Author: صدف ابرار

محکمہ موسمیات کے ماہر ڈاکٹر محمد حنیف بتایا اگلے ہفتے میدانی علاقوں میں شدید گرمی کا آغاز ہوگا،مئی کےتیسرے ہفتے سے پنجاب میں آندھی اور بارشیں شروع ہونگی۔ڈاکٹر محمد حنیف نے سندھ اور پنجاب کے کاشتکاروں کو چاول کی بھرپور کاشت کرنے کا مشورہ دیا۔دوسری جانب ملک کے بیشتر شہروں میں موسم خشک جبکہ وسطی اور جنوبی علاقوں میں گرم رہنے کا امکان ہے۔ محکمہ موسمیات نے آج بالائی خیبرپختونخوا، گلگت بلتستان اور کشمیر کے چند مقامات پر بارش کا امکان ظاہر کیا ہے۔کراچی میں بھی آئندہ 24 گھنٹوں کے دوران موسم گرم اور خشک رہنے کا امکان ہے، زیادہ سے زیادہ درجہ حرارت 34 سے36 ڈگری سینٹی گریڈ تک رہنے کا امکان ہے۔محکمہ موسمیات کے مطابق شہر قائد میں اگلے گھنٹوں میں 40 سے 45 کلو میٹر فی گھنٹہ کی رفتار سے ہوائیں چلنے کا امکان ہے۔محکمہ موسمیات نے بتایا کہ گزشتہ روز ملک میں سب سے زیادہ درجہ حرارت نواب شاہ میں 42 ڈگری سینٹی گریڈ ریکارڈ کیا گیا۔

وفاقی وزیرِ پیٹرولیم مصدق ملک کا کہنا ہے کہ ہم چاہتے ہیں کہ ملک میں نا امیدی کا کلچر ختم ہو، ہم نے ملک کی ترقی کے لیے دن رات کوشاں رہنا ہے۔
پاکستان اب مدد نہیں کاروبار پر توجہ دے رہا ہے، ہم مدد نہیں تجارت اور کاروبار چاہتے ہیں۔وفاقی وزراء کے ہمراہ میڈیا سے گفتگو کرتے ہوئے وفاقی وزیرِ پیٹرولیم مصدق ملک نے کہا کہ سعودی تجارتی وفد پاکستان کے اہم دورے پر ہے، پاکستان اور سعودی عرب کے مابین گزشتہ چند ہفتوں میں اہم تجارتی دورے اور گفتگو ہوئی۔ان کا کہنا ہے کہ پاکستانی سرمایہ کاروں کو بھی تجارت میں اپنا حصہ ڈالنے کا موقع ملے گا، پاکستان سعودی وژن 2030ء کے لیے بھی کردار ادا کرے گا، سعودی عرب کی سرمایہ کاری سے نوجوانوں کو روزگار کے مواقع میسر آئیں گے۔
وفاقی وزیرِ پیٹرولیم مصدق ملک نے بتایا کہ سعودی کمپنیوں کے ساتھ ایک ایک کوآرڈینیٹر منسلک کیا گیا ہے،انہوں نے کہا کہ ملک کے مختلف حصوں میں چھوٹے اور بڑے کاروبار کا جال بچھے گا، پہلے حکومت سے حکومت کے درمیان معاہدے ہوئے، اب بزنس سے بزنس کے معاہدے ہوں گے۔وفاقی وزیرِ پیٹرولیم مصدق ملک کا کہنا ہے کہ ہم پاکستان کی معیشت کی مضبوطی کے ایجنڈے پر گامزن ہیں، حکومت نے پاکستان سے سرخ فیتے کے کلچر کے خاتمے کا عزم کیا ہے۔ان کا کہنا ہے کہ پاکستان کے ہنر مند افراد دنیا کی ترقی میں اپنا بہترین کردار ادا کر رہے ہیں، ہم ترقی، خوش حالی اور اعتدال پر مبنی معاشرے کی تشکیل چاہتے ہیں۔وفاقی وزیرِ پیٹرولیم مصدق ملک نے بتایا کہ ہمارے ملک کے نوجوان سعودی کمپنیوں کے ساتھ مل کر چھوٹے کاروبار شروع کریں گے، ہم نے ملک کی ترقی کے لیے دن رات کوشش کی۔انہوں نے یہ بھی بتایا ہے کہ آج سعودی عرب کے کاروباری افراد پاکستان میں ہیں اور پاکستانی کمپنیوں سے بات کر رہے ہیں۔

پی ٹی آئی سیاسی کمیٹی نے چیئرمین پبلک اکاؤنٹس کمیٹی (پی اے سی) کے لیے وقاص اکرم کے نام کی منظوری دے دی۔ذرائع کے مطابق سیاسی کمیٹی نے شیر افضل مروت کی جگہ شیخ وقاص اکرم کو چیئرمین پی اے سی بنانے کا فیصلہ کیا ہے۔ سیاسی کمیٹی شیر افضل مروت کا نام واپس لینے کے فیصلے سے بانی پی ٹی آئی کو آگاہ کرے گی، شیر افضل مروت کو ہٹانے کے لیے عمر ایوب اور شبلی فراز نے سیاسی کمیٹی کا اجلاس بلایا تھا۔ذرائع نے بتایا کہ سیاسی کمیٹی اجلاس میں شیر افضل مروت کا نام واپس لینے کے لیے ووٹنگ کرائی گئی، شیر افضل مروت کے حق میں اسد قیصر، شہریار آفریدی، شاندانہ گلزار اور ذلفی بخاری سامنے آئے جبکہ عمر ایوب اور شبلی فراز شیر افضل مروت کو ہٹانے کے لیے وقاص اکرم کا نام سامنے لائے۔اس سے قبل بانی پی ٹی آئی شیر افضل مروت کا نام چیئرمین پی اے سی کے لیے تجویز کر چکے ہیں۔دو روز قبل بیرسٹر گوہر علی نے بانی پی ٹی آئی کی جانب سے شیر افضل مروت کے نام تجویز کرنے کا اعلان کیا تھا۔اس حوالے سے شیر افضل مروت کا کہنا ہے کہ مجھے سیاسی کمیٹی اجلاس میں نہ مدعو کیا گیا نہ مشورہ ہوا۔

صوابی میں گھریلو ناچاکی پر شوہر نے بیوی کو قتل کر دیا ۔ افسوسناک واقعہ صوابی کے گاؤں جلبی میں پیش آیا جہاں گھریلو ناچاکی پر ملزم محمد نبی نامی شخص نے بیوی کو قتل کرنے کے بعد لاش کو ٹکڑے کرکے پھینک دیا ،تھانہ تورڈھیر پولیس نے لاش کے ٹکڑوں کو پوسٹ مارٹم کے لیے باچا خان میڈیکل کمپلیکس شاہ منصور منتقل کر دیا ہے۔
پولیس حکام کے مطابق قتل کے بعد ملزم فرار ہونے میں کامیاب ہو گیا۔ ملزم کی گرفتاری کے لیے چھاپے مارے جا رہے ہیں۔

نائب وزیراعظم اور وزیر خارجہ اسحاق ڈار نے اسلامی سربراہی کانفرنس کے اجلاس سےخطاب میں کہا کہ او آئی سی کے رکن ممالک فوری طور پر غزہ میں جنگ بندی کرائیں،پاکستان کو بیرونی سپانسرڈ دہشتگردی کا سامنا ہے۔نائب وزیراعظم اور وزیر خارجہ اسحاق ڈار کاکہنا ہےکہ او آئی سی کے رکن ممالک فوری طور پر غزہ میں جنگ بندی کرائیں،پاکستان کو بیرونی سپانسرڈ دہشتگردی کا سامنا ہے۔ان کاکہنا تھا کہ فلسطین کےشہریوں کو بلاتعطل غذا کی فراہمی یقینی بنائی جائے۔ او آئی سی عالمی اقتصادی ترقی میں اہم کردار ادا کرسکتی ہے۔ او آئی سی کو اقوام متحدہ کے ساتھ ملکر عالمی دہشتگردی کی روک تھام کیلئے کام کرناچاہیے اورتنازعات کے پھیلاؤ کو روکا جائے ۔اسحاق ڈارنے اسلامو فوبیا سے نمٹنے پر بھی زور دیا ۔ انہوں نے خود مختار فلسطینی ریاست، اقوام متحدہ میں اس کی مکمل رکنیت کیلئے حمایت کا اعادہ کیا۔اسحاق ڈار نے یہ بھی کہا کہ مقبوضہ جموں و کشمیر میں بھارت نہتے کشمیریوں پر مظالم ڈھا رہا ہے، او آئی سی جموں و کشمیر سے متعلق ایکشن پلان پرعملدرآمد کرے۔ان کا کہنا تھا کہ اسلامو فوبیا اور مسلمانوں کےخلاف امتیازی سلوک کی مذمت کرتے ہیں، او آئی سی کی جانب سے اسلامو فوبیا پر خصوصی ایلچی کی تقرری قابل ستائش ہے۔ ان کا مزید کہنا تھا کہ او آئی سی عالمی اقتصادی ترقی میں اہم کردار ادا کرسکتی ہے، اوآئی سی ممالک موسمیاتی تبدیلی جیسے چیلنجز سے نمٹنے کیلئے ملکر کام کریں۔