Author: ممتاز حیدر

واشنگٹن: امریکا کے صدر ڈونلڈ ٹرمپ نے ملک کے بڑے اور معتبر اخبار نیویارک ٹائمز کے خلاف ہتک عزت اور توہین کا مقدمہ دائر کرنے کا اعلان کردیا ہے۔

تفصیلات کے مطابق صدر ٹرمپ نے سوشل میڈیا پلیٹ فارم ٹرتھ سوشل پر اپنے بیان میں کہا کہ انہیں یہ اعزاز حاصل ہوا ہے کہ وہ نیویارک ٹائمز کے خلاف 15 بلین ڈالر کا مقدمہ فلوریڈا کی عدالت میں دائر کر رہے ہیں۔ٹرمپ نے الزام عائد کیا ہے کہ نیویارک ٹائمز نے طویل عرصے سے ان کے خلاف من گھڑت اور جھوٹی خبریں شائع کیں، جن میں ان کے اہلِ خانہ اور کاروباری معاملات سے متعلق بھی بے بنیاد دعوے شامل تھے۔ ان کے مطابق اخبار نے باقاعدہ منصوبہ بندی کے تحت ان کی ساکھ کو نقصان پہنچانے اور عوام میں بدنام کرنے کی مہم چلائی۔

امریکی صدر نے اپنے سخت لہجے میں کہا "نیویارک ٹائمز کو بہت زیادہ عرصے تک کھلی چھوٹ دی گئی کہ وہ میرے خلاف جھوٹ بولے، میرے خاندان کو نشانہ بنائے اور میرے کاروبار کو مشکوک بنائے۔ اب یہ سب بند ہونا چاہیے۔”

سیاسی مبصرین کے مطابق ٹرمپ کا یہ اقدام امریکی میڈیا اور صدر کے درمیان جاری کشیدگی کو مزید بڑھا سکتا ہے۔ نیویارک ٹائمز کی جانب سے اس معاملے پر فی الحال کوئی ردعمل سامنے نہیں آیا، تاہم قانونی ماہرین کا کہنا ہے کہ اس مقدمے کے نتائج نہ صرف ٹرمپ بلکہ امریکی میڈیا اور آزادیٔ صحافت کے لیے بھی بڑے اثرات مرتب کر سکتے ہیں۔

گوہاٹی: پولیس نے پیر کے روز آسام سول سروس کی ایک خاتون افسر نوپور بورا کو غیر قانونی دولت رکھنے کے الزام میں گرفتار کرلیا۔ یہ کارروائی وزیر اعلیٰ کے اسپیشل ویجیلنس سیل کی جانب سے کی گئی، جس کے دوران افسر کے گھروں پر چھاپے مارے گئے اور بھاری مقدار میں نقدی و زیورات برآمد ہوئے۔

تفصیلات کے مطابق، اسپیشل ویجیلنس سیل کی ٹیم نے نوپور بورا کے گوہاٹی میں واقع رہائشی مکان سے 92 لاکھ روپے نقدی اور تقریباً ایک کروڑ روپے مالیت کے زیورات برآمد کیے۔ اس کے علاوہ، برپیٹا میں ان کے کرائے کے گھر سے مزید 10 لاکھ روپے نقدی بھی قبضے میں لی گئی۔نوپور بورا کا تعلق ضلع گولاگھاٹ سے ہے اور وہ 2019 میں آسام سول سروس میں شامل ہوئی تھیں۔ گرفتاری کے وقت وہ ضلع کامروپ کے علاقے گوروی ماری میں بطور سرکل آفیسر تعینات تھیں۔

وزیر اعلیٰ ہیمنت بسوا سرما نے انکشاف کیا کہ نوپور بورا گزشتہ چھ ماہ سے نگرانی میں تھیں کیونکہ ان پر زمینوں کے تنازعات اور مشکوک لین دین میں ملوث ہونے کی شکایات موصول ہوئی تھیں۔وزیر اعلیٰ کا کہنا تھا "یہ افسر برپیٹا ریونیو سرکل میں تعیناتی کے دوران ہندوؤں کی زمین مشکوک افراد کو رقم کے عوض منتقل کرتی رہی۔ اس کے خلاف سخت کارروائی کی گئی ہے۔”انہوں نے مزید کہا کہ اقلیتی اکثریتی علاقوں میں ریونیو سرکلز کے اندر بڑے پیمانے پر بدعنوانی موجود ہے جسے ختم کرنے کے لیے حکومت اقدامات کر رہی ہے۔اسپیشل ویجیلنس سیل نے نوپور بورا کے مبینہ ساتھی اور برپیٹا ریونیو سرکل دفتر میں تعینات لات منڈل سُراجیت ڈیکا کے گھر پر بھی چھاپہ مارا۔ الزام ہے کہ انہوں نے نوپور بورا کے ساتھ ملی بھگت سے برپیٹا میں کئی زمینیں خرید رکھی تھیں۔یہ گرفتاری آسام سول سروس میں بدعنوانی کے ایک بڑے اسکینڈل کے طور پر دیکھی جا رہی ہے، جس نے سرکاری مشینری کی شفافیت پر سوالات کھڑے کر دیے ہیں۔

مبصرین اور انسانی حقوق کے گروپوں کا کہنا ہے کہ نریندر مودی حکومت کی سرپرستی میں ہندوتوا ایجنڈے کو تقویت مل رہی ہے، جس کے نتیجے میں اقلیتوں کے خلاف نفرت پھیلانے اور سماجی و سیاسی طور پر انہیں کنارے لگانے کی منظم کوششیں نظر آتی ہیں۔ ناقدین کا کہناہے کہ یہ پالیسیز اور بیانیے بھارت کو ایک ایسے قومی خدوخال کی طرف لے جا رہے ہیں جو شہریوں کو طبقاتی اور مذہبی بنیادوں پر تقسیم کرتا ہے۔

کئی ہندو انتہا پسند رہنماؤں کی خبروں اور بیانات میں بھی ایسے اشارے ملے ہیں جنھیں ناقدین ریاستی سرپرستی میں نفرت انگیز مہم کا ثبوت قرار دے رہے ہیں۔ہندو انتہا پسند رہنماء ہنت راجو داس نے دعویٰ کیا کہ وہ دہلی سے پیدل مارچ کا آغاز کریں گے تاکہ ’’ہندو راشٹر‘‘ کا قیام ممکن بنایا جا سکے۔ اسی طرح سوامی رام بھدر اچاریہ اور مہانت رام چندر گیری جیسے رہنماؤں کے بیانات میں مسلم آبادی والے علاقوں کو نشانہ بنانے اور انہیں الگ تناظر میں دیکھنے کے خیالات سامنے آئے ہیں۔

ماہرینِ سیاست اور انسانی حقوق کے کارکنان کا کہنا ہے کہ ایسی تقاریر اور اقدامات اقلیتی کمیونٹیز کو دوسرے درجے کے شہری بنانے کے درپے ہیں اور اس سلسلے میں ریاستی اداروں کا رویّہ تشویش کا باعث ہے۔ ماہرین کہتے ہیں کہ بعض سرکاری اور نیم سرکاری ادارے نہ صرف اس نظریے کو نظرانداز کر رہے ہیں بلکہ بعض مواقع پر اس بیانیے کو مضبوط کرنے کا سبب بھی بن رہے ہیں ، جسے متعدد مبصرین "منظم امتیاز” اور "ریاستی دہشت گردی” سے تعبیر کر رہے ہیں۔