Author: ممتاز حیدر

پاکستان مرکزی مسلم لیگ کے صدر خالد مسعود سندھو نے کہا ہے کہ بھارت نے سلال ڈیم کے دروازےکھول کر پھر آبی جارحیت کی ہے،پاکستان میں ایک بار پھر بڑے سیلاب کا خطرہ ہے، حکومت خاموشی اختیار کرنے کی بجائے بھارتی آبی جارحیت کو دنیا کے سامنے بے نقاب کرے،

خالد مسعود سندھو کا کہنا تھا کہ بھارتی آبی جارحیت کے نتیجے میں پنجاب میں سیلاب سے تباہی ہوئی،اب ایک بار پھر بھارت نے پاکستان کو اطلاع دیئے بغیر سلال ڈیم،ننگل ڈیم اور ہریکے بیراج سے مزید پانی چھوڑ دیاہے،جس کے نتیجے میں دریائے چناب،ستلج کے قریبی علاقوں میں شدید سیلاب کا اندیشہ ہے اور آبادیاں متاثر ہوں گی،صرف سلال ڈیم سے بھارت سے چھوڑا جانے والا سیلابی ریلا 8 لاکھ کیوسک کا ہے،بھارت کھلم کھلا آبی جارحیت کر رہا ہے،پاکستان میں بھارتی آبی جارحیت کے نتیجے میں لاکھوں افراد بے گھر ہو چکے ہیں،اب مزید سیلاب آئے گا اور تباہی ہو گی، حکومت کو چاہئے کہ بھارتی آبی جارحیت کو عالمی سطح پر اٹھائیں،بھارت کی جانب سے پانی کو ہتھیار کےطور پر استعمال کرنے کے اقدام پر حکومتی خاموشی کسی صورت درست نہیں،بھارت نے پہلے بھی بنا اطلاع کے پانی چھوڑا اور اب بھی ایسا ہی کیا،بھارتی آبی جارحیت کے خلاف پاکستانی قوم بھی متحد ہو ،پاکستان میں سیلاب سے متاثرہ علاقوں میں مرکزی مسلم لیگ کے رضاکار امدادی سرگرمیاں مزید تیز کر دیں.

لاہور اور گردونواح کے علاقے موسلادھار بارشوں سے شدید متاثر ہوئے ہیں، جس کی وجہ سے سڑکیں، گلیاں اور دفاتر زیر آب آگئے ہیں۔ جناح اسپتال کی ایمرجنسی کی چھت سے پانی ٹپکنے لگا، جبکہ بارش کا پانی او پی ڈی سمیت مختلف وارڈز اور راہداری میں بھی داخل ہوگیا، جس سے اسپتال میں آنے والے مریضوں اور ان کے اہل خانہ کو مشکلات کا سامنا کرنا پڑا۔

لاہور، شیخوپورہ، پھولنگر، ننکانہ صاحب، اوکاڑہ اور کوٹ رادھا کشن میں بھی موسلادھار بارشوں کی وجہ سے سیلابی صورتحال پیدا ہو گئی ہے۔ بارش کے پانی نے سڑکوں اور گلیوں کو تالاب کا منظر پیش کر دیا ہے، جس کے باعث شہریوں کو آمدورفت میں شدید مشکلات پیش آ رہی ہیں۔ کئی علاقوں میں پانی گھروں میں داخل ہو گیا ہے، جس سے مکینوں کی زندگی مزید مشکل ہو گئی ہے۔محکمہ موسمیات کے مطابق لاہور کے علاقے نشتر ٹاؤن میں سب سے زیادہ 145 ملی میٹر بارش ریکارڈ کی گئی ہے، جبکہ دیگر علاقوں میں بھی بارش کا سلسلہ جاری ہے۔ محکمہ موسمیات نے مون سون کے اس اسپیل کو 2 ستمبر تک جاری رہنے کا امکان ظاہر کیا ہے، جس کے نتیجے میں مزید بارشوں کی توقع ہے۔شہریوں کو احتیاطی تدابیر اختیار کرنے کی ہدایت کی گئی ہے اور سیلابی پانی سے بچاؤ کے لیے حکومت کی جانب سے امدادی کارروائیاں شروع کر دی گئی ہیں۔ انتظامیہ نے ندی نالوں اور نشیبی علاقوں میں رہائش پذیر افراد کو نقل مکانی کی ہدایات بھی جاری کی ہیں۔

موسم کے اس بحران میں شہریوں کو سڑکوں پر بے احتیاطی سے چلنے، پانی میں گاڑیاں چلانے اور کھلے مقامات پر جانے سے گریز کرنے کی تاکید کی گئی ہے۔ اس کے علاوہ، اس بات پر بھی زور دیا جا رہا ہے کہ شہری اپنے گھروں کی چھتوں، دیواروں اور کھڑکیوں کی دیکھ بھال کریں تاکہ بارش کا پانی اندر نہ آ سکے۔

لاہور: لاہور کی انسدادِ دہشت گردی کی عدالت نے بھارتی دہشت گرد عثمان عرف عبدالرحمٰن کو مجموعی طور پر 20 سال قید کی سزا سنائی ہے۔ عدالت نے اس سزا کا فیصلہ مجرم کی دہشت گردی میں ملوث ہونے اور پاکستان میں دہشت گردی کے مقاصد کے لیے غیر قانونی بارودی مواد رکھنے کی بنیاد پر کیا۔

مجرم عثمان عرف عبدالرحمٰن سابق بھارتی شہری اور جاسوس کے طور پر شناخت کیا گیا ہے۔ پراسیکیوٹر کی جانب سے دورانِ سماعت یہ دلائل دیے گئے کہ مجرم اس وقت افغانستان کی شہریت رکھتا ہے اور پاکستان میں تخریبی سرگرمیوں کے لیے داخل ہوا تھا۔ پراسیکیوٹر نے عدالت کو بتایا کہ عثمان چمن کے راستے پاکستان میں داخل ہوا اور اس کے قبضے سے دھماکا خیز مواد برآمد ہوا جو دہشت گردی کی کارروائیوں کے لیے استعمال ہونے والا تھا۔مجرم عثمان کے خلاف 2024ء میں سی ٹی ڈی لاہور نے مقدمہ درج کیا تھا اور تحقیقات کے دوران مجرم کی دہشت گردی میں ملوث ہونے کی مزید تفصیلات سامنے آئیں۔ سی ٹی ڈی نے اس کی گرفتاری کے بعد اس سے مزید بارودی مواد اور حساس معلومات بھی حاصل کیں، جس سے یہ بات واضح ہوئی کہ وہ پاکستان میں دہشت گردی کے منصوبے پر عمل پیرا تھا۔

عدالت نے مجرم عثمان کو مجموعی طور پر 20 سال قید کی سزا سناتے ہوئے اسے دہشت گردی کے تمام الزامات میں مجرم قرار دیا۔ اس فیصلے کو پاکستان کی عدالتوں کی جانب سے دہشت گردی کے خلاف سخت اقدامات کی ایک اور مثال قرار دی جا رہا ہے۔