Author: سعد فاروق

وزیر داخلہ سندھ ضیاء الحسن لنجار نے آئندہ احکامات تک سیکیورٹی کو ہائی الرٹ رکھنے کی ہدایت کردی۔

باغی ٹی وی کے مطابق وزیر داخلہ سندھ ضیاء الحسن لنجار کا کہنا ہے کہ آئندہ احکامات تک صوبے بھر میں سیکیورٹی کو ہائی الرٹ رکھا جائے، بے نظیر بھٹو کے یوم شہادت کے موقع پر صوبائی سطح پر سیکیورٹی کو مربوط اور مؤثر بنایا جائے۔وزیر داخلہ سندھ نے کہا کہ ملک بھر سے گڑھی خدا بخش کی جانب کثیر تعداد میں عقیدت مندوں کی آمد کو سیکیورٹی اقدامات میں پیش نظر رکھا جائے جب کہ دیگر تمام صوبوں سے گڑھی خدا بخش آنے والے قافلوں کو ضلعی سطح پر سیکیورٹی فراہم کی جائے۔ گڑھی خدا بخش و نوڈیرو کے روٹس سے تجاوزات کو فی الفور ختم کیا جائے، پارکنگ کو ناصرف مناسب فاصلوں پر رکھنے بلکہ پارکنگ ایریا کی کڑی نگرانی بھی کی جائے۔وزیر داخلہ سندھ نے ہدایت کی کہ گڑھی خدا بخش، نوڈیرو اور اطراف کے علاقوں میں انٹیلی جنس کو بڑھایا جائے، معلومات کے حصول اور فالو کرنے کے عمل کو بروقت اور مؤثر بنایا جائے۔انہوں نے مزید کہا کہ مشکوک اشیاء، پارسل، بیگ وغیرہ یا لاوارث گاڑی اور موٹرسائیکل دکھائی دینے پر شہری فوری پولیس 15 پر اطلاع دیں۔

انٹرنیٹ ٹیکنالوجی کمپنی گوگل نے پاکستان سمیت مزید 16 ممالک میں اپنا ڈیجیٹل ادائیگی کا نظام‘ متعارف کرانے کا اعلان کردیا۔

باغی ٹی وی کے مطابق گوگل والٹ کی پاکستان سروسز دستیاب نہیں تھیں لیکن اب کمپنی نے پاکستان اور مصر سمیت متعدد ممالک میں اسے متعارف کرانے کا اعلان کردیا۔کمپنی کے مطابق پاکستان، مصر، وینزویلا، تاجکستان، مراکش، پاناما، پیرو، موناکو اور کوسوو سمیت مزید 16 ممالک میں دسمبر 2024 اور جنوری 2025 کے درمیان گوگل والٹ کی سہولیات شروع کی جائیں گی۔پاکستان میں گوگل والٹ کی سہولیت آئندہ ماہ جنوری میں شروع کی جائیں گی، یعنی گوگل کی جانب سے پاکستانیوں کو نئے سال پر ڈیجیٹل ادائیگی کے نظام کا تحفہ دیا جائے گا۔گوگل والٹ ایسا ڈیجیٹل ادائیگی اور دستاویزات کو محفوظ رکھنے کا نظام ہے، جس کے تحت صارفین اپنے کریڈٹ اور ڈیبٹ کارڈز کو اکاؤنٹ سے منسلک کر کے پیسوں کی ادائیگی اور وصولی کرسکیں گے۔مذکورہ نظام اور ایپلی کیشن کو محفوظ ترین تصور کیا جاتا ہے، کمپنی کا دعویٰ ہے کہ گوگل والٹ میں محفوظ کی گئی معلومات انکرپٹڈ ہوتی ہے جو کسی بھی دوسرے شخص کو دستیاب نہیں ہوتی۔گوگل والٹ دراصل ایک ڈیجیٹل بٹوا یا پرس ہے، جس میں ہر صارف مختلف کارڈز اور دستاویزات بھی محفوظ کر سکتا ہے۔کمپنی کے مطابق گوگل والٹ کے ذریعے کی جانے والی ادائیگیاں انکرپٹڈ ہوتی ہیں، ہر خریداری کو منفرد کوڈ بھیج کر والٹ کو استعمال کرنے اور پیمنٹ انفارمیشن کو پروسیس کرنے کی سہولت میسر ہوتی ہے۔گوگل والٹ میں صارفین اپنے بٹوے کی طرح بینک کارڈز، بورڈنگ پاسز، ٹکٹس اور دیگر ڈیجیٹل پاسز محفوظ کر سکتے ہیں، ایپ میں ڈیٹا کے تحفظ کو یقینی بنانے کے لیے انکرپشن اور ڈیوائس سیکیورٹی فیچرز کا استعمال کیا جاتا ہے۔کمپنی کا کہنا ہے کہ اگر کوئی اس ڈیٹا تک رسائی حاصل کرلے تو بھی وہ اس کے کسی کام کا نہیں ہوتا کیونکہ اس میں ڈیبیٹ یا کریڈٹ کی تفصیلات موجود نہیں ہوتیں۔