Author: ممتاز حیدر

بھارت میں 15 اگست کی مناسبت سے گیم شو "کون بنے گا کروڑپتی” میں فوجی وردی میں ملبوس خواتین افسران کی شرکت نے سوشل میڈیا پر شدید بحث چھیڑ دی۔ شو میں تین خواتین فوجی افسران نے "آپریشن سندور” کے حوالے سے نام نہاد کامیابی سے متعلق گفتگو کی، جسے ناقدین نے سیاسی پروپیگنڈے کا حصہ قرار دیا ہے۔

بھارتی عوام نے سوال اٹھایا ہے کہ کیا پیشہ ور افسران کا تفریحی گیم شو میں جانا عسکری وقار کے منافی نہیں؟ مشہور بھارتی اداکار پرکاش راج نے طنز کرتے ہوئے کہا، "اب فوجی افسران بگ باس میں بھی آئیں گے، آگے کیا ہوگا؟”ناقدین کا کہنا ہے کہ یہ عمل فوج کو سیاسی اسٹیج ڈرامہ بنانے کے مترادف ہے۔ شو میں شرکت کے مقصد کو لے کر کئی قیاس آرائیاں کی جا رہی ہیں ، کیا یہ پیسہ کمانے، عوامی ہمدردی سمیٹنے یا "آپریشن سندور” کی ناکامی چھپانے کی کوشش ہے،دنیا بھر سے اس اقدام پر تنقید سامنے آ رہی ہے، اور ماہرین کے مطابق فوج جیسے ادارے کو اس قسم کے تفریحی مواد کا حصہ بنانا اس کے پیشہ ورانہ وقار کے خلاف ہے،

آپریشن سندور میں رافیل اور SU-30 ایم کے آئی جیسے جدید بھارتی طیاروں کو پاکستانی جے-10C کے ہاتھوں شکست کا سامنا کرنے کے باوجود مودی حکومت ایک بار پھر فرانس سے مزید رافیل طیاروں کی خریداری کے معاہدے کی کوششوں میں مصروف ہے۔

ٹائمز آف انڈیا کے مطابق، بھارتی حکومت اسکواڈرن کی گرتی ہوئی تعداد کو مدِنظر رکھتے ہوئے فرانس سے نئے طیارے خریدنے کے لیے MRFA منصوبے کے تحت معاہدہ کرنے کی خواہاں ہے۔ ذرائع کے مطابق بھارتی فضائیہ دو ماہ کے اندر دفاعی حصولیاتی کونسل سے منظوری لینے کی کوشش کر رہی ہے۔

دفاعی ماہرین کا کہنا ہے کہ آپریشن سندور نے بھارتی فضائیہ کی پیشہ ورانہ کمزوری، سیاسی مداخلت اور ناقص حکمت عملی کو بے نقاب کر دیا ہے۔ جہاں پاکستان کی فضائیہ نے بہتر تربیت اور حکمتِ عملی سے برتری حاصل کی، وہیں بھارت کی جانب سے مہنگے ہتھیاروں پر انحصار اور جنگی جنون نے اسے عالمی سطح پر سبکی سے دوچار کیا۔

ناقدین نے رافیل منصوبے کو مہنگی "خود فریبی” قرار دیتے ہوئے کہا ہے کہ فضائی برتری صرف جدید ہتھیاروں سے نہیں بلکہ پیشہ ور پائلٹس، بہتر تربیت اور غیر سیاسی عسکری قیادت سے حاصل ہوتی ہے۔

بھارتی افواج کی قیادت سیاسی سفارشات، ہندو توا کے نعروں اور رشوت کے کھیل میں الجھی ہوئی ہے۔مودی کا آر ایس ایس بیانیے پر مشتمل جنگی جنون حقیقت میں ہر بار بھارت کو شرمناک شکست سےدوچار کر تا ہے۔دفاعی تجزیہ کاروں اور خود بھارتی عوام کی جانب سے بھی سوال اٹھایا جا رہا ہے کہ رافیل جیسے ناکام تجربے کے بعد حکومت ایک بار پھر اس پر سرمایہ کیوں لگا رہی ہے؟ کیا یہ اقدام آپریشن سندور کی ہزیمت سے توجہ ہٹانے کی ایک اور ناکام کوشش ہے؟

بھارت اور چین 5 سال بعد سرحدی تجارت دوبارہ شروع کرنے پر بات چیت کر رہے ہیں۔

غیر ملکی خبر ایجنسی اے ایف پی کے مطابق ٹرمپ کے محصولات سے متاثرہ عالمی تجارتی نظام میں بھارت چین تعلقات میں نرمی لانے پر مجبور ہوئے ہیں۔ماضی میں برف پوش اور بلند و بالا ہمالیائی سرحدی راستوں سے دونوں پڑوسی ممالک کے درمیان تجارت ہوتی تھی تاہم اس کا حجم کم ہوتا تھا لیکن پھر بھی اس کی بحالی کو علامتی طور پر اہم سمجھا جا رہا ہے۔دونوں بڑی اقتصادی طاقتیں طویل عرصے سے جنوبی ایشیا میں اسٹریٹیجک اثر و رسوخ کے لیے مقابلہ کرتی رہی ہیں تاہم امریکی صدر ڈونلڈ ٹرمپ کے ٹیرف کے نظام سے پیدا ہونے والے عالمی تجارتی اور جغرافیائی سیاسی بحران کے تناظر میں دونوں ممالک تعلقات بہتر کرنے کی کوشش کر رہے ہیں۔

گزشتہ روز بھارتی وزارتِ خارجہ کے ترجمان رندھیر جیسوال نے پریس بریفنگ میں کہا کہ بھارت تمام نامزد تجارتی پوائنٹس یعنی اتراکھنڈ میں لیپولیکھ پاس، ہماچل پردیش میں شپکی لا پاس اور سکم میں ناتھو لا پاس کے ذریعے سرحدی تجارت کو دوبارہ شروع کرنے میں سہولت فراہم کرنے کے لیے چینی حکام کے ساتھ گفتگو کرراہ ہے۔

بھارتی میڈیا کے مطابق چینی وزیر خارجہ وانگ یی کی مذاکرت کے لیے پیر کو نئی دہلی آمد متوقع ہے جب کہ اس سے قبل بھارتی وزیر خارجہ جے شنکر جولائی میں بیجنگ کا دورہ کر چکے ہیں۔اس کے ساتھ ساتھ براہِ راست پروازوں اور سیاحتی ویزوں کے اجرا پر ہونے والے معاہدوں کو بھی 2020 میں دونوں ممالک کے فوجیوں کے درمیان ہونے والی مہلک سرحدی جھڑپ سے متاثرہ تعلقات کو بحال کرنے کی کوشش کے طور پر دیکھا جا رہا ہے۔