Author: صدف ابرار

مسلم لیگ ن کے رہنما حنیف عباسی اور سابق وزیراعظم انوارالحق کاکڑ ک ایک دورسرےپر الزامات کی بھر مار ،دونوں کے درمیان گندم اسکینڈل پر تلخ کلامی ہوئی۔
ذرائع کے مطابق دونوں رہنماؤں کے درمیان تلخ کلامی گزشتہ رات ایک نجی ہوٹل میں ہوئی اور ایک دوسرے پر الزامات لگائے گئے۔انوارالحق نے حنیف عباسی سے کہا کہ گندم معاملے پر آپ نے ہم پر انگلی اٹھائی ہے کیا گرفتار کرنے آئے ہیں؟ جس پر حنیف عباسی نے کہا کہ میں قسم کھاتا ہوں آپ چور ہو اور گندم اسکینڈل میں پیسےکھائےہیں۔حنیف عباسی نے کہا کہ میں نے پروگرام میں جو بھی گفتگو کی وہ بالکل درست تھی۔ جواب میں انوارالحق کاکڑ نے کہا کہ فارم 47 پر بات کی تو آپ اور ن لیگ کو منہ چھپانے کی جگہ نہیں ملےگی۔

وفاقی حکومت نے خیبرپختونخوا میں فیصل کریم کنڈی اور بلوچستان میں جعفر مندو خیل کو گورنر تعینات کرنے کا فیصلہ کرلیا۔وزیراعظم شہباز شریف سے پاکستان پیپلزپارٹی چیئرمین بلاول بھٹو زرداری کی ملاقات ہوئی جس میں پنجاب، بلوچستان اور خیبرپختونخوا کے نئے گورنرز کی تقرری کے معاملے پر تفصیلی گفتگو کی گئی۔وفاقی حکومت اور پیپلزپارٹی نے معاہدے کے تحت پنجاب میں سردار سلیم حیدر، خیبرپختونخوا میں فیصل کریم کنڈی اور بلوچستان میں جعفر مندو خیل کو گورنر تعینات کرنے کا فیصلہ کرلیا۔پنجاب، خیبر پختونخوا اور بلوچستان میں گورنرز کی تعنیاتی کے حوالے سے اہم پیشرفت سامنے آئی، پیپلز پارٹی اور مسلم لیگ ن نے پھر اپنے امیدوار تبدیل کرلیے۔بلاول بھٹو زرداری ملاقات کے لیے وزیر اعظم ہاؤس پہنچے تو شہباز شریف نے اُن کا استقبال کیا اور ظہرانہ بھی دیا۔دونوں رہنماؤں نے ملاقات میں ملکی سیاسی صورت حال پر تفصیلی بات چیت کی جبکہ گورنرز کی تقرری پر بھی مشاورت کی۔بلاول بھٹو زرداری نے بلوچستان، پنجاب اور خیبرپختونخوا کے لیے مختلف نام تجویز کیے جن میں سے 2 صوبوں میں پیش کیے گئے ناموں کی وزیراعظم نے منظوری دی۔

وزیراعظم شہباز شریف کی زیرصدارت سعودی عرب کی پاکستان میں سرمایہ کاری اور منصوبوں پر پیش رفت کے حوالے سے اعلی سطحی جائزہ اجلاس ہوا، جس میں وزیرِ اعظم نے اجلاس کو اپنے حالیہ دورہ سعودی عرب کے حوالے سے آگاہ کیا۔ سعودی وفد کی پاکستان کی کاروباری شخصیات سے ملاقاتوں سے متعلق وزیراعظم شہبازشریف نے ہدایت جاری کرتے ہوئے کہا کہ سعودی وفد کی بہترین مہمان نوازی کی جائے، امید ہے سعودی وفد کے ساتھ پاکستانی کاروباری شخصیات کی ملاقاتیں نتیجہ خیز ہوں گی۔انہوں نے کہا کہ پاکستان اور سعودی عرب کے مابین دیرینہ برادرانہ تعلقات ہیں جو دہائیوں پر محیط ہیں ، پاکستان خوش قسمت ہے جسے سعودی عرب جیسا خیر خواہ دوست میسر ہے۔وزیراعظم شہبازشریف نے اجلاس کو سعودی عرب کی جانب سے کاروباری شخصیات کے اعلیٰ سطحی وفد کے آئندہ چند روز میں دورہ پاکستان کے بارے میں آگاہ کیا۔وزیراعظم شہباز شریف نے کہا ہے کہ پاکستان کی ترقی و خوشحالی کے لیے اقدامات پر سعودی قیادت کے شکر گزار ہیں۔اس موقع پر وزیراعظم شہباز شریف نے کہا کہ پاکستان کی ترقی و خوشحالی کے لیے اقدامات پر سعودی قیادت کے شکر گزار ہیں، سعودی قیادت کی پاکستان کی ترقی و خوشحالی کے لیے معاونت کی پیشکش خوش آئند ہے۔شہباز شریف کا کہنا تھا کہ پاکستان خوش قسمت ہے جسے سعودی عرب جیسا خیر خواہ دوست میسر ہے، سعودی فرمانروا اور ولی عہد یہاں سرمایہ کاری میں گہری دلچسپی رکھتے ہیں، وہ پاکستان کی ترقی و خوشحالی میں بھی دلچسپی رکھتے ہیں۔

وفاقی حکومت نے نیشنل سائبرکرائم انویسٹی گیشن ایجنسی بنادی ہے۔ سائبر کرائم انویسٹی گیشن ایجنسی انٹرنیٹ اور سوشل میڈیا پر ہونے والے کرائم سے نمٹنے کیلئے بنائی گئی ہے۔تجویز شدہ قانون کے مطابق ایف آئی اے سائبر ونگ کےتمام ملازمین ایک سال کیلئے نئی ایجنسی میں کام کرینگے۔نئی ایجنسی پیکا قانون کے تحت کام کریگی۔سائبرکرائم سے متعلق کیسز، انکوائریاں ایف آئی اے سے ایجنسی کو منتقل ہو جائینگے ۔ مجوزہ قانون میں بتایا گیا ہے کہ سائبر کرائم ایجنسی کا ڈی جی اکیس یا بائیس گریڈ کا افسر ہوگا۔مجوزہ قانون کے مطابق ڈی جی سائبر کرائم ایجنسی کا تقرر 2سال کےلئے ہوگا،ڈی جی سائبر کرائم ایجنسی کو آئی جی پولیس کے اختیارات حاصل ہونگے۔سائبر ایجنسی یو کے اور امریکا کی طرز کی سائبر کرائم ایجنسی بنائی گئی ہے۔سرکاری نیشنل سائبرکرائم انویسٹگیشن ایجنسی بل جلد پارلیمان میں پیش کردیاجائے گا۔

وزیراعظم شہبازشریف نے ایک بار پھر بلاول بھٹو کو مل کر آگے بڑھنے پر زور دیا ہے جبکہ شہباز شریف نے بلاول بھٹو کو حکومت کا حصہ بننے کی پیشکش بھی کی ہے ، ملاقات میں ملکی سیاسی صورتحال پر تفصیلی بات چیت ہوئی، وزیر اعظم شہباز شریف اور بلاول بھٹو زرداری کے درمیان گورنر کی تقرری پر مشاورت ہوئی، بلاول بھٹو زرداری نے پنجاب اور خیبرپختونخوا کے لئے مختلف نام تجویز کئے، وزیراعظم نے دونوں نام جلد اپنی ایڈوائس کے ساتھ صدر کو بھجوانے کی یقین دہانی کروائی ۔

صدر مملکت آصف زرداری نے ٹیکس قوانین ترمیمی بل 2024 کی منظوری دے دی۔ ترمیمی بل کا مقصد ٹیکسوں اور ڈیوٹیز سے متعلق قوانین میں ترامیم لانا ہے۔ سیلز ٹیکس ایکٹ 1990 کے سیکشن 30 ڈی ڈی ڈی، 43 ،45 بی، 46 اور47 میں ترامیم کی گئی ہیں۔وفاقی ایکسائز ایکٹ 2005 کے سیکشن 29، 33، 34 اور 38 میں بھی ترامیم کی گئی ہیں۔ انکم ٹیکس آرڈیننس2001 کے سیکشن 122 اے، 124، 126 اے، 130، 131، 132، 133 اور 134 اے میں ترامیم کی گئی ہیں۔ ٹیکس قوانین ترمیمی بل 2024 قومی اسمبلی سے 29 اپریل 2024 کو پاس ہوا تھا۔ صدر مملکت نے ترمیمی بل کی منظوری وزیرِاعظم کی ایڈوائس پر دی۔ ترمیمی بل میں سیلز ٹیکس ایکٹ 1990 کی 5 دفعات میں ترامیم کی گئی ہیں۔وفاقی ایکسائز ایکٹ 2005 کی 4 دفعات میں ترامیم کی گئی ہیں جبکہ انکم ٹیکس آرڈیننس 2001 کی 8 دفعات میں ترامیم کی گئی ہیں۔واضح رہے کہ ٹیکس قوانین ترمیمی بل 2024 قومی اسمبلی سے 29 اپریل کو منظور ہوا تھا۔

راولپنڈی میں میڈیا سے گفتگو کرتے ہوئے علی محمد خان نے کہا کہ دھاندلی زدہ انتخابات پر بات کرنی ہے تو آئیں ہم تیار ہیں، حکومت مسائل کا حل چاہتی ہے تو پی ٹی آئی کا مینڈیٹ واپس کرے۔پاکستان تحریک انصاف (پی ٹی آئی) کے رہنما علی محمد خان کا کہنا ہے کہ پی ٹی آئی سیاسی سمیت دیگر قوتوں کے ساتھ مذاکرات کیلئے تیار ہے، ہماری پارٹی کو سیاست کرنے دی جائے ہم سب سے بڑی جماعت ہیں۔علی محمد خان نے کہا کہ ایک طویل انتظار کے بعد بانی پی ٹی آئی سے ملاقات ہوئی، بانی پی ٹی آئی کے ساتھ کھڑے رہنے والوں کو مسائل سہنے پڑ رہے ہیں، کسی سے بھی بات کرنے کیلئے تیار ہیں، ڈیل اور مذاکرات میں فرق ہے، ہم نے کسی سے ڈیل نہیں کرنی، ہمارے مذاکرات بانی پی ٹی آئی اور دیگر اسیران کی رہائی کیلئے ہوں گے، بانی پی ٹی آئی سے مذاکرات کیلئے دلوں سے بغض نکالنا ہوگا۔
پی ٹی آئی رہنما نے کہا کہ الیکشن کمیشن کو پی ٹی آئی کا مینڈیٹ واپس کرنا پڑے گا، چیف جسٹس سے گزارش ہے الیکشن کروانا اہم نہیں صاف و شفاف الیکشن اہم تھے، چیف جسٹس سے درخواست ہے اس دھاندلی زدہ الیکشن پر ازخود نوٹس لیں۔ علی محمد نے کہا کہ بانی پی ٹی آئی سابق وزیر اعظم ہیں ان کے تحفظات ہیں، ان کے خلاف القادر ٹرسٹ سمیت تمام کیسز جعلی ہیں، عدت کے کیس کا ذکر کرتے ہی شرم محسوس ہوتی ہے۔