کراچی۔ (اے پی پی) الاخوان سی سی نے مدمقابل بوم بوم اسپورٹس کو بہ آسانی 112 رنز سے شکست دے دی۔ محمد ذاکر کھتری میموریل چیمپئننز لیگ ٹی20 لیگ کرکٹ ٹورنامنٹ کے چھٹے روز ایسٹرن اسٹار کرکٹ گراؤنڈ پر طاقتور الاخوان سی سی نے مدمقابل بوم بوم اسپورٹس کو بہ آسانی 112 رنز سے شکست دے کر دوسری شاندار کامیابی حاصل کرلی۔ ایونٹ میں اب تک کھیلے گئے میچوں میں الاخوان سی سی اور جناح اسپورٹس نے دو دو میچوں میں کامیابی بعد 4 -4 پوائنٹس کے ہمراہ سرفہرست ہیں اور سیمی فائنل میں پہنچ چکی ہیں جبکہ آج اتوار 29 ستمبر کو دونوں روایتی حریفوں کے درمیان ہو نے والے ٹاکرے کا نتیجہ لیگ کی نمبر 1 اور نمبر 2 کا فیصلہ کرے گا۔ دونوں ٹیموں کے سپورٹرز اور کھلاڑیوں کو اس میچ کا شدت سے انتظار ہے۔ کھیلے گئے پہلے میچ کی نمایاں خصوصیات فاتح الاخوان سی سی کے آصف علی جی کے(38رنز)، وکٹ کیپر بیٹسمین نوید جی بی کے(38رنز)، حمید(37رنز ناٹ آؤٹ) جبکہ کامران چائنا کی(11 /4 وکٹیں).دوسری جانب بوم بوم اسپورٹس کے صدیقی کی 4/30 وکٹیں) تھیں۔ میں الاخوان سی سی الیون نے ٹاس جیت کر پہلے بیٹنگ کی اور مقررہ 20 اوورز میں 7 وکٹوں کے نقصان 198 رنز رنز کا بڑا ہندسہ اسکور بورڈ کی زینت بنایا۔ آصف علی جی نے جارحانہ بیٹنگ کرتے ہوئے 18 گیندوں پر 38 رنز کی دلکش باری میں 8 مرتبہ گیند کو باؤنڈری لائن کی سیر کرائی، وکٹ کیپر بیٹسمین نوید جی بی نے ذمدارانہ 38 رنز میں 6 چوکے لگائے، دنوں کے درمیان 78 رنز کی شاندار اوپنگ شراکت بھی رہی، حمید نے ناقابلِ شکست 37 رنز 20 گیندوں پر 3 چوکوں اور چھکے کی مدد سے بنائے اے بی جوبت نے جارحانہ 21 رنز 8 گیندوں ہر 2 چھکوں اور 2 چوکوں کی بدولت بنائے۔ صدیقی نے عمدہ بولنگ کرتے ہوئے 11 رنز کے عوض 4 کھلاڑیوں کو شکار کیا، ایم فیضان نے 32 رنز کے بدلے 2 وکٹوں کا سودا کیاجبکہ طلحہ کے حصے میں ایک وکٹ آئی۔ جوابی بیٹنگ میں بوم بوم اسپورٹس کی بیٹنگ لائن فاتح ٹیم کے بولروں کی عمدہ اور نپی تلی بولنگ کے آگے بے بس نظر آئی اور پوری ٹیم مقررہ 20ویں اوورز کی آخری گیند پر 86 رنز پر ڈھیرہوگئی۔ بوم بوم اسورٹس کی جانب سے نوید 21 رنز، اسد 14 اور ایم صادق 10 رنز ہی ڈبل فگر میں داخل ہوسکے۔ کامران چائنا نے جادوئی بولنگ کرتے ہوئے 11 رنز کے عوض 4 کھلاڑیوں کو میدان بدر کیا، حماد بی جے نے 12 اور ارسلان بی جے نے 18 رنز کے بدلے 2-2 وکٹیں جبکہ کامران کھتری ایک وکٹ لی۔ اس موقع پر محمدفیصل کھتری، شاہد تاؤ،حسنین 5 اسٹار، معیز 5 اسٹار، عزیر واڈا، شہزاد پٹنی، حذیفہ 5اسٹار، اوسامہ سونیجا، نادر چھاٹ پاٹ بھی موجود تھے۔
Author: Regional News
عمران خان نے اقوام متحدہ میں مسلم امہ کا بیانیہ پیش کرکے مظلوم مسلمانوں کا دل جیت لیا، جسٹس (ر) سید جعفر شاہ
گلگت۔ (اے پی پی)صدر تحریک انصاف گلگت بلتستان جسٹس (ر) سید جعفر شاہ نے کہا ہے کہ وزیراعظم عمران خان نے اقوام متحدہ میں مسلم امہ کا بیانیہ پیش کرکے دنیا بھر کے مظلوم اور مصائب میں گرے ہوئے مسلمانوں کا دل جیت لیا،وزیراعظم نے بھارت اور مودی کا چہرہ دنیا میں بے نقاب کیا اور کشمیریوں پر ڈھائے جانے مظالم پر عالمی ضمیر کو جھنجھوڑا ہے۔ ان خیالات کا اظہار انھوں نے ایک بیان میں کیا۔سید جعفر شاہ نے کہا کہ وزیراعظم پاکستان نے کشمیریوں کی امید کو روشن کردیا، اب مقبوضہ کشمیر میں آزادی کی تحریک کو ایک نئی روح ملے گی، دنیا بھر کے مسلمان وزیراعظم عمران خان کے اقوام متحدہ میں دلیرانہ موقف اور امن پسندانہ رویے پر انھیں خراج تحسین پیش کررہے ہیں۔ انہوں نے کہا کہ بھارت دنیا میں بڑی جمہوریت کا ڈھونگ رچارہا ہے جبکہ وہاں بلخصوص مقبوضہ کشمیر میں انسانی حقوق کی صورتحال انتہائی مخدوش ہے، ایسی صورتحال میں دنیا کو بھارت کا مکروہ اور ظالمانہ چہرہ دکھانا بہت ضروری تھا اور اس سلسلے میں وزیراعظم پاکستان نے دنیا بھر کے مظلوموں بالخصوص مقبوضہ کشمیر کے مظلوم عوام کی بھرپور ترجمانی کی۔ انہوں نے کہا کہ سعودی عرب، ایران،امریکہ اور افغانستان کے لیے وزیراعظم عمران خان امن کی امید بن کر ابھرے ہیں، خطے میں امن، ترقی اور غربت کے خاتمے کیلیے وزیراعظم عمران خان کا کردار تمام عالمی رہنماؤں کے لیے قابل تقلید ہے۔
بوسیدہ دیوار گرنے سے 7 سالہ بچہ موقع پر جاں بحق
مانسہرہ۔ (اے پی پی) شنکیاری میں بوسیدہ دیوار کے نیچے آ کر بچہ جاں بحق ہو گیا، نماز جنازہ کی ادائیگی کے بعد مرحوم کو سپرد خاک کر دیا گیا۔ تفصیلات کے مطابق الائی کے غریب خاندان کا رہائشی 7 سالہ بچہ محمد عرفان ولد عبدالرشید گھر میں کھیل رہا تھا کہ اچانک دیوار اس پر آ گری۔ والدہ کے شور شرابہ پر اہل محلہ موقع پر پہنچ گئے اور بچہ کو ملبہ سے نکال کر قریبی ہسپتال پہنچایا لیکن اس وقت بچہ دم توڑ چکا تھا۔ مرحوم بچہ کی نماز جنازہ میں عزیز و اقارب سمیت اہلیان علاقہ کی ایک بڑی تعداد نے شرکت کی۔ بعد ازاں مرحوم بچہ کو نماز جنازہ کی ادائیگی کے بعد آبائی قبرستان میں سپرد خاک کر دیا گیا۔
جواں سالہ بہن کو قتل کرنے والے ملزم بھائی نے پولیس کے روبرو اعتراف جرم کر لیا
مانسہرہ۔ (اے پی پی) مانسہرہ کے علاقہ شنکیاری میں جواں سالہ بہن کو قتل کرنے والے ملزم بھائی نے پولیس کے روبرو اعتراف جرم کر لیا۔ ملزم بھائی نے اپنے بیان میں بتایا کہ اپنی بہن کرن بی بی سے کھانا مانگا جو اس نے دینے میں لیت و لعل سے کام لیا، غصہ آنے پر میں نے لکڑی کا ٹکڑا اٹھا کر دے پھینکا جو اس کے سر میں جا لگا جس کی وجہ سے اس کے سر سے شدید خون بہنے لگا اور دیکھتے ہی دیکھتے وہ موقع پر ہی بحق ہو گئی۔ باغوار شنکیاری میں اپنی بہن کرن بی بی دختر گلاب کو قتل کرنے والے ملزم بھائی آکاش نے عدالت کے روبرو بھی اعتراف جرم کرتے ہوئے بتایا کہ غصہ میں آ کر لکڑی اس کے سر پر دے ماری جس سے اس کی موت واقع ہو گئی۔ ملزم کو اعتراف جرم کے بعد جوڈیشل ریمانڈ پر جیل بھیج دیا گیا۔
صنعتوں کے فروغ کیلئے حکومت کے اقدامات قابل تحسین ہیں
سرگودھا۔(اے پی پی) منی لانڈرنگ روکنے کیساتھ ساتھ معیشت کی مضبوطی اور صنعتوں کے فروغ کیلئے حکومت کے اقدامات قابل تحسین ہیں تاکہ دنیا کے تناظر میں پاکستان اپنی معاشی پالیسیوں کو مضبوط بناکر معیشت کو مستحکم کرسکے ان خیالات کا اظہار صدر انجمن تاجران سرگودھا و ایگزیکٹو ممبر سرگودھا چیمبر آف کامرس اینڈ انڈسٹری شفیق الرحمن نے کیا انہوں نے کہا کہ ماضی میں پاکستان میں کرپشن نے اپنے پنجے گاڑے ہوئے تھے منی لانڈرنگ اور کرپشن ملک کیلئے ناسور ہیں جن کی روک تھام کیلئے سخت قوانین بنانے کی ضرورت ہے شفیق الرحمن نے کہا کہ کرپشن میں جو بھی سیاستدان سرکاری اہلکار ملوث ہو اسے نہ صرف جیلوں میں ڈالا جائے بلکہ نوکریوں سے فارغ کرکے ان کی تاحیات سیاست پر بھی پابندی عائد کی جائے۔
عمران خان نے اقوام متحدہ میں دنیا بھر کے مسلمانوں کی نمائندگی کا حق ادا کردیا ہے
سرگودھا۔(اے پی پی) وزیر اعظم عمران خان نے اقوام متحدہ میں دنیا بھر کے مسلمانوں کی نمائندگی کا حق ادا کردیا ہے،جس طرح انہوں نے اقوام متحدہ میں مسلمانوں کی نمائندگی کی ہے اس سے مخالفین پر خاموشی طاری ہے ان خیالات کا اظہار چیئرمین سرگودھا ڈویلپمنٹ اتھارٹی و سینئر راہنما پاکستان تحریک انصاف الحاج ممتاز اختر کاہلوں نے کیا انہوں نے کہا کہ 70 سال کے دوران کسی پاکستانی لیڈر نے آج اقوام متحدہ کے پلیٹ فارم پر جس طرح مسلمانوں کی ترجمانی کی ہے یہ ایک سچے لیڈر کی نشانی ہے، وزیر اعظم عمران خان نے دنیا پر واضح کردیا ہے کہ اگر کشمیریوں کو حق خود ارادیت نہ دیا تو خطے کا امن خطرے میں پڑ سکتا ہے الحاج ممتاز اختر کاہلوں نے کہا کہ وزیر اعظم نے اقوام عالم پر یہ واضح کردیا ہے کہ جو لوگ ایک ارب کی تجارتی منڈی پر انسانوں کا خون بہتا دیکھ کر خاموش ہیں وہ یہ مت بھولیں کہ پاکستان اور بھارت ایٹمی قوتیں ہیں اگر اقوام عالم نے کشمیر کے مسئلہ پر اپنا کردار ادا نہ کیا تو پھر دونوں عالمی قوتیں آمنے سامنے آسکتی ہیں۔
مودی کا مکروہ چہرہ دنیا کے سامنے بے نقاب ہوچکا‘جہانگیر اعظم
پشاور۔(اے پی پی)یونیورسٹی آف لکی مروت کے زیر اہتمام پبلک لائبریری میں یکجہتی کشمیر پر سیمینار سے خطاب کرتے ہوئے ڈپٹی کمشنر جہانگیر اعظم وزیر نے کہا ہے کہ پاکستان نے کشمیر کا مقدمہ مؤثر انداز سے لڑا ہے، آج پوری دنیا مقبوضہ کشمیرکے عوام پر ڈھائے جانے والے مظالم پر بھارت کی مذمت میں پیش پیش ہے۔ سیمینار سے یونیورسٹی کے ڈائریکٹر اکیڈمکس پروفیسر ڈاکٹر ایاز، ممتاز اردو شاعر پروفیسر ریٹائر محمد انور بابر اور پروفیسر ڈاکٹر عصمت اللہ خان نے بھی خطاب کیا۔ اس موقع پر یونیورسٹی کے پراجیکٹ ڈائریکٹر پروفیسر ڈاکٹر محمد جمیل خان اور رجسٹرار انعام اللہ خان بھی موجود تھے۔ سکول طلبہ نے ٹیبلوز پیش کئے جبکہ یونیورسٹی طلبہ ثاقب خان، عالیہ الماس نے کہا کہ بھارت نے ڈیڑھ ماہ سے کرفیو لگا کر کشمیری عوام کو گھروں میں قید کررکھا ہے اور ان پر ظلم و ستم کے پہاڑ توڑے جارہے ہیں۔سیمینار میں شریک طلبہ اور اساتذہ نے کشمیری جھنڈے اٹھا رکھے تھے۔ڈپٹی کمشنر جہانگیر اعظم وزیر نے کہا کہ کشمیر پاکستان کی شہ رگ ہے اس کے بغیر پاکستان نامکمل ہے کشمیری عوام اور پاکستانیوں کے دل ایک ساتھ دھڑکتے ہیں،بھارتی وزیر اعظم کا مکروہ چہرہ پوری دنیا کے سامنے بے نقاب ہوچکا ہے اور وہ دن دور نہیں جب کشمیری عوام کی جدوجہد آزادی رنگ لائے گی۔
عوام کے حقو ق کیلئے کسی قربانی سے دریغ نہیں کرینگے‘یاسر آفریدی
پشاور۔(اے پی پی)ڈسٹرکٹ پولیس آفیسر بنوں یاسر آفریدی نے کہا ہے کہ معاشرے سے جرائم اور منشیات کے خاتمے کیلئے عوام اور مشران علاقہ کا تعاون انتہائی ضروری قراردیا۔ مشران اور عوام کے بغیر جرائم پر کنٹرول ممکن نہیں بنوں کے عوام نے ہمیشہ امن کیلئے قربانیاں دی ہیں اور پولیس کے ساتھ تعاون کیا ہے۔ان خیالات کا اظہار انہوں نے سابق تحصیل ناظم بنوں ملک احسان اللہ خان کو پولیس کے ساتھ بہترین تعاؤن کرنے پر تعریفی سند دیتے ہوئے کیا۔انہوں نے کہا کہ پولیس امن برقرار رکھنے کیلئے اپنی ذمہ داریاں نبھا رہی ہے تاہم عوامی تعاؤن کے بغیر امن برقرار رکھنا ممکن نہیں امن کیلئے عوام اور پولیس کا ایک دوسرے کے ساتھ تعاؤن لازم وملزوم ہے۔ انہوں نے کہا کہ سابق تحصیل ناظم انجینئر ملک احسان اللہ خان سمیت بنوں کے تمام مشران،تاجر برادری،صحافیوں اور عوام کامشکور ہوں جنہوں نے ہر مشکل وقت میں منشیات کے خاتمے اور امن کیلئے پولیس کے ساتھ تعاون کیا ہے اور انشا اللہ عوام تسلی رکھیں کہ بنوں پولیس بنوں کے عوام کے جان ومال کے تحفظ کیلئے ہمہ وقت تیار ہے اور عوام کے تحفظ کیلئے پولیس کسی بھی قسم کی قربانی دینے سے دریغ نہیں کریگی۔
بنوں، عارضی تجاوزات کے خلاف کریک ڈاؤن،سائن بورڈز سمیت سامان بلڈوز
پشاور۔(اے پی پی) ڈپٹی کمشنر بنوں اور ٹی ایم او بنوں کی خصوصی ہدایت پر لینڈ انسپکٹر ٹی ایم اے بنوں نذیر اللہ اعوان نے بنوں شہر اور تجارتی مراکز میں عارضی تجاوزات کے خلاف آپریشن کرکے سڑک کنارے اور گلیوں میں رکھا گیا سامان ضبط کرلیا لینڈ انسپکٹر نذیر اللہ اعوان نے گردان لی سٹریٹ،چائے بازار،چوک بازار اور ملحقہ بازاروں میں ٹی ایم اے عملے کے ہمراہ تجاوزات کے خلاف آپریشن کرتے ہوئے دکانداروں اور ریڑھی بانوں کی جانب سے نالیوں پر دکانوں کے سامنے رکھے گئے میز اور دیگر سامان قبضہ میں لیتے ہوئے ٹی ایم اے دفتر پہنچایا جہاں ان کی نگرانی میں یہ سامان مشینری کے ذریعے توڑ دیا گیا لینڈ انسپکٹر نذیر اللہ اعوان نے میڈیاکو بتایا کہ بنوں شہر میں تجاوزات کے خلاف کامیاب اپریشن کے دوران تجاوزات کا خاتمہ کیا گیا ہے تاہم دکانداروں کی جانب سے اور ریڑھی بانوں کی جانب سے عارضی تجاوزات کے خلاف روزانہ کی بنیاد پر آپریشن جاری ہے جس میں دکانوں کے سامنے نالیوں پر رکھے گئے میز،سائن بورڈ اور دیگر سامان قبضے میں لیکر بلڈوز کیا جاتا ہے انہوں نے دکا نداروں سے اپیل کی کہ وہ رضاکارانہ طور پر عارضی تجاوزات کا خاتمہ کردیں بصورت دیگر ان سے کسی قسم کی کوئی رعایت نہیں کی جائیگی اور سامان قبضے میں لیکر بلڈوز کیا جائیگا۔
ڈرامہ”خاص“ معاشرے کی دومختلف خواتین کی عکاسی کرتا ہے، حراترین
اسلام آباد۔ (اے پی پی) اداکارہ حراترین نے کہا کہ ڈرامہ”خاص“ معاشرے کی دومختلف خواتین کی عکاسی کرتا ہے۔ نجی ٹی وی پر حرا ترین نے ڈرامہ سیریل”خاص“ کے حوالے سے بات کرتے ہوئے کہا کہ اس ڈرامے میں معاشرے کی دومختلف خواتین کو دکھایا گیا ہے جس میں سے ایک کا تعلق ایسی فیملی سے ہے جس کے لئے اپنی خوشیوں سے زیادہ والدین کی تربیت معانی رکھتی ہے اور وہ ان کی عزت کو قائم رکھتے ہوئے اپنی ذات پر لگے ہوئے جھوٹے الزامات پر آواز اٹھانے سے قاصر ہے اور دوسری طرف ایک خاتون کے سامنے اپنی خواہشات زیادہ اہمیت رکھتی ہیں۔ انہوں نے کہا ان کے لئے اس ڈرامے میں ایک خود غرض خاتون کا کردار ادا کرنا کسی چیلنج سے کم نہیں تھا اور ہمیں مزید ایسے حساس عنوانات پر کام کرنے کی ضرورت ہے۔ اداکارہ ڈرامہ ”خاٖص“ میں علی رحمان خان کے ساتھ مرکزی کردار ادا کر رہی ہیں۔
