Author: صدف ابرار

وفاقی وزیر قانون اعظم نذیرتارڑ کاکہنا ہے کہ وزیراعلیٰ خیبرپختونخوا علی امین گنڈا پور کے دھمکیوں سے صاف ظاہر ہے کہ 9 مئی کے واقع میں کون ملوث تھا، انہوں نے کہا کہ اسلام آباد پرقبضے کی بات پہلی بار نہیں کی۔وفاقی وزیرقانون اعظم نذیرتارڑ کا صحافیوں سے گفتگو کرتے ہوئے کہنا تھا کہ تحریک انصاف کی دھمکیوں کا نتیجہ عوام پہلے بھی عوام کے سامنے ہے۔عدالتی معاملات کو عدالت اور سیاسی معاملات کو ڈائیلاگ سے حل کرنے چاہئیں۔طاقت کی دھمکیوں سے نہ کسی کو فائدہ ہوا ہے اور نہ ہی ہوگا۔پی ٹی آئی کا جو رویہ ہے وہ قوم دیکھ چکی ہے،۔ جمہوریت کو مضبوط کرنے کےلئے ہمیشہ سیاسی جماعتوں نے آپس میں گفتگو کی۔
وزیرقانون کاکہنا تھا کہ گندم کے معاملے پر وزیر اعظم نے چھ میٹنگز کی ہیں۔گندم خریداری پر ایک سپیشل کمیٹی تشکیل دیدی گئی ہے جو تین دن بعد رپورٹ پیش کریں گی۔ وفاقی کابینہ میں گندم کی خریداری کا معاملہ حل کیاجائےگا۔کسانوں کی مشکلات کو مدنظر رکھتے ہوئے جو ٹارگٹ کو نہ صرف بڑھایا بلکہ صوبائی حکومتوں سے بھی بات کی ہے۔اعظم نذیر تارڑ کاکہنا تھا کہ مئی 2023ء میں 14مئی کے انتخابات کیلئے جو کمیٹی بنی وہ فائنل نتیجہ پر پہنچ چکی تھی اگر اس وقت آمرانہ رویہ اختیار نہ کیاجاتاتو پی ٹی آئی کی تاریخ مختلف ہوتی۔

عمرا خان کو سخت وقت میں اکیلا چھوڑنے والوں کے لئے پی ٹی آئی میں کو جگہ نہیں،تحریک انصاف کے رہنماؤں،ارکان پارلیمنٹ نے فواد چودھری کی پارٹی میں واپسی کی مخالفت کردی ۔ ذرائع کے مطابق درجنوں پی ٹی آئی رہنماوں اور اراکین پارلیمنٹ نے فواد چوہدری کی پارٹی میں دوبارہ واپسی پر ردعمل دیا۔پی ٹی آئی رہنماؤں کاکہنا تھا کہ فواد چودھری سمیت پی ٹی آئی کو چھوڑنے والوں کو کسی صورت پارٹی میں دوبارہ آنے نہیں دیں گے۔ پارٹی چھوڑنے والوں نے مشکل وقت میں بانی چیئرمین اور پی ٹی آئی سے بے وفائی کی۔فواد چودھری کی واپسی پی ٹی آئی کیلئے جیل کی صعوبتیں برداشت کرنے والے کارکنان کیساتھ زیادتی ہے۔ایسے سابق رہنماوں کی واپسی پر پارٹی کے اندر اور باہر احتجاج ریکارڈ کرائیں گے۔پارٹی رہنماؤں کامزید کہنا تھا کہ خان صاحب کئی بار کلیئر کہہ چکے ہیں کہ چھوڑنے والے اراکین کیلئے پارٹی میں کوئی جگہ نہیں۔

ٹانک میں سیشن جج کے اغواء کیس سے متعلق خصوصی کمیٹی قائم کر دی گئی جبکہ واقعے کی ایف آئی آر بھی محکمہ انسداد دہشت گردی نے درج کرلی۔پولیس کے مطابق جج کے اغواء کیس سے متعلق بنی کمیٹی میں سی ٹی ڈی، پولیس اور دیگر قانون نافذ کرنے والے اداروں کے حکام شامل ہیں جبکہ جج کی بازیابی کے لیے سی ٹی ڈی میں الگ ٹیم تحقیقات کر رہی ہے۔پولیس حکام کے مطابق جج کی گاڑی کو ریکور کرلیا گیا ہے، اس کے ساتھ ہی جائے وقوعہ کے روٹ کی سی سی ٹی وی فوٹیج بھی حاصل کرلی گئی۔پولیس حکام کا بتانا ہے کہ ڈی آئی خان ریجن کے مختلف علاقوں میں مسلسل سرچ آپریشن اور کئی مشبہ افراد سے تفتیش بھی جاری ہے۔دوسری جانب سیشن جج کے اغواء کی ایف آئی ار محکمہ انسداد دہشت گردی نے درج کرلی۔ادھر ڈی آئی خان اور ٹانک سرحد پر سیکیورٹی سخت کر دی گئی ہے اور کسی بھی گاڑی اور شخص کو بغیر تلاشی کے پختونخوا سے پنجاب میں داخل ہونے سے روکنے کے احکامات جاری کیے گئے ہیں۔

بین الاقوامی مالیاتے ادارے(آئی ایم ایف) کی مینیجنگ ڈائریکٹر کرسٹالینا جارجیوا نے کہا ہے کہ بعض ممالک جیسے کہ پاکستان کو نمایاں مشکلات کا سامنا ہے۔کرسٹالینا جارجیوا نے سعودی عرب کے شہر ریاض میں ورلڈ اکنامک فورم کے خصوصی سیشن میں گفتگو کرتے ہوئے کہا کہ عالمی اقتصادی فورم کی اس میٹنگ کے دوران آئی ایم ایف کے دو پیغامات ہیں۔ایم ڈی آئی ایم ایف کرسٹالینا جارجیواکا کہنا ہے کہ ایڈوانس معیشتوں میں امریکا کی کارکردگی اچھی ہے،انڈونیشیا، ملائیشیااور انڈیا جیسی ابھرتی مارکیٹس کی کارکردگی بھی اچھی ہے،چین کی کارکردگی پہلی سہہ ماہی میں توقعات سے کچھ بڑھ کر اچھی رہی،بعض ممالک جیسے کہ پاکستان کو نمایاں مشکلات کا سامنا ہے ،مصر اب بہتر ہے لیکن اسے بھی مشکلات ہیں،کم آمدنی والے ممالک کی حالت خراب ہو رہی ہے۔انہوں نے کہا کہ پچھلے چند سال کی مشکلات کے باوجود ترقی اور معیشت بہتر ہے، ہم نے ترقی کے تخمینوں کو اس سال کے لیے بہتر کیا ہے، ایڈوانس معیشتوں میں امریکا کی کارکردگی اچھی ہے۔
انہوں نے کہا کہ مصر اب بہتر ہے لیکن اسے بھی مشکلات ہیں، کم آمدنی والے ممالک کی حالت خراب ہو رہی ہے، کورونا کی وباء کے باعث دنیا کو 3.3 ٹریلین ڈالرز کا نقصان پہنچا،ایم ڈی آئی ایم ایف نے کہا ہے کہ کورونا کے باعث معاشی نقصان سے کم آمدنی والے ممالک زیادہ متاثر ہوئے، ہمارے لیے اس وقت 3 ترجیحات ہیں۔ان کا یہ بھی کہنا ہے کہ اوّل ترجیح یہ ہے کہ جن ملکوں میں مہنگائی بہت زیادہ ہے اسے ٹارگٹ تک لایا جائے، کسی حد تک مہنگائی میں کمی لانے میں کامیاب ہوئے ہیں تاہم کام باقی ہے۔ایم ڈی آئی ایم ایف نے کہا کہ ہماری دوسری ترجیح مالی خسارے پر قابو پانے پر توجہ کرنا ہے، مالی خسارے پر قابو پانا بہت مشکل مرحلہ ہے۔ان کا مزید کہنا تھا کہ ہماری تیسری ترجیح تعاون کیلئے مزید راستے تلاش کرنا ہے۔

وزیراعظم محمد شہباز شریف نے صدر اسلامی ترقیاتی بینک ڈاکٹرمحمد سلیمان الجاسر سے ملاقات کی اور پاکستان میں اسلامی ترقیاتی بینک کے جاری مختلف منصوبوں کو جلد مکمل کرنے پر اتفاق کیا۔ وزیراعظم محمد شہباز شریف نے عالمی اقتصادی فورم کے خصوصی اجلاس کی سائیڈ لائینز پرصدر اسلامی ترقیاتی بینک سے ملاقات کے دوران اپنے سابقہ دور حکومت میں اسلامی ترقیاتی بینک کی جانب سے مختلف منصوبوں میں ایک ارب امریکی ڈالرز کی سرمایہ کاری پر اسلامی ترقیاتی بینک کا شکریہ ادا کیا، ملاقات میں دونوں رہنماؤں نے اسلامی ترقیاتی بینک کے پاکستان میں جاری مختلف منصوبوں پر پیشرفت کا جائزہ لیا۔
محمد شہباز شریف نے پاکستان کی سیلاب کے بعد بحالی میں اسلامی ترقیاتی بینک کی معاونت کو سراہا اور اس حوالے سے ڈاکٹر الجاسر کے ذاتی تعاون اور قائدانہ کردار کو تسلیم کیا،ملاقات میں پاکستان اور اسلامی ترقیاتی بینک کے درمیان تعاون کے نئے مواقع تلاش کرنے کے حوالے سے تبادلہ خیال کیا گیا۔ وزیراعظم نے اس موقع پر گفتگو کرتے ہوئے کہا کہ اسلامی ترقیاتی بینک کی پاکستان کے ساتھ مفید شراکت داری،تعمیرنو اور روزگار میں مدد فراہم کرنے کے ساتھ ساتھ حکومت کےپائیدار ترقی کے مقاصد کے حصول میں بھی معاون ثابت ہو رہی ہے۔ انہوں نے کہا کہ ملک میں غیر ملکی سرمایہ کاری کو صحیح خطوط پر استوار کرنے، غیر ملکی سرمایہ کاروں کے تمام خدشات کو دور کرنے اور ون ونڈو آپریشنز مہیا کرنے کے لئے خصوصی سرمایہ کاری سہولت کونسل پوری طرح سے فعال ہے۔
ملاقات کے آخر میں صدراسلامی ترقیاتی بینک ڈاکٹرمحمد سلیمان الجاسرکا کہنا تھا کہ پاکستان اسلامی ترقیاتی بینک کا بانی رکن ہے اور ایک انتہائی اہم ممبر ہے،اللہ تعالیٰ نے پاکستان کو بھرپور قدرتی و آبی وسائل سے نوازا ہے ، پاکستان کی بڑی افرادی قوت سے بھرپور طرح سے مستفید ہوا جا سکتا ہے ،پاکستان کی خوشحالی اور بہتری کےلئے دعا گو ہیں ملاقات میں وزیر خارجہ اسحاق ڈار ، وفاقی وزیر خزانہ و محصولات محمد اورنگزیب ، وفاقی وزیر اطلاعات و نشریات عطاء اللہ تارڑ ، وفاقی وزیر پیٹرولیم مصدق ملک ، وفاقی وزیر تجارت جام کمال خان اور وفاقی وزیر توانائی اویس احمد خان لغاری بھی موجود تھے۔