Author: ممتاز حیدر

پاکستان میں مون سون کی بارشوں کے نتیجے میں سیلاب کے حوالے سے برطانیہ کے کنگ چارلس سوئم نے وزیر اعظم شہباز شریف کو اپنے پیغام میں کہا ہے کہ وہ اور انکی اہلیہ پاکستان میں حالیہ مون سون کے سیلاب کی وجہ سے ہونے والے جانی نقصان اور بڑے پیمانے پر ہونے والی تباہی اور امدادی کارروائیوں کے دوران ہیلی کاپٹر کے ہولناک حادثے کے بارے میں جان کر سخت غمزدہ ہیں. اس سیلاب کے تناظر میں پیدا ہونے والی تباہی کا پیمانہ واقعی دل دہلا دینے والا ہے۔ان کا کہنا تھا کہ ہم ان تمام لوگوں سے ہمدردی کا اظہار کرتے ہیں جنہوں نے اپنے پیاروں، گھروں اور معاش کو کھو دیا ہے۔

انہوں نے پاکستان اور برطانیہ کے درمیان پائیدار تعلقات کا ذکر کرتے ہوئے کہا کہ برطانیہ میں بہت سے ایسے خاندان آباد ہیں جن کا پاکستان کے ساتھ انتہائی قریبی رشتہ ہے ہم ان تمام خاندانوں کے ساتھ بھی دلی ہمدردی کا اظہار کرتے ہیں۔ ہم متاثرہ افراد کے لیے اپنی گہرے دلی تعزیت کا اظہار کرتے ہیں اور اس مشکل ترین وقت میں پاکستانی عوام کے ساتھ یکجہتی کے ساتھ کھڑے ہیں۔

انہوں نے اپنے پیغام میں مزید کہا ہے کہ ہم ہنگامی خدمات، رضاکاروں اور مقامی کمیونٹیز کی ہمت اور عزم کو انتہائی قدر کی نگاہ سے دیکھتے ہیں جو خطرے میں پڑنے والوں کو بچانے اور ان لوگوں کو ریلیف فراہم کرنے کے لیے کوشاں ہیں جن کی زندگیاں اس سیلاب سے شدید متاثر ہوئی ہیں۔ ان کی یہ بے لوث کوشش گھپ اندھیرے میں بھی شمع کی مانند ہیں ۔ انہوں نے مزید کہا ہے کہ چونکہ متاثرہ کمیونٹیز بحالی اور تعمیر نو کے چیلنجوں کا مقابلہ کر رہی ہیں، ہم اپنی خصوصی دعاؤں کے ساتھ ساتھ ان کی بہادری اور کاوشوں کو سراہتے ہیں۔

سوشل میڈیا کے ذریعے بننے والے تعلقات ایک بار پھر تنازع کا سبب بن گئے، جب اتر پردیش کے ضلع سون بھدر کے ایک نوجوان اور جھارکھنڈ کی ایک لڑکی کے درمیان فیس بک پر ہوئی دوستی شادی کے بندھن تک تو پہنچی، لیکن بعد میں لڑکے نے لڑکی کو پہچاننے سے ہی انکار کر دیا، جس پر لڑکی نے دھوکا دہی کا الزام عائد کرتے ہوئے پولیس سے رجوع کر لیا۔

تفصیلات کے مطابق جھارکھنڈ کی رہائشی ایک نوجوان لڑکی نے سون بھدر کے ایک لڑکے کی فیس بک فرینڈ ریکویسٹ قبول کی، جو ایک معروف ادارے میں ملازم ہے۔ دونوں کے درمیان آن لائن چیٹ اور ویڈیو کالز کا سلسلہ شروع ہوا، جو جلد ہی ایک گہرے رشتے میں بدل گیا۔ بعد ازاں دونوں نے آمنے سامنے ملاقات کی اور ایک مقامی مندر میں ہندو رسم و رواج کے مطابق شادی کر لی، جس میں سات پھیروں کی رسم بھی شامل تھی۔لڑکی کا کہنا ہے کہ اس نے نوجوان کے ساتھ زندگی گزارنے کا فیصلہ کرتے ہوئے اپنا گھر بار اور خاندان تک چھوڑ دیا، لیکن جب وہ اپنے مبینہ شوہر کے گھر پہنچی، تو اس نے اسے تسلیم کرنے سے ہی انکار کر دیا۔ لڑکی کے مطابق نوجوان نے صاف لفظوں میں کہا "معاف کرنا، تم کون ہو؟ میں تمہیں نہیں جانتا!”

یہ سن کر لڑکی پر جیسے قیامت ٹوٹ پڑی۔ وہ وہیں رو پڑی اور گھر کے باہر دھرنے پر بیٹھ گئی، جس سے محلے میں سنسنی پھیل گئی۔ مقامی لوگ جمع ہو گئے، اور معاملہ بڑھنے پر پولیس کو مداخلت کرنا پڑی۔بعد ازاں لڑکی نے تھانے میں تحریری شکایت درج کرائی جس میں اس نے الزام لگایا کہ "اس نوجوان نے مجھے فیس بک کے ذریعے محبت اور شادی کا جھانسہ دیا، میرے جذبات سے کھیلا، مجھ سے شادی کی، اور اب اپنی بیوی ماننے سے انکار کر رہا ہے۔ مجھے انصاف چاہیے اور میرے حقوق کا تحفظ کیا جائے۔”

پولیس حکام نے واقعے کی تصدیق کرتے ہوئے کہا ہے کہ وہ معاملے کی مکمل جانچ کر رہے ہیں۔ افسران کا کہنا ہے کہ شادی کے قانونی پہلوؤں اور لڑکی کی جانب سے لگائے گئے الزامات کی روشنی میں تحقیقات کی جا رہی ہیں، اور اگر الزامات درست ثابت ہوئے تو نوجوان کے خلاف قانونی کارروائی کی جائے گی۔

یہ واقعہ علاقے میں موضوعِ بحث بنا ہوا ہے، اور سوشل میڈیا کے ذریعے بننے والے رشتوں کی سچائی اور پائیداری پر سوالات اٹھا رہا ہے۔ سماجی حلقے اس بات پر زور دے رہے ہیں کہ ایسے معاملات میں جلد بازی اور جذباتی فیصلوں سے گریز کیا جائے، کیونکہ اکثر یہ تعلقات دھوکہ، جذباتی ٹوٹ پھوٹ اور قانونی پیچیدگیوں کا باعث بن سکتے ہیں۔

بنگلادیش نے بھارت سے سخت مطالبہ کیا ہے کہ وہ فوری اور موثر اقدامات کرے تاکہ بھارتی سرزمین پر موجود کوئی بھی بنگلادیشی شہری ملک مخالف سرگرمیوں میں ملوث نہ ہو۔

یہ مطالبہ بنگلادیش کی وزارتِ خارجہ کی طرف سے جاری ہونے والے ایک بیان میں سامنے آیا ہے جس میں بھارت پر زور دیا گیا ہے کہ وہ کالعدم قرار دی گئی جماعت ‘بنگلادیش عوامی لیگ’ کے تمام دفاتر کو فوری طور پر بند کرے۔بنگلادیشی وزارتِ خارجہ کے مطابق، بھارت میں اس جماعت کے کئی سینئر رہنما بنگلادیش میں انسانیت کے خلاف سنگین جرائم کے مقدمات میں مفرور ہیں۔ بیان میں کہا گیا ہے کہ 21 جولائی 2025 کو عوامی لیگ کے رہنماؤں نے دہلی پریس کلب میں ایک این جی او کے نام سے عوامی رابطہ مہم چلائی اور صحافیوں میں کتابچے تقسیم کیے، جس کی بھارتی میڈیا نے بھی تصدیق کی ہے کہ بھارت میں اس جماعت کی سرگرمیاں تیزی سے بڑھ رہی ہیں۔وزارتِ خارجہ کے بیان میں واضح کیا گیا ہے کہ بنگلادیشی شہریوں کی طرف سے، خاص طور پر مفرور رہنماؤں اور کالعدم جماعت کے کارکنوں کی طرف سے بھارت میں سیاسی سرگرمیاں یا دفاتر قائم کرنا بنگلادیش کی خود مختاری اور قومی سلامتی کے خلاف کھلا حملہ ہے۔ بیان میں خبردار کیا گیا ہے کہ اس طرح کی سرگرمیاں نہ صرف دونوں ممالک کے درمیان اعتماد کو نقصان پہنچائیں گی بلکہ عوامی جذبات کو بھی شدید متاثر کریں گی، جو دوطرفہ تعلقات اور تعاون پر منفی اثرات مرتب کر سکتے ہیں۔

واضح رہے کہ بنگلادیش کی عبوری حکومت نے سابق وزیر اعظم حسینہ واجد کی جماعت عوامی لیگ اور اس کی ذیلی تنظیموں کی تمام سرگرمیوں پر پابندی عائد کر دی تھی۔ یہ پابندی جماعت کے رہنماؤں پر قتل، نسل کشی، انسانیت کے خلاف جرائم اور دیگر سنگین الزامات کی بنا پر لگائی گئی۔ اسی دن الیکشن کمیشن نے عوامی لیگ کی انتخابی رجسٹریشن بھی معطل کر دی تھی۔ماہرین کا کہنا ہے کہ بنگلادیش کی جانب سے بھارت پر یہ مطالبہ دونوں ممالک کے تعلقات میں ایک اہم موڑ ثابت ہو سکتا ہے۔ اگر بھارت نے اس معاملے کو سنجیدگی سے نہ لیا تو یہ مسئلہ نہ صرف سیاسی اور سفارتی سطح پر بلکہ عوامی سطح پر بھی کشیدگی کا باعث بن سکتا ہے۔

اسرائیل نے مغربی کنارے میں انتہائی متنازع اور غیر قانونی بستی کے قیام کے منصوبے کی حتمی منظوری دے دی جسے فلسطینی ریاست کے قیام کے تصور کو ختم کرنے کی جانب ایک بڑی پیش رفت قرار دیا جارہا ہے۔

انتہا پسند اسرائیلی وزیر خزانہ بیزالیل اسموتریچ نے بدھ کو ایک بیان میں کہا کہ ای ون بستی کے قیام کا منصوبہ انہوں نے گزشتہ ہفتے پیش کیا تھا اور بدھ کو وزارت دفاع کی منصوبہ بندی کمیٹی نے اس کی باضابطہ منظوری دے دی،خیال رہے کہ ای ون منصوبہ مقبوضہ مغربی کنارے کو درمیان سے کاٹ دے گا اور مشرقی القدس (یروشلم) سے اس کا زمینی رابطہ ختم ہوجائے گا۔ اسموتریچ نے کہا کہ ای ون کے ساتھ ہم وہ وعدہ پورا کر رہے ہیں جو برسوں پہلے کیا گیا تھا، فلسطینی ریاست کے امکان کو نعرے بازی سے نہیں بلکہ عملی اقدامات سے ختم کیا جائے گا۔

فلسطینی وزارتِ خارجہ نے اس منصوبے کی مذمت کرتے ہوئے کہا کہ یہ غیر قانونی بستی مقامی فلسطینی آبادی کو الگ تھلگ کردے گا اور دو ریاستی حل کے امکانات کو ختم کردے گی.جرمن حکومت کے ترجمان نے بھی اس اقدام پر شدید تحفظات کا اظہار کرتے ہوئے کہا کہ اسرائیلی بستیاں بین الاقوامی قانون کی خلاف ورزی ہیں اور ’یہ دو ریاستی حل اور مغربی کنارے پر اسرائیلی قبضے کے خاتمے کی راہ میں بڑی رکاوٹ ہیں‘۔

اسرائیلی وزیراعظم بنیامین نیتن یاہو نے اس منصوبے پر براہِ راست تبصرہ نہیں کیا، تاہم اتوار کو مغربی کنارے کی ایک اور بستی ’عوفرا‘ کے دورے کے دوران ان کا کہنا تھا کہ میں نے 25 سال پہلے کہا تھا کہ ہم ہر ممکن اقدام کریں گے کہ سرزمینِ اسرائیل پر اپنی گرفت مضبوط رکھ سکیں، فلسطینی ریاست کے قیام کو روک سکیں اور ہمیں یہاں سے بے دخل کرنے کی کوششوں کو ناکام بنا سکیں۔ میں نے جو وعدہ کیا تھا ہم نے وہ پورا کیا،

ای ون منصوبہ ماضی میں 2012 اور 2020 میں امریکی اور یورپی دباؤ کے باعث روک دیا گیا تھا، اس منصوبے کے تحت تقریباً 3 ہزار 400 نئے رہائشی یونٹس تعمیر کیے جائیں گے۔ اسرائیلی تنظیم ’پیس ناؤ‘ کے مطابق بنیادی انفراسٹرکچر کے کام آئندہ چند ماہ میں شروع ہوسکتے ہیں جبکہ رہائشی تعمیرات ایک سال کے اندر شروع ہونے کا امکان ہے۔

کیلیفورنیا سٹیٹ سینیٹ نے متفقہ طور پر 31 کے مقابلے میں 0 ووٹوں سے ایک تاریخی قرارداد منظور کی ہے، جس میں پاکستان اور امریکہ کے دیرینہ تعلقات کا جشن منایا گیا ہے اور کیلیفورنیا کی معیشت، معاشرت اور ثقافتی دھارے میں پاکستانی امریکی کمیونٹی کی انمول خدمات کو تسلیم کیا گیا ہے۔

یہ قرارداد کیلیفورنیا سینیٹر میلیسا ہارٹاڈو نے پیش کی، جو کیلیفورنیا کی تاریخ میں سب سے کم عمر خاتون سینیٹر ہیں اور ریاستی سینیٹ کمیٹی برائے زراعت کی چیئرپرسن بھی ہیں۔ قرارداد میں پاکستان اور امریکہ کے درمیان طویل عرصے سے جاری کئی جہتی تعلقات کو اجاگر کیا گیا ہے۔ اس میں پاکستانی امریکیوں کے کیلیفورنیا کی ترقی اور معاشی میدان میں اہم کردار کو بھی سراہا گیا ہے، جہاں کیلیفورنیا دنیا کی چوتھی بڑی معیشت ہے۔سینیٹر میلیسا ہارٹاڈو نے قرارداد پیش کرتے ہوئے کہا، "آج میں پاکستانی امریکی تعلقات کی بھرپور تاریخ اور کیلیفورنیا میں پاکستانی امریکیوں کی خدمات کو تسلیم کرنے کے لیے کھڑی ہوں۔ ان کی کہانی قربانی، وقار اور ثابت قدمی کی داستان ہے۔”

قرارداد میں پاکستانی امریکی کمیونٹی خصوصاً نوجوان نسل کی ثقافتی وابستگی اور فخر کو اجاگر کیا گیا ہے، جو کیلیفورنیا کی متنوع اور جیتی جاگتی کمیونٹیز میں معنی خیز کردار ادا کرنے کی صلاحیت کو مزید مضبوط کرتی ہے۔ اس کے علاوہ اس قرارداد میں ان افراد اور تنظیموں کو بھی خراج تحسین پیش کیا گیا ہے جنہوں نے پاکستانی امریکی ثقافت، روایات اور کامیابیوں کو فروغ دیا ہے۔سینیٹر ہارٹاڈو نے کہا، "امریکہ اور پاکستان کے تعلقات نہ صرف تجارت اور سفارت کاری پر مبنی ہیں بلکہ یہ شراکت داری مشترکہ اقدار جیسے کہ برداشت، جمہوریت اور انسانی وقار پر بھی مبنی ہے۔ جیسے ہم پاکستان کی آزادی کا جشن مناتے ہیں، ویسے ہی ہم امریکہ اور پاکستان کے دیرینہ تعلقات کو بھی تسلیم کرتے ہیں۔”

قرارداد کے موقع پر پاکستان کے امریکہ میں سفیر، جناب رضوان سعید شیخ بھی موجود تھے۔ سینیٹر ہارٹاڈو نے ان کا خیرمقدم کرتے ہوئے کہا، "آئیے ہم سب مل کر ان کا شکریہ ادا کریں جو ہمارے ممالک کے تعلقات کو مضبوط بنانے کے لیے اپنی خدمات، قیادت اور عزم کا مظاہرہ کر رہے ہیں۔”سفیر رضوان سعید نے سینیٹر ہارٹاڈو کی قیادت اور ‘کونسل آف پاکستان’ کے کردار کی تعریف کرتے ہوئے کہا کہ وہ اس اہم اقدام کو آگے بڑھانے میں کلیدی کردار ادا کر رہے ہیں۔ انہوں نے پاکستان اور امریکہ کے درمیان عوامی روابط کو مزید مضبوط بنانے کے لیے پاکستان کی پختہ عزم کا اعادہ کیا اور کہا کہ کیلیفورنیا سینیٹ کی یہ قرارداد پاکستان کے 79ویں یوم آزادی کے موقع پر ہمارے دو طرفہ تعلقات کی گہرائی اور عوامی سطح پر روابط کی عکاسی کرتی ہے۔

"گولڈن اسٹیٹ” کے نام سے مشہور کیلیفورنیا ایک عالمی اقتصادی مرکز اور ثقافتی تنوع کی مثال ہے، جہاں پاکستانی امریکیوں کی خدمات سے اس کی ترقی کو نئی بلندیوں پر پہنچایا گیا ہے۔