Author: صدف ابرار

بین الاقوامی مالیاتے ادارے(آئی ایم ایف) کی مینیجنگ ڈائریکٹر کرسٹالینا جارجیوا نے کہا ہے کہ بعض ممالک جیسے کہ پاکستان کو نمایاں مشکلات کا سامنا ہے۔کرسٹالینا جارجیوا نے سعودی عرب کے شہر ریاض میں ورلڈ اکنامک فورم کے خصوصی سیشن میں گفتگو کرتے ہوئے کہا کہ عالمی اقتصادی فورم کی اس میٹنگ کے دوران آئی ایم ایف کے دو پیغامات ہیں۔ایم ڈی آئی ایم ایف کرسٹالینا جارجیواکا کہنا ہے کہ ایڈوانس معیشتوں میں امریکا کی کارکردگی اچھی ہے،انڈونیشیا، ملائیشیااور انڈیا جیسی ابھرتی مارکیٹس کی کارکردگی بھی اچھی ہے،چین کی کارکردگی پہلی سہہ ماہی میں توقعات سے کچھ بڑھ کر اچھی رہی،بعض ممالک جیسے کہ پاکستان کو نمایاں مشکلات کا سامنا ہے ،مصر اب بہتر ہے لیکن اسے بھی مشکلات ہیں،کم آمدنی والے ممالک کی حالت خراب ہو رہی ہے۔انہوں نے کہا کہ پچھلے چند سال کی مشکلات کے باوجود ترقی اور معیشت بہتر ہے، ہم نے ترقی کے تخمینوں کو اس سال کے لیے بہتر کیا ہے، ایڈوانس معیشتوں میں امریکا کی کارکردگی اچھی ہے۔
انہوں نے کہا کہ مصر اب بہتر ہے لیکن اسے بھی مشکلات ہیں، کم آمدنی والے ممالک کی حالت خراب ہو رہی ہے، کورونا کی وباء کے باعث دنیا کو 3.3 ٹریلین ڈالرز کا نقصان پہنچا،ایم ڈی آئی ایم ایف نے کہا ہے کہ کورونا کے باعث معاشی نقصان سے کم آمدنی والے ممالک زیادہ متاثر ہوئے، ہمارے لیے اس وقت 3 ترجیحات ہیں۔ان کا یہ بھی کہنا ہے کہ اوّل ترجیح یہ ہے کہ جن ملکوں میں مہنگائی بہت زیادہ ہے اسے ٹارگٹ تک لایا جائے، کسی حد تک مہنگائی میں کمی لانے میں کامیاب ہوئے ہیں تاہم کام باقی ہے۔ایم ڈی آئی ایم ایف نے کہا کہ ہماری دوسری ترجیح مالی خسارے پر قابو پانے پر توجہ کرنا ہے، مالی خسارے پر قابو پانا بہت مشکل مرحلہ ہے۔ان کا مزید کہنا تھا کہ ہماری تیسری ترجیح تعاون کیلئے مزید راستے تلاش کرنا ہے۔

وزیراعظم محمد شہباز شریف نے صدر اسلامی ترقیاتی بینک ڈاکٹرمحمد سلیمان الجاسر سے ملاقات کی اور پاکستان میں اسلامی ترقیاتی بینک کے جاری مختلف منصوبوں کو جلد مکمل کرنے پر اتفاق کیا۔ وزیراعظم محمد شہباز شریف نے عالمی اقتصادی فورم کے خصوصی اجلاس کی سائیڈ لائینز پرصدر اسلامی ترقیاتی بینک سے ملاقات کے دوران اپنے سابقہ دور حکومت میں اسلامی ترقیاتی بینک کی جانب سے مختلف منصوبوں میں ایک ارب امریکی ڈالرز کی سرمایہ کاری پر اسلامی ترقیاتی بینک کا شکریہ ادا کیا، ملاقات میں دونوں رہنماؤں نے اسلامی ترقیاتی بینک کے پاکستان میں جاری مختلف منصوبوں پر پیشرفت کا جائزہ لیا۔
محمد شہباز شریف نے پاکستان کی سیلاب کے بعد بحالی میں اسلامی ترقیاتی بینک کی معاونت کو سراہا اور اس حوالے سے ڈاکٹر الجاسر کے ذاتی تعاون اور قائدانہ کردار کو تسلیم کیا،ملاقات میں پاکستان اور اسلامی ترقیاتی بینک کے درمیان تعاون کے نئے مواقع تلاش کرنے کے حوالے سے تبادلہ خیال کیا گیا۔ وزیراعظم نے اس موقع پر گفتگو کرتے ہوئے کہا کہ اسلامی ترقیاتی بینک کی پاکستان کے ساتھ مفید شراکت داری،تعمیرنو اور روزگار میں مدد فراہم کرنے کے ساتھ ساتھ حکومت کےپائیدار ترقی کے مقاصد کے حصول میں بھی معاون ثابت ہو رہی ہے۔ انہوں نے کہا کہ ملک میں غیر ملکی سرمایہ کاری کو صحیح خطوط پر استوار کرنے، غیر ملکی سرمایہ کاروں کے تمام خدشات کو دور کرنے اور ون ونڈو آپریشنز مہیا کرنے کے لئے خصوصی سرمایہ کاری سہولت کونسل پوری طرح سے فعال ہے۔
ملاقات کے آخر میں صدراسلامی ترقیاتی بینک ڈاکٹرمحمد سلیمان الجاسرکا کہنا تھا کہ پاکستان اسلامی ترقیاتی بینک کا بانی رکن ہے اور ایک انتہائی اہم ممبر ہے،اللہ تعالیٰ نے پاکستان کو بھرپور قدرتی و آبی وسائل سے نوازا ہے ، پاکستان کی بڑی افرادی قوت سے بھرپور طرح سے مستفید ہوا جا سکتا ہے ،پاکستان کی خوشحالی اور بہتری کےلئے دعا گو ہیں ملاقات میں وزیر خارجہ اسحاق ڈار ، وفاقی وزیر خزانہ و محصولات محمد اورنگزیب ، وفاقی وزیر اطلاعات و نشریات عطاء اللہ تارڑ ، وفاقی وزیر پیٹرولیم مصدق ملک ، وفاقی وزیر تجارت جام کمال خان اور وفاقی وزیر توانائی اویس احمد خان لغاری بھی موجود تھے۔

سعودی عرب کی سینئیر علماء کونسل نے آنے والے سیزن میں حج کرنے کا ارادہ رکھنے والوں کیلئے فتویٰ جاری کر دیا۔ وزارت نے حج کرنے کا ارادہ رکھنے والوں پر زور دیا کہ وہ ضوابط اور رہنما خطوط طے کرنے پر سختی سے عمل کریں،فتویٰ میں کہا گیا ہے کہ سرکاری اجازت نامے کے بغیر حج کرنے پر پابندی ہوگی،وزارت برائے حج و عمرہ کی جانب سے جاری ایک بیان میں کہا گیا کہ سینئر علماء کونسل نے ایک فتویٰ جاری کیا ہے جس میں اس طرح کے طریقوں پر پابندی عائد کی گئی ہے۔اس فیصلے کا مقصد زائرین کی حفاظت کے ساتھ ساتھ عمرہ کرنے والوں اور زائرین کی تنظیم اور ہم آہنگی کو یقینی بنانا ہے۔
سعودی وزارت داخلہ، وزارت حج و عمرہ اور مسجد نبویؐ اور اس کے امور کی نگہداشت کیلئے قائم جنرل اتھارٹی کے ساتھ سینئر اسکالرز کی کونسل نے بغیر سرکاری اجازت نامے کے حج کرنے والوں کو درپیش چیلنجوں اور خطرات کا جائزہ لیا۔ فتویٰ کونسل کی طرف سے اجازت نامے کو لازمی قرار دینے کا فیصلہ نہ صرف دستاویز کی ضرورت کو ظاہر کرتا ہے، بلکہ یہ بھی بتاتا ہے کہ اسلامی قانون میں اس کی جڑیں کتنی گہری ہیں اور حج سے منسلک عبادات کو آسان بنانے میں یہ ایک اہم جز ہے۔یہ فتویٰ شریعت کی طرف سے لازمی خدمات کی ہموار فراہمی کو بھی یقینی بناتا ہے، جو کہ نظم و نسق اور حفاظت کو برقرار رکھنے کے لیے بہت ضروری ہے، خاص طور پر زیادہ ہجوم اور بھگدڑ کو روکنے کے لیے حجاج کی تعداد کے انتظام میں، اسلامی قانون کے مطابق حج پرمٹ حاصل کرنا محض قانونی ذمہ داری نہیں ہے بلکہ ملک کے قانون کی تعمیل ہے۔ کونسل کے مطابق، جو لوگ اس قانونی جوابدہی کا احترام کرتے ہیں وہ نہ صرف قانونی اثرات سے بچیں گے بلکہ انہیں ان کے ایمان اور اطاعت کا ثبوت بھی دیا جائے گا۔

مسلم لیگ ن کے سینیٹر عرفان صدیقی نے کہا ہے کہ کہ رؤف حسن نے کہا کہ مسلم لیگ ن، پیپلز پارٹی اور ایم کیو ایم سے مذاکرات نہیں ہو سکتے، بات صرف اسٹیبلشمنٹ سے ہو گی۔شبلی فراز اپنے قائدین سے پوچھ لیں پی ٹی آئی چاہتی کیا ہے؟ایک بیان میں عرفان صدیقی نے کہا کہ اُدھر سے این او سی مل جائے تو ہم حاضر ہیں۔انہوں نے کہا کہ پی ٹی آئی کے ترجمان رؤف حسن نے دو ٹوک پالیسی بیان جاری کیا ہے۔واضح رہے کہ ایک بیان میں پاکستان تحریک انصاف (پی ٹی آئی) کے سینیٹر شبلی فراز نے کہا تھا کہ حکومت مذاکرات میں سنجیدہ ہے تو پہلے اس کی شرائط طے کرے۔
سینیٹر شبلی فراز نے پی ٹی آئی کو مذاکرات کی دعوت دینے والے سینیٹر عرفان صدیقی کو جواب دیا تھا۔انہوں نے کہا تھا کہ حکومت مذاکرات میں سنجیدہ ہے تو پہلے مذاکرات کے پیرامیٹر کو طے کرے۔پی ٹی آئی کے سینیٹر نے مزید کہا تھا کہ جو سیاسی جماعتیں بھی مذاکرات میں شامل ہوں گی، ان کے درمیان پہلے طے کیا جائے کہ وہ کس ماحول میں اور کس بنیاد پر ہوں گے۔ن لیگی سینیٹر عرفان صدیقی نے سینیٹ اجلاس میں اظہارِ خیال کرتے ہوئے کہا تھا کہ آئیں پاکستان کے لیے ایک ساتھ بیٹھیں، ہم ایک بار پھر آپ کی طرف ہاتھ بڑھاتے ہیں۔
ن لیگی سینیٹر نے مزید کہا تھا کہ فضل الرحمٰن کے ساتھ بیٹھ سکتے ہیں جن کا نام بھی آپ بھول گئے تھے تو ہمارے ساتھ بیٹھنے میں کیا قباحت ہے؟ ہم نہیں چاہتے ہیں، جن مشکلات کا سامنا ن لیگ کو اور اس کی قیادت کو کرنا پڑا ہے، وہ کسی اور کو بھی کرنا پڑے۔