Author: صدف ابرار

وزیراعظم شہبازشریف نے پاکستان اور یواے ای کی آئی ٹی کمپنوں کی شراکت داری سے متعلق راؤنڈ ٹیبل سیشن سے خطاب کرتے ہوئے کہا ہے کہ متحدہ عرب امارات سے قرض نہیں بلکہ مشترکہ سرمایہ کاری چاہتے ہیں۔تقریب کے دوران وزیر اعظم نے پاکستان میں کامیاب کاروبار کرنے والی اماراتی کمپنیوں کے سربراہان کو ایوارڈز دیے۔تقریب سے خطاب کرتے ہوئے انہوں نے کہا کہ ہمارے ملک کی آبادی کی اکثریت نوجوانوں پر مشتمل ہے جن کی عمریں 15 سے 30 برس کے درمیان ہیں۔
ان کا کہنا تھا کہ ہم حقیقت میں اپنی وزارت انفارمیشن ٹیکنالوجی کو ٹرانسفارم کرچکے ہیں، یہ صرف پہلا قدم ہے، طویل راستہ طے کرنا ہے، ہم یہاں ایک خاندان کی طرح یہاں بیٹھے ہیں، میں کہوں گا کہ یو اے ای کے صدر محمد بن زاہد اپنے والد کی طرح مشکل وقت میں پاکستان کی مدد کرنے میں بہت سخی رہے ہیں، اگر آپ مجھ سے پوچھیں تو ہم اور میں کبھی بھی ان کا مشکل وقت پاکستان کے لیے تعاون اور سخاوت کبھی بھول نہیں سکتا۔ان کا کہنا تھا کہ یہ راؤنڈ ٹیبل کانفرنس اس بات کی عکاس ہے کہ ہم ایک ساتھ مل کر کیا کیا حاصل کر سکتے ہیں، میں یہاں آکر اور اس سیشن کا حصہ بننے پر خوشی محسوس کر رہا ہوں۔شہباز شریف نے کہا کہ ہم اپنی معیشت کو تبدیل کرنے کے لیے تیار ہیں، ہم پاکستان کی معشیت کو یو اے ای میں موجود اپنے بھائیوں کے ساتھ مل کر تبدیل کرنے کے لیے پرعزم ہیں، یہ جوائنٹ وینچرز، باہمی تعاون اور نالج شیئرنگ پارٹنرشپ کے ذریعے ہوسکتا ہے۔
ان کا کہنا تھا کہ اب وقت بدل چکا، میں یہاں آیا ہوں، کئی میٹنگز ہوں گی، آج مجھے ان سے ملنے کا اعزاز بھی حاصل ہوگا، میں ان سے کہوں گا کہ آپ نے اپنے عظیم والد کی طرح ایک خاندان کے رکن کےطور پر، ایک بھائی کی طرح پاکستان کی مدد کی، لیکن آج میں آپ سے قرض مانگننے نہیں آیا بلکہ جوائنٹ کولیبریشن مانگنے آیا ہوں، مشترکہ سرمایہ کاری طلب کرنے آیا ہوں، جس کے باہمی فوائد ہوں گے۔وزیراعظم متحدہ عرب امارات کے ایک روزہ دورہ پر ابو ظہبی پہنچے ہیں، ابو ظہبی پہنچنے پر نائب صدر و نائب وزیراعظم شیخ منصور بن زیدالنہیان نے وزیراعظم کا پرتپاک استقبال کیا۔

اس حوالے سے ترجمان دفتر خارجہ کی جانب سے جاری کی جانے والی پریس ریلیز کے مطابق وزارت عظمیٰ سنبھالنے کے بعد وزیراعظم شہباز شریف کا یہ پہلا یو اے ای کا دورہ ہے۔ترجمان دفتر خارجہ کا کہنا ہے کہ وزیراعظم کے ساتھ کابینہ کے اہم وزرا پر مشتمل ایک اعلیٰ سطح کا وفد بھی موجود ہے جس میں نائب وزیراعظم و وزیر خارجہ اسحٰق ڈار، وزیر دفاع خواجہ آصف، وزیر داخلہ محسن نقوی، وفاقی وزیر اطلاعات عطا تارڑ ، وزیر تجارت جام کمال خان اور وزیر اعظم کے معاون خصوصی طارق فاطمی شامل ہیں۔
دورے کے وزیراعظم کی متحدہ عرب امارات کے صدر اور ابوظہبی کے حکمران شیخ محمد بن زاید سے ملاقات متوقع ہے جبکہ ملاقات میں متحدہ عرب امارات اور پاکستان کے مابین تعاون پر گفتگو ہوگی۔دورہ یو اے ای کے دوران اماراتی کاروباری برادری اور مالیاتی اداروں کے سربراہان سے ملاقاتوں کا بھی امکان ہے۔ملاقاتوں کے دوران وزیراعظم تجارت اور سرمایہ کاری سمیت دو طرفہ تعلقات پر تبادلہ خیال کریں گے۔ترجمان نے مزید کہا کہ پاکستان اور متحدہ عرب امارات کے درمیان دیرینہ برادرانہ تعلقات ہیں، وزیراعظم شہباز شریف کا دورہ کثیرالجہتی تعاون کو مزید مضبوط کرنے کی جانب اہم قدم ہے۔خیال رہے کہ وزیراعظم شہباز شریف نے گزشتہ روز ایرانی صدر ابراہیم رئیسی، وزیر خارجہ حسین امیر عبد اللہیان و دیگر حکام کی ہیلی کاپٹر حادثے میں موت پر ایران کے شہر تہران میں تعزیتی تقریب میں شرکت کی تھی۔
ترجمان دفتر خارجہ کے مطابق شہباز شریف کے ہمراہ نائب وزیراعظم و وزیر خارجہ اسحٰق ڈار، وفاقی وزیر داخلہ سید محسن رضا نقوی، وفاقی وزیر اطلاعات و نشریات عطا اللہ تارڑ اور وزیر اعظم کے معاون خصوصی طارق فاطمی بھی تھے۔

اپوزیشن لیڈر عمر ایوب نے اڈیالہ جیل کے باہر میڈیا سے گفتگو کرتے ہوئے کہا کہ بانی پی ٹی آئی عمران خان سے جیل میں ملاقات ہوئی، ان سے ملاقات بڑے اچھے ماحول میں ہوئی، ہم مطالبہ کرتے ہیں کہ ان کو جلد از جلد جیل سے باہر نکالا جائے۔اپوزیشن لیڈر عمر ایوب نے کہا کہ ہمارے ساتھیوں پر ظلم و جبر کے پہاڑ ڈھائے جارہے ہیں، عمران خان نے کہا ہے کہ کسی کو بھی غائب کیا گیا تو شدید احتجاج کریں گے، اسمبلی کے اندر بھی اور اسمبلی کے باہر سڑکوں پر بھی احتجاج کریں گے۔انہوں نے کہا کہ جلسوں کی تحریک جاری رکھیں گے، اتحادیوں کے ساتھ مل کر احتجاج کرتے رہیں گے۔ بانی پی ٹی آئی عمران خان جب بھی کال کریں گے شدید احتجاج کیا جائے گا، تحریک تحفظ آئین کے تحت ہمارے جلسے ہوتے رہیں گے۔

عمر ایوب نے کہا کہ عمران خان نے ہدایت کی ہے کہ حماد اظہر، میاں اسلم قانونی کارروائی کے بعد پارٹی کو لیڈ کریں گے، حماد اظہر، میاں اسلم سے کوئی بیان دلوایا گیا تو ہم نہیں مانیں گے۔اپوزیشن لیڈر کا کہنا تھا کہ ملکی معیشت کی کشتی ڈوب رہی ہے، پاکستان کی معیشت ڈگمگا رہی ہے، کسانوں کی تیار فصل نہیں خریدی جا رہی ہیں، اس وقت ہمیں قومی یکجہتی کی ضرورت ہے۔انہوں نے عمران خان سے ملاقات کے دوران انتظامیہ کے غیر منصفانہ سلوک کا ذکر کرتے ہوئے کہا کہ اسی اڈیالہ جیل میں نوازشریف سے دن بھر لوگ ملاقاتیں کرتے تھے، بانی پی ٹی آئی سے 20سے 25 منٹ سے زیادہ ملاقات نہیں کرنے دیتے۔

موبائل کمپنیوں کی جانب سے فیڈرل بورڈ آف ریونیو (ایف بی آر) کی ہدایات پر نان فائلرز کی موبائل سمیں بند کرنے کا سلسلے جاری ہے۔ ترجمان ایف بی آرنے بتایا ہے کہ 22 مئی تک 11 ہزار 252 سمز بلاک کی جا چکی ہیں۔ایف بی آر کے ترجمان کے مطابق موبائل سمیں انکم ٹیکس جنرل آرڈر کے تحت بند کی گئی ہیں۔ایف بی آر کے ترجمان نے یہ بھی بتایا ہے کہ ایف بی آر ٹیکس کمپلائنس اور ٹیکس کلچر کے فروغ کےلیے پُر عزم ہے۔فیڈرل بورڈ آف ریونیو کے مطابق نان فائلرز سم کی بندش سے بچنے کے لیے فوری طور پر انکم ٹیکس گوشوارے جمع کرائیں۔ایف بی آر کے مطابق انکم ٹیکس آرڈیننس کے تحت 2023ء کے انکم ٹیکس گوشوارے جمع نہ کروانے والے افراد کے خلاف کارروائی کی جا رہی ہے۔علاوہ ازیں گزشتہ روز اسلام آباد ہائیکورٹ میں سماعت کے دوران چیف جسٹس عامر فاروق نے واضح کیا کہ تھا کہ عدالت نے سمز بند کرنے پر حکم امتناع نہیں دیا حکومت کا یہ آرڈر اب بھی برقرار ہے۔

رؤف حسن کے چہرے پر زخم آہنی مکا لگنے سے آیا، انہوں نے ابتدائی طبی امداد پی اے ایف اسپتال سے لی۔پاکستان تحریک انصاف کے رہنما رؤف حسن کی میڈیکل رپورٹ اسلام آباد پولیس کو موصول ہوگئی۔ذرائع کے مطابق سرکاری میڈیکل رپورٹ میں زخم کی گہرائی نہیں بتائی گئی، زخم پر ٹانکے لگے ہونے کی وجہ سے زخم کی گہرائی کا تعین نہیں کیا جاسکا۔ذرائع کا کہنا ہے کہ موقع سے ملنے والا بلیڈ فارنزک اور فنگر پرنٹس کی شناخت کیلئے لاہور بھجوا دیا ہے، حملے کی جگہ کی سی سی ٹی فوٹیجز بھی فارنزک کے لیے ایف آئی اے کو بھجوا دی گئی ہیں۔ذرائع کے مطابق حملہ آوروں کے چہروں کی شناخت کے لیے فوٹیجز آج نادرا کو بھجوائی جائیں گی، اسلام آباد پولیس حملہ آوروں کی شناخت کیلئے تمام خواجہ سراؤں سے تحقیقات کر رہی ہے۔ذرائع کا کہنا ہے کہ حملے کی تحقیقات کے لیے جیو فینسنگ بھی کی جارہی ہے۔

احتساب عدالت اسلام آباد میں سابق وزیر اعظم راجا پرویز اشرف و دیگر کے خلاف رینٹل پاور کیس کی سماعت کے دوران عدالت نےملزمان کی غیر حاضری پر برہمی کا اظہار کردیا۔احتساب عدالت اسلام آباد میں سابق وزیراعظم راجا پرویز اشرف کے خلاف رینٹل پاور ریفرنس پر سماعت کی۔ نیب پراسیکیوٹر خواجہ منظور، وکیل صفائی ارشدتبریز احتساب عدالت پیش ہوئے۔وکیل ارشدتبریز نے کہا کہ راجا پرویز اشرف کی جانب سے درخواست استثنا دائر کروں گا۔جس پر احتساب عدالت نے اظہار برہمی کرتے ہوئے کہا کہ دیگر ملزمان کہاں ہیں؟ وکیل نہ ملزمان پیش ہوئے؟ گواہ پیش ہوا ہے تو ملزمان یا وکیل کو بھی پیش ہونا چاہیے۔غیرحاضر ملزمان کی ضمانتیں خارج کردوں گا، جیل میں ڈال دوں گا، ملزمان کے وکلاء کے آنے کا تھوڑا سا انتظار کرلیتے ہیں۔احتساب عدالت نے ملزمان کی لسٹ طلب کرتے ہوئے سماعت میں کچھ دیر وقفہ کردیا،سماعت کے دوبارہ آغاز پر 2 غیر حاضر ہونے والے ملزمان عدالت کے روبرو پیش ہوگئے، احتساب عدالت میں ریفرنس میں ایک گواہ کا بیان بھی قلمبند کرلیا گیا۔
بعد ازاں عدالت نے کیس کی مزید سماعت 29 مئی تک ملتوی کردی۔
واضح رہے کہ راجا پرویز اشرف سمیت دیگر ملزمان پر قومی خزانے کو 75 لاکھ روپے کا نقصان پہنچانے کا الزام عائد کیا گیا تھا۔قومی احتساب بیورو (نیب) نے الزام عائد کیا تھا کہ یہ رقم ٹھیکیدار کو پروسیسنگ فیس کے طور پر ادا کی گئی تھی یہاں تک کہ اس منصوبے کے لیے مشینری اور آلات کو منتقل تک نہیں کیا گیا تھا۔یہ بات یاد رہے کہ سندھ کے علاقے نوڈیرو میں قائم رینٹل پاور پروجیکٹ کا معاہدہ 4 مارچ 2010 کو کیا گیا تھا۔