Author: صدف ابرار

استحکام پاکستان پارٹی کے رکن قومی اسمبلی عون چوہدری کا کہنا ہے کہ پی ٹی آئی والوں کو سمجھنا چاہیے ان کے ساتھ بیٹھے ہوئے لوگ کیا گیم کر رہے ہیں۔ عون چوہدری نے کہا کہ پاکستان اس وقت نازک موڑ پر ہے، جہاں عدل و انصاف ہوتا ہے وہاں ترقی اور خوشحالی آتی ہے، ہمیں الزام تراشی سے نکلنا چاہیے، عدلیہ پر الزام نہ لگایا جائے، سب کی ذمہ داری ہے کہ ملک میں استحکام آئے۔مقامی ٹی وی گفتگو کرتے ہوئے عون چوہدری نے کہا کہ 9 مئی پاکستان کی تاریخ میں پہلے کبھی نہیں ہوا، 2014 میں بھی دھرنا ہوا تھا کیا کوئی ایک گاڑی جلی تھی، ان کو دیکھنا ہوگا پی ٹی آئی میں پیٹرول بم بنانے والے کہاں سے آگئے؟
پروگرام میں شریک پی ٹی آئی رہنما عاطف خان نے کہا کہ اگر ہمارے دور میں کچھ غلط ہوا تھا تو اس کا دفاع نہیں کروں گا، اگر ہمارے دور میں کچھ غلط ہوا تھا تو اس کو دہرانا نہیں چاہیے، اس حکومت کو دشمن کی کوئی ضرورت نہیں یہ خود اپنی دشمن ہے۔ عاطف خان نے کہا کہ 6 ججز نے لکھا کہ ان کے کمروں میں کیمرے لگے ہوئے ہیں، ججز نے کہا کہ ان پر دباؤ ہے اور دباؤ کیا تھا بانی پی ٹی آئی کے خلاف فیصلے کرنے کا، جج صاحب نے ٹھیک پوچھا حکومت بتائے عدلیہ میں کون کالی بھیڑ ہے۔پی ٹی آئی رہنما نے کہا کہ میڈیا کے ساتھ اس حکومت کو مسئلہ ہے شاعروں سے مسئلہ ہے، ماحول کو ٹھیک کرنا حکومت کی ذمہ داری ہوتی ہے۔

وفاقی وزیر مذہبی امور اور بین المذاہب ہم آہنگی چودھری سالک حسین سے قازقستان کے سفیر یرژان کِسٹافن کی ملاقات ہوئی، ملاقات میں باہمی دلچسپی کے امور اور دوطرفہ تعلقات کے حوالے سے بات چیت کی گئی۔ ملاقات کے دوران گفتگو کرتے ہوئے وفاقی وزیر مذہبی امور چودھری سالک حسین نے کہا کہ پاکستان طلبہ کا ڈیٹا قازقستان کے ساتھ شیئر کرے گا تاکہ تشدد کا کوئی واقعہ نہ ہو،دونوں ممالک کےمتعلقہ حکام کو سکیورٹی ڈائیلاگ کا اہتمام کرنا چاہیے،انہوں نے کہا کہ قازقستان کی ائیرلائن پاکستان کے ساتھ رابطے کا ذریعہ بن سکتی ہے ،ہم ائیر لائن بزنس کو مزید وسعت دے سکتے ہیں، سفیر قازقستان یرژان کِسٹافن نے کہا کہ اسلامو فوبیا سے نمٹنا مسلم ممالک کی ترجیحات میں سے ایک ہے،پاکستان اور قازقستان کے درمیان مذہبی مکالمہ پر بات چیت انتہائی ضروری ہے ،ہم آئندہ ماہ مذہبی کانفرنس منعقد کرانے کی تیاری کر رہے ہیں ،امید کرتے ہیں پاکستان کی کانفرنس میں شرکت سے مذہبی مکالمہ کو تقویت ملے گی۔ انہوں نے کہا کہ ہم قازقستان میں پاکستانی طلبہ کو دوستانہ ماحول فراہم کرنا چاہتے ہیں ،ہمیں ایک فریم ورک بنا نے کی ضرورت ہے تاکہ نوجوان آبادی پر توجہ مرکوز کر سکیں۔ ملاقات کے دوران دو طرفہ تعلقات کی مزید فروغ دینے پر اتفاق کیا گیا ،دونوں رہنماؤ ں نے ملاقات کو انتہائی خوشگوار قرار دیا۔

نیشنل الیکٹرک پاور ریگولیٹری اتھارٹی (نیپرا) نے بجلی کی صنعت میں ہیلتھ، سیفٹی اور انوائرمنٹ پر رپورٹ جاری کردی جس میں صارفین کو بجلی کی فراہمی کے شعبے میں کےالیکٹر کو سب سے بہتر قرار دیا گیا ہے۔رپورٹ کے مطابق صارفین کو بجلی فراہمی میں فیصل آباد الیکٹرک سپلائی کمپنی (فیسکو) دوسرے اور لاہور الیکٹرک سپلائی کمپنی (لیسکو) تیسرے نمبر پر قرار دی گئی ہے۔نیپرا رپورٹ کے مطابق بجلی فراہمی میں گیپکو چوتھے اور میپکو پانچویں نمبر پر رہی، جبکہ سکھر اور حیدرآباد سمیت تمام ڈسکوز کم ترین سطح پر رہے۔رپورٹ میں یہ بھی کہا گیا کہ بجلی فراہمی میں کےالیکٹرک 95 اسکور کے ساتھ سرفہرست رہی۔

شدید گرمی کی لہر کے پیش نظر اڈیالہ جیل میں تمام قیدیوں کےلیے خصوصی اقدامات کیے گئے ہیں۔جیل سپرنٹنڈنٹ اسد وڑائچ کے مطابق اڈیالہ جیل میں تمام قیدیوں کو ٹھنڈے پانی کی دستیابی کے لیے واٹر چلرز نصب کردیے گئے ہیں۔جیل سپر نٹنڈنٹ کے مطابق گرمی کی شدت میں اضافے کے پیش نظر تمام قیدیوں کو ائیر کولرز فراہم کردیے گئے ہیں، قیدیوں کی بیرکس میں ایگزاسٹ فینز بھی لگا دیے گئے ہیں اور تمام قیدیوں کے کمروں میں پنکھوں کی مرمت بھی کردی گئی ہے۔سپرنٹنڈنٹ اڈیالہ جیل کے مطابق جیل میں ہیٹ اسٹروک یونٹ بھی قائم کردیا گیا ہے جس میں 24 گھنٹے ڈاکٹر دستیاب ہوگا، قیدیوں کو دن میں دو مرتبہ نمکین لسی اور لیموں پانی بھی فراہم کیا جارہا ہے،جیل سپر نٹنڈنٹ نے بتایا کہ بانی پی ٹی آئی، بشریٰ بی بی اور شاہ محمود قریشی کو بھی سہولیات دی،

وفاقی وزارت تعلیم نے پاکستان کی معروف خاتون کوہ پیما نائلہ کیانی کو لڑکیوں کی تعلیم کے لیے قومی خیر سگالی کی سفیر مقرر کر دیا، نائلہ کیانی نے 8 ہزار میٹر سے زائد کی 14 بلند ترین چوٹیوں میں سے 11 کو سر کیا ہے۔وفاقی وزارت تعلیم کا کہنا ہے کہ نائلہ کیانی خیر سگالی سفیر کی حیثیت سے ملک بھر میں لڑکیوں کی تعلیم کی اہمیت کو اجاگر کریں گی، نائلہ کیانی کی بطور قومی خیر سگالی سفیرتقرری خواتین کو تعلیم کے ذریعے بااختیار بنانے کے عزم کا ثبوت ہے۔واضح رہے کہ نائلہ کیانی ایرو اسپیس انجینئر اور ایک بینکر ہیں، وہ پہلی پاکستانی خاتون اور تیسری پاکستانی ہیں جنہوں نے 8,000 میٹر سے زائد 14 بلند ترین چوٹیوں میں سے 11 کو سر کیا ہے۔نائلہ کیانی ستارہ امتیاز حاصل کرنے والی پاکستان میں واحد خاتون ایتھلیٹ ہیں، نائلہ کیانی نانگا پربت، گاشربرم ون، گاشربرم ٹو، لوتسے، مناسلو، براڈ پیک، اناپورنا، مکالو، اور چو اویو سرکر چکی ہیں۔
اپنی تقرری پر نائلہ کیانی کا کہنا ہے کہ لڑکیوں کی تعلیم کے لیے قومی خیر سگالی کی سفیر مقرر ہونے پر فخر محسوس کر رہی ہوں، ہمارے ملک کے لیے خواتین کو بااختیار بنانے اور کامیابی کا واحد راستہ تعلیم ہے ۔

پی آئی اے کی نجکاری کے خلاف ملازمین کے احتجاج کو روکنے کےلیے ادارے میں لازمی سروسز ایکٹ نافذ کیا گیا ہے۔نوٹیفکیشن کے مطابق وزارت داخلہ کی ہدایت پر پی آئی اے انتظامیہ نے ادارے میں 6 ماہ کیلئے لازمی سروسز ایکٹ نافذ کیا ہے۔نوٹیفکیشن میں واضح کیا گیا کہ لازمی سروسز ایکٹ کا نفاذ ایئرلائن آپریشن کو بلاتعطل جاری رکھنے کیلئے عوامی مفاد میں کیا گیا ہے۔نوٹیفکیشن میں کہا گیا کہ لازمی سروسز ایکٹ کا نفاذ ملازمین کے تمام گریڈ پر ہوگا، قانون کے تحت کسی ملازم کا ڈیوٹی سے انکار اور غیر ضروری چھٹی جرم ہوگا۔نوٹیفکیشن کے مطابق لازمی سروسز ایکٹ کی خلاف سرگرمی جرم ہوگی، ایکٹ کے تحت دیگر ملازمین کو ڈیوٹی سے روکنا بھی جرم ہوگا۔نوٹیفکیشن کے مطابق ملازمین کا قانون کےمطابق دیے گئے حکم پر عمل کرنے سے انکار جرم ہو گا، پی آئی اے میں نافذ لازمی سروسز ایکٹ کی خلاف ورزی پر 1 سال قید اور جرمانے کی سزا ہوسکتی ہے۔

ایف بی آر کی جانب سے نان فائلرز کے خلاف کارروائی کے مثبت اثرات سامنے آنے لگے ہیں۔ایف بی آر ذرائع کے مطابق ٹیکس گوشوارے جمع کرانے پر 7 ہزار 167 افراد کی موبائل سمز بحال کردی گئی ہیں۔ذرائع کا کہنا ہےکہ اب تک 65 ہزار نان فائلرز کا ڈیٹا ٹیلی کام کمپنیوں سے شیئرکیا گیا، ٹیلی کام کمپینوں کو نان فائلرزکی موبائل سمز بلاک کرنے کی ہدایت کی گئی۔ذرائع کے مطابق مجموعی طور پر 5 لاکھ 6 ہزار 671 نان فائلرز کی فہرست تیارکی گئی تھی۔خیال رہے کہ انکم ٹیکس جنرل آرڈر کے تحت ان افراد کی سمز بتدریج بند کرنےکا فیصلہ ہوا تھا۔