Author: ممتاز حیدر

امریکی صدر ڈونلڈ ٹرمپ نے پاک افغان مسئلے کے حل میں دلچسپی کا اظہار کرتے ہوئے کہا کہ میں پاک افغان مسائل جلد حل کروں گا۔

ملائیشیا کے دارالحکومت کوالالمپور میں جاری آسیان سمٹ سے خطاب کرتے ہوئے ڈونلڈ ٹرمپ نے کہا کہ تھائی لینڈ کمبوڈیا جنگ ان 8 جنگوں میں سے ایک ہے جو میں سے 8 ماہ میں رکوائی ہیں، ایک اور جنگ رکوانا ابھی باقی ہے،میں نے سنا ہے کہ پاکستان اور افغانستان کے درمیان پھر سے مسائل شروع ہوگئے ہیں، مجھے لگتا ہےکہ میں اس مسئلے کے حل کے لیے کچھ کرسکتا ہوں، میں دونوں ممالک کو جانتا ہوں اور میں پاک افغان مسائل جلد حل کروں گا اور میں یہ اچھے طریقے سے کروں گا، پاکستان کے وزیراعظم اور فیلڈ مارشل اچھے لوگ ہیں، مجھے دونوں پر اعتماد ہے، اس میں کوئی شک نہیں ہے کہ ہم پاک افغان مسئلہ جلد حل کر لیں گے۔

اتر پردیش کے دارالحکومت لکھنؤ میں ایک شخص پر الزام ہے کہ وہ شادیوں کا عادی بن چکا ہے۔ یہ شخص نہ صرف اپنی پہلی بیوی کو طلاق دیے بغیر دوسری شادی کر بیٹھا بلکہ اب تیسری شادی کی تیاری میں مصروف ہے۔

تفصیلات کے مطابق، منیش کمل نامی شخص نے اپنی دوسری بیوی انکیتا سریواستو سے رواں سال 7 مارچ کو شادی کی تھی۔ شادی دھوم دھام سے لکھنؤ کے آئی آئی ایم روڈ پر واقع ونائک میرج لان میں انجام پائی۔ انکیتا کے والدین نے بیٹی کی خوشی کے لیے 15 لاکھ روپے نقد اور دیگر سامان ملا کر 35 لاکھ روپے خرچ کیے۔انکیتا نے پولیس کو بتایا کہ شادی کے صرف آٹھ دن بعد ہی منیش اسے اطلاع دیے بغیر گھر سے بھاگ گیا۔ جب وہ غمزدہ حالت میں دہرادون پہنچی تو اسے پتہ چلا کہ منیش نے اپنی پہلی بیوی کو طلاق دیے بغیر اس سے شادی کی تھی۔ مزید تحقیقات میں انکیتا کو یہ بھی معلوم ہوا کہ منیش کے مختلف خواتین سے ناجائز تعلقات ہیں۔

انکیتا کا کہنا تھا “شادی کے بعد سے ہی وہ مجھ سے جہیز کے لیے دباؤ ڈال رہا تھا۔ اس کے اہلِ خانہ نے مجھ سے مزید 10 لاکھ روپے مانگے۔ جب میں نے انکار کیا تو مجھے مارا پیٹا گیا اور مسلسل ذہنی اذیت دی گئی۔ میں چاہتی ہوں کہ پولیس منیش کو سخت سزا دے تاکہ وہ کسی اور عورت کی زندگی برباد نہ کر سکے۔”

انکیتا نے بتایا کہ شادی کے دوسرے ہی دن سے اس کی ساس میرا سریواستو، سسر اور بھابھی نے اسے جہیز کے مطالبے پر پریشان کرنا شروع کر دیا۔ حالات اس قدر بگڑ گئے کہ منیش نے اسے محض آٹھ دن بعد چھوڑ دیا اور غائب ہو گیا۔واقعہ کے بعد انکیتا نے سائرہ پور پولیس اسٹیشن، لکھنؤ میں اپنے شوہر منیش کمل، ساس میرا سریواستو، سسر اور بھابھی کے خلاف مقدمہ درج کرا دیا۔پولیس کے مطابق، شکایت موصول ہونے پر فوری طور پر دفعہ 498-اے (جہیز کے لیے ہراسانی)، 420 (دھوکہ دہی) اور بگامی (دوہری شادی) کی دفعات کے تحت مقدمہ درج کیا گیا ہے۔

انسپکٹر منوج کوری نے میڈیا سے گفتگو میں کہا“متاثرہ خاتون کی درخواست پر مقدمہ درج کر کے تحقیقات شروع کر دی گئی ہیں۔ ملزمان کی تلاش جاری ہے اور متاثرہ کو مکمل انصاف فراہم کیا جائے گا۔”

ذرائع کے مطابق، منیش کمل کا تعلق غازی پور ضلع کے منڈی اکبر آباد رائے گنج سے ہے، جب کہ دوسری بیوی انکیتا سریواستو کا تعلق دہرادون کے ٹرنر روڈ سے ہے۔ پولیس کو شبہ ہے کہ منیش پہلے بھی متعدد خواتین سے رشتہ ازدواج میں بندھ چکا ہے اور مالی فائدہ اٹھانے کے بعد فرار ہو جاتا ہے۔

اترپردیش کے ضلع مرادآباد میں ایک نہایت افسوسناک اور شرمناک واقعہ منظرِ عام پر آیا ہے، جہاں ایک مدرسے کی انتظامیہ نے آٹھویں جماعت میں داخلے کے لیے ایک کمسن لڑکی سے کنوارہ پن کا سرٹیفکیٹ طلب کیا۔ یہ واقعہ پاکبارہ تھانہ حدود میں قائم جامعہ احسان البنات نامی مدرسے میں پیش آیا۔

متاثرہ طالبہ کے والدین، جن کا تعلق چندی گڑھ سے بتایا گیا ہے، نے الزام عائد کیا ہے کہ مدرسہ انتظامیہ کی جانب سے ان کی بیٹی کے کردار پر سوال اٹھایا گیا اور داخلہ دینے سے پہلے "طبی معائنہ” کرانے کا مطالبہ کیا گیا۔ والد کے مطابق داخلہ سیل انچارج شاہجہاں، پرنسپل اور دیگر عملے نے واضح طور پر کہا کہ جب تک لڑکی کا میڈیکل سرٹیفکیٹ جمع نہیں کرایا جاتا، اسے داخلہ نہیں دیا جائے گا۔والد نے الزام لگایا،میری بیٹی میرے ساتھ اکیلی تھی۔ مدرسے نے مجھ سے کہا کہ اس کا میڈیکل ٹیسٹ کرواؤ اور کنوارہ پن کا سرٹیفکیٹ لاؤ، ورنہ ایڈمیشن نہیں ملے گا۔ میں نے انکار کیا تو انہوں نے میری بیٹی کو مدرسے سے نکال دیا اور میرے ساتھ بدتمیزی بھی کی۔

متاثرہ کے والد نے مدرسہ انتظامیہ کے رویے کے خلاف ایک ویڈیو بنا کر سوشل میڈیا پر جاری کی، جو تیزی سے وائرل ہو گئی۔پولیس کے مطابق انہیں 14 اکتوبر کو ڈاک کے ذریعے ایک تحریری شکایت موصول ہوئی تھی۔ شکایت موصول ہونے کے بعد ابتدائی تحقیقات کے نتیجے میں پولیس نے مدرسے کی ایڈمیشن سیل انچارج شاہجہاں، پرنسپل، اور دیگر عملے کے خلاف مقدمہ درج کر لیا ہے۔ پولیس حکام کا کہنا ہے کہ مزید شواہد اکٹھے کیے جا رہے ہیں اور تفتیش مکمل ہونے پر قانونی کارروائی عمل میں لائی جائے گی۔

رپورٹس کے مطابق، جب لڑکی کے والد نے کنوارہ پن سرٹیفکیٹ جمع کرانے سے صاف انکار کیا، تو مدرسہ کے عملے نے ان کے ساتھ نازیبا رویہ اختیار کیا اور انہیں مدرسے سے زبردستی باہر نکال دیا۔ اس واقعے کے بعد متاثرہ خاندان نے انصاف کے لیے پولیس سے رجوع کیا۔ واقعے نے سوشل میڈیا اور عوامی حلقوں میں شدید غم و غصہ پیدا کر دیا ہے۔ شہریوں اور سماجی تنظیموں کا کہنا ہے کہ کسی بھی تعلیمی ادارے کو کسی طالبہ کی عزت و وقار کو مجروح کرنے کا کوئی حق حاصل نہیں۔ شہریوں نے حکومتِ اترپردیش سے مطالبہ کیا ہے کہ واقعے کے ذمے داروں کو سخت ترین سزا دی جائے تاکہ آئندہ کوئی ادارہ اس طرح کی غیر اخلاقی حرکت کرنے کی جرات نہ کرے۔