Author: صدف ابرار

وفاقی وزیر امور کشمیر و گلگت بلتستان انجینئر امیر مقام نے 100 دن کی مثالی کارکردگی پر وزیراعظم شہباز شریف کو خراج تحسین پیش کیا ہے ، ان کا کہنا ہے کہ روٹی، آٹے اور گھی سمیت کھانے پینے کی اشیاء کے بعد پٹرول کی قیمتوں میں مزید کمی عوام اور ریاست دونوں کو ریلیف دینے کی کامیاب پالیسیوں کا نتیجہ ہے، 100 دن میں وزیراعظم شہباز شریف نے ملک اور عوام دونوں کے بوجھ کم کئے، پاکستان اور عوام دونوں کو ریلیف دیا۔ انہوں نے دعویٰ کیا کہ شہباز سپیڈ’ سے 100 دن میں انقلاب برپا ہوگیا، اگلے 1725 دن میں ملک و قوم کی معاشی تقدیر بدلیں گے، وزیراعظم نے باتوں اور دعووں کے بجائے اللہ کے فضل سے 100 فیصد کام کیا ، 38 فی صد سے مہنگائی کا 12 فی صد پر آنا، پٹرول کی قیمت میں 35 روپے کا ریلیف، روپے کی قدر میں استحکام اللہ کا فضل اور وزیر اعظم شہباز شریف کی پرخلوص محنت کا نتیجہ ہے۔

سعودی عرب، متحدہ عرب امارات، کویت سے اربوں ڈالر کی سرمایہ کاری سے روزگار اور کاروبار میں اضافہ ہوگا، ملک اور قوم دونوں کو مزید ریلیف ملے گا ،چین ہر سال 3 لاکھ پاکستانی نوجوانوں کو آئی ٹی میں مفت تربیت دے گا، وزیر اعظم شہباز شریف کی کوششوں سے ہونے والے اس اقدام سے نوجوانوں کا مستقبل روشن ہوگا ، "پوری تیاری ہے” کے دعویدار جعلی انقلابیوں کو 100 دن میں یہ سمجھ نہیں آئی تھی کہ آئی ایم ایف جانا ہے یا نہیں؟ ان کا مزید کہنا تھا کہ زرمبادلہ ذخائر 14 ارب ہونا، برآمدات میں اضافہ، 3 ارب ڈالر سے زائد بیرون ملک سے آنے والی ترسیلات زر، سٹاک ایکسچینج کا 77 ہزار کی حد عبور کرنا معاشی کامیابیوں کا منہ بولتا ثبوت ہے ، زراعت، آئی ٹی، معدنیات، توانائی سمیت ہر شعبہ ترقی کی طرف گامزن ہے، خسارے کم ہو رہے ہیں، کرنٹ اکاؤنٹ خسارہ منفی سے مثبت ہو گیا ہے۔ انہوں نے یہ بھی کہا کہ 9 مئی کو ریاست اور شہدا کے وقار پر حملہ کرنے والے مجرموں کی لائی تباہی کے اثرات آہستہ آہستہ ختم ہو رہے ہیں۔

محکمہ موسمیات نےمون سون کی آؤٹ لک رپورٹ جاری کردی ، رپورٹ کے مطابق ملک کےبیشترعلاقوں میں معمول سےزیادہ بارشیں ہونے کا خدشہ ظاہر کیا جا رہا ہے ۔محکمہ موسمیات کے مطابق بالائی پنجاب اورزیریں سندھ میں زیادہ بارشیں متوقع ہیں جبکہ بلوچستان میں بھی معمول سےکچھ زیادہ بارشیں ہو سکتیں ہیں۔ محکمہ موسمیات نے عید قربان کے دوسرے روز بارشوں کی پیشگوئی کر دی۔محکمہ موسمیات کے مطابق بحریہ عرب سے نم ہوائیں ملک کے بالائی اور وسطی علاقوں میں داخل ہونے کا امکان ہے، 18 جون سے ملک کے مغربی علاقوں میں نم ہوائیں داخل ہونے کے باعث گلگت، کے پی کے، پنجاب ،اسلام آباد، بلوچستان اور سندھ کے مختلف اضلاع میں بارشوں کا امکان ہے۔موسم کا احوال بتانے والوں کا کہنا ہے کہ 18 سے 22 جون کے دوران گلگت بلتستان، کشمیر میں تیز ہواؤں اور گرج چمک کے ساتھ بارش کا امکان ہے، کشمیر میں بعض مقامات پر موسلادھار بارش کی بھی توقع ہے، 16 سے 18 جون کے دوران کے پی کے میں موسم شدید گرم اور خشک رہے گا۔محکمہ موسمیات کا کہنا تھا کہ 18 جون سے 22 جون کے دوران چترال، ایبٹ آباد میں آندھی اور گرج چمک کے ساتھ چند مقامات پر وقفے وقفے سے بارش کا امکان ہے، 16 سے 18 جون کے دوران بلوچستان کے بیشتر علاقوں میں موسم شدید گرم اور خشک رہے گا۔موسم کا احوال بتانے والوں نے اپنی رپورٹ میں کہا کہ 18 سے 22 جون کے درمیان اسلام آباد، راولپنڈی ،مری اور گلیات میں اندھی چلنے کے علاوہ گرج چمک کے علاوہ بعض مقامات پر بارش کا امکان ہے، 20 سے 22 جون کے دوران بہاولپور، ملتان اور خانیوال میں آندھی جھگڑ چلنے کے علاوہ گرج چمک کے ساتھ بارش کی توقع ہے۔
محکمہ موسمیات کا کہنا تھا کہ 20 سے 22 جون کے دوران کوئٹہ ژوب، ڈیرا بوٹکے باہر خان میں اندھیرا چمک کے ساتھ چند مقامات پر بارش کا امکان ہے جبکہ 17 سے 20 جون تک سندھ کے بیشتر علاقوں موسم شدید گرم اور خشک رہے گا، 21 سے 22 جون کے دوران سکھر، جیکب آباد میں آندھی جکڑ چڑنے کے علاوہ چند مقامات پر موسلادھار بارش متوقع ہے۔موسم کا احوال بتانے والوں نے انتباہ جاری کرتے ہوئے کہا کہ آندھی چلنے اور گرج چمک کے باعث روز مرہ کے معمولات زندگی متاثر ہونے کے ساتھ کمزور انفراسٹرکچر کو نقصان پہنچنے کا خدشہ ہے ، 19 سے 22 جون کے دوران شدید گرمی کی لہر میں کمی کا امکان ہے، تمام متعلقہ اداروں کو گرمی کی لہر کے دوران الرٹ رہنے کی ہدایت کردی گئ۔ملک کے دریاؤں میں ممکنہ شدید بارشوں کے باعث سیلابی صورتحال پیدا ہونے کا خدشہ بھی رپورٹ میں ظاہر کیا گیا ہے۔محکمہ موسمیات نے شہری علاقوں میں مون سون بارشوں کی وجہ سے اربن فلڈنگ جبکہ ہندوکش، کوہ سلیمان اور کیرتھر کے پہاڑی سلسلوں میں فلیش فلڈنگ کا اندیشہ بھی ظاہر کیا ہے ۔

بانی چیئرمین پاکستان تحریک انصاف (پی ٹی آئی) عمران خان نے جیل سے محمود خان اچکزئی کو مکمل اعتماد کا پیغام بھجوادیا۔ ذرائع کے مطابق اسد قیصر نے محمود خان اچکزئی سے ملاقات میں مذاکراتی عمل آگے بڑھانے کا کہہ دیا۔محمود خان اچکزئی کی سربراہی میں اپوزیشن الائنس نے حکومتی اتحادی جماعتوں پیپلز پارٹی، مسلم لیگ (ن) اور متحدہ قومی موومنٹ سے رابطے کا فیصلہ کیا ہے۔ذرائع کے مطابق بانی پی ٹی آئی نے جیل سے محمود خان اچکزئی کو مکمل اعتماد کا پیغام بجھوا دیا ہے۔
ذرائع کے مطابق اپوزیشن الائنس کی طرف سے ٹی او آرز طے کرکے پی پی، ن لیگ اور ایم کیو ایم سے رابطہ ہوگا۔ذرائع کے مطابق محمود اچکزئی مذاکرات کے لیے الائنس میں شامل جماعتوں میں سے ایک ایک نمائندہ شامل کریں گے۔ذرائع کے مطابق محمود اچکزئی پی ٹی آئی سے مشاورت کے بعد مولانا فضل الرحمان کو اعتماد میں لیں گے۔ذرائع کے مطابق محمود خان اچکزئی عید کے بعد مولانا فضل الرحمان سے ملاقات کریں گے، بانی پی ٹی آئی الائنس کے مذاکراتی عمل کی مکمل حمایت کریں گے۔

وزیراعظم آفس کے مطابق پٹرول کی قیمت میں 10 روپے 20 پیسے فی لیٹر اور ڈیزل کی قیمت میں 2 روپے 33 پیسے فی لیٹر کمی کی گئی ہے۔وزیراعظم آفس نے بتایاکہ یکم جون کو حکومت نے پیٹرول کی قیمت میں 4 روپے 74 پیسے کمی کی تھی۔ واضح رہے کہ قیمتوں میں اضافے یا کمی کا اعلان ہر ماہ کی 15 اور مہینے کی آخری تاریخ کو ہوتا ہے لیکن اس بار ایک روز قبل ہی قیمتوں میں کمی کی گئی ہے۔ قبل ازیں وزیراعظم شہبازشریف نے صنعت اور برآمدات میں بڑے اضافے کیلئے تاریخی اقدام کیا اور صنعتوں کیلئے بجلی کی قیمت میں 10روپے69 پیسے فی یونٹ کی کمی کردی۔صنعت اور برآمدات کے شعبے کیلئے بجلی کی قیمت 34 روپے 99 پیسے فی یونٹ مقرر کی گئی ہے۔

سینیٹ کی قائمہ کمیٹی برائے خزانہ کے اجلا س میں ارکان سینیٹ نے ریٹیلرز کے خلاف شکایات کے انبار لگا دیے۔سینیٹ ارکان نے اجلاس میں کہا کہ ریسٹورنٹس اور بک شاپس سمیت بہت سے ریٹیلرز کریڈٹ یا ڈیبٹ کارڈ وصول نہیں کرتے اور مشین کا لنک ڈاؤن ہونے کا بہانہ کر دیتے ہیں۔اس پر چیئرمین ایف بی آر امجد زبیر ٹوانہ نے کریڈٹ کارڈ کے ذریعے ادائیگی یقینی بنانے کیلئے اقدامات کی یقین دہانی کرائی۔ انہوں نے کہا کہ ریٹیلرز کی ذمہ داری ہوگی کہ وہ کریڈٹ کارڈ کے ذریعے پیمنٹ وصول کریں، اگر کوئی کریڈٹ یا ڈیبٹ کارڈ قبول نہیں کرتا تو کاروبار سیل کیا جائے گا۔ ان کا کہناتھاکہ پی او ایس انوائس سسٹم پر عمل درآمد نہ کرنے والے ریٹیلرز کو پانچ لاکھ جرمانے وصول کرکے 7 دن بعد کاروبار یا دکان کھولنے کی اجازت ہوگی۔انہوں نے مزید کہا کہ صارفین کی جانب سے روز کی تین یا ہفتے میں پانچ شکایات پر کارروائی کی جائے گی، اب ایف بی آر میں ڈیش بورڈ بھی لگا ہوا ہے جس سے پتہ چل جاتا ہے کہ کس دکان کا پوائنٹ آف سیل بند ہے۔