Author: ممتاز حیدر

اسلام آباد ہائی کورٹ نے داڑھی چھوٹی ہونے کی وجہ سے امتحان میں بیٹھنے کی اجازت نہ ملنے کے خلاف درخواست پر تفصیلی فیصلہ جاری کیا ہے۔ جسٹس محسن اخترکیانی کی سربراہی میں عدالت نے درخواست کو ہدایات کے ساتھ مسترد کر دیا۔

فیصلے میں عدالت نے سیکرٹری تعلیم کو مدارس کے لیے قانون سازی کی تجویز بھیجنے کی ہدایت کی ہے اور کہا کہ وہ چھ ماہ کے اندر مدارس ریگولیشن کے حوالے سے ضوابط تیار کریں۔عدالت نے اپنے فیصلے میں کہا کہ ڈی جی مذہبی تعلیم اور وزارت تعلیم مدارس کے لیے باقاعدہ قواعد و ضوابط بنانے میں ناکام رہے ہیں۔ ان کا کہنا تھا کہ قانون میں دینی مدارس کے تعلیمی معیار، اساتذہ کی قابلیت، نصاب، داخلے اور امتحانی نظام کے اصول وضوابط طے کیے جائیں تاکہ دینی تعلیم کے اداروں میں معیار کو بہتر بنایا جا سکے۔اس کے علاوہ، عدالت نے یہ بھی کہا کہ اگرچہ ایچ ای سی (ہائر ایجوکیشن کمیشن) مدارس کی ڈگریوں کی تصدیق کر رہا ہے، لیکن اس کے لیے کوئی واضح قانونی یا تعلیمی ضابطہ موجود نہیں۔

عدالت نے اپنے فیصلے میں کہا کہ ایسا لگتا ہے کہ حکومت نے اس معاملے کو حل کرنے کے بجائے ایک سیاسی حکمت عملی کے تحت التوا میں رکھا ہے۔ ان کا کہنا تھا کہ مدارس کا تعلیمی معیار یقینی بنانے کے لیے، جیسے دیگر شعبوں میں قانون سازی کی گئی ہے، ویسا ہی کوئی قانون یا ضابطہ مدارس کے لیے نہیں بنایا گیا۔عدالت کا مزید کہنا تھا کہ ملک میں قومی سطح پر کوئی یکساں تعلیمی نظام موجود نہیں، جس کی وجہ سے دینی مدارس اپنی پالیسیوں کے مطابق بغیر کسی قانونی نگرانی کے کام کر رہے ہیں۔ اس کا نتیجہ یہ ہو سکتا ہے کہ دینی مدارس سے فارغ التحصیل طلبا کو مستقبل میں مشکلات کا سامنا ہو گا، کیونکہ مدارس کی ڈگریاں نہ تو ملک میں مکمل طور پر تسلیم شدہ ہیں اور نہ ہی بین الاقوامی سطح پر۔

عدالت نے اپنے فیصلے میں یہ بھی واضح کیا کہ دینی مدارس کسی مخصوص قانون کے تحت ریگولیٹ نہیں کیے جا رہے، اور درخواست گزار کو آئین کے آرٹیکل 199 کے تحت تحفظ فراہم نہیں کیا جا سکتا۔ اس کے نتیجے میں، درخواست کو مسترد کر دیا گیا۔

اسلام آباد کے ایف 9 پارک کے قریب ایک تشدد کا واقعہ پیش آیا جس میں خواتین اور ملزم جمال کے درمیان راضی نامہ ہوگیا ہے۔ پولیس کے مطابق راضی نامہ ہونے کے بعد ملزم جمال کی 7 مارچ کو ضمانت منظور ہوچکی ہے۔

دوسری جانب خواتین اور ملزم کے درمیان ہونے والے معاہدے کا متن منظرعام پر آگیا ہے، جس کے مطابق خواتین نے مکمل تسلی کرنے کے بعد یہ تسلیم کیا ہے کہ جمال بے قصور ہے اور یہ مقدمہ محض غلط فہمی کی بنا پر درج کیا گیا۔ خواتین نے اپنے بیان میں کہا کہ ہم نے جمال کے ساتھ راضی نامہ کرلیا ہے اور اگر عدالت جمال کو رہا کرتی ہے تو ہمیں کوئی اعتراض نہیں ہوگا، اور اگر عدالت ملزم جمال کو بری کردے تو ہمیں اس پر بھی کوئی اعتراض نہیں۔خواتین کا کہنا تھا کہ وہ اس مقدمے کی مزید پیروی نہیں کرنا چاہتیں اور اس معاہدے پر تینوں خواتین کے دستخط موجود ہیں۔

یاد رہے کہ گزشتہ روز ایف 9 پارک میں ایک معروف فوڈ چین کے سامنے سڑک پر خواتین کو زدوکوب کرنے کی ویڈیو منظرعام پر آئی تھی، جس میں ملزمان کو خواتین کو بالوں سے پکڑ کر گھسیٹتے ہوئے دیکھا جا سکتا تھا۔ پولیس نے متاثرہ خاتون کی مدعیت میں تھانہ مارگلہ میں ملزمان کے خلاف مقدمہ درج کیا تھا۔ ایف آئی آر کے مطابق، مرکزی ملزم جمال نے 23 فروری کی رات اپنے ساتھیوں کے ساتھ مل کر خواتین کو زدوکوب کیا اور ان سے 10 تولہ زیورات اور 20 لاکھ روپے نقد چھین لیے۔

اسلام آباد پولیس کے ترجمان کا کہنا ہے کہ یہ واقعہ 23 فروری کا ہے اور مقدمہ درج ہونے کے بعد پولیس نے بروقت کارروائی کرتے ہوئے ملزم کو گرفتار کرلیا تھا۔ تین روزہ جسمانی ریمانڈ حاصل کر کے ملزم سے برآمدگی کی گئی، اور اس کے بعد چالان مجاز عدالت میں پیش کیا گیا، جس کے بعد ملزم کو جوڈیشل ریمانڈ پر جیل بھیج دیا گیا۔

آج ہونے والے اجلاس میں سینیٹ کی قائمہ کمیٹی برائے نجکاری نے نئے چیئرمین کا انتخاب کیا۔ یہ اجلاس سینیٹر طلال چوہدری کی وزارت داخلہ کے لئے وزیر مملکت کے طور پر تعیناتی کے بعد منعقد ہوا، جنہوں نے چیئرمین کے عہدے سے استعفیٰ دے دیا تھا۔

اجلاس میں سینیٹرز افنان اللہ خان، اشرف علی جتوئی، بلال احمد خان، ندیم احمد بھٹو، فیصل سلیم رحمان، محسن عزیز، اور خالدہ عتیب نے شرکت کی۔اجلاس کے دوران سینیٹر ندیم احمد بھٹو نے سینیٹر افنان اللہ خان کو چیئرمین کے عہدے کے لئے باضابطہ طور پر نامزد کیا، جبکہ سینیٹر فیصل سلیم رحمان نے اس تجویز کی تائید کی۔سینیٹر افنان اللہ خان کو بلامقابلہ سینیٹ کی قائمہ کمیٹی برائے نجکاری کا نیا چیئرمین منتخب کر لیا گیا۔

چیئرمین منتخب ہونے پر اپنے خیالات کا اظہار کرتے ہوئے سینیٹر افنان اللہ خان نے کمیٹی کے اراکین کا شکریہ ادا کیا اور ان کے اعتماد کو سراہا۔ انہوں نے کمیٹی کے اہم کردار کو اجاگر کیا اور کہا کہ یہ کمیٹی ملک کے مفادات کو فروغ دینے میں اہم کردار ادا کرتی ہے۔ اس کے علاوہ، انہوں نے کمیٹی کے اراکین کے ساتھ مل کر موثر تعاون اور تعمیری گفتگو کی اہمیت پر زور دیا تاکہ اپنے فرائض کو بہترین طریقے سے نبھایا جا سکے۔اجلاس کا اختتام سینیٹر خان کی مبارکبادوں کے ساتھ ہوا، جب کہ کمیٹی کے دیگر اراکین نے ان کو دل سے خوشی اور کامیابی کی خواہشات پیش کیں۔