Author: ممتاز حیدر

مودی سرکار ایک مرتبہ پھر خطے کو جنگ کے دھانے پر لے جانے کی کوششوں میں مصروف ہے۔ بھارتی وزارتِ دفاع نے بھارت الیکٹرانکس لمیٹڈ کو جدید دفاعی نظاموں کے اہم آرڈرز دیے ہیں، جن میں سمندری جارحیت کے لیے جدید مواصلاتی اور میری ٹائم نظام بھی شامل ہیں۔ یہ واضح اشارہ ہے کہ مودی سرکار اپنی جنگی صلاحیتوں کو بڑھا کر علاقائی تصادم کی راہ ہموار کرنا چاہتی ہے۔

جدید ٹارگٹ سسٹمز، جیمرز اور سیکرز کی خریداری مودی کی جنگی ذہنیت کا منہ بولتا ثبوت ہے، جو نام نہاد جنگی صلاحیتوں کے باوجود آپریشن سندور میں پاکستان کی بدترین شکست کا داغ دھونے میں ناکام رہی ہے۔ بھارتی اقدامات بی جے پی اور آر ایس ایس کی انتہا پسند ہندوتوا نظریات اور جارحانہ عزائم کی عکاسی کرتے ہیں۔پاکستان نے اپنی جدید الیکٹرانک وارفیئر صلاحیتوں، کاؤنٹر جیمنگ ٹیکنالوجی، اور مضبوط کمانڈ سسٹمز کے ذریعے بھارتی مہم جوئی کا بھرپور اور مؤثر جواب دینے کی صلاحیت حاصل کر رکھی ہے۔ خطے میں امن کے لیے پاکستان ہر ممکن کوشش کرے گا تاکہ بھارت کے بڑھتے ہوئے جنگی جنون کو ناکام بنایا جا سکے۔

مودی سرکار کے حالیہ دفاعی معاہدے اور جدید ہتھیار محض تکنیکی ترقی نہیں بلکہ جارحانہ عسکری منصوبہ بندی کی واضح مثال ہیں۔ سوال یہ اٹھتا ہے کہ کیا مودی اپنی ناقص جنگی حکمت عملی اور آپریشن سندور میں شکست کے اثرات کو ان جدید ٹیکنالوجیز کے ذریعے چھپا پائیں گے؟

واشنگٹن: امریکہ نے اپنی نئی تجارتی پالیسی کے تحت جنوبی ایشیا کے ممالک پر مختلف شرحوں میں ٹیرف عائد کیے ہیں، جس میں پاکستان کو بھارت کے مقابلے میں خاص رعایت دی گئی ہے۔

وائٹ ہاؤس کی جانب سے جاری کردہ اعلامیے کے مطابق امریکی صدر ڈونلڈ ٹرمپ کی انتظامیہ نے پاکستانی مصنوعات پر 19 فیصد جوابی ٹیرف عائد کیا ہے، جبکہ بھارت پر 25 فیصد ٹیرف لاگو کیا گیا ہے۔یہ فیصلہ جنوبی ایشیا کے تین بڑے ممالک میں پاکستان کو سب سے زیادہ رعایت دینے کی نشاندہی کرتا ہے، جسے ملکی سطح پر پاکستانی حکومت کی کامیاب سفارتی کوششوں کا نتیجہ قرار دیا جا رہا ہے۔

وائٹ ہاؤس کے مطابق، جنوبی افریقا پر 30 فیصد، سوئٹزرلینڈ پر 39 فیصد اور ترکی پر 15 فیصد ٹیرف عائد کیا گیا ہے۔ مشرق وسطیٰ میں امریکہ کے قریبی اتحادی اسرائیل کو بھی 15 فیصد ٹیرف کا سامنا کرنا پڑا ہے۔کینیڈا پر پالیسی اختلافات کے باعث ٹیرف کی شرح 25 فیصد سے بڑھا کر 35 فیصد کر دی گئی ہے۔ اس کے علاوہ برطانیہ، برازیل اور فاکلینڈ آئی لینڈز کو 10 فیصد ٹیرف عائد کیا گیا ہے۔15 فیصد ٹیرف کی فہرست میں ترکی، اسرائیل، افغانستان، انگولا، بولیویا، کیمرون، کوسٹا ریکا، جاپان، نیوزی لینڈ، جنوبی کوریا اور دیگر کئی ممالک شامل ہیں۔

پاکستان کی طرح انڈونیشیا، ملائیشیا، فلپائن، تھائی لینڈ اور کمبوڈیا پر بھی 19 فیصد ٹیرف نافذ ہے، جبکہ بنگلہ دیش، سری لنکا، ویتنام اور تائیوان کو 20 فیصد ٹیرف کا سامنا ہے۔ بھارت کے برابر یعنی 25 فیصد ٹیرف قازقستان، تیونس اور مالدوا کو بھی دیا گیا ہے۔30 فیصد ٹیرف الجزائر، لیبیا، بوسنیا ہرزیگوینا اور جنوبی افریقا پر عائد کیا گیا ہے جبکہ میانمار اور لاوس کو 40 فیصد اور شام کو سب سے زیادہ 41 فیصد ٹیرف کا سامنا ہے۔

تجزیہ کاروں کے مطابق پاکستان کو بھارت کی نسبت کم ٹیرف دینا پاکستان کی متوازن اور مدبرانہ خارجہ پالیسی کا ثبوت ہے۔ یہ کامیابی فیلڈ مارشل جنرل سید عاصم منیر کی امریکی صدر سے ملاقات، وزیراعظم شہباز شریف اور امریکی وزیر خارجہ مارکو روبیو کے باہمی رابطوں، نائب وزیراعظم اسحاق ڈار کی امریکی وزیر خارجہ سے حالیہ ملاقات اور وزیر خزانہ محمد اورنگزیب کی امریکی وزیر تجارت سے بات چیت کا نتیجہ ہے۔ماہرین کا کہنا ہے کہ پاکستان کو چاہیے کہ وہ اس رعایت سے بھرپور فائدہ اٹھائے تاکہ ملکی معیشت کو فروغ ملے اور برآمدات میں اضافہ ہو۔

وزیراعظم محمد شہباز شریف کی زیر صدارت انسداد دہشت گردی و ریاستی رٹ کے قیام (Harden the State) کے حوالے سے قائم اسٹیرنگ کمیٹی کا جائزہ اجلاس ہوا.

اجلاس میں نائب وزیراعظم محمد اسحاق ڈار، فیلڈ مارشل چیف آف آرمی سٹاف سید عاصم منیر، نیشنل سیکیورٹی ایڈوائزر لیفٹیننٹ جنرل محمد عاصم ملک، وفاقی وزیر اطلاعات و نشریات عطاء اللہ تارڑ، وفاقی وزیر قانون اعظم نذیرتارڑ، وفاقی وزیر اکنامک افیئرز ڈویژن احد خان چیمہ، وزیراعظم کے مشیر براۓ بین الصوبائی تعاون رانا ثنا اللہ، وزیر مملکت برائے داخلہ طلال چوہدری، تمام صوبوں کے چیف سیکرٹریز، انسپیکٹر جنرلز اور متعلقہ سرکاری حکام نے شرکت کی.

وزیراعظم شہباز شریف کا کہنا تھا کہ ریاست پاکستان، دہشت گردی کے ناسور کو جڑ سے ختم کرنے کے لیے پرعزم ہے اور دنیا دہشت گردوں کے خلاف ہماری کامیاب کاروائیوں کی معترف ہے۔ریاست پاکستان نے دہشت گردی کے خلاف جنگ میں کثیر الجہتی حکمت عملی اپنائی ہے،پاکستان کی طرف سے زمینی آپریشن، متعلقہ قانون سازی، بامعنی عوامی رابطے اور انتہا پسند سوچ کی حوصلہ شکنی جیسے اہم عناصر کا بھرپور اور موثر استعمال کیا گیا۔

کمیٹی نے دھشتگردی کے خلاف وفاقی و صوبائی حکومتوں کے مابین ہم آہنگی کو مؤثر بنانے اور اس ضمن میں کمیٹی کی سفارشات پر سختی سے عملدرآمد کی ہدایت کی، وزیراعظم کا کہنا تھا کہ بہادر افواج کے سپوتوں کا دہشت گردی کے خلاف اس جنگ میں کردار قابل تعریف و قابل تحسین ہے۔ارض وطن کی خاطر اپنی جانوں کا نذرانہ پیش کرنے والے اہلکار و افسران اور قربانی کے جذبے سے سرشار ان کے اہل خانہ پر مجھ سمیت پوری قوم کو فخر ہے. دہشت گردی کے خلاف جنگ میں پوری پاکستانی قوم، بہادر افواج، قانون نافذ کرنے والے ادارے، انٹیلیجنس ادارے متحد اور یکسو ہیں. پاکستان کی بہادر افواج نے آپریشن رد الفساد اور ضرب عضب میں دہشت گردوں کا بھرپور مقابلہ کیا اور حالیہ تاریخ ساز معرکہ حق میں دنیا نے پاکستان کی فتح کو تسلیم کیا۔صوبائی حکومتوں ، انٹیلیجنس بیورو، وزارت داخلہ،کاؤنٹر ٹیررزم ڈیپارٹمنٹ بالخصوص پنجاب انسداد دہشتگردی ڈیپارٹمنٹ نے دہشت گردی کے خلاف اس جنگ میں نہایت موثر اقدامات اٹھائے ہیں۔ پاکستان کو فتنتہ ہندوستان اور فتنتہ الخوارج اور اس طرح کی دوسرے سماج دشمن عناصر کے مکمل خاتمے کے لیے جامع، موثر اور قابل عمل حکمت عملی پر کام کررہی ہے۔ تمام متعلقہ اداروں کی مشترکہ کاروائیوں و تعاون سے اسمگلنگ کے خلاف مؤثر کاروائیاں عمل میں لائی گئیں، جس سے اسمگلنگ کی روک تھام ممکن ہوئی.اسمگلنگ کی روک تھام سے معیشت پر مثبت اثرات مرتب ہوئے. دہشت گردی سے پاک اور پرامن مضبوط ریاستی ڈھانچہ ہی بین الاقوامی سطح پر سرمایہ کاروں کے اعتماد کو بحال کرتا ہے۔ بین الاقوامی سطح پر سرمایہ کاروں کے اعتماد کی بحالی کے لیے حکومت نے تمام نظام کی ڈیجیٹائزیشن اور ٹیکس سسٹم میں بہتری جیسے انقلابی تبدیلیاں لائی ہیں۔پاکستان اسٹاک ایکسچینج میں ریکارڈ اضافہ اور گلوبل ریٹنگز میں بہتری پاکستان کی معیشت میں استحکام کی نشاندہی کرتا ہے اور اس سے بیرونی سرمایہ کار کا اعتماد بحال ہوگا،غیر قانونی طور پر پاکستان میں مقیم افغان باشندوں کی بین الاقوامی قوانین کے عین مطابق وطن واپسی کے پروگرام پر عملدرآمد مؤثر طور سے جاری ہے.