Author: صدف ابرار

وفاقی وزیر اور پاکستان مسلم لیگ (ن) کے رہنما عطاءاللّٰہ تارڑ نے کہا ہے کہ وزیراعظم نے سنجیدہ اور چند افراد پر مشتمل کابینہ تشکیل دی ہے۔ میڈیا سے گفتگو کرتے ہوئے عطا تارڑ کا کہنا تھا کہ حکومت عوام کے مسائل کے حل کےلیے سنجیدگی سے اقدامات کرے گی۔انہوں نے کہا کہ وزیراعظم کچھ دیر بعد کابینہ ارکان سے خطاب کریں گے، وزیراعظم مستقبل کے لائحہ عمل کا اعلان کریں گے۔عطا تارڑ نے بتایا کہ ہم نے پہلے بھی مشکلات کا مقابلہ کیا ہے، معاشی مشکلات کے خاتمے کےلیے اقدامات کیے جائیں گے۔انکا کہنا تھا کہ ہمیں حکومتی اخراجات کو کم کرنا ہے، ملکی معیشت میں بہتری لانی ہے۔وفاقی وزیر نے کہا کہ وزیراعظم کابینہ سے خطاب کریں گے تو تفصیلات سامنے آجائیں گی۔

مسلم لیگ(ن) کے رہنما رانا ثناء اللّٰہ اور خواجہ سعد رفیق کوئی بھی حکومتی عہدہ لینے سے انکاری ہے ، ذرائع کے مطابق سابق وفاقی وزیر داخلہ رانا ثناء اللّٰہ ضمنی الیکشن بھی لڑنا نہیں چاہتے ہیں، انہوں نے اپنے ارادے سے نواز شریف کو آگاہ کردیا ہے۔ذرائع کا کہنا ہے کہ خواجہ سعد رفیق عام انتخابات میں بھی حصہ نہیں لینا چاہتے تھے، انہوں نے اپنے بھائی سلمان رفیق اور پارٹی قیادت کے دباؤ میں الیکشن لڑا تھا۔ذرائع کے مطابق رانا ثنا اللّٰہ کوئی سرکاری عہدہ نہ لینے کے ساتھ ساتھ ضمنی الیکشن میں بھی حصہ نہیں لینا چاہتے، انہوں نے اپنی خواہش سے پارٹی قائد نوازشریف کو بھی آگاہ کردیا ہے۔ن لیگی قائد نواز شریف نےرانا ثناء اللّٰہ کی رائے سننے کے بعد خاموشی اختیار کی۔رانا ثنااللّٰہ نے امید ظاہر کی ہے کہ پارٹی قیادت ان کی رائے کو مقدم رکھے گی۔اس حوالے سے جب رانا ثنا اللّٰہ سے بات کی گئی تو ان کا کہنا تھا کہ ن لیگ کا صوبائی صدر ہوں اور پارٹی پالیسی کا بھی پابند ہوں۔

وزیرِ اعظم محمد شہباز شریف کی زیرِ صدارت پیٹرولیم کے شعبے کے حوالے سے اعلی سطح اجلاس ہوا ۔ اجلاس میں سینیٹراسحاق ڈار، سینیٹر ڈاکٹر مصدق ملک، شزہ فاطمہ خواجہ، احد خان چیمہ، جہانزیب خان، محمد اورنگزیب، علی پرویز ملک اور متعلقہ اعلی حکام نے شرکت کی. وزیراعظم شہبازشریف نے رمضان المبارک میں بجلی اور گیس کی بلاتعطل فراہمی یقینی بنانے کاحکم دیدیا۔
اجلاس کو بتایا گیا کہ ملک میں تیل اور گیس کے ذخائر تیزی سے کم ہو رہے ہیں اور ملکی کھپت کو پورا کرنے کیلئے سالانہ 4 ارب ڈالر کی پیٹرلیم مصنوعات درآمد کی جارہی ہیں. مقامی سطح پر دریافت سے اربوں ڈالر کا قیمتی زرمبادلہ بچایا جاسکے گا.اجلاس کو پیٹرولیم اور گیس کے شعبے کے گردشی قرضے، ٹائٹ گیس اور زیر سمندر قدرتی گیس اور پیٹرولیم کے ذخائر کی دریافت، انسے بھرپور فائدہ اٹھانے اور اس شعبے میں بین الاقوامی سرمایہ کاری بڑھانے کیلئے اقدامات کے حوالے سے تفصیلی طور پر آگاہ کیا گیا.
اجلاس کو پیٹرولیم اور گیس کے شعبے کے گردشی قرضے کے حوالے سے بھی بتایا گیا. وزیرِ اعظم نے گردشی قرضے کو ختم کرنے کیلئے ترجیحی بنیادوں پر لائحہ عمل مرتب کرکے پیش کرنے کی ہدایت کی. اجلاس کو ٹائٹ گیس اور زیرِ سمندر تیل کے ذخائر کی دریافت کے حوالے سے بین الاقوامی سرمایہ کاروں کی گہری دلچسپی کے بارے بھی آگاہ کیا گیا. اجلاس کو بتایا گیا کہ صارفین کے تحفظ کو مد نظر رکھتے ہوئے ایل پی جی پالیسی 2024 پر کام جاری ہے جس کیلئے تمام اسٹیک ہولڈرز سے مشاورت بھی کی جاری ہے.
وزیرِ اعظم نےتیل اور گیس کی دریافت، ریفائننگ اور تقسیم میں نجی شعبے اور مقامی و بیرونی سرمایہ کاروں کو ہر قسم کی سہولت فراہم کرنے کی ہدایت کردی
وزیراعظم شہبازشریف کاکہنا تھاکہ قابل افسوس امر ہے کہ پاکستان کی سمندری حدود جس کا رقبہ بلوچستان سے بھی ذیادہ ہے اس میں موجود وسائل کو بروئے کار لانے کیلئے اقدامات نہ اٹھائے گئے. پاکستان کی سمندری حدود میں تیل اور گیس کے وسیع ذخائر کی دریافت اور انسے بھرپور فائدہ اٹھانے کیلئے اقدامات حکومت کی اولین ترجیح ہے. ملک میں پیٹرولیم کی ریفائننگ کی استعداد کو بڑھایا جائے.شہبازشریف کاکہنا تھاکہ حکومت کا کام کاروبار نہیں بلکہ نجی شعبے کو سہولت فراہم کرنا اور صارفین بالخصوص معاشی طور پر کمزور طبقے کے مفادات کا تحفظ ہے. وزیرِ اعظم نےٹائٹ گیس اور زیرِ سمندر تیل و قدرتی گیس کے ذخائر دریافت کرنے کیلئے بین الاقوامی سرمایہ کاری کے فروغ کے حوالے سے اقدامات اٹھانے کی ہدایت کردی وزیرِ اعظم نے گیس اور تیل کے شعبے کے گردشی قرضے کو ختم اور اس مسئلے کے دیر پا حل کیلئے جامع لائحہ عمل طلب کرلیا.
شہبازشریف کاکہنا تھاکہ گیس اور تیل کے شعبے میں چوری کرنے والوں کی نشاندہی کرکے قرار واقعی سزا دی جائے. گیس پر سمارٹ میٹرنگ سے خسارے کو کم کیا جائے.عوام کے خون پسینے کی کمائی، قومی خزانے کو مزید نقصان نہیں پہنچنے دونگا. ایل پی جی کے شعبے کی کڑی نگرانی یقینی بنائی جائے تاکہ صارفین کو سستے داموں ایل پی جی میسر ہو. صنعتوں کو گیس کی بلاتعطل فراہمی یقینی بنائی جائے. صنعتوں میں انرجی ایفیشنٹ مشینری کی تنصیب یقینی بنائی جائے.گھریلو صارفین کی روزمرہ استعمال کی اشیاء کو گیس کی بجائے بجلی پر چلانے کی حوصلہ افزائی کی جائے.وزیرِ اعظم کی گزشتہ دورِ حکومت میں توانائی کی بچت کیلئے مرتب کئے گئے لائحہ عمل پر عملدرآمد کے حوالے سے بھی رپورٹ طلب کر لی.وزیرِ اعظم کی پاکستان کے توانائی شعبے کے انتظامی ڈھانچے کو بین الاقوامی خطوط پر استوارکرنے،توانائی شعبے میں میرٹ پر ملک کے باصلاحیت افراد کو تعینات کرنے کی ہدایت کردی۔

وفاقی کابینہ میں شامل ہونے کے بعد محمد اورنگزیب نے ایچ بی ایل کے صدر اور چیف ایگزیکٹیو کے عہدے سے استعفیٰ دے دیا۔ پاکستان اسٹاک ایکسچینج میں نجی بینک کی جانب سے اہم نوٹ جمع کروایا گیا۔ نوٹ کے مطابق بینک کے بورڈ آف ڈائریکٹرز نے محمد اورنگزیب کا استعفیٰ منظور کر لیا۔خیال رہے کہ محمد اورنگزیب وفاقی کابینہ میں شامل ہوگئے، انہوں نے آج کا بینہ ممبر کا حلف اٹھایا۔ محمد اورنگزیب سے متعلق اطلاعات تھیں کہ انہیں وزیر خزانہ بنائے جانے کا امکان ہے۔ علم میں رہے کہ محمد اورنگزیب نے اپنے پروفیشنل کیریئر کا آغاز نجی بینک سے کیا تھا، وہ نجی بینک کے کنٹری منیجر کے عہدے پر بھی رہے۔محمد اورنگزیب پاکستان بزنس کونسل کے ڈائریکٹر بھی رہے، انہوں نے نجی بینک کے عہدے کے ساتھ ڈچ قومیت بھی چھوڑ دی تھی۔

جسٹس نعیم اختر افغان کل بطور سپریم کورٹ جج اپنے عہدے کا حلف اٹھائیں گے۔چیف جسٹس قاضی فائز عیسیٰ، جسٹس نعیم اختر افغان سے عہدے کا حلف لیں گے، حلف برداری کی تقریب سپریم کورٹ میں ہو گی، سپریم کورٹ کے ججز، سینئر وکلاء، عدالتی سٹاف حلف برداری میں شریک ہوگا۔جسٹس نعیم اختر افغان بلوچستان ہائیکورٹ کے چیف جسٹس کے طور پر فرائض سر انجام دے چکے ہیں۔