Author: صدف ابرار

وزیر اعظم شہباز شریف اور آئر لینڈ کے وزیراعظم کے درمیان ٹیلیفونک رابطہ ہوا، شہباز شریف نے آئرلینڈ کے وزیراعظم کو عہدہ سنبھالنے پر مبارکباد دی اور نیک خواہشات کا اظہار کیا۔وزیر اعظم شہباز شریف نے کہا کہ امید ہے کہ آئرلینڈ کے وزیراعظم اپنے ملک اور عوام کی ترقی و خوشحالی میں اہم کردار ادا کریں گے، وزیراعظم نے آئرلینڈ کی طرف سے فلسطین کی ریاست کو تسلیم کرنے کے فیصلے کو سراہا اور کہا کہ آئرلینڈ کا یہ فیصلہ معصوم فلسطینیوں کیلئے اُمید اور یکجہتی کا پیغام دے گا۔شہباز شریف نے کہا کہ آئرلینڈ کا فیصلہ فلسطین کاز کو فروغ دینے میں بھی اہم کردار ادا کرے گا، آئرلینڈ کا یہ فیصلہ دوسرے ممالک پر بھی ایسے فیصلے لینے کیلئے دباؤ کا باعث بنے گا، یو این قراردادوں کے مطابق دو ریاستی حل ہی مشرق وسطیٰ میں دیرپا امن لانے کا واحد راستہ ہے۔آئرش وزیر اعظم سائمن ہیرس نے کہا کہ آئرلینڈ نے دیگر یورپی اتحادیوں کی مشاورت سے اصولی فیصلہ کیا ہے، غزہ میں اسرائیل کی فوجی کارروائی کو کسی بھی طرح معاف نہیں کیا جا سکتا، آئرلینڈ حکومت نے محسوس کیا کہ یہ فیصلہ نارملائزیشن کو فروغ دینے کے لیے ضروری ہے۔دونوں رہنماؤں نے پاکستان اور آئرلینڈ کے درمیان دوطرفہ تعلقات پر تبادلہ خیال کیا، دونوں رہنماؤں نے باہمی دلچسپی کے شعبوں میں تعاون کو مضبوط بنانے کی خواہش کا اظہار کیا۔وزیراعظم نے پاکستان میں اپنا ریزیڈنٹ مشن کھولنے کے آئرلینڈ کے فیصلے کو سراہا اور کہا کہ یہ مشن ڈبلن میں پاکستانی مشن کے ساتھ دوطرفہ تجارت، سرمایہ کاری اور عوام کے درمیان تبادلوں کو فروغ دینے میں اہم کردار ادا کرے گا، شہباز شریف نے وزیراعظم سائمن ہیرس کو پاکستان کا سرکاری دورہ کرنے کی دعوت بھی دی۔

پاکستان فٹ بال فیڈریشن (پی ایف ایف) نے آئندہ ماہ ہونے والی فرنچائز پر مبنی پاکستان فٹبال لیگ کو غیر آئینی قرار دے دیا ہے۔ ایک بیان میں پی ایف ایف نے واضح کیا کہ فیڈریشن نے اس ایونٹ کی منظوری نہیں دی ہے۔ پی ایف ایف نے اس بات پر زور دیا کہ، فیفا اور اے ایف سی کے بینرز تلے، یہ پاکستان میں فٹ بال کے معاملات کے انتظام کی ذمہ دار واحد اتھارٹی ہے۔بیان کے مطابق، فٹ بال کی تمام سرگرمیاں، ان کے اوقات اور مقامات صرف پی ایف ایف کی طرف سے اختیار کیے جا سکتے ہیں، جیسا کہ فیفا کے حقوق نے دیے ہیں۔ فیڈریشن نے نشاندہی کی کہ پاکستان سپورٹس بورڈ کی 9 ستمبر 2014 کی ہدایت میں یہ حکم دیا گیا ہے کہ حکومت صرف ان فیڈریشنوں کی حمایت کرتی ہے جو بین الاقوامی اداروں کے تحت کام کرتی ہیں۔پی ایف ایف نے اس بات پر زور دیا کہ اس کی منظوری کے بغیر کسی بھی تقریب کا انعقاد آئین کے آرٹیکل 82 کی خلاف ورزی ہے، جو تادیبی کارروائی کا باعث بن سکتا ہے۔ فیڈریشن نے ملک میں فٹ بال کے فروغ کے لیے کسی بھی منصوبے کی حوصلہ افزائی کے لیے اپنے عزم کا اعادہ کیا، بشرطیکہ اس کی پہلے سے منظوری دی گئی ہو۔

وزیراعظم شہباز شریف سے پاکستان میں چینی کمپنیوں کے نمائندوں کے وفد نے ملاقات کی ہے۔ وزیر اعظم شہباز شریف نے چینی ٹیکسٹائل انڈسٹری کو پاکستان میں صنعتیں لگانے کی دعوت دے دی اور کہا کہ چین اور پاکستان کے دیرینہ اور گہرے برادرانہ تعلقات ہیں جو وقت کے ساتھ مزید مضبوط ہو رہے ہیں، چین پاکستان کی ترقی میں اہم شراکت دار ہے، چینی شہریوں کی سیکیورٹی اور تحفظ حکومت کی اولین ترجیح ہے۔جمعے کو وزیر اعظم شہباز شریف سے پاکستان میں چینی کمپنیوں کے نمائندوں کے وفد نے وزیراعظم ہاؤس اسلام آباد میں ملاقات کی۔
وزیراعظم نے وفد کو خوش آمدید کہا اور ان سے گفتگو کرتے ہوئے کہا کہ چین اور پاکستان کے دیرینہ اور گہرے برادرانہ تعلقات ہیں جو وقت کے ساتھ مزید مضبوط ہو رہے ہیں، چین پاکستان کی ترقی میں اہم شراکت دار ہے ۔شہباز شریف نے کہا کہ چین نے پاکستان کی ہر برے وقت میں مدد کی جس پر مجھ سمیت پوری قوم چینی قیادت اور چینی عوام کی مشکور ہے، پاکستان ہر محاذ پر چین کے ساتھ کھڑا رہے گا۔ملاقات میں پاکستان چین جے سی سی اجلاس پر وزیر منصوبہ بندی احسن اقبال نے بریفنگ دی، چینی کمپنیوں کے نمائندوں نے پاکستان میں کاروبار اور سرمایہ کاری بڑھانے کے عزم کا اظہار کیا۔ چینی شہریوں کی فول پروف سکیورٹی کے لیےتمام ممکنہ اقدامات کیے جارہے ہیں۔وزیراعظم نے چینی کمپنیوں کو خصوصی اقتصادی زونز میں بی ٹوبی انتظام کے تحت صنعتیں لگانےکی ترغیب دی اور چینی ٹیکسٹائل انڈسٹری کو پاکستان میں اپنی صنعتیں قائم کرنے کی دعوت دی۔
وزیر اعظم نے کہا کہ سی پیک 2 سے متعلق بھرپور تیاری کررہے ہیں، آنے والے دورہ چین کا محور سی پیک 2 اور معاشی تعلقات کا مزید فروغ ہوگا، چین نے جس طرح 70 کروڑ افراد کو غربت سے نکالا وہ ہمارے لیے مشعل راہ ہے۔وزیر اعظم شہباز شریف نے کہا کہ برآمدات بڑھانے کے لیے چینی تجربات سے فائدہ اٹھانا چاہتے ہیں، سی پیک کےاگلے مرحلےکے لیے ہمیں اپنی افرادی قوت کو بہترین تکنیکی و فنی تربیت دینی ہے۔وزیر اعظم نے کہا کہ پاکستان آئی ٹی سیکٹر کے فروغ کے لیے چین کی آئی ٹی انڈسٹری کی مہارت سےفائدہ اٹھاناچاہتا ہے۔وزیراعظم نے چینی کمپنیوں کوپاکستان میں الیکڑک اور ہائبرڈ گاڑیوں کے پلانٹ لگانے کی بھی دعوت دی۔ وزیراعظم نے اجلاس میں چینی کمپنیوں کے تمام تر مسائل حل کرنے کی ہدایت بھی کی۔

وزیراعظم شہباز شریف نے ایس آئی ایف سی ایپکس کمیٹی کا اہم اجلاس کل طلب کر لیا ۔ تفصیلات کے مطابق اجلاس کل پی ایم ہاؤس میں دن ایک بجے ہو گا ، اجلاس میں اعلی عسکری اور سول قیادت شرکت کرے گی ،اجلاس میں وفاقی وزراء اور چیف سیکریٹریز بھی موجود ہوں گے ،اجلاس میں ایس آئی ایف سی ایگزیکٹو کمیٹی کے فیصلوں کی توثیق دی جائے گی ،اجلاس میں وزیر داخلہ کی جانب سے اینٹی سمگلنگ کارروائیوں پر بھی بریفنگ دی جائے گی ،وزیراعظم کا دورہ عرب امارات کے موقع پر 10 ارب ڈالرز کی سرمایہ کاری بارے پیش رفت پر اجلاس کو بریفنگ دی جائے گی ،اجلاس میں دوست مملک کی سرمایہ کاری پر رپورٹ پیش کی جائے گی ،اجلاس میں داخلی سیکیورٹی صورتحال پر بھی اجلاس کو آگاہ کیا جائے گا ، ایس آئی ایف سی ایپکس کمیٹی اجلاس میں اہم فیصلے متوقع ہے

12ایک ہفتےکے دوران مہنگائی کی شرح صفر اعشاریہ 34 فیصد کم ہوگئی ہے، جس کے بعد ہفتہ وار بنیادوں پر مہنگائی کی سالانہ شرح 21 اعشاریہ 31 فیصد پر آ گئی ہے۔گذشتہ ایک ہفتے کے دوران 18 اشیا سستی اور 12 مہنگی ہوئیں جبکہ 21 اشیا کی قیمتوں میں استحکام رہا۔ادارہ شماریات کی طرف سے جاری کردہ ہفتہ وار بنیادوں پر مہنگائی کی رپورٹ کے مطابق رواں ہفتے کے دوران لہسن کی فی کلو قیمت میں 43 روپے 46 پیسے، چکن کی فی کلو قیمت میں 20 روپے 21 پیسے، آٹے کا 20 کلو کا تھیلا مزید 88 روپے 89 پیسے، ایل پی جی کا گھریلو سلنڈر 93 روپے 12 پیسے سستا ہوا۔اسی طرح گزشتہ ایک ہفتے کے دوران پیاز کی فی کلو قیمت میں 1 روپے 97 پیسے اور انڈے فی درجن 3 روپے 53 پیسے سستے ہوئے۔ایک ہفتے کے دوران باسمتی چاول، دال مسور، مونگ اور ٹماٹر سستی ہونے والی اشیا میں شامل ہیں۔ایک ہفتے میں گائے کے گوشت کی فی کلو قیمت میں 4 روپے 62 پیسے، مٹن فی کلو 4 روپے 47 پیسے اور دہی فی کلو 1 روپے 23 پیسے مہنگا ہوا۔گرم مصالحہ، گڑ، چائے کی پتی اور سگریٹ مہنگی ہونے والی اشیا میں شامل ہیں۔رواں ہفتے کے دوران کوکنگ آئل، بجلی، پٹرولیم مصنوعات سمیت 21 اشیا کے دام مستحکم رہے۔

وزیراعظم محمد شہبازشریف کی جانب سے فلسطین میں نسل کشی کے خلاف دائر مقدمے پر عالمی عدالت انصاف کے فیصلے کا خیرمقدم کیا گیا ۔ وزیراعظم شہباز شریف کا کہنا ہے کہ اقوام متحدہ کی سلامتی کونسل اور عالمی برادری غزہ میں اسرائیلی آپریشن روکنے کے عالمی عدالت کے فیصلے پر فوری عمل کرائے۔ رفح میں آپریشن روکنے کے عالمی عدالت انصاف کے فیصلے پر عمل درآمد سے دنیا میں امن کی راہ ہموار ہوگی، مظلوم انسانیت کے حق میں فیصلہ دینے والے تیرہ ججوں اور پٹیشن دائر کرنے پر جنوبی افریقہ کو خراج تحسین پیش کرتے ہیں۔ انہوں نے کہا کہ پاکستان نے جنوبی افریقہ کی پٹیشن کی حمایت کی تھی، آئیندہ بھی تمام فلسطینیوں کا کیس لڑتے رہیں گے۔
شہباز شریف نے کہا کہ عدالتی فیصلے کے مطابق اقوام متحدہ کے تحقیقاتی کمیشن کو غزہ اور رفح میں فوری رسائی دی جائے۔ فیصلہ مظلوم انسانوں کی فتح ہے، فیصلے پر عمل درآمد کرایا جائے۔ راستے کھولنے، غذائی اورطبی امداد کی فوری فراہمی کے فیصلے پر عمل درآمد کرایا جائے تاکہ مظلوم انسانوں کوریلیف مل سکے ۔ پاکستان مظلوم فلسطینیوں کے بنیادی انسانی اور قانونی حقوق کے تحفظ کے لئے اپنا کردار ادا کرتا رہے گا ۔