Author: صدف ابرار

نیپرا نے امتحانات کے دوران لوڈشیڈنگ کا نوٹس لے لیا۔ کے الیکٹرک سمیت تمام ڈسکوز کو ہدایات جاری کر دیں ۔نیپرا اعلامیہ کے مطابق پرنٹ میڈیا، الیکٹرانک میڈیا سمیت مختلف چینلزسے شکایات بھی موصول ہوئیں۔اعلامیہ میں کہاگیا کہ پتہ چلا کہ امتحانی سیشنز کے دوران تقسیم کار کمپنیاں لوڈ شیڈنگ کر رہی ہیں۔ تقسیم کار کمپنیوں کو ہدایت کی جاتی ہے کہ وہ لوڈ شیڈنگ کی تمام سرگرمیوں، خاص طور پر امتحانی پرچوں کی مدت کے دوران دوبارہ دیکھیں۔نیپرا کی طرف سے ہدایت کی گئی ہے کہ بجلی صارفین کے لیے بلاتعطل بجلی کی فراہمی کو برقرار رکھا جائے۔

اعلامیے کے مطابق اجلاس میں وزارت نجکاری کی طرف سے مرحلہ وار نجکاری پروگرام پیش کیا گیا۔ کمیٹی نے کہا کہ خسارے میں چلنے والے اداروں کی نجکاری کو ترجیح دی جائے گی، حکومت کا دائرہ کار اسٹریٹجک اور ضروری ریاستی ملکیتی اداروں تک محدود ہوگا، منافع بخش اداروں کی نجکاری پر بھی غور کیا جائے گا۔نائب وزیراعظم و وزیر خارجہ اسحاق ڈار کی زیر صدارت نجکاری کمیٹی کے اجلاس میں نجکاری پروگرام کیلئے 24 اداروں کی منظوری دے دی گئی۔
اجلاس میں پاکستان کے ریاستی انتظام میں چلنے والے کاروباری اداروں (ایس او ایز) 84 ایس او ایز کی نجکاری پر تفصیلی غور کیا گیا، اسٹریٹجک اور ضروری ایس او ایز کی درجہ بندی کی جائے گی، کمیٹی نے کہا کہ اگلی میٹنگ میں مرحلہ وار نجکاری پروگرام کو حتمی شکل دی جائے، آئل اینڈ گیس ڈویلپمنٹ کمپنی لمیٹڈ (او جی ڈی سی ایل) کے شیئر وزارت توانائی کو منتقل کرنے کی تجویز پر بھی غور کیا گیا۔نجکاری کمیٹی نے معاملے پر وزارت قانون کو جائزہ لینے کی ہدایت کردی، جبکہ اجلاس میں یہ بھی کہا گیا کہ وزارت قانون اگلے کمیٹی اجلاس میں اپنی سفارشات پیش کرے۔

کابینہ نے سید جنید اخلاق کو قائم مقام چیئرمین وفاقی تعلیمی بورڈ تعینات کرنے کی منظوری دیدی ۔نوٹیفکیشن کے مطابق سید جنید اخلاق کو چیئرمین فیڈرل بورڈ کا اضافی چارج دیا گیا ہے۔چیئرمین وفاقی تعلیمی بورڈ قیصر عالم کو عہدے سے ہٹا دیا گیا ہے۔دوسری جانب پنجاب کریکلم اینڈ ٹیکسٹ بک بورڈ کا ادارہ ختم کرنے کا فیصلہ کر لیا گیا۔ذرائع پی سی ٹی بی بی کا کہنا تھا کہ تعلیم کے چار مختلف اداروں کو ایک کردیا جائے گا، پنجاب ٹیکسٹ بک بورڈ، پنجاب ایجوکیشن کمیشن، اساتذہ کی ٹریننگ کو ایک ادارے میں ضم کردیا جائے گا اور نصاب بنانے کا ادارہ بھی ضم کردیا جائے گا۔

ذرائع نے بتایا کہ وزیراعلی پنجاب محکمے کی سربراہ ہوں گی،وزیر تعلیم محکمے کے وائس چئیرپرسن ہوں گے، نصابی امور میں نجی اداروں کے لوگ بھی محکمے میں شامل کئے جائیں گے۔صوبائی وزیر تعلیم رانا سکندر حیات کا کہنا تھا کہ رواں سال بجٹ سے پہلے ایک ادارہ تشکیل دے دیں گے، کتاب بنانے والا پہلے استاد سے مشاورت کرے گا۔امتحان بنانے والا، چیک کرنے والا بھی اساتذہ اور طلبا کو نظر میں رکھے گا۔رانا سکندر حیات کا مزید کہنا تھا کہ کتاب بنانے والے کو پتا نہیں استاد کیا پڑھاسکتا ہے۔امتحان بنانے والے کو پتا نہیں پڑھایا کیسے گیا، استاد جو پڑھاتا نہیں وہ نصاب میں شامل ہے، الگ محکمے ہونے کی وجہ سے نقل اور فیل طلبا کی تعداد بڑھی۔

پاکستان تحریک انصاف کے رہنما ور رکن قومی اسمبلی اسد قیصر کا کہنا ہے کہ وفاق خیبرپختونخواکواس کے بقایاجات نہیں دے رہا، یہ عوامی مینڈیٹ کی توہین ہے،ہم قومی اسمبلی میں آواز اٹھائے گے ،رکن قومی اسمبلی آصف خان کے گھر پر پریس کانفرنس کرتے ہوئے پی ٹی آئی سیاسی کمیٹی کے سربراہ سابق سپیکر قومی اسمبلی اسد قیصر کا کہناتھا کہ گزشتہ دنوں ناخوشگوار واقعہ کی مذمت کرتے ہیں،کسی کواجازت نہیں کہ کسی کودھمکائے،جعلی طورپر منتخب آدمی کیسے دھمکیاں دے رہاہے، قانونی کارروائی ہوگی،یہ کارروائی پوری پی ٹی آئی کے ساتھ ہے،ان کاکہناتھا کہ خطے میں نئی جنگ چھڑگئی ہے، پختون ہمیشہ پرائی جنگوں کا ایندھن بنے،پہلے افغان جنگ اورپھر دہشت گردی کے خلاف جنگ ہوئی،اس وقت افغانستان ، ایران اور بھارت کےساتھ تعلقات خراب ہیں،مزید جنگوں کاایندھن نہیں بننا چاہتے ایسا ہواتو ہم اٹھ کھڑے ہونگے۔
اسد قیصر کا کہناتھا کہ افغانستان کےساتھ تجارت ٹھپ ہوکررہ گئی ہے،پختون کیاکریں کیابھوکوں مرجائیں،پی ٹی آئی حکومت میں افغانستان کے ساتھ تجارت کے نئے راستے کھولے،ہم تعلیم،روزگار اورامن چاہتے ہیں،ہمیں خیبرپختونخوامیں مینڈیٹ ملالیکن فنڈزنہیں دے رہے،قبائلی علاقوں کاانضمام ہوا لیکن فنڈز ضم اضلاع کونہیں مل رہے،مرکز صوبہ کواس بقایاجات بھی نہیں دے رہا، یہ عوامی مینڈیٹ کی توہین ہے،ہم قومی اسمبلی میں یہ ایشو اٹھائیں گے۔پی ٹی آئی رہنما نے کہاکہ نوازشریف ووٹ کوعزت دینے بات کرتے تھے تواب عزت دیں،ہم جیواورجینے دوکی پالیسی مانتے ہیں نہ مداخلت کرتے ہیں نہ کرنے دینگے،ہم ملک بھرمیں جلسے جلوس کریں گے،مرکز کے خلاف مالی وسائل کے حصول کیلئے عدالت جاناہوگا،ان کاکہنا تھا کہ کوئی مذاکرات نہیں ہورہے وہ تو منتخب پارلیمنٹ سے ہوسکتے ہیں،ان سے کوئی مفاہمت نہیں ہوگی بلکہ ان کے خلاف کھڑے رہیں گے۔

برطانوی ہائی کمیشن کے زیر اہتمام یوکے پاکستان گرین انویسٹمنٹ فورم سے خطاب کرتے ہوئے وفاقی وزیر خزانہ محمد اورنگزیب نے کہا کہ پاکستان میں موسمیاتی تبدیلیاں زرعی پیداوار کو متاثر کر رہی ہیں، سیلاب، طوفان اور ہیٹ ویو جیسے خطرات پیدا ہو رہے ہیں۔ان کاکہنا تھا کہ موسمیاتی خطرات پر عالمی بینک نے حال ہی میں ایک سٹڈی کی، سٹڈی میں موسمیاتی خطرات کے ممکنہ نقصانات بتائے گئے ہیں۔ وفاقی وزیر خزانہ محمد اورنگزیب کاکہنا ہے کہ پاکستان میں موسمیاتی تبدیلیاں زرعی پیداوار کو متاثر کر رہی ہیں، سیلاب، طوفان اور ہیٹ ویو جیسے خطرات پیدا ہو رہے ہیں۔
ان کاکہنا تھا کہ خطرات سے جی ڈی پی کے ایک فیصد نقصانات کا تخمینہ لگایا گیا۔ وفاقی وزیر خزانہ نے کہا کہ حکومت پائیدار ترقیاتی منصوبوں کی مالی اعانت کا ارادہ رکھتی ہے، دسمبر تک گھریلو گرین سکوک بانڈز جاری کرنے پر کام کررہے ہیں، گزشتہ 10 ماہ میں میکرو اکنامک اشاریوں میں نمایاں بہتری آئی۔انہوں نے مزید کہاکہ افراط زر میں بہتری، زرعی شعبے میں نمو ریکارڈ کی جارہی ہے، زرمبادلہ کے ذخائر میں اضافہ، سٹاک مارکیٹ میں اضافے کا ہے۔ وزیر خزانہ نے کہا کہ آئی ایم ایف کے ساتھ 9 ماہ کا معاہدہ کامیابی سے تکمیل کو پہنچا، پاکستان آئی ایم ایف کے ساتھ ایک پروگرام کرنے کا ارادہ رکھتا ہے۔

پاکستان پیپلز پارٹی نے وفاقی کابینہ میں شامل نہ ہونے کا فیصلہ کیا ہے۔ذرائع پیپلزپارٹی کا کہنا ہے کہ بجٹ سے قبل اور بجٹ کے بعد بھی وفاقی کابینہ میں پیپلزپارٹی شامل نہیں ہوگی،وزیر اعظم شہباز شریف اور چیئرمین بلاول بھٹو زرداری کی ملاقات میں وزارتوں کا کوئی ذکر نہیں،ذرائع کا مزید کہنا ہے کہ بلاول بھٹو زرداری نے شہباز شریف سے کابینہ میں شمولیت کی بات تک نہیں کی،ذرائع کاکہناہے کہ ہم پنجاب اور وفاق میں کوئی وزارتیں نہیں لے رہے،بلاول بھٹو زرداری نے شہباز شریف ملاقات میں گندم کی خریداری لازمی کرنے پر زور دیا۔

سولر پینل کی قیمتوں میں مزید کمی آگئی اپریل میں سولر پینل کی قیمت 40 روپے فی واٹ تک آگئی تھی جس میں اب مزید کمی ہوئی ہے۔دو سال قبل 80 روپے فی واٹ میں ملنے والی سولر پینل پلیٹ اب 37 روپے میں دستیاب ہے، 5 کلو واٹ سولر سسٹم کی قیمت 2022 کے مقابلے میں 2 لاکھ 15 ہزار جبکہ 10 کلو واٹ سسٹم کی قیمت 4 لاکھ30 ہزار روپے تک گر گئی ہے۔یعنی 180 واٹ کا پینل چھ ہزار چھ سو ساٹھ (6660) روپے میں دستیاب ہے البتہ سولر سسٹم لگوانے کیلئے استعمال کیے جانے والے انورٹرز اور بیٹریز کی قیمت میں کوئی کمی نہیں دیکھی گئیسولر پینل ڈیلرز کا کہنا ہے کہ سپلائی زیادہ ہونے کی وجہ سے سولر پینل کے ریٹس کم ہوئے ہیں اور صرف 6 ماہ میں ہی سولر پینل کی قیمتیں 30 فیصد نیچے آچکی ہیں۔سولر پینل ڈیلرز کا یہ بھی کہنا ہے کہ آنے والے وقت میں ان پینلز کی قیمتیں مزید گر سکتی ہیں۔
اس کی وجہ یہ ہے کہ یورپ میں بڑے پیمانے پر شمسی توانائی کے استعمال کا منصوبہ بنایا گیا تھا۔یورپی حکام کا خیال تھا کہ پینل بھی یورپ میں ہی تیار کیے جائیں گے لیکن چینی کمپنیوں نے بہت بڑے پیمانے پر سولر پینلز تیار کر کے مارکیٹ میں پہنچا دیئے۔ اس کے نتیجے میں سولر پینلز کی قیمتیں گرنے لگیں جو مسلسل گر رہی ہیں۔
سولر پینل مزید سستے بھی ہو سکتے ہیں کیونکہ مارکیٹ خراب ہونے کے بعد یورپ نے اپنے یہاں شمسی توانائی کے استعمال پر سبسڈی دینے کا منصوبہ ترک کر دیا ہے۔ اس کے نتیجے میں سولر پینل بنانے والی مقامی صنعت بالکل بیٹھ گئی ہے اور مارکیٹ میں صرف چینی سولر پینل ہی دستیاب ہیں۔سولر پینل سستے ہونے سے لوگوں کو تو ریلیف ملے گا مگر سولر پینل تیار کرنے والی پاکستانی کمپنیاں نقصان میں چلی جائیں گی۔