وفاقی وزیر پلاننگ اینڈ ڈویلپمنٹ احسن اقبال نے میڈیا سے گفتگو کرتے ہوئے کہا کہ پاکستان کی سمت صحیح کی طرف ہو چکی ہے، پاکستان کی معیشت ترقی کی طرف گامزن ہو رہی ہے، سٹاک مارکیٹ 76 ہزار انڈیکس کراس کر گئی ہے۔ احسن اقبال نے کہا کہ اس کا مطلب ہے کہ بیرونی اور اندرونی سرمایہ کاروں کو حکومت کی پالیسیوں پر بھرپور اعتماد کا اظہار ہے، اگلے پانچ سالوں میں پاکستان کی معیشت کی بحالی کے سفر کو محاذ آرائی کی سیاست سے بچائیں، پاکستان کی معیشت مشکلات کا شکار ہوتی ہے تو مشکلات پی ٹی آئی پر نہیں ن لیگ پر آئیں گی۔وفاقی وزیر نے کہا کہ اگر ملک ترقی کرے گا تو 24 کروڑ عوام کا بھلا ہو گا، اگر ملک بحران کی طرف جائے گا تو عوام اس کی سزا بھگتیں گے، پی ٹی آئی قیادت کو مشورہ ہے سڑکوں کو چھوڑ کر ایوانوں میں آئے، ایوانوں میں مثبت اپوزیشن کا کردار ادا کرے۔
وفاقی وزیر پلاننگ اینڈ ڈویلپمنٹ احسن اقبال نے کہاکہ پی ٹی آئی عدالت کو اسٹیبلشمنٹ اور حکومت سے لڑا کر اپنے لئے راستہ بنانا چاہتی ہے۔ان کا مزید کہنا تھا کہ 2029ء تک انتظار کریں، خیبرپختونخوا میں پی ٹی آئی کی حکومت ہے، عوام کی خدمت کریں، جہاں پر جس کو مینڈیٹ ملا ہے عوام کی خدمت کریں، ہمیں اب جلسوں کا کھیل نہیں کھیلنا ہمیں عوام کی خدمت کا مقابلہ کرنا ہے، ہمارے دروازے بامقصد بامعنی مذاکرات کے لئے تمام جماعتوں کے لئے کھلے ہیں۔احسن اقبال نے مزید کہا کہ بامقصد بامعنی مذاکرات تبھی ہوسکتے ہیں جب ہر فریق کھلے دل سے مثبت ایجنڈے کے ساتھ مذاکرات کرے، ضد انا کے ساتھ مذاکرات ہوں گے تو وہ کامیاب نہیں ہوں گے، 9 مئی کے واقعات کو قوم کبھی معاف نہیں کر سکتی۔وفاقی وزیر کا کہنا تھا کہ پی ٹی آئی سیاست میں مار کھانے کے بعد عدالت کا کندھا استعمال کررہی ہے، آج پھر سیاست میں مات کھا چکی ہے، اس کو کوئی امکان نظر نہیں آرہا، اپنی سیاست کے لئے عدالت کے کندھے استعمال کرنا چاہتی ہے، پاکستان کی عدلیہ بہت جہاں دیدہ اور میچور ہیں، پاکستان کے تمام ستون سمجھتے ہیں ہم سب کو مل کر پاکستان کے لئے کام کرنا ہے۔
Author: صدف ابرار
-
ہمارے دروازے بامقصد مذاکرات کے لئے تمام جماعتوں کے لئے کھلے ہیں، احسن اقبال
-
آرمی چیف کا ایرانی صدر اور رفقاء کے انتقال پر اظہار افسوس
آرمی چیف جنرل عاصم منیر نے ایرانی چیف آف جنرل سٹاف کو ٹیلی فون کیا، آرمی چیف نے ایرانی صدر اور رفقاء کے انتقال پر اظہار افسوس کیا۔پاک فوج کے شعبہ تعلقات عامہ (آئی ایس پی آر) کے مطابق آرمی چیف نے پاک فوج کے تمام رینکس کی جانب سے مرحوم کی روح کیلئے دعا اور سوگوار خاندانوں کیلئے نیک خواہشات کا اظہار کیا۔آرمی چیف نے کہا مرحوم ابراہیم رئیسی اور ایرانی وزیر خارجہ غیرمعمولی رہنما اور پاکستان کے سچے دوست تھے، دونوں رہنماؤں اور ان کے رفقاء کا جانی نقصان ناقابل تلافی ہے، پاکستان کے ایران کے ساتھ تاریخی، ثقافتی اور برادرانہ تعلقات ہیں۔
آرمی چیف نے مزید کہا کہ پاکستان اور ایران کی مسلح افواج ہمیشہ ایک ساتھ کھڑی ہیں۔ آرمی چیف جنرل عاصم منیر کا کہنا تھا کہ مرحوم ایرانی صدراوروزیرخارجہ پاکستان کےسچے دوست تھے، دونوں رہنماوں سمیت دیگر کےانتقال سےناقابل تلافی نقصان پہنچا۔پاک فوج کے تمام رینکس مرحومین کےایصال ثواب کیلئے دعاگوہیں۔ آرمی چیف کی جانب سے سوگوارخاندانوں کے لیے بھی نیک خواہشات کا اظہار کیا گیا۔ ان کا کہنا تھا کہ پاکستان کے ایران کےساتھ تاریخی ،ثقافتی اوربرادرانہ تعلقات ہیں، پاکستان اور ایران کی مسلح افواج ہر موقع پر ایک ساتھ کھڑی ہے۔ ایرانی مسلح کےچیف آف جنرل اسٹاف نے دکھ کی اس گھڑی میں ساتھ دینےپرآرمی چیف سے اظہار تشکرکیا۔ ایرانی جنرل نے دونوں افواج کے درمیان تعاون جاری رکھنے کے عزم کا اظہار کیا ۔
-
ہتک عزت بل پر تمام اسٹیک ہولڈرز سےمشاورت ہو گی ، گورنر پنجاب
گورنر پنجاب سردار سلیم حیدر خان سے صحافتی تنظیموں کی جوائنٹ ایکشن کمیٹی کے عہدیداران کی ملاقات ہوئی۔ جوائنٹ ایکشن کمیٹی کے وفد میں سی پی این ای، پی بی اے، پی ایف یو جے، اے پی این ایس، ایسوسی ایشن آف الیکٹرانک میڈیا ایڈیٹرز اینڈ نیوز ڈائریکٹرز کے نمائندے شامل تھے۔ اس کے علاوہ وفد میں ارشاد عارف صدر سی پی این ای، سیکرٹری پی ایف یو جے، سابق صدر سی پی این ای کاظم خان، محمد عثمان وائس پریذیڈنٹ، ایسوسی ایشن آف الیکٹرانک میڈیا ایڈیٹرز اینڈ نیوز ڈائریکٹرز، نوید کاشف پی بی اے، امتنان شاہد، حافظ عثمان طارق شامل تھے ۔اس موقع پر جنرل سیکرٹری پیپلزپارٹی وسطی پنجاب حسن مرتضی، سابق ایم پی اے مخدوم مرتضی محمود، شہزاد سعید چیمہ انفارمیشن۔سیکرٹری وسطی پنجاب بھی موجود تھے۔ صحافتی تنظیموں کے نمائندوں نے گورنر پنجاب کو ہتک عزت بل بارے تحفظات سے اگاہ کیا۔
گورنر پنجاب سردار سلیم حیدر کا کہنا تھا کہ میری پوری کوشش ہو گی کہ آئندہ چند روز میں ہتک عزت بل پر تمام اسٹیک ہولڈرز کو مشاورت کے لیے اکٹھا کیا جائے۔ہتک عزت بل پر تمام اسٹیک ہولڈرز سے مشاورت بہت ضروری ہے۔ -
پیر کو سورج خانہ کعبہ کے عین اوپر ہوگا
رواں سال پہلی مرتبہ سورج کَل عین خانہ کعبہ کے اوپر ہوگا، اس دوران قبلہ رخ کا بھی تعین کیا جاسکتا ہے۔سورج کے گردش زمین کی گردش کے دوران کبھی کبھار سورج عین خانہ کعبہ کے برابر اوپر آجاتا ہے۔ رواں سال یہ پہلا واقعہ ہے جب سورج خارجہ کعبہ کے عین اوپر ہوگا، سال میں ایسا دو بار ہوتا ہے۔فلکیاتی سوسائٹی کے نگران انجینئر کا کہنا ہے کہ سعودی عرب کے مقامی وقت کے مطابق سورج کے خانہ کعبہ کے عین اوپر آنے کا وقت دوپہر 12 بج کر 18 منٹ بتایا گیا ہے۔ سورج 90 ڈگری پر ہو گا جس کی وجہ سے خانہ کعبہ اور کسی بھی مجسم عمارت یا دیگر اشیا کا سایہ نہیں ہوگا۔ اس دوران دیگر مقامات پر سورج قدرے مائل ہو گا۔ وہ علاقے جو عرض بلد پر 23.5 ڈگری شمال اور جنوب میں واقع ہیں وہاں یہ مشاہدہ سال میں دو بار دیکھا جاسکتا ہے۔دوسری طرف سورج کے عین خانہ کعبہ کے اوپر آنے پر قبلہ کے رخ کا تعین بھی کیا جاسکتا ہے۔
-
بشام میں چینی انجینیئرز پر حملے میں ٹی ٹٰی پی ملوث ہے ، محسن نقوی
وزیر داخلہ محسن نقوی کا کہنا ہے کہ بشام میں چینی انجینیئرز پر حملے میں افغان سرزمین استعمال کی گئی، کالعدم ٹی ٹی پی دہشت گردی کے واقعات میں ملوث ہے۔لاہور میں میڈیا سے گفتگو کرتے ہوئے محسن نقوی نے کہا کہ تمام شواہد موجود ہیں کہ بشام واقعہ کالعدم ٹی ٹی پی نے کیا، افغان سرزمین استعمال ہوئی، منصوبہ بندی سے چینی شہریوں پر حملہ کیا گیا۔ ثبوت افغان حکومت کے حوالے کیے گئے لیکن اب افغان حکومت نے کوئی جواب نہیں دیا۔محسن نقوی نے کہا کہ چینی شہریوں کی سیکیورٹی ہماری ذمہ داری ہے، چین اور پاکستان کے تعلقات ہمارے لیے بہت اہمیت رکھتے ہیں، دونوں ممالک مختلف فورمز پر ایک دوسرے کی حمایت کرتے ہیں، وہ ہماری بہتری اور ہم ان کی بہتری کیلئے کام کرتے ہیں۔ وزیر داخلہ نے کہا کہ ہم نے اپنی سرحدوں پر سیکیورٹی بڑھائی ہے، حکومت بخوبی جانتی ہے کہ کونسی طاقتیں امن خراب کرنا چاہتی ہیں، چینی شہریوں کی سیکیورٹی ہمارے لیے بہت ضروری ہے، چینی شہریوں کی حفاظت کیلئے ہر ممکن اقدام کیا جا رہا ہے۔ محسن نقوی نے کہا کہ چینی شہریوں کی سکیورٹی کے لئے نئے ایس او پیز بنائے ہیں، چینی شہریوں کی سکیورٹی کے لئے ہرممکن اقدامات کر رہے ہیں، اگلے مہینے وزیراعظم چین کا دورہ کریں گے۔
اس موقع پر نیکٹا کے سربراہ رائے طاہر نے میڈیا سے گفتگو کرتے ہوئے کہا کہ چینی شہریوں کی حفاظت کرنا ہماری ذمہ داری ہے، بشام حملہ ٹی ٹی پی نے کیا جس کے تمام شواہد موجود ہیں، 26 مارچ کوچینی انجینئرزکا قافلہ داسو جارہا تھا، قافلہ داسوکی طرف رواں دواں تھا کہ کارمیں بیٹھے خودکش بمبار نے خود کو اڑا لیا۔انہوں نے بتایا کہ دھماکہ خیزمواد کار کے دروازوں میں فکس کیا گیا تھا، چینی انجیئنرز کی بس دھماکے بعد 150 فٹ گہرے نالے میں گرگئی تھی، حملے میں استعمال ہونے والی سلور کارکا ماڈل 2006ء تھا۔رائے طاہر نے مزید بتایا کہ گاڑی پاکستانی نہیں یہ کار افغانستان سے پاکستان میں داخل ہوئی، حملے کا سارا پلان افغانستان میں بنایا گیا۔ -
پاکستان میں پانچ برسوں کے دوران غربت میں اضافہ
پاکستان انسٹیٹیوٹ آف ڈویلپمنٹ اکنامکس (پائیڈ) نے ملک میں غربت کی شرح کے حوالے سے اعداد و شمار جاری کر دیئے۔پاکستان انسٹیٹیوٹ آف ڈویلپمنٹ اکنامکس کی رپورٹ کے مطابق 5 برسوں میں غربت کی شرح 38.6 فیصد سے بڑھ کر 39.5 فیصد تک پہنچ گئی۔پائیڈ کے مطابق بلوچستان میں 70 فیصد، خیبرپختونخواہ میں 48 فیصد، سندھ 45 فیصد، پنجاب میں 30 فیصد لوگ غربت کا شکار ہیں، ملک بھر میں شہری علاقوں کی نسبت دیہی علاقوں میں غربت کی شرح زیادہ ریکارڈ کی گئی ہے۔
پاکستان انسٹیٹیوٹ آف ڈویلپمنٹ اکنامکس کے مطابق دیہی علاقوں میں غربت کی شرح 51 فیصد تک ریکارڈ ہوئی جبکہ شہری علاقوں میں غربت کی شرح 17 فیصد تک ریکارڈ ہوئی۔پائیڈ کے مطابق 26.5 فیصد لوگ رہن سہن سہولت، 49.4 فیصد تعلیمی سہولت، 24.1 فیصد لوگ صحت کیلئےسہولیات سے محروم ہیں۔پاکستان انسٹیٹیوٹ آف ڈویلپمنٹ اکنامکس کی ریسرچ رپورٹ کے مطابق پاکستان میں سب سے زیادہ غربت کی شرح صوبہ بلوچستان میں ریکارڈ کی گئی ہے۔ -
جنس معلوم کرنے کیلئے حاملہ بیوی کا پیٹ چاک کرنے والے شوہر کو عمرقید
بھارتی ریاست اتر پردیش کے ضلع بوداؤں میں بچے کی جنس معلوم کرنے کیلئے اپنی 8 ماہ کی حاملہ بیوی کا پیٹ چاک کرنے والے شخص کو عمر قید کی سزا سنادی گئی۔ غیر ملکی میڈیا کے مطابق واقعہ 19 ستمبر 2020 کو سول لائنز کے علاقے میں پیش آیا ، جہاں 46 سالہ ملزم پنا لال نے ایک پنڈت کے کہنے پر اپنی بیوی انیتا دیوی پر درانتی سے پیٹ کاٹ لیا ،ملزم نے بتایا کہ پنڈت نے کہا کہ اس کی بیوی دوبارہ بیٹی پیدا کرنے والی ہے اور ملزم بیٹے کا خواہش مند تھا۔ انیتا کو پولیس نے دہلی کے اسپتال میں داخل کرادیا جہاں ڈاکٹر اس کی جان تو بچا لیں لیکن نومولود کو نہیں بچا سکے ،ڈاکٹرز کے مطابق پنڈت کی پیشگوئی کے برعکس خاتون بیٹی نہیں بیٹے کو جنم دینے والی تھی ،ملزم پنا لال کو انڈین پینل کوڈ(آئی پی سی) کے تحت اقدامِ قتل اور عورت کی رضامندی کے بغیر اسقاط حمل کا مقدمہ درج کر کے جیل بھیج دیا گیا تھا، 2021 میں اس کے خلاف چارج شیٹ جمع کرادی گئی تھی۔ متاثرہ خاتون کے بھائی روی سنگھ نے بتایا کہ انیتا کی 5 بیٹیاں تھیں لیکن پنا لال کو لڑکا چاہیے تھا، جب میری بہن چھٹی بار حاملہ ہوئی تو پنا لال چاہتا تھا کہ وہ اسقاط حمل کرا دے کیونکہ گاؤں کے کسی پنڈت نے اس کے دماغ میں یہ بات بٹھا دی تھی کہ انیتا دوبارہ بیٹی پیدا کرنے والی ہے۔ عدالت نے قتل کی کوشش کرنے کے جرم کے لیے مجرم کو عمر قید کی سزا سنا ئی جبکہ50 ہزار روپے جمع کرونے کی ہدایت بھی کی۔
-
پنجاب: طوفانی ہواؤں اور بارش کے باعث مختلف حادثات میں 3 بچے جاں بحق جبکہ 15 افراد زخمی
راوالپنڈی اور سیالکوٹ میں تیز ہواؤں، بارش آندھی، طوفان کے باعث مختلف حادثات میں 4 بچوں سمیت 6 افراد جاں بحق جبکہ 15 سے زائد زخمی ہوگئے۔راولپنڈی کے نواحی علاقہ گوجرخان میں طوفانی ہواؤں اور بارش کے باعث مختلف حادثات میں 3 بچے جاں بحق جبکہ 15زخمی ہوگئے۔ذرائع کے مطابق طوفانی ہواؤں اور بارشوں کے باعث گھروں کی چھتیں اور درخت گرنے کے درجنوں واقعات رونما ہوئے، درخت، دیواریں اور چھتیں گرنے سے 3 بچے جان کی بازی ہار گئے۔ریسکیو زرائع نے بتایا کہ نواحی علاقہ سنگنی میں چھت گرنے سے 14 سالہ لڑکی اریبہ جاں بحق ہو گئی جبکہ چنگا بنگیال میں چھت گرنے سے 2 بچے 8 سالہ ظل حسن اور 9 سالہ حیدر عباس جان کی بازی ہار گئے۔ریسکیو ذرائع کے مطابق حادثات میں 15 زخمیوں کو تحصیل ہیڈ کوارٹر اسپتال منتقل کر دیا گیا، جن میں 12 سالہ علیزے اور 4 سالہ فرحان کو زخمی حالت میں راولپنڈی ڈی ایچ کیو منتقل کیا گیا۔
دوسری جانب سیالکوٹ میں تیز آندھی اور طوفان کے باعث مختلف حادثات میں 3 افراد جاں بحق ہوگئے۔کشمیر روڈ پر محلہ اسلام نگر میں کباڑ خانے کی خستہ حال دیوار گرنے سے 2 افراد ملبے تلے آ کر دب گئے۔ریسکیو ون ون ٹو ٹو نے ملبے سے عاقب اور قمر کو نکال کر اسپتال منتقل کیا جہاں 27 سالہ عاقب دم توڑ گیا۔تحصیل پسرور کے علاقہ بھاگ میں چچا بھتیجا آسمانی بجلی گرنے سے جاں بحق ہوگئے، 32 سالہ راحیل اور 12 سالہ محمد علی کھیتوں میں چارہ کاٹ رہے تھے کہ ان پرآسمانی بجلی گری۔ -
وزیر اعظم شہباز شریف اور آئر لینڈ کے وزیراعظم کے درمیان ٹیلیفونک رابطہ،
وزیر اعظم شہباز شریف اور آئر لینڈ کے وزیراعظم کے درمیان ٹیلیفونک رابطہ ہوا، شہباز شریف نے آئرلینڈ کے وزیراعظم کو عہدہ سنبھالنے پر مبارکباد دی اور نیک خواہشات کا اظہار کیا۔وزیر اعظم شہباز شریف نے کہا کہ امید ہے کہ آئرلینڈ کے وزیراعظم اپنے ملک اور عوام کی ترقی و خوشحالی میں اہم کردار ادا کریں گے، وزیراعظم نے آئرلینڈ کی طرف سے فلسطین کی ریاست کو تسلیم کرنے کے فیصلے کو سراہا اور کہا کہ آئرلینڈ کا یہ فیصلہ معصوم فلسطینیوں کیلئے اُمید اور یکجہتی کا پیغام دے گا۔شہباز شریف نے کہا کہ آئرلینڈ کا فیصلہ فلسطین کاز کو فروغ دینے میں بھی اہم کردار ادا کرے گا، آئرلینڈ کا یہ فیصلہ دوسرے ممالک پر بھی ایسے فیصلے لینے کیلئے دباؤ کا باعث بنے گا، یو این قراردادوں کے مطابق دو ریاستی حل ہی مشرق وسطیٰ میں دیرپا امن لانے کا واحد راستہ ہے۔آئرش وزیر اعظم سائمن ہیرس نے کہا کہ آئرلینڈ نے دیگر یورپی اتحادیوں کی مشاورت سے اصولی فیصلہ کیا ہے، غزہ میں اسرائیل کی فوجی کارروائی کو کسی بھی طرح معاف نہیں کیا جا سکتا، آئرلینڈ حکومت نے محسوس کیا کہ یہ فیصلہ نارملائزیشن کو فروغ دینے کے لیے ضروری ہے۔دونوں رہنماؤں نے پاکستان اور آئرلینڈ کے درمیان دوطرفہ تعلقات پر تبادلہ خیال کیا، دونوں رہنماؤں نے باہمی دلچسپی کے شعبوں میں تعاون کو مضبوط بنانے کی خواہش کا اظہار کیا۔وزیراعظم نے پاکستان میں اپنا ریزیڈنٹ مشن کھولنے کے آئرلینڈ کے فیصلے کو سراہا اور کہا کہ یہ مشن ڈبلن میں پاکستانی مشن کے ساتھ دوطرفہ تجارت، سرمایہ کاری اور عوام کے درمیان تبادلوں کو فروغ دینے میں اہم کردار ادا کرے گا، شہباز شریف نے وزیراعظم سائمن ہیرس کو پاکستان کا سرکاری دورہ کرنے کی دعوت بھی دی۔
-
پی ایف ایف نے آئندہ فرنچائز فٹبال لیگ کو غیر آئینی قرار دے دیا
پاکستان فٹ بال فیڈریشن (پی ایف ایف) نے آئندہ ماہ ہونے والی فرنچائز پر مبنی پاکستان فٹبال لیگ کو غیر آئینی قرار دے دیا ہے۔ ایک بیان میں پی ایف ایف نے واضح کیا کہ فیڈریشن نے اس ایونٹ کی منظوری نہیں دی ہے۔ پی ایف ایف نے اس بات پر زور دیا کہ، فیفا اور اے ایف سی کے بینرز تلے، یہ پاکستان میں فٹ بال کے معاملات کے انتظام کی ذمہ دار واحد اتھارٹی ہے۔بیان کے مطابق، فٹ بال کی تمام سرگرمیاں، ان کے اوقات اور مقامات صرف پی ایف ایف کی طرف سے اختیار کیے جا سکتے ہیں، جیسا کہ فیفا کے حقوق نے دیے ہیں۔ فیڈریشن نے نشاندہی کی کہ پاکستان سپورٹس بورڈ کی 9 ستمبر 2014 کی ہدایت میں یہ حکم دیا گیا ہے کہ حکومت صرف ان فیڈریشنوں کی حمایت کرتی ہے جو بین الاقوامی اداروں کے تحت کام کرتی ہیں۔پی ایف ایف نے اس بات پر زور دیا کہ اس کی منظوری کے بغیر کسی بھی تقریب کا انعقاد آئین کے آرٹیکل 82 کی خلاف ورزی ہے، جو تادیبی کارروائی کا باعث بن سکتا ہے۔ فیڈریشن نے ملک میں فٹ بال کے فروغ کے لیے کسی بھی منصوبے کی حوصلہ افزائی کے لیے اپنے عزم کا اعادہ کیا، بشرطیکہ اس کی پہلے سے منظوری دی گئی ہو۔