Author: ممتاز حیدر

اسرائیل نے مغربی کنارے میں انتہائی متنازع اور غیر قانونی بستی کے قیام کے منصوبے کی حتمی منظوری دے دی جسے فلسطینی ریاست کے قیام کے تصور کو ختم کرنے کی جانب ایک بڑی پیش رفت قرار دیا جارہا ہے۔

انتہا پسند اسرائیلی وزیر خزانہ بیزالیل اسموتریچ نے بدھ کو ایک بیان میں کہا کہ ای ون بستی کے قیام کا منصوبہ انہوں نے گزشتہ ہفتے پیش کیا تھا اور بدھ کو وزارت دفاع کی منصوبہ بندی کمیٹی نے اس کی باضابطہ منظوری دے دی،خیال رہے کہ ای ون منصوبہ مقبوضہ مغربی کنارے کو درمیان سے کاٹ دے گا اور مشرقی القدس (یروشلم) سے اس کا زمینی رابطہ ختم ہوجائے گا۔ اسموتریچ نے کہا کہ ای ون کے ساتھ ہم وہ وعدہ پورا کر رہے ہیں جو برسوں پہلے کیا گیا تھا، فلسطینی ریاست کے امکان کو نعرے بازی سے نہیں بلکہ عملی اقدامات سے ختم کیا جائے گا۔

فلسطینی وزارتِ خارجہ نے اس منصوبے کی مذمت کرتے ہوئے کہا کہ یہ غیر قانونی بستی مقامی فلسطینی آبادی کو الگ تھلگ کردے گا اور دو ریاستی حل کے امکانات کو ختم کردے گی.جرمن حکومت کے ترجمان نے بھی اس اقدام پر شدید تحفظات کا اظہار کرتے ہوئے کہا کہ اسرائیلی بستیاں بین الاقوامی قانون کی خلاف ورزی ہیں اور ’یہ دو ریاستی حل اور مغربی کنارے پر اسرائیلی قبضے کے خاتمے کی راہ میں بڑی رکاوٹ ہیں‘۔

اسرائیلی وزیراعظم بنیامین نیتن یاہو نے اس منصوبے پر براہِ راست تبصرہ نہیں کیا، تاہم اتوار کو مغربی کنارے کی ایک اور بستی ’عوفرا‘ کے دورے کے دوران ان کا کہنا تھا کہ میں نے 25 سال پہلے کہا تھا کہ ہم ہر ممکن اقدام کریں گے کہ سرزمینِ اسرائیل پر اپنی گرفت مضبوط رکھ سکیں، فلسطینی ریاست کے قیام کو روک سکیں اور ہمیں یہاں سے بے دخل کرنے کی کوششوں کو ناکام بنا سکیں۔ میں نے جو وعدہ کیا تھا ہم نے وہ پورا کیا،

ای ون منصوبہ ماضی میں 2012 اور 2020 میں امریکی اور یورپی دباؤ کے باعث روک دیا گیا تھا، اس منصوبے کے تحت تقریباً 3 ہزار 400 نئے رہائشی یونٹس تعمیر کیے جائیں گے۔ اسرائیلی تنظیم ’پیس ناؤ‘ کے مطابق بنیادی انفراسٹرکچر کے کام آئندہ چند ماہ میں شروع ہوسکتے ہیں جبکہ رہائشی تعمیرات ایک سال کے اندر شروع ہونے کا امکان ہے۔

کیلیفورنیا سٹیٹ سینیٹ نے متفقہ طور پر 31 کے مقابلے میں 0 ووٹوں سے ایک تاریخی قرارداد منظور کی ہے، جس میں پاکستان اور امریکہ کے دیرینہ تعلقات کا جشن منایا گیا ہے اور کیلیفورنیا کی معیشت، معاشرت اور ثقافتی دھارے میں پاکستانی امریکی کمیونٹی کی انمول خدمات کو تسلیم کیا گیا ہے۔

یہ قرارداد کیلیفورنیا سینیٹر میلیسا ہارٹاڈو نے پیش کی، جو کیلیفورنیا کی تاریخ میں سب سے کم عمر خاتون سینیٹر ہیں اور ریاستی سینیٹ کمیٹی برائے زراعت کی چیئرپرسن بھی ہیں۔ قرارداد میں پاکستان اور امریکہ کے درمیان طویل عرصے سے جاری کئی جہتی تعلقات کو اجاگر کیا گیا ہے۔ اس میں پاکستانی امریکیوں کے کیلیفورنیا کی ترقی اور معاشی میدان میں اہم کردار کو بھی سراہا گیا ہے، جہاں کیلیفورنیا دنیا کی چوتھی بڑی معیشت ہے۔سینیٹر میلیسا ہارٹاڈو نے قرارداد پیش کرتے ہوئے کہا، "آج میں پاکستانی امریکی تعلقات کی بھرپور تاریخ اور کیلیفورنیا میں پاکستانی امریکیوں کی خدمات کو تسلیم کرنے کے لیے کھڑی ہوں۔ ان کی کہانی قربانی، وقار اور ثابت قدمی کی داستان ہے۔”

قرارداد میں پاکستانی امریکی کمیونٹی خصوصاً نوجوان نسل کی ثقافتی وابستگی اور فخر کو اجاگر کیا گیا ہے، جو کیلیفورنیا کی متنوع اور جیتی جاگتی کمیونٹیز میں معنی خیز کردار ادا کرنے کی صلاحیت کو مزید مضبوط کرتی ہے۔ اس کے علاوہ اس قرارداد میں ان افراد اور تنظیموں کو بھی خراج تحسین پیش کیا گیا ہے جنہوں نے پاکستانی امریکی ثقافت، روایات اور کامیابیوں کو فروغ دیا ہے۔سینیٹر ہارٹاڈو نے کہا، "امریکہ اور پاکستان کے تعلقات نہ صرف تجارت اور سفارت کاری پر مبنی ہیں بلکہ یہ شراکت داری مشترکہ اقدار جیسے کہ برداشت، جمہوریت اور انسانی وقار پر بھی مبنی ہے۔ جیسے ہم پاکستان کی آزادی کا جشن مناتے ہیں، ویسے ہی ہم امریکہ اور پاکستان کے دیرینہ تعلقات کو بھی تسلیم کرتے ہیں۔”

قرارداد کے موقع پر پاکستان کے امریکہ میں سفیر، جناب رضوان سعید شیخ بھی موجود تھے۔ سینیٹر ہارٹاڈو نے ان کا خیرمقدم کرتے ہوئے کہا، "آئیے ہم سب مل کر ان کا شکریہ ادا کریں جو ہمارے ممالک کے تعلقات کو مضبوط بنانے کے لیے اپنی خدمات، قیادت اور عزم کا مظاہرہ کر رہے ہیں۔”سفیر رضوان سعید نے سینیٹر ہارٹاڈو کی قیادت اور ‘کونسل آف پاکستان’ کے کردار کی تعریف کرتے ہوئے کہا کہ وہ اس اہم اقدام کو آگے بڑھانے میں کلیدی کردار ادا کر رہے ہیں۔ انہوں نے پاکستان اور امریکہ کے درمیان عوامی روابط کو مزید مضبوط بنانے کے لیے پاکستان کی پختہ عزم کا اعادہ کیا اور کہا کہ کیلیفورنیا سینیٹ کی یہ قرارداد پاکستان کے 79ویں یوم آزادی کے موقع پر ہمارے دو طرفہ تعلقات کی گہرائی اور عوامی سطح پر روابط کی عکاسی کرتی ہے۔

"گولڈن اسٹیٹ” کے نام سے مشہور کیلیفورنیا ایک عالمی اقتصادی مرکز اور ثقافتی تنوع کی مثال ہے، جہاں پاکستانی امریکیوں کی خدمات سے اس کی ترقی کو نئی بلندیوں پر پہنچایا گیا ہے۔

بھارتی فوج میں خواتین کی جنسی ہراسانی اور زیادتی کے بڑھتے ہوئے واقعات نے ادارے کی ساکھ پر سنگین سوالات کھڑے کر دیے ہیں۔

کشمیر میڈیا سروس کے مطابق تازہ ترین واقعے میں ایک کرنل نے اپنی اہلیہ کے ساتھ جنسی زیادتی کا انکشاف کیا ہے ۔ جس میں بھارتی فوج کے متعدد اعلیٰ افسران ملوث ہیں۔ریٹائرڈ کرنل امیت کمار کے مطابق انکی اہلیہ کو اوڈیشہ کے ہسپتال میں اعلیٰ فوجی افسروں کی طرف سے زیادتی کا نشانہ بنایا گیا۔ کرنل کی طرف سے پیش کئے گئے ویڈیو شواہد اور باضابطہ ایف آئی آر میں تین بریگیڈیئرز اور ایک لیفٹیننٹ کرنل کو نامزد کئے جانے کے باوجود فوج کی انٹرنل انکوائری میں انہیں الزامات سے بری کر دیا گیا ہے۔کرنل امیت کمار نے بھارتی فوج کی قیادت اور پولیس پر ساز باز کا الزام لگاتے ہوئے کہا کہ فوج میں اعلیٰ افسروں کی طرف سے خواتین سے جنسی زیادتی کے واقعات طویل عرصے سے جاری ہیں اور متاثرہ خواتین اور خاندانوں کو ڈرا دھمکا کر خاموش کر دیا جاتا ہے۔

واضح رہے کہ بھارتی فوج میں خواتین سے زیادتی کا یہ کوئی پہلا واقعہ نہیں ہے ۔2015ء میں راجستھان میں آرمی کی سگنل کور کی ایک نوجوان خاتون افسر نے اپنے کمانڈنگ افسر کے خلاف جنسی ہراسانی اور بدسلوکی کی شکایت درج کرائی تھی۔ تاہم مذکورہ افسر کے خلاف کارروائی میں جان بوجھ کر کئی ماہ کی تاخیر کی گئی اور مجبوراً ، خاتون افسر کو وزیر دفاع سے انصاف کی اپیل کرنی پڑی ۔ اس سے قبل 2008ء میں آرمی سپلائی کور کی کیپٹن پونم کور نے سینئر افسران پر ذہنی اور جنسی طور پر ہراساں کرنے کا الزام لگایا تھا ۔ تاہم اعلیٰ افسروں کو بچانے کیلئے تحقیقات میں کیپٹن کے تمام الزامات کو جھوٹ پر مبنی قرار دیدیا گیا تھا۔بھارتی فوج مقبوضہ جموں کشمیر میں بھی بڑے پیمانے پر جنسی تشدد اور عصمت دری کے واقعات میں ملوث ہے۔ 1991ء میں بھارتی فوج نے ضلع کپواڑہ کے علاقے کنن پوش پورہ میں تلاشی کی کارروائی کے دوران درجنوں کشمیری خواتین کی اجتماعی عصمت دری کی تھی۔ اگرچہ اس واقعے کی ایف آئی آر صرف 23 متاثرہ خواتین کی طرف سے درج کرائی گئی تاہم انسانی حقوق کے گروپوں کے مطابق متاثرہ خواتین کی اصل تعداد 100 کے قریب ہے ، جو آج بھی انصاف کی منتظر ہیں ۔ان سنگین واقعات کی تحقیقات کے لیے ایک آزاد اور شفاف نظام کی عدم موجودگی سے بھارتی فوج کو ان گھناؤنے جرائم کی پردہ پوشی کا موقع فراہم ہوتا ہے۔ کرنل امیت کمار کی اہلیہ سے اعلیٰ افسروں کی زیادتی کے واقعے سے ایک بار پھر ثابت ہو گیا ہے کہ بھارتی فوج میں خواتین کے تحفظ اور اُنہیں انصاف کی فراہمی کے دعوے صرف کھوکھلے ہیں۔