Author: صدف ابرار

وزیر دفاع خواجہ محمد آصف نے عالمی مالیاتی ادارے (آئی ایم ایف) کو پاکستان کی خود مختاری کےلیے خطرہ قرار دے دیا۔وزیر دفاع نے مزید کہا کہ ان کا شہر سیالکوٹ ایکسپورٹ کا مرکز ہے، ایکسپورٹرز پر جو ٹیکس لگایا گیا اس سے ایف بی آر کے کرپٹ مافیا کو فائدہ ہوگا۔ان کا کہنا تھا کہ غلام سرور قومی مجرم ہیں، ان کے ایک بیان کی وجہ سے ہماری پروازوں کے روٹس بند ہوگئے، جس سے کئی سو ارب کا نقصان ہوچکا ہے۔ خواجہ آصف نے اپنی ہی حکومت کے بجٹ پر اعتراض داغ دیا۔انہوں نے کہا کہ حالیہ بجٹ میں ٹیکس آئی ایم ایف کے دباؤ پر لگایا گیا ہے، آئی ایم ایف پاکستان کی خودمختاری کے لیے خطرہ ہے۔
انہوں نے کہا کہ حکومت پر آئی ایم ایف کا پریشر تھا، ایکسپورٹرز ڈیڑھ فیصد دینے کو تیار تھے، ایکسپورٹرز کےلیے میں 15 سے 20 دن سے احتجاج کر رہا ہوں۔وزیر دفاع کا کہنا تھا کہ پیپلز پارٹی اور ایم کیو ایم کے آپریشن عزم استحکام پر نہیں سندھ کی حد تک اختلافات ہیں، جسے ختم کرنے میں وزیراعظم شہباز شریف کو کردار ادا کرنا چاہیے۔ ان کا کہنا تھا کہ آپریشن عزم استحکام میں کوئی نقل مکانی نہیں ہوگی، ہمیں دہشت گردی کی اطلاعات مل رہی ہیں جبکہ آپریشن مخصوص جگہوں پر ہوگا۔خواجہ آصف نے یہ بھی کہا کہ ایوی ایشن منسٹری میں اربوں روپے کی کرپشن ہو رہی ہے، پیٹرول کی قیمتیں بین الاقوامی سطح پر بڑھی ہیں اس لیے بڑھائی ہیں۔خواجہ آصف نے کہا کہ 8 فروری کے انتخابات کے فیصلے میں جے یو آئی اور اے این پی دونوں شامل تھیں۔انہوں نے کہا کہ جماعت اسلامی جب سے اسلامی جمعیت طلبہ کے ہاتھ میں آئی ہے، اس کے اعلیٰ اصول کمپرومائز ہوگئے، انہیں یاد رکھنا چاہیے کہ وہ پرویز مشرف کے ساتھ کھڑے تھے۔

پاکستان تحریک انصاف کی کورکمیٹی نے اعلان کیا ہے کہ فواد چوہدری سمیت جوبھی پارٹی قیادت پرتنقید کرتا ہے اسے سخت جواب دیا جائے، مشکل وقت میں پارٹی چھوڑنے والوں کے پاس پارٹی معاملات پر تبصرے کا کوئی اخلاقی جواز یا اختیار نہیں۔پاکستان تحریک انصاف کی کورکمیٹی کا اجلاس ہوا جس میں مختلف معاملات پر غور کیا گیا۔کور کمیٹی اجلاس میں 3 قراردادیں متفقہ طور پر منظور کی گئیں۔ عمر ایوب کا بطور سیکرٹری جنرل استعفیٰ منظورنہ کرنے کی سفارش بھی قرارداد کا حصہ ہے۔
قرارداد کے متن کے مطابق عمر ایوب کی بطورپارٹی سیکرٹری جنرل خدمات موجودہ حالات میں نہایت اہمیت کی حامل ہیں، کور کمیٹی بانی پی ٹی آئی سے عمرایوب خان کا استعفیٰ منظور نہ کرنے کی درخواست کرتی ہے۔قرارداد میں کہا گیا ہے کہ کورکمیٹی عمر ایوب کی انتہائی کٹھن حالات میں پارٹی کیلئے قابل تحسین خدمات کی معترف ہے لہٰذا سیکرٹری جنرل عمرایوب سے پارٹی عہدے سے اپنا استعفیٰ واپس لینے کی درخواست کرتے ہیں۔ایک اور قرارداد میں کہا گیا ہے کہ کورکمیٹی حساس اور اہم موڑ پر پارٹی سے راہیں جدا کرنے والے افراد کی شدید مذمت کرتی ہے، مشکل وقت میں پارٹی چھوڑنے والوں کے پاس پارٹی معاملات پر تبصرے کا کوئی اخلاقی جواز یا اختیار نہیں، پارٹی کا ایسے تمام افراد سے کوئی سروکار نہیں ہے، ایسے افراد کےبیانات کسی طور پرپارٹی معاملات پر اثرانداز نہیں ہو سکتے ۔

قرارداد میں قرار دیا گیاکہ مشکل وقت میں راہیں جدا کرنے والے لوگ پارٹی کیلئے پھر سے کبھی قابلِ قبول نہیں ہوں گے، وہ تمام افراد جنہیں اپنے کیے پر افسوس ہے ان سے متعلق فیصلہ بانی پی ٹی آئی کی صوابدید ہے، پارٹی اس امر کی توثیق کرتی ہے کہ ہر حال میں پارٹی صفوں میں سخت نظم و ضبط کا نفاذ کیا جائے گا اور مستقبل میں پارٹی نظم و ضبط کی خلاف ورزی کے امور سے نہایت سختی سے نمٹا جائے گا۔قرارداد میں کہا گیا ہے کہ پارٹی نظم و ضبط کی خلاف ورزی پر بنیادی رکنیت کی معطلی سمیت دیگر تادیبی اقدامات کا سامنا کرنا ہو گا جن افراد کو ڈسپلن کی خلاف ورزی پر نوٹسز دیے جا چکے ان کے معاملات 7 روز میں نمٹائے جائیں گے۔
کورکمیٹی کا مزید کہنا ہے کہ مشکل وقت میں جورہنما کھڑے رہے ان کیخلاف بیانات کی مذمت کرتے ہیں، فواد چوہدری سمیت جوبھی پارٹی قیادت پرتنقید کرتا ہے اسے سخت جواب دیا جائے۔کور کمیٹی ارکان نے مطالبہ کیا کہ جنید اکبرکے استعفے کا معاملہ کورکمیٹی کے سامنے لایا جائے اور ہمیں بتایا جائے جنید اکبرنے کیوں اورکس لیے استعفی دیا؟خیال رہے کہ گزشتہ دنوں فواد چوہدری نے انٹرویو میں کہا تھاکہ پی ٹی آئی ہی کی وجہ سے ہیں، ہماری پہچان ہی پی ٹی آئی ہے، پی ٹی آئی میں تھے، ہیں اور رہیں گے۔واضح رہے کہ 24 مئی 2023 کو فواد چوہدری نے پی ٹی آئی سے علیحدگی کا اعلان کیا تھا اور 9 مئی واقعے کی مذمت کی تھی۔

وزیرِ اعظم محمد شہباز شریف سے معروف کاروباری شخصیت و اقتصادی مشاورتی کونسل کے رکن جہانگیر خان ترین کی ملاقات ہوئی۔
ملاقات میں استحکام پاکستان پارٹی کے راہنما عون چوہدری بھی شریک تھے، ملاقات میں جہانگیر ترین نے وزیرِ اعظم کو مشکل معاشی حالات کے باوجود کاروبار و سرمایہ کار دوست اور عوامی بجٹ پیش کرنے پر خراج تحسین پیش کیا۔ جہانگیر ترین نے وزیرِ اعظم کو معیشت کو مثبت سمت میں گامزن کرنے پر بھی مبارکباد پیش کی۔

محکمہ موسمیات نے ملک میں رواں ہفتے سے مون سون بارشوں کی پیشگوئی کردی۔ محکمہ موسمیات کا کہنا ہے کہ 2 تا 7جولائی میرپورکشمیر ، اسلام آباد، سرگودھا، بہاولپور، بہاولنگر، ڈی جی خان میں تیزہوا اور گرج چمک کے ساتھ بارشیں متوقع ہیں۔محکمہ موسمیات نے بتایاکہ تین سے 7 جولائی بلوچستان کے بیشتر علاقوں میں موسم گرم مرطوب رہنے اور مشرقی علاقوں میں گرج چمک کےساتھ بارش کا امکان ہے۔محکمہ موسمیات کے مطابق چار سے7 جولائی سندھ میں موسم انتہائی گرم مرطوب رہنے کا امکان ہے تاہم مٹھی،عمرکوٹ،سکھر،لاڑکانہ میں گرج چمک کے ساتھ بارش متوقع ہے۔محکمہ موسمیات نے بتایاکہ رواں ہفتے ملک کے بالائی اور وسطی علاقوں میں شدت کےساتھ مون سون بارشوں کا امکان ہے۔محکمہ موسمیات کے مطابق طوفانی بارشوں کے باعث روزمرہ کے معمولات متاثر ہونے کاخدشہ ہے۔محکمہ موسمیات نے بتایاکہ موسلادھار بارش کے باعث پہاڑی ندی نالوں میں سیلابی صورتحال اور سیالکوٹ،گوجرانوالہ،نارووال میں اربن فلڈنگ کا خدشہ ہے۔رواں ہفتے کے دوران گلگت بلتستان میں مطلع ابر آلود رہنے کے علاوہ بارش کی توقع ہے۔

وزیراعظم شہباز شریف رواں ہفتے تاجکستان کےصدر امام علی رحمان کی دعوت پر وزیراعظم 2 سے 3 جولائی تک دوشنبہ تاجکستان کا سرکاری دورہ کرینگے ۔ دوشنبہ میں وزیر اعظم کی صدر امام علی رحمان، مجلسی اولی محمدطائر زویر ذوکر زادہ سے ملاقات ہوگی ،وزیر اعظم شہباز شریف تاجکستان کے وزیر اعظم قاہر رسولزادہ اور مجلس نمایندگان کے چیئرمین سے ملاقات کریں گے۔
یہ دورہ پاکستان اور تاجکستان کے درمیان باقاعدہ اعلیٰ سطح تبادلوں کا حصہ ہے،دونوں فریقین باہمی دلچسپی کے شعبوں پر وسیع پیمانے پر بات چیت کریں گے ۔
ملاقات میں علاقائی رابطوں، تجارت، عوام سے عوام کے رابطوں اور توانائی کے ساتھ ساتھ کثیر الجہتی امور پر تعاون کے شعبوں میں فریق پر بات چیت ہوگی ، تعاون کے مختلف شعبوں میں معاہدوں اور مفاہمت کی یادداشتوں پر بھی دستخط کریں گے۔

ٹیکس دینے والوں پر ریٹرن فائل کرنے میں تاخیر پر بھی ٹیکس لگے گا۔ 5 کروڑ مالیت رکھنے والا فائلرز تاخیر سے ریٹرن فائل کرے گا تو 6 فیصد اضافی ٹیکس لگے۔10 کروڑ والے پر 7 فیصد اور اس سے زائد مالیت والے فائلرز پر 8 فیصد اضافی ٹیکس لگے گا۔ کمرشل پراپرٹی، اوپن پلاٹ اور رہائشی پلاٹس کی خریداری پر ایکسائز ڈيوٹی عائد ہوگی۔ فائلرز ان پلاٹس پر 3 فیصد، لیٹ فائلرز 5 فیصد اور نان فائلرز 7 فیصد ایکسائز ڈیوٹی ادا کریں گے۔چینی مینوفیکچرر کےلیے سپلائی پر 15 روپے فکسڈ ڈیوٹی عائد کردی گئی، سگریٹس میں استعمال ہونے والے فلٹر پر 44 ہزار روپے فی کلو ایکسائز ڈیوٹی عائد کی گئی ہے۔