Author: ممتاز حیدر

نئی دہلی: بھارتی کانگریس پارٹی کے سینئر رہنما راہول گاندھی کو بہار میں ووٹر فہرست میں مبینہ ترمیمات کے خلاف احتجاج کے دوران حراست میں لے لیا گیا ہے۔

یہ واقعہ اس وقت پیش آیا جب راہول گاندھی اور دیگر اپوزیشن رہنما الیکشن کمیشن کی عمارت کی جانب مارچ کر رہے تھے تاکہ انتخابات میں مبینہ دھاندلی کے خلاف اپنی آواز بلند کر سکیں۔بھارتی میڈیا رپورٹس کے مطابق تقریباً 300 اپوزیشن رہنما اس احتجاجی مارچ میں شامل تھے جن کی قیادت راہول گاندھی کر رہے تھے۔ یہ مارچ خاص طور پر ‘ووٹ چوری’ کے الزام کے تحت کیا جا رہا تھا جس میں کہا گیا ہے کہ بہار کی ووٹر فہرستوں میں غیر قانونی ترامیم کی گئی ہیں تاکہ ووٹروں کو ووٹ ڈالنے سے محروم کیا جا سکے۔راہول گاندھی نے گزشتہ دنوں بھارتی الیکشن کمیشن اور حکمران بھارتیہ جنتا پارٹی (بی جے پی) پر انتخابات میں دھاندلی کرنے کے سنگین الزامات عائد کیے تھے۔ انہوں نے دعویٰ کیا تھا کہ الیکشن کمیشن نے بی جے پی کے ساتھ مل کر عام انتخابات میں ووٹ چوری کی اور عوام کے حق پر ڈاکہ ڈالا گیا ہے۔

راہول گاندھی نے اپنے الزامات کی حمایت میں دستاویزی ثبوت بھی پیش کیے اور بتایا کہ کہیں ڈپلیکیٹ ووٹر آئی ڈیز بنائی گئیں، کہیں جعلی پتے درج کیے گئے اور کچھ حلقوں میں جعلی تصاویر کا بھی استعمال کیا گیا تاکہ انتخابی نتائج میں دھاندلی کی جا سکے۔ ان کے مطابق کم از کم 100 سے زائد نشستوں پر ہیرا پھیری کی گئی ہے۔راہول گاندھی نے کہا کہ اگر یہ جعل سازی نہ ہوتی تو وزیراعظم نریندر مودی آج ملک کے وزیراعظم نہ ہوتے۔ ان کا مزید کہنا تھا کہ گزشتہ انتخابات میں بی جے پی، وزیراعظم نریندر مودی اور ان کے ساتھیوں نے آئین پر حملہ کیا ہے۔کانگریس رہنما کی گرفتاری کے بعد سیاسی ہلچل بڑھ گئی ہے اور اپوزیشن جماعتوں نے حکومت پر کڑی تنقید شروع کر دی ہے کہ وہ جمہوری عمل کو نقصان پہنچا رہی ہے اور سیاسی مخالفین کو دبانے کی کوشش کر رہی ہے۔

پولیس کی جانب سے راہول گاندھی کے ساتھ اراکین پارلیمنٹ کو بھی گرفتار کیا گیا ہے، گرفتار اراکین کو دو بسوں میں بٹھا کر لے جایا گیا ہے۔ راہل گاندھی، اکھلیش یادو، پرینکا گاندھی، جیسے سینئر رہنماؤں کوپولیس نے گرفتار کیا ہے،اس دوران راہل گاندھی نے کہا کہ ہمیں تو بولنے نہیں دیا جا رہا ہے۔

اپوزیشن کے 30 رہنماؤں کو بلایا تھا، زیادہ آ گئے، اس لئے اراکین پارلیمنٹ کو بھی حراست میں لیا، دہلی پولیس
دہلی پولیس کے ایک افسر کا کہنا ہے کہ الیکشن کمیشن کی طرف سے 30 رہنماؤں کو آنے کی اجازت تھی، لیکن دروازے پر بڑی تعداد میں رہنما پہنچ گئے۔ اس کی وجہ سے نظام بگڑنے کا اندیشہ تھا۔ اسی وجہ سے اراکین پارلیمنٹ کو حراست میں لیا گیا ہے۔ ان کا کہنا ہے کہ اگر اپوزیشن پارٹی چاہے تو اب بھی 30 اراکین پارلیمنٹ کو آرام سے الیکشن کمیشن کے دفتر لے جایا جا سکتا ہے۔

ترکی کے شہر استنبول سمیت دنیا بھر میں ہزاروں افراد نے اسرائیل کی غزہ میں جاری عسکری کارروائیوں کے خلاف زبردست احتجاج کیا ہے اور جنگ فوری طور پر روکنے کا مطالبہ کیا ہے۔

استنبول میں ہزاروں مظاہرین نے پرامن احتجاجی ریلی نکالی، جس میں انہوں نے بینرز اٹھا رکھے تھے جن پر فلسطینیوں کے حق میں نعرے درج تھے۔ مظاہرین نے اسرائیل کے وحشیانہ حملوں کی شدید مذمت کی اور عالمی برادری سے مطالبہ کیا کہ وہ غزہ میں جاری خونریزی کو روکنے کے لیے فوری اقدامات کرے۔اسی دوران، دنیا کے دیگر حصوں میں بھی فلسطینی عوام کے حق میں مظاہرے کیے گئے۔ چلی کے دارالحکومت سینتیاگو میں احتجاج کرنے والوں نے خالی برتن بجا کر غزہ میں اسرائیل کی جانب سے لگائے جانے والے محاصرے اور جبری قحط کے خلاف اپنی آواز بلند کی۔ اس موقع پر مظاہرین نے عالمی برادری سے مطالبہ کیا کہ وہ فلسطینی عوام کی مدد کرے اور ان کے بنیادی انسانی حقوق کا تحفظ یقینی بنائے۔

ارجنٹائن میں بھی فلسطینیوں کے حق میں بڑے پیمانے پر مظاہرے دیکھنے میں آئے جہاں دارالحکومت بیونس آیرس میں سینکڑوں افراد نے غزہ میں جاری نسل کشی کو فوری طور پر بند کرنے کا مطالبہ کیا۔ مظاہرین نے نعرے بازی کرتے ہوئے کہا کہ انسانی جانوں کی حفاظت ہر ملک کی ذمہ داری ہے۔ادھر اسرائیل کے اندر بھی غزہ کی جنگ کے خلاف آوازیں بلند ہو رہی ہیں۔ شہر تل ابیب میں یرغمالیوں کے اہل خانہ نے اسرائیلی حکومت سے مطالبہ کیا ہے کہ وہ جنگ بندی کرے تاکہ یرغمالیوں کی جانیں بچائی جا سکیں۔ انہوں نے حکومت کے خلاف احتجاجی ہڑتال کی کال دی ہے جو 17 اگست کو ملک گیر سطح پر منائی جائے گی۔

جنوبی امریکہ کے ملک ایکواڈور کے ساحلی صوبے گوایاس کے دیہی علاقے سانتا لوسیا میں قائم ایک نائٹ کلب میں ایک خونریز فائرنگ کے واقعے میں کم از کم 8 افراد ہلاک ہو گئے ہیں۔

غیر ملکی میڈیا رپورٹس کے مطابق، یہ واقعہ اس علاقے کے سب سے خطرناک واقعات میں سے ایک قرار دیا جا رہا ہے۔ حکام نے بتایا ہے کہ فائرنگ کرنے والے مشتبہ افراد بھاری ہتھیاروں سے لیس تھے اور وہ موٹر سائیکلوں اور دو گاڑیوں میں سوار تھے۔ انہوں نے نائٹ کلب میں داخل ہو کر اندھا دھند فائرنگ شروع کر دی جس کے نتیجے میں 7 افراد موقع پر ہی ہلاک ہو گئے جبکہ ایک زخمی شخص اسپتال لے جاتے ہوئے دم توڑ گیا۔

فائرنگ کے دوران ہلاک ہونے والوں کی عمریں 20 سے 40 سال کے درمیان بتائی جا رہی ہیں۔ اس کے علاوہ تین افراد شدید زخمی ہوئے جنہیں فوری طور پر قریبی اسپتال منتقل کر کے طبی امداد فراہم کی گئی ہے۔مقامی حکام نے واقعے کی تحقیقات شروع کر دی ہیں لیکن ابھی تک فائرنگ کی اصل وجہ سامنے نہیں آ سکی۔ ذرائع ابلاغ کے مطابق ممکنہ طور پر یہ واقعہ کسی گروہی دشمنی یا دیگر غیر قانونی سرگرمیوں کا نتیجہ ہو سکتا ہے، تاہم تفتیش کار تمام پہلوؤں کو زیر غور رکھے ہوئے ہیں۔

امریکا کی ریاست ٹیکساس کے شہر ہیوسٹن میں ایک افسوسناک واقعہ پیش آیا ہے جس میں ایک پاکستانی خاتون کو بلا وجہ اور مبینہ مذہبی منافرت کی بنیاد پر تشدد کا نشانہ بنایا گیا ہے۔ یہ واقعہ ہیوسٹن کے جنوب مغربی علاقے، ساؤتھ ولکریسٹ ڈرائیو پر واقع شوگر پارک پلازہ کے سامنے پیش آیا۔

خاتون جمعہ کی شام تقریباً 5 بجے سامان اٹھا کر جا رہی تھیں کہ اچانک پیچھے سے ایک سنگدل شخص نے انہیں دھکا دے دیا جس کے باعث وہ منہ کے بل گر گئیں۔ اس حملے کے نتیجے میں خاتون کی ناک کی ہڈی فریکچر ہو گئی جبکہ ان کے چہرے کے مختلف حصوں پر شدید چوٹیں آئیں۔واقعے کا تمام منظر سی سی ٹی وی کیمرے میں محفوظ ہو گیا، جس میں دیکھا جا سکتا ہے کہ حملہ آور شخص بغیر کسی خوف کے سڑک کے دوسری طرف چلا گیا۔ پولیس ابھی تک اس ملزم کی شناخت کرنے اور واقعے کی وجہ جاننے میں ناکام ہے۔

خاتون کے بیٹے محمد ظہیر نے میڈیا سے گفتگو کرتے ہوئے بتایا کہ ان کی والدہ زخمی حالت میں انہیں ویڈیو کال کے ذریعے واقعہ سے آگاہ کیا، جس پر وہ شدید دہشت زدہ ہو گئے۔ ظہیر نے کہا، "کوئی بھی اپنی ماں کے ساتھ ایسے ظلم کو برداشت نہیں کر سکتا، ملزم کو فوری گرفتار کر کے سخت سزا دی جانی چاہیے۔”محمد ظہیر کا یہ بھی کہنا تھا کہ ان کی والدہ اس ظالمانہ واقعے کو کبھی فراموش نہیں کر سکیں گی اور انہیں یقین ہے کہ یہ حملہ مذہبی منافرت کی بنیاد پر کیا گیا کیونکہ ان کی والدہ اسکارف پہنے ہوئے تھیں اور ممکنہ طور پر حملہ آور نے انہیں مسلمان خاتون سمجھ کر نشانہ بنایا۔

متاثرہ امریکن پاکستانی خاندان نے پولیس میں رپورٹ درج کرا دی ہے۔ پولیس کا کہنا ہے کہ ملزم کو گرفتار کر لیا جائے تو اسے سنگین جرم کے تحت مقدمہ کا سامنا کرنا پڑے گا۔

بارسلونا: سابق وزیراعظم اور چیئرمین سینیٹ پاکستان یوسف رضا گیلانی کے بیٹے اور ممبر قومی اسمبلی سید عبدالقادر گیلانی بارسلونا میں سیرو تفریح کے دوران ایک انتہائی قیمتی گھڑی سے محروم ہو گئے ہیں۔

تفصیلات کے مطابق سید عبدالقادر گیلانی جو اس وقت اسپین کے شہر بارسلونا میں سیاحت کے لیے موجود ہیں، ان سے چوروں نے ایک مہنگی گھڑی چھین لی۔ اطلاعات کے مطابق یہ گھڑی یورپی ملک میں چوری ہوئی، جس کی مالیت تقریباً 56 ہزار یورو بتائی گئی ہے۔ پاکستانی کرنسی میں اس گھڑی کی قیمت ایک کروڑ 85 لاکھ روپے کے قریب ہے۔

یہ واقعہ ایک ایسے وقت پیش آیا جب عبدالقادر گیلانی سیاحتی مقام پر آرام اور تفریح کر رہے تھے۔ پولیس اور متعلقہ حکام واقعہ کی تحقیقات کر رہے ہیں اور چوروں کو جلد از جلد گرفتار کرنے کے لیے اقدامات کیے جا رہے ہیں۔

غزہ میں اسرائیلی فوج کے تازہ حملے میں قطری نشریاتی ادارے الجزیرہ کے معروف صحافی انس الشریف اپنے ساتھیوں کے ساتھ شہید ہو گئے ہیں۔

عرب میڈیا رپورٹس کے مطابق، اسرائیلی فوج نے غزہ سٹی میں صحافیوں کے خیمے کو نشانہ بنایا، جس کے نتیجے میں الجزیرہ کے دو صحافیوں اور تین کیمرا آپریٹرز کی شہادت کا واقعہ پیش آیا ہے۔شہدا میں الجزیرہ کے نامور صحافی انس الشریف، محمد قریقہ، اور کیمرا آپریٹرز محمد ظاہر، محمد نوفل، اور مومین علیوا شامل ہیں۔ الجزیرہ کے مطابق 28 سالہ انس الشریف اور ان کے ساتھی اس وقت شہید ہوئے جب وہ اسپتال کے مرکزی دروازے کے باہر صحافیوں کے لیے مخصوص ایک خیمے میں موجود تھے، جسے اسرائیلی فوج نے بمباری سے تباہ کر دیا۔

غزہ کے سرکاری میڈیا دفتر کی جانب سے جاری کردہ اعداد و شمار کے مطابق، اکتوبر 2023 میں جنگ کے آغاز سے اب تک اسرائیلی حملوں میں 237 صحافی شہید ہو چکے ہیں، جو جنگ زدہ علاقوں میں صحافت کے لیے ایک انتہائی خطرناک صورتحال کی عکاسی کرتی ہے۔

دوسری جانب، اسرائیلی فوج نے انس الشریف کو نشانہ بنانے کی تصدیق کرتے ہوئے الزام عائد کیا ہے کہ وہ حماس کے ایک عسکری سیل کے سربراہ تھے اور اسرائیلی شہریوں اور فوجیوں کے خلاف راکٹ حملوں کی منصوبہ بندی میں ملوث تھے۔ تاہم، انس الشریف نے شمالی غزہ سے بڑے پیمانے پر رپورٹنگ کی تھی اور ماضی میں بھی انہیں جان سے مارنے کی دھمکیاں دی جاتی رہیں۔