شاہ محمو دقریشی نے کہا کہ ن لیگ میں گینگ آف فور فیصلے کر رہا ہے، شاہد خاقان عباسی نون لیگ کے ایکٹنگ صدر ہوں گے
باغی ٹی وی کی رپورٹ کے مطابق ملتان میں میڈیا سے گفتگو کرتے ہوئے وزیر خارجہ شاہ محمود قریشی نے کہا کہ گندم کی خریداری کا آغاز ہو گیا ہے ،باردانہ ملے گا،جہاں ضلعی انتظامیہ کو دقت آ رہی ہے اسکی نشاندہی کریں، ازالہ کیا جائے گا، انہوں نے کہا کہ ہر کاشتکار کی گندم خریدی جائے گی، انہوں نے کہا کہ وزیر اعلیٰ کی اراکین اسمبلی سے نشست ہوئی اس میں جو معاملات اٹھائے گئے ان پر اقدامات اٹھائے جائیں گے. وزیر اعلیٰ ہر ماہ اراکین اسمبلی سے ملیں گے. وزیر اعلیٰ آٹھ مئی کو دوبارہ اسلام آباد آئیں گے اور اراکین اسمبلی سے ملیں گے بلدیاتی نظام پر بریفنگ ہو گی. انہوں نے کہا کہ جب الیکشن ہوتا ہے تو ایک گورنمنٹ کو پانچ سال کا مینڈیٹ دیا جاتا ہے، اپوزیشن کو مینڈیٹ کا احترام کرنا چاہئے ،پی پی اور ن لیگ کے مینڈیٹ کا احترام کیا گیا. انہوں نے کہا کہ ن کی قیادت ہمیں بتائے کہ رات کو یہ تبدیلی لائی گئی ،جب ان کے اراکین سے رابطہ کیا گیا تو ان کو بھی علم نہیں تھا وہ بے خبر تھے. گینگ آف فور ن لیگ میں فیصلے کررہا ہے. شہباز شریف لیڈر آف اپوزیشن رہ سکتے ہیں ان کی صحت کو کچھ نہیں ہوتا تو پی اے سی جو منتوں سے حاصل کی تھی اس سے کیوں بھاگ گئے، پیپلز پارٹی ن لیگ کی اتحادی جماعت ہے وہ بھی کہہ رہی ہے کہ رانا تنویر کی نامزدگی پر کوئی رابطہ نہیں کیا گیا. ضروری نہیں کہ انہیں قبول کیا جائے.
