Author: ممتاز حیدر

وفاقی وزیر دفاع خواجہ آصف نے کہا ہے کہ آبی گزرگاہوں پر کمرشل تعمیرات کی گئیں، دریاؤں کی زمینوں پر ہاؤسنگ سوسائیٹیز بنائی گئیں جس سے حالیہ سیلاب میں تباہی وبربادی ہوئی۔

قومی اسمبلی کا اجلاس اسپیکر قومی اسمبلی ایاز صادق کی زیر صدارت شروع ہوا جس میں حالیہ سیلابی صورتحال پر بحث کی تحریک پیش کی گئی، حالیہ سیلابی صورتحال پر بحث کی تحریک وفاقی وزیر طارق فضل چوہدری نے پیش کی،وفاقی وزیر دفاع خواجہ آصف نے سیلابی صورتحال پر اظہار خیال کرتے ہوئے کہا کہ یہ آفت قدرتی آفت نہیں ہے بلکہ یہ ہمارے اعمال ہیں کہ ہم اتنی بڑی آفت کا سامنا کر رہے ہیں، ہم نے دریاؤں پر ہوٹل بنالیے ہیں۔دریاؤں کے راستوں کو تنگ کرکے ہاؤسنگ سوسائیٹیاں بنائی جا رہی ہیں، نالوں کے اندر پلاٹ بناکر بیچ دیے گئے، جب آپ قدرت کے ساتھ کھلواڑ کریں گے تو فطرت اس کا جواب دے گی۔سیلاب جب بھی آتا ہے تو کہا جاتا ہے اتنے ارب ڈالر کا نقصان ہوگیا، ہر سال سیلاب کا سامنا کرنا پڑتا ہے لیکن ہم دنیا اور یو این سے مدد مانگتے ہیں مگر اپنے اعمال درست نہیں کرتے،دریاؤں کی زمینوں پر ہاؤسنگ سوسائیٹیاں بنائی گئیں، سیالکوٹ میں دریا کے راستوں کو آباد کردیاگیا ہے لیکن ہم نے گزشتہ برسوں میں تجاوزات کے خلاف کتنی کارروائیاں کیں، ملک میں بڑے ڈیم صرف آمروں کے دور میں بنائے گئے کیونکہ ان کے پاس طاقت ہوتی ہے اور وہ اس طاقت کے ذریعے قومی اتفاق رائے پیدا کرا لیتے ہیں، لیکن سیاست دان اختلافات اور سیاسی دکانداری کی وجہ سے قومی معاملات پر یکجہتی قائم نہیں کر پاتے،اب وقت آگیا ہے کہ قومی اتفاق رائے سے نئے ڈیمز تعمیر کیے جائیں تاکہ مستقبل میں تباہ کن سیلابی صورتحال سے نمٹا جا سکے۔؎

خواجہ آصف کا مزید کہنا تھا کہ اگر کہیں کوئی نہر یا ڈیم بنانے کی بات کی جائے تو سڑکیں نہیں بند کرنی چاہییں، ہمیں فوری طور پر چھوٹے ڈیم بنانے کی ضرورت ہے، کیوں کہ 10 سے 15 سال انتظار کرتے رہے تو سب کچھ ڈوب جائےگا۔

سینیٹ کی قائمہ کمیٹی نجکاری اجلاس میں سیکریٹری نجکاری ڈویژن نے کہا کہ جو ادارے آج منافع میں ہیں، ضروری نہیں کہ آئندہ بھی رہیں، حکومت کی سوچ ہے کہ بجلی، بسیں یا جہاز چلانا ہمارا کام نہیں، جو کمپنی منافع میں نہ ہو وہ پرائیویٹ سیکٹر کے لیے دلچسپی کی حامل ہے۔

سینیٹر افنان اللّٰہ خان کی زیر صدارت سینیٹ کی نجکاری کمیٹی کا اجلاس ہوا، جس میں جنریشن کمپنیوں (جنکوز) کی نجکاری کا ایجنڈا زیر بحث آیا، سیکریٹری پاور ڈویژن کا کہنا تھا کہ جنکوز کے 2 پلانٹس پرائیویٹائزیشن لسٹ پر ہیں، سینیٹ کی قائمہ کمیٹی نجکاری نے اگلے اجلاس میں چیئرمین نیشنل الیکٹرک پاور ریگولیٹری اتھارٹی (نیپرا) کو طلب کرنے کا فیصلہ کرلیا، چیئرمین نجکاری کمیٹی کا کہنا ہے کہ چیئرمین نیپرا کو اگلے اجلاس میں طلب کر لیتے ہیں،جوائنٹ سیکریٹری پاور ڈویژن نے کہا کہ اس وقت ڈسکوز اور جنکوز کی پرائیویٹائزیشن ہورہی ہے، نندی پور کے 8 ایشوز حل کرلیے،9 رہتے ہیں، گڈو کے 9 میں سے 4 ایشوز حل کرلیے ہیں،سینیٹر ذیشان خانزادہ نے سوال کیا کہ نجکاری کرکے یہ نیشنل گرڈ میں رہے گا یا الگ سے کوئی پیکج ہے؟ جس کے جواب میں سیکریٹری نجکاری ڈویژن نے کہا کہ ڈسکوز پر فنانشنل ایڈوائزر ہائر ہوا ہے،سینیٹر ذیشان خانزادہ نے پوچھا کہ تقسیم کار کمپنیوں کی نجکاری کا فیصلہ کیسے ہوا؟ سیکریٹری نجکاری ڈویژن نے جواب دیا کہ نجکاری کا اعلیٰ سطح پر فیصلہ ہوا، کابینہ نے فیصلہ کیا، جب یہ پلانٹس پرائیویٹ سیکٹر میں جائیں گے توحکومت کو ریونیو ملے گا، پرائیویٹ سیکٹر ایفیشینسی لاتا ہے، ریکوری کی پوزیشن بہتر ہوگی۔

اجلاس میں شرکاء کو پاکستان منرل ڈویلپمنٹ کارپوریشن حکام نے بریفنگ دی، چیف فنانشل آفیسر پی ایم ڈی سی کا کہنا تھا کہ ہمارا اس سال کا ریونیو 5.4 بلین روپے ہے، جس پر چیئرمین نجکاری کمیٹی نے کہا کہ ایف سی سے بات کر کے مائننگ کرنے والوں کے لیے ریٹس بہتر کروالیں،ایڈیشنل سیکریٹری دفاع نے کہا کہ اگر آپ کوئی علاقہ پوائنٹ کر دیں جہاں ایف سی کے ریٹ زیادہ ہیں، جواب میں چیئرمین کمیٹی نے کہا کہ یہ ایجنڈا داخلہ کمیٹی میں بہتر ڈسکس ہوسکتا ہے،چیف فنانشل آفیسر پی ایم ڈی سی کا کہنا ہے کہ 15لاکھ ٹن ہماری نمک کی پیداوار ہے، نجکاری کے حق میں نہیں ہیں، ابھی منرلز پر کام کر رہے ہیں،سینیٹر عمر فاروق نے کہا کہ یہ صوبائی سبجیکٹ ہے تو وفاق کو پیسے کس مد میں مل رہے ہیں، جواب میں چیف فنانشل آفیسر پی ایم ڈی سی نے کہا کہ رائلٹی صوبوں کو جاتی ہے، ٹیکسز وفاق کو جاتے ہیں،کمیٹی کے اراکین نے کہا کہ تجویز ہے کہ پھر پی ایم ڈی سی کو نجکاری لسٹ سے نکال دیا جائے۔

سیلاب متاثرین کی مدد کے لیے پاک فوج کا ریسکیو اینڈ ریلیف آپریشن جاری ہے

اٹاری، ہیڈ سلیمانکی، رینالہ خورد، جندراکہ، اوکاڑہ اور ساہیوال میں پاک فوج اور سول انتظامیہ کا ریسکیو اینڈ ریلیف آپریشن جاری ہے،سیلاب سے متاثرہ علاقوں میں سینکڑوں افراد اور مال مویشیوں کو محفوظ مقامات پر منتقل کیا گیا،سیلابی پانی کے باعث متعدد علاقوں کا زمینی رابطہ منقطع، پاک فوج نے کشتیوں کے ذریعے متاثرین کو ریسکیو کیا،پاک فوج اور سول انتظامیہ نے متاثرین سیلاب کے لیے امدادی کیمپس قائم کر دیے، کپڑے، ادویات اور راشن کی فراہمی جاری ہے،پاک فوج نے سیلاب متاثرین کے لیے فری میڈیکل کیمپس بھی قائم کر دیے،بزرگ، خواتین اور بچوں سمیت درجنوں افراد کو محفوظ مقامات پر منتقل کیا گیا، متاثرین نے پاک فوج کے کردار کو سراہا،

سیلاب متاثرین کی مدد کیلئے پاک فوج کا اوکاڑہ، ساہیوال اور دیگر علاقوں میں ریسکیو اینڈ ریلیف آپریشن جاری ہے، ساہیوال کے37 متاثرہ دیہاتوں میں پاک فوج اور سول انتظامیہ کی جانب سے 24ریلیف کیمپس قائم کردیئے گئے،دریائے راوی اور ستلج پرپاک فوج کی ٹیمیں ریسکیو اور ریلیف سرگرمیوں میں مصروف عمل ہیں، پاک فوج اور سول انتظامیہ نے متاثرہ علاقوں سے9ہزار 797افراد اور2ہزار 191 مویشیوں کو محفوظ مقامات پر منتقل کر دیا ہے،فوری طبی امداد کیلئے اٹاری اور سلیمانکی ہیڈ پرمیڈیکل کیمپس قائم کردیئے گئے ہیں ، ضلع اوکاڑہ میں 487 شہریوں اور 218 مویشیوں کو محفوظ مقامات پر منتقل کیا گیا ، ضلع اوکاڑہ میں سیلاب متاثرہ مکینوں کی گندم سمیت ضروری سامان بھی محفوظ مقام پر منتقل کیا گیا، ساہیوال میں 3ہزار162 افراد اور4593 مویشیوں کوبھی محفوظ مقام پر منتقل کیاجاچکاہے،سیلاب متاثرین نے پاک فوج اور مقامی انتظامیہ کی بروقت امدادی کارروائیوں کوسراہا ،سیلاب جیسی قدرتی آفت میں پاک فوج عوام کے شانہ بشانہ کھڑی ہے

سپریم کورٹ نے ایگریکلچر ریسرچ کونسل میں غیرقانونی بھرتیوں سے متعلق کیس کا ریکارڈ طلب کرلیا،

جسٹس حسن اظہر رضوی نے کہاکہ بھرتیوں کا سارا ریکارڈ جمع کرائیں،عدالت نےکہا پتہ چلے کس نے انٹرویو کیا، کس کا رشتے دار بھرتی ہوا. دوران سماعت وکیل سابق چیئرمین نے کہاکہ میرے موکل پر کرپشن کا کوئی الزام نہیں،ایڈیشنل اٹارنی جنرل نے کہاکہ سابق چیئرمین پر کرپشن کا الزام ہے،سابق چیئرمین نے اپنی بھانجی کو بھرتی کیا، 168سیٹوں پر 332افراد کو بھرتی کیاگیا، انٹرویو کمیٹی کے رکن نے اپنی بیٹی کو بھرتی کیا، عدالت نے ریکارڈ طلب کرتے ہوئے سماعت 2ہفتے کیلئےملتوی کردی۔

اسلام آباد میں وی لاگر سمیعہ حجاب کو نوجوان نے شادی کی پیشکش مسترد کرنے پر گھر سے مبینہ طور پر اغوا ء کرنے کی کوشش کی جس کی ویڈیو سمیعہ کی جانب سے سوشل میڈیا پر جاری کر دی گئی ہے جبکہ پولیس نے بھی ایکشن لیتے ہوئے ملزم کی تلاش شروع کر دی ۔

سمیعہ نے ویڈیو پیغام جاری کرتے ہوئے کہا کہ ایک حسن زاہد نامی لڑکا ہے جس کا تعلق لاہور سے ہے ، وہ مجھے گزشتہ دو سے تین ماہ سے جان سے مارنے کی دھمکیاں دے رہاہے، وہ مجھے کہتا ہے کہ مجھ سے شادی کرو، میں نے دو سے تین مرتبہ اس کی شادی کی پیشکش کو مسترد کیاہے ، اس کے بعد وہ آج شام کو میرے گھر کے باہر آیا، مجھے نہیں پتا تھا، وہ بیل بجاتا رہاہے اور میں گھر سے باہر گئی ، میں اپنی بیمار والدہ کے ساتھ گھر پر اکیلی تھی اور بھائی باہر گیا ہوا تھا، میں جیسے ہی باہر نکلی وہ میرا موبائل چھین کر گاڑی میں بیٹھ گیا، میں نے اس سے اپنا موبائل واپس لیا اور پھر وہ زبردستی مجھے گاڑی میں بٹھانے کی کوشش کر تا رہا، اس سے پہلے میری ایک دوست ثنا شادی کی پیشکش مسترد کرنے پر ماری جا چکی ہے، میں ثنا نہیں بننا چاہتی اور ان لڑکیوں میں شامل نہیں ہوناچاہتی، جو اپنے لیئے آواز نہ اٹھا سکیں، اسلام آباد پولیس کواطلاع کی تو وہ فوری آئے اور انہوں نے میری رپورٹ بھی لکھی ، میری آئی جی سے درخواست ہے کہ میرا ساتھ دیں، اگر مجھے کچھ ہوا تو اس کی وجہ یہ بندہ ہے ، پولیس نے مجھ سے تفصیل لی ہے اور وہ ایکشن لے رہے ہیں، آئی جی اسلام آباد اس پر سخت ایکشن لیں، مجھ جیسی اور بھی بہت سی لڑکیاں ہیں جو ان ساری چیزوں سے گزرر رہی ہیں اور وہ بول نہیں پا رہیں۔

جی ایچ کیو گیٹ حملہ کیس کی تفتیش کرنیوالا دوسرا افسر بھی تبدیل ہوگیا، کیس کی تفتیش انسپکٹر طارق گوندل کو سونپ دی گئی،

تفتیشی افسر انسپکٹر ناظم شاہ مدت ملازمت مکمل ہونے پر ریٹائر ہوگئے، پہلے تفتیشی افسر مرزا جاوید ڈی ایس پی پروموٹ ہونے پر تفتیش سے الگ ہوگئے تھے، راولپنڈی میں جی ایچ کیو گیٹ حملہ کیس کے مقدمے کی تفتیش میں بڑی پیشرفت ہوگئی، کیس کا دوسرا تفتیشی افسر بھی تبدیل ہوگیا،رپورٹ کے مطابق جی ایچ کیو گیٹ حملہ کیس کی تفتیش انسپکٹر طارق گوندل کو سونپ دی گئی، پچھلے تفتیشی افسر انسپکٹر ناظم شاہ مدت ملازمت مکمل ہونے پر ریٹائر ہوگئے، اس سے قبل پہلے تفتیشی افسر مرزا جاوید ڈی ایس پی پروموٹ ہونے پر تفتیش سے الگ ہوگئے تھے۔

انسپکٹر طارق گوندل پہلے بھی 9 مئی کے 2 مقدمات کے تفتیشی افسر ہیں، وہ 9 مئی کو وارث خان میٹرو اسٹیشن پر حملے اور لیاقت باغ چوک میں توڑ پھوڑ، جلاؤ گھیراؤ کے مقدمے کی تفتیش کررہے ہیں۔