بھارت میں جب کسی عالیشان شادی کا ذکر کیا جاتا ہے تو ذہن میں عموماً امیر ترین تاجر مکیش امبانی یا گوتم اڈانی جیسے خاندانوں کی شادیاں آتی ہیں۔ تاہم، چند سال قبل ایک ایسی شادی بھی ہوئی تھی جس نے ان تاجروں کی عالیشان تقریبات کو پیچھے چھوڑ دیا اور پوری دنیا میں شہرت حاصل کی۔ یہ شادی بھارت کی سب سے مہنگی شادی کے طور پر جانی جاتی ہے، جس نے نہ صرف دولت کی نمائش کی بلکہ لوگوں کی توجہ بھی حاصل کی۔
یہ شادی بھارت کی ریاست کرناٹکا کے سابق وزیر جناردھن ریڈی کی بیٹی کی تھی، جو 16 نومبر 2016 کو منعقد ہوئی۔ اس شاندار تقریب کا بجٹ 500 کروڑ روپے تھا، اور اس میں 50,000 سے زائد مہمانوں نے شرکت کی۔ جناردھن ریڈی نے اس شادی کو پانچ دن تک جاری رکھا، جس نے اس بات کو ثابت کیا کہ دولت کی کوئی کمی نہیں تھی۔تقریب میں مہمانوں کی خاطر مدارات کے لیے بنگلورو کے فائیو اسٹار اور تھری اسٹار ہوٹلوں میں 1500 کمرے بک کیے گئے تھے۔ شادی کا مقام وجے نگر سلطنت کے مندروں کی طرز پر بنایا گیا، جس کے لیے بالی وڈ کے مشہور آرٹ ڈائریکٹرز کی خدمات حاصل کی گئیں۔ کھانے کے ہال کو بیلاری گاؤں کی طرز پر ڈیزائن کیا گیا تاکہ اس میں ایک روایتی رنگ اور ثقافتی جھرمٹ نظر آئے۔
دلہن، جو کہ برہمانی ذات سے تعلق رکھتی ہیں، اس شادی کی سب سے بڑی توجہ کا مرکز بنیں۔ انہوں نے معروف ڈیزائنر نیتا لُلا کی تیار کردہ سرخ ساڑھی زیب تن کی، جس کی قیمت 17 کروڑ روپے تھی۔ اس ساڑھی پر سونے کے دھاگوں سے نفیس کڑھائی کی گئی تھی۔ دلہن کے زیورات کی کل مالیت 90 کروڑ روپے تھی اور ان کے میک اپ پر 30 لاکھ روپے خرچ ہوئے۔شادی کی تقریب میں 40 بیل گاڑیاں مہمانوں کو پنڈال تک پہنچانے کے لیے مخصوص کی گئی تھیں، جبکہ 2000 ٹیکسیاں اور 15 ہیلی کاپٹرز وی آئی پی مہمانوں کے لیے فراہم کیے گئے تھے۔ کھانے کی میز پر شاہی پکوانوں کا انتظام کیا گیا تھا، جس میں 16 اقسام کی مہنگی مٹھائیاں شامل تھیں۔ ان مٹھائیوں کی فی پلیٹ قیمت 3000 روپے تھی۔
اس عالیشان شادی کی ہر طرف تعریف کی گئی، لیکن اس کے ساتھ ہی اس پر شدید تنقید بھی کی گئی۔ جناردھن ریڈی بی جے پی حکومت میں وزیر رہ چکے ہیں، اور ان پر 500 کروڑ روپے کی فضول خرچی پر تنقید کی گئی۔ سیاسی جماعتوں اور سماجی کارکنوں نے ان بے تحاشہ اخراجات پر سوالات اٹھائے اور ریڈی کی دولت کے ذرائع کی جانچ کرنے کا مطالبہ کیا۔ اس شادی نے نہ صرف بھارت بلکہ عالمی سطح پر بھی ایک نیا معیار قائم کیا، اور دولت کے اظہار کا ایک نیا طریقہ متعارف کرایا۔
جناردھن ریڈی کی بیٹی کی شادی نہ صرف ایک یادگار ایونٹ بن کر سامنے آئی بلکہ اس نے بھارتی معاشرتی اور سیاسی حلقوں میں بھی گہری بحث پیدا کر دی۔ اس شادی کے اخراجات اور اس کی شاہانہ شان و شوکت نے ایک طرف تو دنیا کو حیران کن حد تک متاثر کیا، لیکن دوسری طرف اس کی دولت کی حقیقت اور ان اخراجات کی جواز پر سوالات اٹھائے گئے۔
