Author: صدف ابرار

ترجمان دفتر خارجہ کے مطابق نائب وزیراعظم اسحاق ڈار سے صدر گلوبل ڈویلپمنٹ و بل اینڈ میلنڈا گیٹس فاؤنڈیشن کرس الیاس نے ملاقات کی۔دونوں رہنماؤں کے درمیان ہونے والی ملاقات میں پاکستان اور فاؤنڈیشن کے درمیان تعاون کے مختلف شعبوں کا جائزہ لیا گیا۔نائب وزیر اعظم و وزیر خارجہ اسحاق ڈار نے پولیو کے خاتمے کے لیے خاص طور پر صحت کے شعبے میں فاؤنڈیشن کے ساتھ مل کر کام جاری رکھنے کے پاکستان کے عزم کا اعادہ کیا۔

وزیر اعظم محمد شہباز شریف نے اپوزیشن جماعتوں کو دعوت دیتے ہوئے کہا ہے کہ آئیں !چارٹر آف اکانومی پر اتفاق کرتے ہیں۔ قومی اسمبلی میں اظہار خیال کرتے ہوئے وزیر اعظم محمد شہباز شریف کا کہنا تھا کہ میں نے اپنی پہلی تقریرمیں چارٹر آف ڈیموکریسی کی بات کی ، پھر اپوزیشن کو مذاکرات کی دعوت دیتا ہوں۔شہباز شریف کا کہنا تھا کہ میں نے کہا کہ آئیں، چارٹر آف ڈیمو کریسی پر اتفاق کریں ، میری بات کو حقارت سے نظر انداز کیا گیا، میری بات پر ایسے نعرے بلند کیے گئے جس کا ذکر اس ایوان کی توہین ہے۔ انھوں نے کہا کہ ’آج تلخیاں جس حد تک پہنچ گئی ہیں، اس کا ذمہ دار کون ہے۔ آج 76 سال بعد ہم ایسی جگہ پر پہنچے ہیں کہ ایک دوسرے سے ہاتھ ملانے سے بھی ہم جھجھکتے ہیں۔‘انھوں نے کہا کہ ’اس اسمبلی میں ماضی میں بھی بہت تنقید ہوتی تھی، مخالفت میں باتیں ہوتی تھیں مگر سیاست دان ایک دوسرے کے دکھ اور تکلیف میں شریک ہوتے تھے،
محمد شہبازشریف کا کہنا تھا کہ میری والدہ کا انتقال ہوا تو میں جیل تھا، آج ان کے بانی پی ٹی آئی کو مشکلات ہیں،میں پھر کہتا ہوں آئیں آج بیٹھ کر بات کریں معاملات کو حل کریں، میں آج یہاں اپنی تکلیف کا رونا نہیں رونا چاہتا ، میں بھی کینسر کی بیماری میں مبتلا ہوں، میں قیدی وین میں عدالت گیا۔وزیر اعظم نے کہا کہ خواجہ آصف اور رانا ثنااللہ سمیت ہمیں زمینوں پر لٹایا گیا، گھر سے کھانا نہیں لانے دیا گیا، ہماری دوائیاں بند کی گئیں، نہیں چاہتے کہ ان کے ساتھ بھی ایسی زیادتی ہو جو ہمارے ساتھ ہوئی، میں بھی کینسر کی بیماری میں مبتلا رہا کبھی جیل میں رویا نہیں۔ان کا مزید کہنا تھا کہ اس دور میں ہمارے ساتھ جو سلوک ہوا وہ بھی سب جانتے ہیں،آج بانی پی ٹی آئی جیل میں مشکلات میں ہیں تو آئیں بات کریں، ملک کی ترقی اور اس کو آگے لے کر جانے کیلئے آئیں ملکر بیٹھیں، پاکستان کے مفاد میں معاملات طے کریں۔

اپوزیشن لیڈر عمر ایوب نے وزیراعظم شہباز شریف کی مذاکرات کی پیشکش بارے کہا کہ بات تب ہوگی جب بانی پی ٹی آئی باہر آئیں گے، بات تب ہوگی جب ہمارے قیدی باہر آئیں گے۔قومی اسمبلی میں خطاب کرتے ہوئے اپوزیشن لیڈر عمر ایوب نے کہا کہ میں فارم سینتالیس کے وزیراعظم کو کچھ کہنا چاہتا ہوں، جس پر سپیکر قومی اسمبلی نے کہا کہ ایسی گفتگو نہ کریں ماحول بہتر ہو رہا تھا، جس پر عمر ایوب نے کہا کہ سپیکر قومی اسمبلی مجھے جواب دینے کا حق ہے، یہ ہاؤس اس وقت چل سکے گا جب ہمارا احترام ہوگا۔
اپوزیشن لیڈر نے کہا کہ مفاہمت تب ہوگی جب آپ یاسمین راشد، محمود الرشید، حسان نیازی کے ساتھ زیادتی کا احساس کریں گے۔اس موقع پر سپیکر قومی اسمبلی نے کہا کہ آپ بیٹھ جائیں آپ کی بات ہوگئی ہے، آپ کو موقع دے دیا ہے، آپ کا جواب آگیا ہے، آپ کے نام پر کوئی کٹ موشن نہیں ہے عمر ایوب کا کہنا تھا کہ شہباز شریف نے والدہ محترمہ کے جنازے کا ذکر کیا، ہم کلثوم نواز کے جنازے میں شریک ہوئے لیکن میں اپنے والد کے جنازے میں شریک نہیں ہوسکا۔عمر ایوب نے اپنی تقریر جاری رکھتے ہوئے کہا کہ میرے لیڈر کو ڈیتھ سیل میں رکھا گیا ہے جب کہ انہیں تو ایئرکنڈیشنر ملے ہوئے تھے، انہوں نے کہا کہ ملک میں عدم استحکام کی وجہ قانون کی حکمرانی نہ ہونا ہے۔

متحدہ قومی موومنٹ (ایم کیو ایم) پاکستان کے رہنما مصطفیٰ کمال نے کہا ہے کہ ملک میں بجلی وافر مقدار میں موجود ہے۔ اس گرمی میں کراچی میں 18 گھنٹے لائٹ نہیں ہے۔ ایم کیو ایم رہنما کا کہنا تھا کہ بجٹ میں ٹیکس پر بات کرتے ہوئے مصطفیٰ کمال کا کہنا تھا کہ جو لوگ پہلے سے ٹیکس دے رہے تھے ان پر مزید ٹیکس لگ گیا۔ اس سے لوگوں کے بزنس اثر انداز ہوں گے، کاروبار بند ہوں گے۔ اسٹیشنری، دودھ اور اسٹنٹ پر ٹیکس پر ہم نے اعتراض اٹھایا۔اسلام آباد میں پارلیمنٹ ہاؤس کے باہر میڈیا سے گفتگو کرتے ہوئے مصطفیٰ کمال کا کہنا تھا کہ کل بھی وزیراعظم اور ان کے وفد کے ساتھ میٹنگ ہوئی، بجٹ پر ایم کیو ایم نے فلور پر ایشوز اٹھائے۔ انکا کہنا تھا کہ ہم حقیقت سے دور کی بات نہیں کریں گے، سو دن میں مہنگائی کم ہوئی ہے۔ اسٹاک ایکسچینج میں بہتری آئی ہے۔ حکومت نے یہ بات صاف کہی کہ آئی ایم ایف کے پاس جانا لازمی ہے۔ یہ ایک مثبت بات ہے کہ کچھ مبہم نہیں۔
انہوں نے کہا کہ ہم پر 77 ہزار ارب روپے قرضہ ہے، حکومت سمجھتی ہے یہ قرض ٹیکس لگا کر اتارا جائے گا۔ لوگ اس وقت ٹیکس دیں گے جب ان کو سہولتیں دی جائیں گی۔ مصفطیٰ کمال نے یہ بھی کہا کہ یہ روایتی بجٹ ہے، پاکستان کے بڑے معاشی اور ابنارمل مسائل ہیں۔ اس ابنارمل صورتحال میں روایتی بجٹ لایا گیا۔ شہر کراچی کے حوالے سے بات کرتے ہوئے مصطفیٰ کمال کا کہنا تھا کہ کراچی معاشی اور سیکیورٹی مسائل میں گھرا ہے۔ ہم نے حکومت سے تمام مسائل اور بجٹ پر تجاویز شیئر کی ہیں۔ بجٹ میں 15 ارب کراچی، 5 ارب حیدرآباد کےلیے رکھا گیا ہے۔ انہوں نے بتایا کہ کے فور کیلئے 25 ارب رکھے گئے ہیں جس پر ہم نے اعتراض کیا۔ اب وزیراعظم نے کے فور کیلئے 30 ارب کردیے، بعد میں 40 ارب کردیے جائیں گے۔ مصطفیٰ کمال کا کہنا تھا کہ ملک میں بجلی وافر مقدار میں موجود ہے۔ اس گرمی میں کراچی میں 18 گھنٹے لائٹ نہیں ہے۔ کراچی میں گرمی سے 442 لوگ مرگئے۔ انہوں نے کہا کہ کپیسٹی چارجز کے نام پر ڈالرز میں پیمنٹ ہوتی ہے، حکومت ڈسکوز کی قرض دار ہے، حکومت آئی پی پیز کے نظام کو درست کرے۔

قومی اسمبلی نے سوات واقعے کے تناظر میں اقلیتوں کے تحفظ کی قرارداد منظور کرلی۔اسپیکر سردار ایاز صادق کی زیرصدارت قومی اسمبلی اجلاس ہوا جس میں بجٹ پر بحث کی گئی۔وزیر دفاع خواجہ آصف نے کہا کہ پاکستان میں اقلیتوں کے لئے اٹھنے والی آواز کا گلا گھونٹا جارہا ہے، اقلیتوں کا کبھی سوات کبھی سرگودھا کبھی فیصل آباد میں قتل ہوتا ہے، مذہب کے نام پر خون بہانے کی اجازت نہیں دی جاسکتی، ایوان کو اس مسئلہ پر متفق اور متحدہ موقف اختیار کرنا چاہیے، پاکستان میں مسلمانوں کے چھوٹے فرقے اور کوئی مذہبی اقلیت محفوظ نہیں۔وزیرقانون اعظم نزیر تارڑ نے سوات معاملے اور اقلیتوں سے متعلق قرارداد پیش کی جس میں زور دیا گیا کہ وفاقی و صوبائی حکومتیں اقلیتوں کے تحفظ کو یقینی بنائیں، اقلیتوں کے خلاف واقعات میں ملوث افراد کے خلاف کارروائی کی جائے۔
بیرسٹر گوہر نے کہا کہ کچھ ویب سائٹ روزانہ توہین رسالت کررہے ہیں، یہ معاملہ وفاق خود دیکھے ، ہمیں اقلیتوں سے کوئی مسئلہ نہیں ، مگر ہم اداروں کی طرف سے کسی شخص یا گروہ کی سرعام سزا کے بھی خلاف ہیں، کوئی ادارہ بھی غیر قانونی سزا نہ دے۔اپوزیشن نے قرارداد کے مندرجات پر احتجاج کیا تو وزیر قانون نے کہا کہ اپوزیشن ہر معاملہ کو اپنے لیڈر کی رہائی کے ساتھ نہ مشروط کرے، آپ اگر اپنے قائد کی رہائی اس میں شامل کرنا چاہتے ہیں تو ایسا نہیں ہوسکتا۔ایوان نے وزیرِ قانون اعظم نذیر تارڑ کی قرار داد کثرتِ رائے سے منظور کر لی۔قرار داد کے متن کے مطابق اقلیتوں کے تحفظ کو وفاقی اور صوبائی حکومتیں یقینی بنائیں، اقلیتوں کو مکمل تحفظ دیا جائے۔
قرار داد میں کہا گیا ہے کہ اقلیتوں کے خلاف واقعات میں ملوث افراد کے خلاف کارروائی کی جائے۔واضح رہے کہ 20 جون کو مدین میں لوگوں نے قرآن کی بے حرمتی کے الزام میں ایک سیاح کو تشدد کا نشانہ بنا کر اسے جلا ڈالا تھا۔

پاکستان مسلم لیگ (ن) اور پیپلزپارٹی کے درمیان مذاکراتی کمیٹیوں کا تیسرا دور ختم ہوگیا، جس میں حکومت نے پیپلزپارٹی کے تمام مطالبات مان لیے جبکہ پاکستان مسلم لیگ (ن) اور پیپلزپارٹی کے درمیان مذاکراتی کمیٹیوں کے تیسرے دور میں پیپلزپارٹی کے تحفظات دورکرنے کے لیے سفارشات بھی مرتب کرلی گئیں۔ پنجاب میں پیپلزپارٹی کو انتظامی امورمیں حصہ دینے سے متعلق مطالبات کا جائزہ لیا گیا جبکہ پنجاب سے متعلق پیپلزپارٹی کے مطالبات پرکمیٹیوں نے تحریری سفارشات کا مسودہ تیارکرلیا گیا.ذرائع کے مطابق پاکستان مسلم لیگ (ن) اور پیپلزپارٹی کے درمیان مذاکراتی کمیٹیوں کے تیسرا دوروزیراعظم ہاوس میں ہوا۔ذرائع کے دعوی ہے کہ حکومت نے پیپلزپارٹی کے تمام مطالبات مان لیے ہیں۔
پیپلزپارٹی کے تحفظات کو دورکرنے کے لیے سفارشات بھی مرتب کرلی گئیں ہیں، ترقیاتی فنڈز اور پنجاب میں انتظامی عہدوں پر بھی پیپلزپارٹی کو ترجیح دی جائے گی۔بعدازاں کمیٹیوں کے ارکان وزیر اعظم ہاؤس سےروانہ ہو گئے ہیں، اجلاس میں چیف سیکرٹری پنجاب اورآئی جی پنجاب بھی شریک ہوئےاس سے قبل اسلام آباد میں ہونے والے مذاکراتی کمیٹیوں کے اجلاس کی صدارت وزیر اعظم نے کی۔ذرائع کے مطابق پی پی اورن لیگ میں پنجاب کے امورپرمعاملات پنجاب کی کمیٹی نے طے کی جبکہ کمیٹی میں راجہ پرویزاشرف،علی حیدرگیلانی، ندیم افضل چن اورحسن مرتضی شامل ہیں۔ذرائع کی جانب سے مزید بتانا تھا کہ پنجاب میں پاور شیئرنگ فارمولا،خصوصاً جنوبی پنجاب کے معاملات زیرغور آئے۔دوسری جانب پنجاب حکومت کی نمائندگی اسپیکرپنجاب اسمبلی ملک احمد خان،رانا ثنااللہ ،سعد رفیق نے کی۔

خیبر پختون خوا کے ضلع کرم میں 21 جون کو شہید ہونے والے پاک فوج کے 5 جوانوں کو فوجی اعزاز کے ساتھ آبائی علاقوں میں سپردِ خاک کر دیا گیا۔پاک فوج کے شعبۂ تعلقاتِ عامہ (آئی ایس پی آر) کے مطابق 33 سالہ حوالدار عقیل احمد شہید کو اوکاڑہ میں، 30 سالہ لانس نائیک محمد طفیر شہید کو ضلع پونچھ میں سپردِ خاک کر دیا گیا۔24 سالہ سپاہی انوش رفون شہید کی اٹک میں تدفین کی گئی، 26 سالہ سپاہی محمد اعظم خان شہید ہری پور میں، 29 سالہ سپاہی ہارون ولیم شہید کو اسلام آباد میں سپردِ خاک کیا گیا۔شہداء کی نمازِ جنازہ و تدفین میں سینئر حاضر سروس افسران، جوانوں، لواحقین اور مقامی افراد نے بڑی تعداد میں شرکت کی۔آئی ایس پی آر کے مطابق پاکستان کی سیکیورٹی فورسز دہشت گردی کی لعنت ختم کرنے کے لیے پُرعزم ہیں، ہمارے بہادر شہداء کی یہ قربانیاں ہمارے عزم کو مزید تقویت دیتی ہیں۔واضح رہے کہ 21 جون کو خیبر پختون خوا کے ضلع کرم کے علاقے صدہ میں سیکیورٹی فورسز کی گاڑی پر آئی ای ڈی حملہ ہوا تھا، جس کے نتیجے میں مذکورہ 5 جوانوں نے جامِ شہادت نوش کیا تھا۔