فیصل آباد۔ (اے پی پی) ماہرین زراعت نے بتایا کہ کھیرا حیاتین اور معدنی نمکیات کی کمی کو پورا کرنے کیلئے قدرت کاانمول تحفہ ہے کیونکہ ہر کھیرے میں 10ملی گرام کیلشیم، 25ملی گرام فاسفورس، 1.5 ملی گرام فولاد اور 7ملی گرام وٹامن سی ہوتا ہے جو انسان کے جسم کے مختلف اجزاء کو تندرست و توانا رکھنے میں اہم کردار ادا کرتاہے۔ انہوں نے بتایاکہ حکومت پنجاب کی ہدایت پر صوبہ بھر میں گھریلو سطح پر سبزیوں کی کاشت کی حوصلہ افزائی کیلئے کچن گارڈننگ پروگرام کے تحت 50روپے مالیت کے پیکٹ میں عوام کو موسم گرما کی جن 8سبزیوں کے 128 گرام وزنی اعلیٰ معیار کے حامل بیج فراہم کئے جا رہے ہیں ان میں کھیرے کا بیج بھی شامل ہے۔انہوں نے بتایاکہ گھریلو سطح پر لوگ کھیرا کاشت کرکے سپرے کے مضر اثرات سے پاک کھیرا اور دیگر سبزیاں انتہائی ارزاں مالیت پر حاصل کرسکتے ہیں۔ انہوں نے بتایاکہ کچن گارڈننگ پروگرام کے تحت صوبہ بھر میں محکمہ زراعت اور دیگر زرعی اداروں کے تعاون سے بیجوں کے ہزاروں پیکٹس فروخت کئے جا رہے ہیں۔
Author: Regional News
آر سی سی آئی اور سمیڈاکاایکسپورٹ مارکیٹینگ کے حوالے سے تربیتی پروگرام کا ا نعقاد
راولپنڈی (اے پی پی)راولپنڈی چیمبر آف کامرس اینڈ انڈسٹری اور سمال اینڈ میڈیم انٹر پرائزز ڈویلپمنٹ اتھارٹی (سمیڈا) کے مشترکہ تعاون سے چیمبر میں ایکسپورٹ مارکیٹینگ کے حوالے سے ایک تربیتی پروگرام کا ا نعقاد کیا گیا جس کامقصد تاجر وصنعت کار برادری کوضروری ایکسپورٹ مارکیٹنگ کے حوالے سے دورِ جدید کے رائج طریقوں سے آگاہ کرنا تھا۔اس موقع پر راولپنڈی چیمبر کے صدرملک شاہد سلیم، سینئر نائب صدر محمدبدر ہارون، نائب صدر فیاض قریشی،سمیڈا کے ریجنل منیجر محمد اصغر اورتربیتی شرکاء کی کثیر تعداد بھی موجود تھی۔اس موقع پر اظہار خیال کرتے ہوئے صدر راولپنڈی چیمبرملک شاہد سلیم نے کہا کہ سمیڈا خطے میں کاروباری برادری کی ترقی اور بہتری کے لیے گراں قدر خدمات سر انجام دے رہا ہے اور راولپنڈی چیمبر کے ساتھ مل کر تواتر کے ساتھ تربیتی پروگراموں کا انعقاد کرتا رہتا ہے۔آج کا تربیتی پروگرام کاروباری برادری کو ایکسپورٹ کی مارکیٹنگ کے حوالے رائج طریقوں کے مطابق بنانے میں اہم کردار ادا کرے گا۔انہوں نے کہا کہ کاروبار کی ترقی کے لیے تشہیری شعبہ کو فعال بنانا وقت کی اہم ضرورت ہے آج کا تربیتی پروگرام کاروباری برادری کے لیے سود مند ثابت ہوگا۔اس موقع پرسمیڈا کے ٹرینر نے شرکاء کو ایکسپورٹ مارکیٹنگ کے حوالے سے دور جدید اور بین الاقوامی سطح پر رائج طریقوں سے آگاہ کیا اورڈیجیٹلائزیشن کے ٹولز کے تحت مارکیٹنگ کی جدید تکنیک سے بھی معلومات فراہم کیں۔
فاطمہ جناح وویمن یونیورسٹی میں دو روزہ لینگوسٹک اینڈ لٹریچرکانفرنس کا انعقاد
راولپنڈی۔ (اے پی پی)انگلش ڈیپارٹمنٹ فاطمہ جناح وویمن یونیورسٹی کے زیراہتمام لینگوسٹک اینڈ لٹریچر کے موضوع پر سالانہ دو روزہ کانفرنس کی افتتاحی تقریب کا انعقاد کیا گیا۔تقریب کی مہمانے خصوصی محترمہ نور آمنہ ملک مشیر مانیٹرنگ اینڈ ایویلیٹنگ ہائیر ایجوکیشن کمیشن آف پاکستان نے کہا کہ اس طرح کی کانفررنسس کا انعقاد ایک بہترین کاوش ہے جس کیلئے میں وائس چانسلر کو مبارک باد پیش کرتی ہوں۔ جنہوں نے بہت سے سکالزر کو ایک پلیٹ فارم مہیا کیا جہاں وہ اپنے تجربات کو دوسروں تک پہنچا سکیں۔افتتاحی تقریب کی سپیکر پروفیسر ڈاکٹر عالیہ سہیل خان نے ”زبان کے ذریعے اندھیرے سے روشنی تک کا سفر“ سے متعلق موضوع پر بات کی۔اور انہوں نے پروفیسرڈاکٹر ثمینہ امین قادر اور ڈیپارٹمنٹ کی کاوشوں کو سراہتے ہو ئے کہا کہ یہ ایک بہترین پلیٹ فارم ہے جس سے طلباء سکالزر کے تجربات سے بہت کچھ سیکھ سکیں گے۔وائس چانسلر پروفیسر ڈاکٹر ثمینہ امین قادر نے کہا کہ کانفرنس کا بنیادی مقصد تعلیمی اور سماجی سائنسدانوں محققین کو ایک پلیٹ فارم پر اکھٹا کر کے لینگوسٹک اور لٹریچر کے تمام پہلوؤں پر اپنے تجربات کی روشنی میں نظرثانی کریں۔ اپنی ریسرچ اور تحقیقی نتائج کا تبادلہ خیال کریں۔جس سے دو روزہ کانفرنس میں موجود ہ ریسرچ سکالزر نے 60 ریسرچ پیپرز پیش کیئے۔اس کانفرنس میں یونیورسٹی طلباء اور مختلف ڈیپارٹمنٹ سے فیکلٹی ممبران اور سکالزرنے بڑھ چڑھ کر حصہ لیا۔
ایس ایس پی آپریشن ظہور بابر آفریدی کی زیر صدارت کھلی کچہری کا نعقاد
پشاور۔(اے پی پی) ایس ایس پی آپریشن ظہور بابر آفریدی نے کہا ہے کہ عوامی اجتماعی مسائل سے آگاہی حاصل کرنے میں کھلی کچہری کا کردار مسلمہ ہے، عوام کے جان و مال کی حفاظت کو یقینی بنانے کی خاطر شہر کے نواحی علاقوں میں ٹارگٹڈ سرچ اینڈ سٹرائیک آپریشننز جاری ہیں، قبضہ مافیا اور دیگر غیر قانونی سرگرمیوں میں ملوث افراد کا ڈیٹا اکٹھا کیا جا رہا ہے، قیام امن کے ساتھ ساتھ جرائم کی سرکوبی اور سماج دشمن عناصر کا قلع قمع کرنا اولین ترجیحات میں شامل ہے۔ان خیالات کا اظہار انہوں نے تہکال میں منعقدہ کھلی کچہری سے خطاب کر تے ہو ئے کیا۔کھلی کچہری میں عوامی نمائندوں اور مختلف طبقہ ہائے فکر سے تعلق رکھنے والے افراد سمیت ایس پی کینٹ محمد اشفاق، ڈی ایس پی کینٹ ارشد خان اور ایس ایچ اوتھانہ تہکال شہر یار سمیت دیگر پولیس افسران نے شرکت کی۔شرکا ء نے منشیات فروشوں، جرائم پیشہ افراد اور دیگر سنگین جرائم میں ملوث افراد کے خلاف ہونے والی کارروائیوں پراطمینان کا اظہار کیا، ایس ایس پی آپریشن ظہور بابر آفریدی نے اس موقع پر کھلی کچہری کے افادیت اور اہمیت پر روشنی ڈالتے ہوئے کہا کہ قیام امن کے ساتھ ساتھ جرائم کی سرکوبی اور سماج دشمن عناصر کا قلع قمع کرنا اولین ترجیحات میں شامل ہے، عوامی مشکلات کو مد نظر رکھتے ہوئے تھانوں اور پولیس موبائل گاڑیوں پر خصوصی بینرز آویزاں کئے گئے ہیں۔ایس ایس پی آپریشنز ظہور بابرآفریدی نے کہا کہ کھلی کچہری کے ذریعے پولیس اور عوام کے درمیان فاصلوں کو کم کرنے میں مدد ملی ہے، شہرکے تمام لینڈ مافیا اور دیگر غیر قانونی سرگرمیوں میں ملوث افراد کا ڈیٹا اکٹھا کیا جا رہا ہے، عوامی مشکلات کو مد نظر رکھتے ہوئے تمام افسران کے موبائل نمبرات تھانوں کے سامنے آویزاں کر دئیے گئے ہیں،کھلی کچہری میں شامل شرکا نے جرائم کی سرکوبی اور معاشرتی برائیوں کے خاتمہ میں پولیس کا ساتھ دینے کا عزم ظاہر کرتے ہوئے قانون کی بالادستی کی خاطر پولیس کے ساتھ مل کر کام کرنے کا اعادہ کیا۔
بڑھتی ہوئی آبادی سے ملک میں معاشی و سماجی مسائل پیدا ہو رہے ہیں،رکن صوبائی اسمبلی فقیر شیر محمد بلالانی
تھرپارکر۔مٹھی ۔ (اے پی پی) رکن صوبائی اسمبلی فقیر شیر محمد بلالانی نے کہا کہ بڑھتی ہوئی آبادی سے ملک میں معاشی و سماجی مسائل پیدا ہو رہے ہیں جس سے نمٹنے کیلئے بہبود آبادی کی خدمات سے فائدہ اٹھانا وقت کی اہم ضرورت ہے کیونکہ یہ ایک قومی مسئلا ہے۔ ان خیالات کا اظہار انہوں نے محکمہ بہبود آبادی سندھ کے تعاون سے بہبود آبادی تھرپارکر کی جانب سے عالمی مانع حمل طریقوں کا دن شہید بینظیر بھٹو کلچرل کامپلیکس مٹھی میں آگاہی سیمینار سے خطاب کرتے ہوئے کیا۔ انہوں نے مزید کہا کہ تھرپارکر ضلع میں زیادہ تردیہی آبادی پر مشتمل آبادی ہے جہاں لوگوں کو محکمہ بہبود آبادی کی سہولیات فراہم کرنا بہت ضروری ہے جس کیلئے محکمہ بہبود آبادی تھرپارکر کو فور وہیل گاڑیاں فراہم کی جائیں۔ علاوہ ازیں انہوں نے مزید کہا کہ لوگوں میں خاندانی منصوبہ بندی کی اہمیت و افادیت کے متعلق آگاہی فراہم کرنے کیلئے پروگرام منعقد کئے جائیں کیونکہ ترقی یافتہ ممالک میں خاندانی منصوبہ بندی پر خصوصی توجہ دی جا رہی ہے۔
اغوا کے دو مختلف واقعات میں ملزمان نے نوجوان اور خاتون کواغوا کرلیا
ڈسکہ۔ (اے پی پی)اغوا کے دو مختلف واقعات میں 13افراد نے نوجوان اور خاتون کواغوا کرلیا تھانہ سٹی کے علاقہ ماڈل ٹاؤن کے محمد زاہد ریاض چیمہ کی بیوی کو ملزمان ریاض‘شوکت‘اختر اور تین نامعلوم نے اغوا کرلیا جبکہ تھانہ صدر کے علاقہ مندرانوالہ کے سجاد حسین ایڈووکیٹ اپنے بھائی شہباز حسین کے ہمراہ موٹرسائیکل پرگھر کی طرف جارہے تھے کہ ان کو راستے میں پہلے سے موجود ملزمان ذیشان‘شاہد اور پانچ نامعلوم نے روک لیا اور نوجوان شہباز حسین کو زبردستی گاڑی میں ڈال کر نامعلوم مقام پر اغوا کرکے لے گئے اور نوجوان کو تشد دکانشانہ بناتے رہے اور ساتھ ہی نوجوان سے سادہ اشٹام پیپر پر انگوٹھے بھی لگوا لیے نوجوان کی حالت غیر ہونے پر ملزمان نوجوان کو آدمکے چیمہ سڑک پر پھینک پر فرارہوگئے پولیس نے الگ الگ مقدمات درج کرلیے ہیں۔
مکران کوسٹل ہائی وے پر مسافر کوچ الٹنے سے ایک شخص جاں بحق، 20 افراد زخمی
کوئٹہ۔(اے پی پی)بلوچستان کے علا قے حب مکران کوسٹل ہائی وے سنگل مقام پر کراچی سے اوڑماڑہ جانے والی مسافر کوچ الٹنے سے ایک شخص جاں بحق جبکہ 20 افراد زخمی ہوگئے،پاکستان کوسٹ گارڈز اور لیویز کے جوانوں نے فوری موقع پر پہنچ کر زخمیوں کو سٹرکٹ ہیڈ کواٹر ہسپتال اوتھل منتقل کردیا، جہاں انہیں طبی امداد دی جارہی ہے۔
دیوار گرانے سے منع کرنے پر اینٹ کا روڑہ مار کر ایک شخص کو قتل کردیا گیا‘مقدمہ درج
ساہیوال۔ (اے پی پی)دیوار گرانے سے منع کرنے پر اینٹ کا روڑہ مار کر ایک شخص کو قتل کردیا گیا‘مقدمہ درج۔ قتل کی واردات نواحی گاؤں 98/9-Lمیں ہوئی یہاں ظہور وغیرہ نے رمضان کی ڈھاری کے قریب اپنی ڈھاری کی پرانی دیوار گراکر نئی دیوار کی بنیاد رمضان کے رقبہ میں رکھنے لگے تو رمضان اور اس کے والد سید محمد ودیگر نے انہیں ایسا کرنے سے منع کیا تو ظہور وغیرہ غصے میں آگئے اور ظہور کلہاڑی اور سرداراں بی بی سوٹا سے مسلح ہوکر سید محمد للکارنے لگے اس دوران عدنان نے پختہ اینٹ کا روڑہ سید محمد کو مارا اور وہ بائیں آنکھ پر لگنے سے زخمی ہوکر گر پڑا جو موقع پر ہی دم توڑ گیا۔ پولیس تھانہ ڈیرہ رحیم نے ظہور وغیرہ3ملزمان کے خلاف مقدمہ قتل درج کرلیاہے۔
ایم پی اے کے ڈیرہ کے قریب ڈکیتی کی بڑی واردات
ساہیوال۔ (اے پی پی) ایم پی اے کے ڈیرہ کے قریب 2ملزمان نے خواتین سے 50ہزارروپے اور موبائل فون والا پرس چھین لیا‘2موٹرسائیکلیں چوری‘مقدمات درج۔ تفصیلات کے مطابق ایک خاتون سونیا شازم اپنی خالہ کے ہمراہ شاپنگ کرکے ماڈل ٹاؤن گھرواپس جارہی تھیں کہ ممبر صوبائی اسمبلی محمد ارشد ملک کے ڈیرہ کے قریب2موٹرسائیکل سوار ملزمان انور وغیرہ آئے اور ان سے پرس جس میں نقدی 50ہزا رروپے اور موبائل فون تھا چھین کرفرارہوگئے۔چوری کی وارداتوں شاداب ٹاؤن میں نامعلوم ملزمان نے محمد طیب کی موٹرسائیکل نمبری111/SLMمالیتی95ہزار روپے ہوٹل کے باہر سے‘ محلہ بلاٹ گنج میں نامعلوم ملزم نے محمدذیشان کے گھرکے باہر سے موٹرسائیکل نمبری479/SLNمالیتی60ہزار روپے اور مسلم بن عقیل کالونی میں محمد ندیم وغیرہ 5ملزمان نے شگفتہ پروین کے گھر داخل ہوکر نقدی‘طلائی زیورات اور ضروری کاغذات کل مالیتی2لاکھ65ہزار روپے چرالئے۔ پولیس نے الگ الگ مقدمات درج کرلئے ہیں۔
آرا مشین کا بلیڈ ٹوٹ لگنے سے34سالہ تین بچوں کا باپ جاں بحق
ساہیوال۔ 26 (اے پی پی)آرا مشین کا بلیڈ ٹوٹ کو نوجوان کو لگنے سے34سالہ 3بچوں کا باپ جاں بحق‘ ریسکیو1122کی گاڑی بروقت طبی امداد کیلئے پہنچ نہ سکی‘ صرف5گاڑیاں ہیں جو ایمر جنسی میں مصروف تھیں‘ ریسکیو ترجمان۔ تفصیلات کے مطابق کوٹ خادم علی شاہ میں ایک آرا مشین پر مشین کا بلیڈ ٹوٹ کر قریب کھڑے 34سالہ اسلم عرف بگی مزدور جو3بچوں کا باپ تھا کو دائیں کندھے پر لگا جس کے نتیجہ میں وہ شدید زخمی ہوگیا۔ ریسکیو1122 کو اطلاع ملنے کے باوجود ریسکیو کی گاڑی کافی دیر تک نہ پہنچی۔ موٹرسائیکل ریسکیو اہلکار پہنچے ان کی کال کے باوجود ریسکیو گاڑی نہ پہنچ سکی جس کے بعد زخمی کو لوڈ رکشہ پر ہسپتال منتقل کیاگیا لیکن خون زیادہ بہنے کی وجہ سے وہ دم توڑ گیا۔
