Author: ممتاز حیدر

ریڑھ کی ہڈی کے آپریشن شدہ مریض کو سوات پولیس کی جانب سے اسپتال سے گرفتار کرنے پر سپریم کورٹ نے خیبر پختونخوا پولیس پر شدید برہمی کا اظہار کیا۔

جسٹس حسن اظہر رضوی کی سربراہی میں 2 رکنی بینچ نے کیس کی سماعت کی،دوران سماعت جسٹس حسن اظہر رضوی نے استفسار کیا کہ کیا پولیس نے مریض کی گرفتاری سے قبل اسپتال یا ڈاکٹر سے اجازت لی؟ کیا پولیس بستر پر موجود مریض کو ایسے گرفتار کر سکتی ہے؟ ملزم کا ریڑھ کی ہڈی کا آپریشن ہوا تھا جس کے بعد ملزم چل نہیں سکتا،جسٹس شہزاد ملک نے ریمارکس دیتے ہوئے کہا کہ کے پی پولیس نے رپورٹ میں لکھا کہ ملزم آپریشن کے بعد صحتیاب نہیں تھا، ملزم برا انسان ہوگا لیکن اس کے کچھ حقوق بھی ہیں۔

سرکاری وکیل نے کہا کہ آج کل تو آپریشن کے دوسرے دن مریض چلنے پھرنے لگ جاتا ہے،جس پر جسٹس شہزاد ملک نے وکیل سے کہا کہ وکیل صاحب ہر کوئی سلطان راہی نہیں ہوتا، ایسا فلموں میں ہوتا ہے جہاں گولیاں لگنے کے بعد بھی ہیرو اٹھ کر کھڑا ہو جاتا ہے،عدالت نے درخواست ضمانت پر ملزم کی فرانزک رپورٹ طلب کرتے ہوئے سماعت 2 ہفتوں تک ملتوی کر دی۔

اسلام آباد: سکیورٹیز اینڈ ایکسچینج کمیشن آف پاکستان نے قومی اسمبلی کی قائمہ کمیٹی برائے تجارت کی ذیلی کمیٹی کی سفارش پر شوگر ملز میں شیئر ہولڈرزکا ڈیٹاجمع کروا دیا۔

نجی ٹی وی کے مطابق پاکستان میں مختلف سیاسی اور دیگرمعروف شخصیات شوگر ملوں میں شیئرز کے مالک ہیں،جن میں حمزہ شہباز شریف، سلمان حمزہ شریف، سالک حسین، مونس الٰہی ، ذکاء اشرف، شجاعت حسین، چوہدری پرویز الٰہی،میاں عامرمحمود اور خواجہ عبد الغنی مجید سمیت دیگر شامل ہیں،قومی اسمبلی کی قائمہ کمیٹی تجارت کی ذیلی کمیٹی میں سکیورٹیز اینڈ ایکسچینج کمیشن آف پاکستان نے شوگر ملز کمپنیوں اور مالکان کی تفصیلات جمع کروادی،ایس ای سی پی کی دستاویزات کے مطابق العربیہ شوگرملز میں حمزہ شہباز اور نصرت شہباز سمیت دیگر شیئرز ہولڈرز ہیں۔ رمضان شوگرملز میں حمزہ شہباز شریف،سلمان حمزہ شریف،نصرت شہباز شیئرز ہولڈرز ہیں،ایس ای سی پی کی دستاویزات کے مطابق پنجاب شوگر ملز کے شیئرز ہولڈرز میں شجاعت حسین اور سالک حسین سمیت دیگر شامل ہیں۔آر وائی کے ملز میں مونس الٰہی اور مخدوم عمر شہریار سمیت دیگر شیئرز ہولڈرز ہیں، دستاویزات کے مطابق ٹنڈواللہ یار شوگر ملز میں خواجہ عبد الغنی مجید 100 فیصد شیئرز کے مالک ہیں۔ اشرف شوگر ملز میں ذکا ءاشرف سمیت دیگر شیئرزہولڈرز ہیں،ایس ای سی پی کے ڈیٹا کے مطابق رحیم یارخان شوگر انڈسٹری میں میاں عامر محمود سمیت دیگر کے شیئرز شامل ہیں۔ مدینہ شوگر ملز میں محمد رشید اور محمد مجتبٰی سمیت دیگر کے شیئرز ہیں۔

دستاویزات کے مطابق فاطمہ شوگر ملز میں عباس مختار، فیصل مختار اور فوادمختار سمیت دیگر کے شیئرز ہیں۔ اتحادشوگر ملزمیں مخدوم ہاشم جوان بخت،مخدوم عمر شہریار سمیت دیگر کے شیئرزہیں۔ایس ای سی پی کے ڈیٹا کے مطابق بلوچ شوگر ملز میں دوست علی مزاری اور طارق علی مزاری شیئرز ہولڈرز ہیں۔اس کے علاوہ چوہدری شوگر ملز میں عبد العزیز عباس شریف،عبد اللہ یوسف شریف، شریف ٹرسٹ جبکہ چیمہ شوگر ملز میں چوہدری انور علی، سردار محمد عارف نکئی اور محمد شفیع سمیت دیگر شیئرز ہولڈرز ہیں۔

واضح رہے کہ چینی کی قیمتوں میں اضافے کی وجوہات کے تعین کے لیے قائم قومی اسمبلی کی قائمہ کمیٹی تجارت کی ذیلی کمیٹی نے ایس ای سی پی سے 81 کمپنیوں کے شئیر ہولڈرز کی مکمل تفصیلات طلب کیں تھیں جو ایس ای سی پی نے 2 ستمبر کو ہونے والے اجلاس میں جمع کروائیں۔

اسلام آباد ہائیکورٹ نے پی ٹی آئی رہنماؤں سینیٹر شبلی فراز اور کنول شوزب کی توہین عدالت کی درخواستیں عدم پیروی پر خارج کر دیں۔

پی ٹی آئی کے دونوں رہنماؤں نے اپنے نام سفری پابندی کی فہرست سے نہ نکالنے پر یہ درخواستیں دائر کی تھیں،تاہم دو بار کیس کال ہونے کے باوجود دونوں رہنماؤں کی جانب سے کوئی وکیل پیش نہ ہوا جس پر جسٹس طارق محمود جہانگیری نے درخواستیں خارج کر دیں۔

واضح رہے کہ دونوں رہنماؤں نے عدالتی حکم پر عمل درآمد نہ ہونے پر توہین عدالت کی درخواستیں دائر کر رکھی تھیں، عدالت نے نام سفری پابندی کی فہرست سے نکالنے کا حکم دیا تھا تا ہم نام نہیں نکالا گیا تھا جس پر دونوں نے توہین عدالت کے درخواست دائر کی تھی آج عدم پیروی کی جانب سے درخواستیں خارج کی گئیں

فیڈرل بورڈ آف ریونیو ٹرانسفارمیشن کے ایجنڈے کے تحت شفافیت، احتساب اور ادارہ جاتی دیانتداری کو اپنی اولین ترجیحات میں شامل رکھے ہوئے ہے۔اصلاحات کے اس عمل کا ایک اہم ستون داخلی جانچ پڑتال کے نظام کو قائم کرنا اور بدعنوانی کے خلاف زیرو ٹالرنس پالیسی اپنانا ہے۔ اس میں ایف بی آر کے عملے کی دیانتداری کی بنیاد پر پروفائلنگ کرنا اور جہاں ضرورت ہو وہاں انضباطی اور فوجداری کارروائی شامل ہے۔

یاد رہے کہ نیلام شدہ گاڑیوں کے غلط استعمال کو روکنے اور کنٹرول میکانزم کو مضبوط بنانے کے لیے ایف بی آر نے اگست 2021 میں اپنے وی بوک (WeBOC) سسٹم میں "آکشن ماڈیول” متعارف کرایا تھا۔ اس نظام کا مقصد ضبط شدہ اسمگل گاڑیوں کی نیلامی کے بعد کسٹمز کی طرف سے جاری کردہ دستاویزات پر متعدد گاڑیوں کی رجسٹریشن کے مسئلے کو حل کرنا تھا۔ اس ماڈیول کے ذریعے موٹر رجسٹریشن اتھارٹیز کو رجسٹریشن سے قبل نیلام شدہ گاڑیوں کی تفصیلات آن لائن تصدیق کرنے کی سہولت دی گئی، جس سے کاغذی ویری فیکیشنز پر انحصار کم ہو گیا۔ اس اقدام کا مقصد ادارہ جاتی کنٹرول کو مضبوط بنانا اور حقیقی خریداروں کو سہولت فراہم کرنا تھا۔تاہم ان ریفامز کے باوجود جولائی 2025 میں اس آکشن ماڈیول کے غلط استعمال کی رپورٹس سامنے آئیں۔ اس پر ایف بی آر نے فوری طور پر انکوائری شروع کی۔ ماڈیول کے آغاز سے اب تک 1,909 گاڑیوں کی تفصیلات سسٹم میں اپ لوڈ کی گئی تھیں۔ تفصیلی جانچ پڑتال کے بعد معلوم ہوا کہ ان میں سے 103 گاڑیاں جعلی یوزر آئی ڈیز کے ذریعے غلط طریقے سے اپ لوڈ کی گئیں۔ ان میں سے 43 اسمگل شدہ گاڑیاں موٹر رجسٹریشن اتھارٹیز کے ذریعے پہلے ہی رجسٹر ہو چکی تھیں، جس سے انہیں بظاہر قانونی حیثیت مل گئی۔ڈیجیٹل آڈٹ اور انٹرنل انوسٹیگیشن کی بنیاد پر ایف بی آر نے ان یوزر آئی ڈیز کی نشاندہی کی جن کے ذریعے یہ جعلسازی کی گئی۔ نتیجتاً 9 جولائی 2025 کو ایف بی آر نے ایک ڈپٹی کلکٹر اور ایک اسسٹنٹ کلکٹر کو معطل کر دیا، جن کےکوائف اس جرم میں استعمال کیے گئے تھے۔

مزید تحقیقات میں انکشاف ہوا کہ یہ سلسلہ ایک بڑے مجرمانہ نیٹ ورک کا حصہ ہے جس میں موٹر رجسٹریشن اتھاریٹز کے افسران اور کار ڈیلرز بھی شامل تھے۔ معاملے کی سنگینی کو دیکھتے ہوئے ایف بی آر نے فیصلہ کیا کہ اس کیس کو صرف اندرونی انضباطی کارروائی تک محدود نہ رکھا جائے ۔ اس سلسلے میں 9 جولائی 2025 کو ایف بی آر نے باضابطہ طور پر ایف آئی اے ، کسٹمز ، اور انٹیلی جنس ایجنسیوں کے سینئر افسران پر مشتمل ایک مشترکہ تحقیقاتی کمیٹی (JIT) بنانے کی درخواست کی۔ تحقیقاتی کمیٹی کو اس سکینڈل کی جامع تحقیقات کا ٹاسک دیا گیا، جس میں کسٹمز کے ڈیجیٹل سسٹم میں کی گئی ہیرا پھیری کی جانچ پڑتال بھی شامل تھی۔10 جولائی 2025 کو ایف بی آر کی طرف سے ایف آئی اے کو کی گئی باضابطہ شکایت کے بعد جے آئی ٹی نے اپنی تحقیقات شروع کیں۔ اس کے نتیجے میں 28 اگست 2025 کو ایف آئی اے نے ان افسران کے خلاف ایف آئی آر درج کی جن کی نشاندہی پہلے ہی کی جا چکی تھی اورجو اسمگل شدہ گاڑیوں کو ناجائز طور پر قانونی حیثیت دلوانے میں ملوث پائے گئے تھے ۔ ان افراد کو آج کے روز ایف آئی اے نے باقاعدہ گرفتار کر لیا ہے۔ یہاں یہ بات بھی قابل ذکر ہے کہ کسٹمز انفورسمنٹ اب تک اس بڑے سکینڈل سے متعلق 7 ایف آئی آر زدرج کرا چکی ہے اور 13 افراد کو گرفتار بھی کیا جا چکا ہے۔

اس کارروائی سے واضح اور دوٹوک پیغام جاتا ہے کہ ادارے کے اندر موجود مجرمانہ عناصر کی نشاندہی کرکے انہیں بے نقاب کیا جائے گا اور قانون کے مطابق ان کے خلاف کارروائی ہوگی۔ ایف بی آر اپنے افسران کو جواب دہ ٹھہرانے اور پبلک سروس کے وقار اور دیانتداری کو ہر سطح پر اور ہر قیمت پر برقرار ر کھنے کے لئے مکمل طور پر پرعزم ہے.