کارڈز ضبط کر لیے۔
ایف بی آر کی طرف سے جاری کردہ اعلامیے کے مطابق کلکٹوریٹ آف کسٹمز ائیرپورٹ کراچی نے فوری طور پر دو ایف آئی آر درج کروا کر اس جرم میں ملوث کمپنی کے ملازمین کو گرفتار کر لیا،یہ الیکٹرانک سامان کو گڈز ڈیکلریشن جمع کرائے بغیر غیر قانونی طور پر کسٹمز ڈیوٹی اور ٹیکس ادا کیے بغیر باہر نکالی جا رہی تھیں، اس فراڈ میں ایک غیر ملکی گراؤنڈ ہینڈلنگ کمپنی کے ملازمین اور بدعنوان درآمد کنندگان ملوث پائے گئے،جعلی طریقہ کار سے مجموعی طور پر پانچ کھیپیں غیر قانونی طور پر باہر نکالی گئیں، یہ تمام کھیپیں میسرز پیر جیلانی جنرل ٹریڈنگ ایل ایل سی دوبئی نے بھیجی تھیں، ان کھیپوں کو کسٹمز کے WeBOC سسٹم سے چھپایا گیا اور جی ڈی دائر نہ کرکے جعلی گیٹ پاسز کے ذریعے کلیئرنس ممکن بنائی گئی۔،پانچوں کھیپوں کی غیر قانونی کلیئرنس پر کسٹمز ڈیوٹی اور ٹیکس چوری کی کُل تخمینہ شدہ مالیت 38 کروڑ 40 لاکھ روپے ہے، کمپنی ملازمین نے قیمتی الیکٹرانکس اشیا کو غیر قانونی طور پر باہر نکالنے کیلئے اپنے کمپیوٹرائزڈ iCargo سسٹم کو استعمال کیا۔
حکام نے بتایاکہ صرف 1 کنسائنمنٹ سے 258 آئی فون 16، 101 لیپ ٹاپس، 246 ٹیبلیٹس، 102 آئی پیڈز، 46 پلے اسٹیشنز اور 20 ہزار میموری کارڈ برآمد کیے گئے،گیٹ پاس جاری کرنے والی خاتون زیرحراست ہیں، خاتون کے مطابق انہیں اوپر سے ہدایات مل رہی تھیں جبکہ نجی کارگو ٹرمینل کا ایک ماہ سے زائد سی سی ٹی وی ریکارڈ دینے میں ہچکچاہٹ سے کام لے رہا ہے، مزید ایف آئی آرز اور گرفتاریاں بھی متوقع ہیں۔ چئیرمین ایف بی آر راشد لنگڑیال نے کہا ہے کہ اپنی ذمہ داریاں پوری کرنے میں ناکام رہنے والے کسٹمز اہلکار کسی رعایت کے مستحق نہیں ہوں گے
بالی وڈ اداکار اکشے کمار کی 13 سالہ بیٹی آن لائن ہراسانی کا نشانہ بن گئیں، اداکار نے حکومت سے بڑی اپیل کر دی۔
اکشے کمار نے بھارت میں بڑھتے ہوئے سائبر کرائم کے خطرے پر روشنی ڈالتے ہوئے اپنی 13 سالہ بیٹی کے ساتھ پیش آئے ایک افسوسناک واقعے کا انکشاف کیا ہے،بھارتی میڈیا کے مطابق جمعہ کو ممبئی میں منعقدہ ایک سائبر آگاہی پروگرام کی افتتاحی تقریب سے خطاب کرتے ہوئے اکشے کمار نے بتایا کہ چند ماہ قبل ان کی بیٹی ایک آن لائن ویڈیو گیم کھیل رہی تھی، جہاں ایک نامعلوم شخص نے بیٹی سے نازیبا تصاویر کا مطالبہ کیا،اکشے کمار نے کہا کہ میں آپ سب کو ایک چھوٹا سا واقعہ سنانا چاہتا ہوں جو چند ماہ پہلے میرے گھر میں پیش آیا۔ میری بیٹی ایک ویڈیو گیم کھیل رہی تھی، اور کچھ ویڈیو گیمز ایسے ہوتے ہیں جو آپ کسی اور کے ساتھ کھیل سکتے ہیں۔ یعنی آپ کسی انجانے شخص کے ساتھ کھیل رہے ہوتے ہیں، گیم کے دوران کبھی کبھار وہاں سے پیغام بھی آتا ہے۔ میری بیٹی بھی گیم کھیل رہی تھی کہ اسے ایک شخص کی جانب سے پیغام موصول ہوا کہ آپ لڑکے ہیں یا لڑکی؟ تو اس نے جواب دیا لڑکی۔ اس کے بعد اس شخص نے میسج بھیجا کہ کیا آپ اپنی برہنہ تصاویر بھیج سکتی ہیں؟ میری بیٹی نے فوراً گیم بند کر دیا اور جا کر اپنی ماں کو بتایا۔ یہ سب کچھ ایسے ہی شروع ہوتا ہے۔
اکشے کمار نے کہا کہ یہ بھی سائبر کرائم کا حصہ ہے۔ میں مہاراشٹرا کے وزیراعلیٰ سے گزارش کروں گا کہ ساتویں سے دسویں جماعت تک اسکولوں میں ہر ہفتے ایک سائبر پیریڈ رکھا جائے، تاکہ بچوں کو اس بارے میں آگاہی دی جا سکے۔ آپ سب جانتے ہیں کہ یہ جرم اب گلی کے جرائم سے بھی بڑا بنتا جا رہا ہے،حکومت کو سائبر ایجوکیشن کو لازمی نصاب کا حصہ بنانا چاہیے تاکہ بچے بدلتی ہوئی ڈیجیٹل دنیا میں محفوظ رہ سکیں۔
اسلام آباد ہائیکورٹ نے انجینیئر محمد علی مرزا کو اسلامی نظریاتی کونسل کی قرارداد میں گستاخ کہنے کے خلاف درخواست پر اٹارنی جنرل سے 5 نومبر کو عدالتی معاونت طلب کر لی جبکہ اسلامی نظریاتی کونسل، ایف آئی اے اور این سی سی آئی اے کو بھی نوٹس جاری کرتے ہوئے جواب داخل کرانے کا حکم دیا۔
اسلام آباد ہائیکورٹ کے جسٹس محسن اختر کیانی نے ڈاکٹر اسلم خاکی کی درخواست پر سماعت کی۔ درخواست گزار ذاتی حیثیت میں پیش ہوئے اور کہا کہ اسلامی نظریاتی کونسل میں مستند علما تھے، انہوں نے کہا وہ گستاخ ہے۔ عدالت نے پوچھا آپ ملزم کا کیسے دفاع کر رہے ہیں؟ ملزم خود اسلامی نظریاتی کونسل کی قرار داد کوچیلنج کیوں نہیں کر رہا؟ درخواست گزار نے کہا ایسے فتوے پہلے مجھ پر بھی لگے ہیں، میں بھی اس طرح کے معاملے سے گزر چکا ہوں۔انہوں نے مؤقف اختیار کیا کہ انجینیئر محمد علی مرزا نے سب کی منجی ٹھوکی ہوئی ہے اس لیے اسے ٹارگٹ کیا جا رہا ہے، اس طرح تو وہ اس کو ماردیں گے، اسے کم از کم پہلے کورٹ میں تو پیش کیا جائے، بغیر وضاحت کے کسی کو کیسے مورد الزام ٹھہرایا جا سکتا ہے؟
جسٹس محسن اختر کیانی نے کہا لیکن اُن پر مقدمہ تو جہلم میں درج ہے۔ درخواست گزار نے کہا اسلامی نظریاتی کونسل یہاں ہے، میں نے اس کی قردارار کو چیلنج کیا ہے۔عدالت نے پوچھا معاملہ اسلامی نظریاتی کونسل کیسے پہنچا کسی نے ریفر کیا تھا ؟ درخواست گزار نے بتایا نیشنل سائبر کرائم انویسٹی گیشن ایجنسی نے معاونت کے لیے مراسلہ اسلامی نظریاتی کونسل کو بھیجا حالانکہ قانون کے مطابق صدر، گورنر یا پارلیمنٹ اسلامی نظریاتی کونسل کو رائے مانگنے کے لیے لکھ سکتی ہے۔ عدالت نے کہا ریکارڈ آ جائے تو پتہ چل جائے گاالزامات کیا ہیں اور بیان تھا کیا؟ اٹارنی جنرل کو سن کر پہلے درخواست کے قابل سماعت ہونے کا فیصلہ کریں گے۔ کیس کی سماعت پانچ نومبر تک ملتوی کر دی گئی۔
پاکستان سول ایوی ایشن اتھارٹی نے ملکی ایئر لائن سیرین ایئر (پرائیویٹ) لمیٹڈ کے فضائی آپریٹر سرٹیفکیٹس فوری طور پر معطل کر دیے ہیں۔ یہ اقدام اس بنا پر کیا گیا کہ سیرین ایئر اپنی فلیٹ کے لازمی کم از کم طیاروں کی شرط پر پورا اترنے میں ناکام رہی ہے اور اس وقت اس کے پاس کوئی بھی قابلِ پرواز طیارہ موجود نہیں ہے۔
جمعرات 2 اکتوبر 2025 کو جاری کردہ حکم نامے میں سول ایوی ایشن اتھارٹی نے واضح کیا کہ سیرین ایئر اپنی آپریشنل استعداد برقرار رکھنے میں ناکام رہی ہے، جس کے باعث وہ مسافروں کے محفوظ فضائی سفر کو یقینی بنانے کے قابل نہیں رہی۔نوٹیفکیشن کے مطابق، سیرین ایئر کو جاری کردہ دونوں ایئر آپریٹر سرٹیفکیٹس نمبر AOC-031/16-AL اور AOC-032/17-CH کو پی سی اے اے قوانین و ضوابط کے تحت فوری طور پر معطل کیا گیا ہے۔ اس فیصلے کا اطلاق حکم نامے کے اجرا کے ساتھ ہی ہوگیا ہے۔مزید برآں، سول ایوی ایشن اتھارٹی نے سیرین ایئر کو ہدایت کی ہے کہ وہ اپنے معطل شدہ سرٹیفکیٹس فوراً اتھارٹی کے حوالے کرے تاکہ ضروری اندراجات مکمل کیے جا سکیں۔یہ نوٹیفکیشن ڈائریکٹر جنرل پی سی اے اے کی جانب سے ڈائریکٹر فلائٹ اسٹینڈرڈز کی نگرانی میں جاری کیا گیا۔
پاکستان مرکزی مسلم لیگ کے زیر اہتمام گلوبل صمود فلوٹیلا پر اسرائیلی حملے کیخلاف اور اہل غزہ کے ساتھ یکجہتی کے لئے ملک گیر احتجاج کیا گیا، لاہور میں چوبرجی چوک پر بڑے احتجاجی مظاہرے سے حافظ طلحہ سعید و دیگر نے خطاب کیا، خطبات جمعہ میں علما کرام نے یکجہتی غزہ کو موضوع بنایا،احتجاجی مظاہروں و ریلیوں میں مختلف شعبہ ہائے زندگی سے تعلق رکھنے والے ہزاروں افراد نے بھرپور شرکت کی۔ شرکاء نے ہاتھوں میں بینرز اور پلے کارڈز اٹھا رکھے تھے جن پر اسرائیلی جارحیت کے خلاف نعرے درج تھے۔ہاتھوں میں فلسطینی پرچم اٹھائے شرکا اسرائیل کے خلاف نعرے بازی کرتے رہے،ننکانہ میں مسلم ویمن لیگ کی جانب سے ریلی نکالی گئی،مرکزی مسلم لیگ کے رہنماؤں کا کہنا تھا کہ گلوبل صمد فلوٹیلا پر اسرائیلی حملہ اور شرکا کی گرفتاری کھلی دہشتگردی،اسرائیل جنگی جرائم کا مرتکب،اسلامی ممالک دوہرا معیار ترک کر کے اہل غزہ کی کھل کر مدد کریں،فلسطین فلسطینیوں کا ہے انکو کوئی بے دخل نہیں کر سکتا.
پاکستان مرکزی مسلم لیگ کے زیر اہتمام لاہور،اسلام آباد،کراچی،پشاور، فیصل آباد، بہاولپور،ملتان،حیدرآباد،کوئٹہ، سکھر،سیالکوٹ، شیخوپورہ، گوجرانوالہ،میانوالی، ننکانہ، چنیوٹ، اوکاڑہ،ساہیوال، خانیوال،مردان، سوات، چترال، مالا کنڈ،لاڑکانہ، نواب شاہ،خیر پور ،سرگودھا،گجرات، منڈی بہاؤالدین،حافظ آباد،خوشاب، چکوال،جہلم،راولپنڈی، مانسہرہ، ایبٹ آباد،رحیم یار خان ،وہاڑی، بورے والاسمیت دیگر چھوٹے بڑے شہروںمیں گلوبل صمود فلوٹیلا پر حملے اور اہل غزہ پر اسرائیلی بربریت کے خلاف احتجاجی ریلیاں نکالی گئیں جس میں خواتین، بچوں سمیت تمام تر مکاتب فکر کے افراد شریک ہوئے،چوبرجی چوک لاہور میں مرکزی مسلم لیگ کے نائب صدر حافظ طلحہ سعید، حافظ عبدالرؤف،مزمل اقبال ہاشمی و دیگر نے خطاب میں کہا کہ اسرائیل دنیا کے امن کے لیے دن بدن سب سے بڑا خطرہ بنتا جارہا ہے۔ غزہ کا محاصرہ توڑنے کے لیے نکلنے والے گلوبل صمود فلوٹیلا پر حملہ اس حقیقت کی بڑی دلیل ہے، افسوس ہے کہ انسانی حقوق کی تنظیمیں اور عالمی ادارے خاموش تماشائی بنے ہوئے ہیں، حکومت پاکستان سے مطالبہ کرتے ہیں کہ فوری طور پر او آئی سی کا اجلاس بلایا جائے۔ اسرائیلی جارحیت کو روکنے کے لیے تمام مسلم ممالک کو متحد ہونا ہوگا۔اسلام آباد میں نیشنل پریس کلب کے باہر مرکزی مسلم لیگ نے احتجاجی مظاہرہ کیا،کراچی میں پریس کلب کے باہر احتجاجی ریلی و مظاہرے سے مرکزی مسلم لیگ کے رہنماؤں فیصل ندیم ،احمد ندیم اعوان و دیگر نے خطاب کیا،ننکانہ میں مسلم ویمن لیگ نے حرا چوک سے گول چکر تک احتجاجی ریلی نکالی جس میں خواتین اور طالبات کی بڑی تعداد شریک ہوئی،پشاور میں صوبائی صدر خیبر پختونخوا یاور آفتاب کی قیادت میں نماز جمعہ کے بعد فوارہ چوک سے پریس کلب تک احتجاجی مارچ کیا گیا، جس میں شرکا نے اسرائیل کیخلاف نعرے بازی کی،پریس کلب پشاور پر احتجاجی مارچ میں عالمی مجرم نیتن یاہو کے پتلے کو علامتی پھانسی اور نذر آتش کیا گیا،کوئٹہ میں بھی مرکزی مسلم لیگ کی جانب سے اسرائیل کے خلاف اور اہل غزہ کے حق میں احتجاجی مظاہرہ کیا گیا، فیصل آباد میں مرکزی مسلم لیگ کے احتجاجی مظاہرے میں عوام کی کثیر تعداد شریک ہوئی، مظاہرین نے فلسطینی عوام کے ساتھ یکجہتی کا عہد، اسرائیلی بربریت کی بھرپور مذمت کی، مفتی عبدالرحمان عابد،محمد احسن تارڑ نے مظاہرے کے شرکاء سے خطاب کیا،مرکزی مسلم لیگ راولپنڈی کے زیرِ اہتمام گلوبل صمود فلوٹیلا پر اسرائیلی حملے اور غزہ میں جاری قتلِ عام کے خلاف احتجاجی مظاہرہ کیا گیا،مظاہرے کی قیادت مرکزی مسلم لیگ راولپنڈی کے سیکرٹری جنرل انجینئر مبین صدیقی نے کی۔ شہریوں کی بڑی تعداد نے شرکت کرتے ہوئے فلسطین کے حق میں اور اسرائیل و امریکہ کے خلاف پرجوش نعرے لگائے۔بہاولنگر میں مدرسہ شہداء سے کمرشل کالج چوک تک مرکزی مسلم لیگ نے احتجاجی ریلی نکالی، ضلعی جنرل سیکرٹری حافظ امیر حمزہ رافع، جنرل سیکرٹری بہاولنگر سعید عامر و دیگر نے ریلی کی قیادت کی، مرکزی مسلم لیگ ضلع منڈی بہاؤالدین کے زیر اہتمام تحفظ گلوبل صمود فلوٹیلا احتجاجی مظاہرہ کیا گیا،جس کی قیادت حافظ محمد نعیم نے کی، پاکپتن سٹی میں احتجاجی مظاہرہ سے اقبال سلفی و دیگر نے خطاب کیا، مرکزی مسلم لیگ سٹی قصور کے زیرِ اہتمام احتجاجی مظاہرے میں سینکڑوں افراد نے شرکت کی اور فلسطین کے حق میں فلک شگاف نعرے لگائے،احتجاجی مظاہرے سے بشیر وڑائچ و دیگر نے خطاب کیا، مرکزی مسلم لیگ سرگودھا نے بھی گلوبل صمود فلوٹیلا پر حملے اور غزہ میں جاری مسلسل قتل عام کے خلاف ایک پرامن احتجاجی مظاہرہ کیا ،جس سے عبدالحنان مکی ودیگر نے خطاب کیا، مرکزی مسلم لیگ ٹنڈو الہ یار کی جانب سے احتجاجی مظاہرہ کیا گیا،لیہ میں ابوزکریا گجر کی قیادت میں ریلی نکالی گئی، گوجرانوالہ میں مرکزی مسلم لیگ کے ڈپٹی سیکرٹری جنرل انجینئر حارث ڈار، شیخ فیاض احمد،محمد راشد سندھو و دیگر نے احتجاجی مظاہرے سے خطاب کیا، مرکزی مسلم لیگ ضلع مٹیاری کے زیر اہتمام صمود فلوٹیلا پر اسرائیلی حملے کے خلاف پریس کلب کے سامنے احتجاجی مظاہرہ کیا۔ مرکزی مسلم لیگ بہاولپور کی جانب سے گلوبل صمود فلوٹیلا پر اسرائیلی حملے کے خلاف شکار پوری گیٹ سے فوارہ چوک بہاولپور تک احتجاجی مارچ کیا گیا، مرکزی مسلم لیگ ضلع نوشہر و فروز کی جانب سے احتجاجی مظاہرے میں شہری بڑی تعداد میں شریک ہوئے، نارووال،ٹوبہ ٹیک سنگھ، ڈیرہ مراد جمالی، مظفر گڑھ، ہڑپہ،غازی آباد،ساہیوال، وہاڑی،بورے والا سمیت دیگر شہروں میں مرکزی مسلم لیگ کی جانب سے احتجاجی مظاہروں و ریلیوں کا انعقاد کیا گیا.
چرچ آف انگلینڈ کی 1400 سالہ تاریخ میں پہلی بار ایک خاتون کو آرچ بشپ منتخب کر لیا گیا ہے۔
خبر رساں ادارے رائٹرز کے مطابق 63 سالہ ڈیم سارہ مولالی کو باضابطہ طور پر آرچ بشپ آف کینٹربری منتخب کیا گیا ہے۔ وہ اس عہدے پر فائز ہونے والی 106 ویں مذہبی رہنما ہیں۔چرچ آف انگلینڈ میں اس سے قبل خواتین کے لیے اس عہدے پر فائز ہونا ممکن نہیں تھا، تاہم 2014 میں خواتین کو بشپ بنانے کی اجازت دی گئی جس کے بعد یہ تاریخی فیصلہ سامنے آیا ہے۔ڈیم سارہ مولالی گزشتہ سات برسوں سے لندن کی بشپ کے طور پر خدمات انجام دے رہی تھیں۔ اس سے قبل وہ ایک پیشہ ور نرس رہ چکی ہیں اور 2000 کی دہائی کے اوائل میں برطانیہ کی چیف نرسنگ آفیسر کے طور پر کام کرتی رہی ہیں۔ 2002 میں انہوں نے مذہبی خدمت کا راستہ اختیار کیا اور پادری بن گئیں۔ وہ برطانوی ایوان بالا (ہاؤس آف لارڈز) کی رکن بھی رہ چکی ہیں۔
چرچ آف انگلینڈ کے آرچ بشپ کا عہدہ گزشتہ تقریباً ایک سال سے خالی تھا، جب سابق آرچ بشپ جسٹن ویلبی نے ایک جنسی اسکینڈل کے بعد استعفیٰ دے دیا تھا۔عالمی ماہرین مذہبی امور کے مطابق سارہ مولالی کا انتخاب چرچ آف انگلینڈ کے لیے ایک انقلابی اور تاریخی لمحہ ہے، جو نہ صرف ادارے میں خواتین کی شمولیت کو مزید تقویت دے گا بلکہ دنیا بھر کے مسیحی حلقوں میں اس کی حیثیت ایک نمایاں پیش رفت کے طور پر دیکھی جا رہی ہے۔
اسرائیل نے گلوبل فلوٹیلا کے 4 اطالوی کارکنوں کو ڈی پورٹ کردیا۔
غیر ملکی خبر رساں ادارے کے مطابق اسرائیلی وزارت خارجہ کا کہنا ہے کہ دیگر کارکنوں کی ملک بدری کے لیے اقدامات جاری ہیں،اسرائیلی وزارت خارجہ نے کہا کہ زیرِ حراست تمام فلوٹیلا کارکن محفوظ اور صحت مند ہیں۔
واضح رہے کہ غزہ کے لیے امداد لے جانے والے گلوبل صمود فلوٹیلا کی آخری کشتی کو بھی اسرائیل نے قبضے میں لے لیا تھا،عرب میڈیا کے مطابق پولینڈ کے جھنڈے والی اس کشتی پر 6 افراد سوار تھے،اسرائیلی فوج نے گلوبل صمود فلوٹیلا کی تمام کشتیوں کو قبضے میں لے کر تقریباً 500 کارکنان کو گرفتار کرلیا ہے، جن میں ماحولیاتی کارکن گریٹا تھنبرگ، بارسلونا کی سابق میئر ادا کولو اور یورپی پارلیمنٹ کی رکن ریما حسن بھی شامل ہیں،اسرائیلی جیل انتظامیہ کے مطابق 200 سے زائد کارکنان کو صحرائے نقب کی جیل منتقل کر دیا گیا ہے، جہاں ان کے خلاف آبادی و امیگریشن اتھارٹی کے تحت کارروائی ہوگی۔
پیپلز پارٹی کے چیئرمین بلاول بھٹو زرداری نے گلوبل صمود فلوٹیلا کو اسرائیل کی جانب سے روکے جانے پر ردعمل کا اظہار کردیا۔
بلاول بھٹو زرداری نے کہا ہے کہ غزہ جانے والا کھانا اور دوا کوئی خطرہ نہیں، اسرائیل نے ڈاکٹروں اور رضاکاروں کو حراست میں لے کر انسانیت پر کھلا حملہ کیا ہے اسرائیل نے پاکستانی سینیٹر مشتاق احمد خان کو گرفتار کر کے عالمی قوانین کی خلاف ورزی کی،بلاول بھٹو زرداری نے گلوبل صمود فلوٹیلا سے گرفتار تمام افراد کی رہائی کا مطالبہ بھی کیا ہے،اُنہوں نے غزہ کے لیے انسانی راہداری اور فلسطین کے لیے انصاف کا بھی مطالبہ کیا ہے۔
دوسری جانب اسرائیل نے فلوٹیلا کے 200 افراد کو صحرائے نقب کی جیل منتقل کردیا،اسرائیلی میڈیا کے مطابق ڈی پورٹ کیے جانے تک فلوٹیلا کے امدادی کارکنان جیل میں قید رہیں گےگلوبل صمود فلوٹیلا کی آخری کشتی کو بھی اسرائیل نے قبضے میں لے لیا،پاکستان کے سابق سینیٹر مشتاق احمد خان کی جیل منتقلی کی ابھی تصدیق نہیں ہوسکی ہے کشتیوں کو قبضے میں لینے اور گرفتاریوں کے خلاف دنیا بھر میں احتجاج جاری ہے۔