Author: ممتاز حیدر

ا لقادر ٹرسٹ کیس کے اشتہاری ملزم علی ریاض کی موہڑہ نور بنی گالا میں موجود 405 کنال اراضی کو نیلام کر دیا گیا ہے۔ ذرائع کے مطابق اس نیلامی میں اراضی کی فی کنال قیمت 34 لاکھ 20 ہزار روپے مقرر کی گئی تھی، جس کے نتیجے میں حکومت کو مجموعی طور پر ایک ارب 38 کروڑ 51 لاکھ روپے کی رقم حاصل ہوگی۔

نیلامی میں کامیاب بولی ایڈووکیٹ عثمان نے دی، جنہوں نے حتمی بولی لگا کر اس قیمتی زمین کی ملکیت حاصل کی ہے۔ یہ نیلامی حکومت کی طرف سے مختلف کیسز میں ضبط شدہ اثاثوں کی فروخت کے تحت کی گئی ہے تاکہ عوامی خزانے میں مالی وسائل جمع کیے جا سکیں۔دوسری جانب فرحت شہزادی عرف فرح گوگی کی ملکیت 248 کنال زمین کی نیلامی میں کوئی بولی نہیں آئی، جس کی وجہ سے اس زمین کی نیلامی ملتوی ہو سکتی ہے یا اس کے لیے دوبارہ نیلامی کا اعلان کیا جائے گا۔

یہ نیلامی ملک میں قانونی عملدرآمد اور عدالتی کارروائیوں کی شفافیت کو بڑھانے کے لیے ایک اہم قدم تصور کی جا رہی ہے، جس کا مقصد اشتہاری ملزمان کے قبضے میں موجود اثاثے ضبط کر کے حکومت کے حوالے کرنا ہے۔

سکیورٹی فورسز کا ضلع ژوب کے علاقے سمبازہ میں آپریشن، کارروائی میں 3 مزید بھارتی سپانسرڈ خوارج جہنم واصل ہو گئے

ڈی جی آئی ایس پی آر کے مطابق بلوچستان کے ضلع ژوب کے علاقے سمبازہ میں کلیئرنس آپریشن کے دوران مزید 3 بھارتی اسپانسرڈ خوارج مارے گئے ہیں۔ ہلاک دہشت گردوں سے اسلحہ، گولہ بارود اور بارودی مواد برآمد ہوا۔ چار روزہ انسداد دہشت گردی آپریشن میں ہلاک ہونے والے خوارج کی تعداد 50 تک پہنچ گئی ہے۔

سیکیورٹی فورسز نے اس آپریشن کے ذریعے پاکستان کی سرحدوں کی حفاظت اور ملک میں امن و استحکام کو خراب کرنے کی سازشوں کو ناکام بنانے کا عزم ظاہر کیا ہے۔ فورسز کا کہنا ہے کہ وہ ملک کی سلامتی اور ترقی کو یقینی بنانے کے لیے ہر ممکن قدم اٹھاتی رہیں گی۔

افواج پاکستان شب و روز ارضِ وطن کو دہشتگردوں سے پاک کرنے میں مصروف عمل ہیں،وزیراعظم
وزیرِ اعظم محمد شہباز شریف نے پاکستان-افغانستان سرحدی علاقے، سمبازا میں خوارج کے خلاف ایک اور کامیاب آپریشن پر سیکیورٹی فورسز کے افسران و اہلکاروں کی پزیرائی کی ہے،وزیرِ اعظم نے چند دن قبل اسی علاقے میں 47 خارجیوں کو جہنم رسید کرنے کے بعد کل شب 3 مزید بھارتی سرپرستی میں سرگرم خارجیوں کو ہلاک کرنے پر سیکیورٹی فورسز کے افسران و اہلکاروں کی پیشہ ورانہ صلاحیتوں کی تعریف کی اور کہا کہ دھشتگردی کی عفریت کے ملک سے مکمل خاتمے تک اس کے خلاف جنگ جاری رکھیں گے.افواج پاکستان شب و روز ارضِ وطن کو دھشتگردوں سے پاک کرنے میں مصروف عمل ہیں جس پر مجھ سمیت پوری قوم انکو خراج تحسین پیش کرتی ہے. ملک سے دھشتگردی کے مکمل خاتمے کے غیر متزلزل عزم میں پوری قوم افواج پاکستان کے شانہ بشانہ کھڑی ہے.

خیبر پختونخوا کے ضلع باجوڑ میں شدت پسند گروہ فتنہ الخوارج کے دہشتگردوں کے خلاف سخت کارروائی کا فیصلہ کر لیا گیا ہے۔

نجی ٹی وی کے مطابق سرکاری ذرائع نے بتایا ہے کہ باجوڑ میں دہشتگردوں کے خلاف قبائلی عمائدین کے جرگے کی کوششیں ناکام ہو گئی ہیں، جس کے بعد علاقے میں آپریشن کی تیاری مکمل کر لی گئی ہے۔ذرائع کے مطابق باجوڑ اور خیبر کے مختلف علاقوں میں موجود دہشتگردوں کے خلاف عسکری کارروائی کے لیے حکومتی سطح پر پلاننگ کی جا رہی ہے۔ قبائلی عمائدین کے جرگے نے فتنہ الخوارج سے تین اہم مطالبات کیے تھے جن میں سب سے اہم علاقہ چھوڑنے کا مطالبہ تھا، تاہم دہشتگردوں نے اس مطالبے کو مسترد کر دیا ہے۔باوجڑ کی تحصیل ماموند کے دو علاقوں میں تقریباً 300 دہشتگرد موجود ہیں جن میں سے 80 فیصد سے زائد افغان باشندے ہیں۔ یہ گروہ علاقے میں دہشت و وحشت پھیلانے کے ساتھ ساتھ مقامی لوگوں کو شدید مشکلات میں مبتلا کر رہا ہے۔ باجوڑ کی تحصیل ماموند کی کل آبادی 3 لاکھ سے زائد ہے جن میں سے تقریباً 40 ہزار افراد اپنی جان بچانے کے لیے علاقے سے نقل مکانی کر چکے ہیں۔

کمشنر مالاکنڈ عابد وزیر نے گفتگو کرتے ہوئے بتایا کہ نقل مکانی کرنے والے متاثرین کے لیے حفاظتی اقدامات اور رہائش کے جامع انتظامات کر لیے گئے ہیں۔ باجوڑ کے تحصیل خار میں 107 سرکاری عمارتوں کو عارضی پناہ گاہوں کے طور پر استعمال کیا جا رہا ہے جبکہ خار کے اسپورٹس کمپلیکس میں خیمہ بستی بھی قائم کی جائے گی تاکہ متاثرین کو ہر ممکن سہولت فراہم کی جا سکے۔انہوں نے مزید کہا کہ متاثرین کو خوراک، صحت کی سہولیات، اور دیگر بنیادی ضروریات کی فراہمی کو یقینی بنایا جا رہا ہے تاکہ وہ اس مشکل وقت میں کسی قسم کی مشکلات کا سامنا نہ کریں۔

ذرائع کے مطابق دہشتگردوں کی جانب سے علاقے کو چھوڑنے سے انکار کے بعد حکومتی مشینری آپریشن کے لیے مکمل تیار ہے۔ مقامی انتظامیہ اور قانون نافذ کرنے والے ادارے اس حوالے سے باقاعدہ منصوبہ بندی کر رہے ہیں تاکہ دہشتگردوں کو جڑ سے ختم کیا جا سکے اور علاقے میں امن و امان کی صورتحال بحال ہو سکے۔یہ کارروائی نہ صرف باجوڑ بلکہ پورے خیبر پختونخوا کے لیے اہم قرار دی جا رہی ہے کیونکہ دہشتگردی کے واقعات میں حالیہ دنوں میں اضافہ دیکھا گیا ہے۔

پاکستان کے دفتر خارجہ نے بھارتی وزارت خارجہ کا بیان مسترد کردیا۔

پاکستان کے دفترخارجہ کے ترجمان نے کہا کہ بھارتی وزارت خارجہ کے غیر سنجیدہ اور حقائق مسخ کرنے والا بیان مسترد کرتا ہے، بھارتی وزارت خارجہ کا بیان حقائق کو توڑ مروڑ کر پیش کرنے کی عادت کا ایک اور ثبوت ہے، پاکستان طاقت کے استعمال یا اس کی دھمکی کے سخت خلاف ہے، بھارت ہر موقع پر جنگی جنون اور الزام تراشی کا سہارا لیتا ہے، پاکستان ذمہ دار ایٹمی ملک ہے، کمانڈ اینڈ کنٹرول کا مکمل سویلین نظام موجود ہے، پاکستان نے ہمیشہ تحمل اور نظم و ضبط کا مظاہرہ کیا ہے،پاکستان کی انسداد دہشت گردی کی کاوشیں دنیا بھر میں تسلیم شدہ ہیں، بھارتی وزارت خارجہ کے بے بنیاد الزامات غیر ذمہ دارانہ اور ثبوت سے عاری ہیں، بھارت کا تیسرے ممالک کو بلاوجہ شامل کرنے کا اقدام سفارتی کمزوری کی علامت ہے۔

ترجمان دفترخارجہ نے کہا کہ پاکستان ذمہ دار ملک کے طور پر اپنا کردار جاری رکھے گا، بھارت کی کسی بھی جارحیت کا فوری اور بھرپور جواب دیا جائے گا، کشیدگی کی ذمہ داری مکمل طور پر بھارتی قیادت پر عائد ہوگی۔

نئی دہلی: بھارت کی جانب سے نئی دہلی میں پاکستانی ہائی کمیشن کے سفارتکاروں کے خلاف ہراسانی کے واقعات میں اضافہ دیکھا جا رہا ہے۔ ذرائع کے مطابق بھارتی حکام نے چار پاکستانی سفارتکاروں کو اپنے کرایہ کی رہائش گاہیں خالی کرنے کے نوٹس جاری کر دیے ہیں، جو کہ نجی مکان مالکان کی جانب سے دئیے گئے ہیں۔

پاکستانی سفارتکار اپنی نجی رہائش گاہوں پر کرائے کے مکانوں میں مقیم ہیں اور ان کے مکان مالکان نے کانٹریکٹ کی مدت ختم ہونے سے قبل ہی انہیں نوٹس دے دیے ہیں۔ اس سے سفارتکاروں کی نقل و حرکت اور قیام پر براہ راست اثرات مرتب ہو رہے ہیں۔مزید اطلاعات کے مطابق، پاکستانی سفارتکاروں کی نگرانی سخت کر دی گئی ہے اور ان کے گھروں میں فراہم کی جانے والی بنیادی سہولیات جیسے گیس اور انٹرنیٹ سروسز بھی وقتاً فوقتاً معطل کی جا رہی ہیں۔ اس اقدام کو سفارتی امور میں رکاوٹ سمجھا جا رہا ہے۔

ذرائع نے بتایا ہے کہ نئی دہلی میں پاکستانی ہائی کمیشن کے کل 17 عملے کے ارکان کے بھارتی ویزوں کی توسیع بھی بھارتی وزارت خارجہ میں تاخیر کا شکار ہے۔ پاکستانی حکام نے تین سے پانچ ماہ قبل ویزوں کی تجدید کے لیے درخواستیں دی تھیں، لیکن بھارت کی طرف سے اس پر کوئی حتمی فیصلہ نہیں کیا گیا۔اس کے علاوہ، پاکستانی ہائی کمیشن کو پانی کی فراہمی بھی بند کر دی گئی ہے اور ڈیڑھ ماہ سے بھارتی اخبارات کی ترسیل بھی معطل ہے، جس سے ہائی کمیشن کی روزمرہ سرگرمیوں میں خلل پڑ رہا ہے۔ذرائع کا کہنا ہے کہ پاکستانی ہائی کمیشن نے ان تمام معاملات کی اطلاع اپنے وزارتِ خارجہ کو دے دی ہے تاکہ بھارت کی طرف سے بڑھتی ہوئی ہراسانی کے خلاف حکمت عملی تیار کی جا سکے۔