ممبر قومی اسمبلی شیر افضل مروت نے کہا ہے کہ فتنہ پھیلانے والے کئی افراد ہیں جو بانی چیئرمین پاکستان تحریک انصاف (پی ٹی آئی) عمران خان سے ان کی ملاقات میں رکاوٹ ڈال رہے ہیں۔
انہوں نے ان خیالات کا اظہار جوڈیشل کمپلیکس اسلام آباد میں میڈیا سے گفتگو کرتے ہوئے کیا۔شیر افضل مروت کا کہنا تھا کہ پی ٹی آئی کی پوری قیادت مختلف مقدمات میں نامزد ہے۔ کبھی ایک رہنما تو کبھی دوسرا رہنما عدالتوں میں پیش ہوتا ہے۔ انہوں نے مزید کہا کہ 26 نومبر کو پی ٹی آئی کے کارکنوں کی گاڑیاں چھین لی گئیں اور ان پر مقدمات بھی بنائے گئے، لیکن بانی پی ٹی آئی عمران خان کو 26 نومبر کی معافی مانگنے کی کیا ضرورت ہے؟
ایک سوال کے جواب میں شیر افضل مروت نے کہا کہ اگر حکومت ہوشیار ہوتی تو بلوچستان میں امن قائم ہو چکا ہوتا۔ انہوں نے اس بات پر بھی زور دیا کہ حکومت کی طرف سے بہتر حکمت عملی اپنائی جاتی تو امن کی صورتحال بہت مختلف ہو سکتی تھی۔
شیر افضل مروت نے اپنی سیاسی وابستگی کے بارے میں بات کرتے ہوئے کہا کہ ان کا کسی بھی پارٹی سے کوئی رابطہ نہیں ہے۔ وہ صرف لوگوں سے ملاقات کرتے ہیں اور اگر کوئی انہیں ملے تو وہ اس سے سلام دعا کر لیتے ہیں۔عمران خان سے ملاقات کے بارے میں انہوں نے کہا کہ بانی پی ٹی آئی جب انہیں بلائیں گے تو وہ ملاقات کے لیے جائیں گے۔ ان کا مزید کہنا تھا کہ کچھ لوگ ایسے ہیں جو ملاقات میں رکاوٹ ڈالتے ہیں اور فتنہ پھیلاتے ہیں۔
