Author: صدف ابرار

ملکی تاریخ میں پہلی بار پاکستانی رکن پارلیمنٹیرین آئی ایم ایف اور ورلڈ بینک بورڈ کے ممبر منتخب ہو گئے۔سینیٹر فیصل سلیم آئی ایم ایف اور ورلڈ بینک کے پارلیمنٹری بورڈ کے ممبر منتخب ہو گئے. پارلیمنٹری نیٹ ورک غربت کے خاتمے اور معاشی استحکام سے متعلق ریفارمز کی سفارشات مرتب کرتا ہے۔
دنیا بھر کے 140 ممالک پارلیمنٹری نیٹ ورک آن آئی ایم ایف اور ورلڈ بینک کے رکن ہیں۔پارلیمنٹری نیٹ ورک غربت کے خاتمے اور معاشی استحکام سے متعلق ریفارمز کی سفارشات مرتب کرتا ہے۔واضح رہے کہ خیبر پختونخوا سے تعلق رکھنے والے سینیٹر فیصل سلیم مارچ 2021 میں ایوان بالا کے رکن بنے تھے اور ان کی مدت مارچ 2027 کو ختم ہو رہی ہے۔

اسلام آباد میں اپنی رہائشگاہ پر پیپلز پارٹی کے وفد سے ملاقات کے بعد پریس کانفرنس کرتے ہوئے خالد مقبول صدیقی کا کہنا تھا کہ صدارتی انتخابات میں آصف زرداری کی حمایت کریں گے ،متحدہ قومی موومنٹ (ایم کیو ایم) پاکستان نے صدارتی انتخاب کےلیے آصف علی زرداری کو ووٹ دینے کا اعلان کردیا۔ انہوں نے کہا کہ جمہوری قوتوں کو اختلافات سامنے رکھ کر بھی ڈائیلاگ جاری رکھنے چاہئیں۔اس موقع پر چیئرمین پیپلز پارٹی بلاول بھٹو زرداری نے کہا کہ جو حکومت بننے جارہی ہے اس کی سب سے زیادہ توجہ کراچی پر ہوگی۔چیئرمین پیپلز پارٹی بلاول بھٹو زرداری کی قیادت میں پی پی وفد نے ایم کیو ایم کنوینر سے اسلام آباد میں انکی رہائشگاہ پر ملاقات کی۔ ذرائع نے بتایا تھا کہ وزیراعظم شہباز شریف سے ایم کیو ایم وفد کی ملاقات ہوئی۔ وزیراعظم سے خالد مقبول صدیقی کی قیادت میں ایم کیو ایم پاکستان کے وفد کی ملاقات عشائیہ کے بعد ہوئی۔ذرائع نے بتایا کہ ایم کیو ایم نے صدارتی الیکشن میں آصف زرداری کو ووٹ دینے کی ہامی بھرلی۔

سپریم جوڈیشل کونسل کی جانب سے مستعفی جج کو مس کنڈکٹ کا مرتکب قرار دینے کی رائے پر جسٹس مظاہر علی اکبر نقوی نے اپنے دفاع میں کچھ سوالات اٹھا لئے، سابق جج مظاہر علی اکبر نقوی نقوی نے کونسل کی رائے کو چیلنج کرنے کا اعلان کر دیا، اور کہا کہ وہ تمام کرداروں کو بے نقاب کریں گے،متعلقہ قانونی فورم سے رجوع کر کے میڈیا کو آگاہ کریں گے،یہ یکطرفہ کاروائی تھی جس کا حصہ بننے سے میں نے انکار کر دیا تھا، قانون جج کے استعفی دینے کے بعد انکوائری جاری رکھنے کی اجازت نہیں دیتا،جوڈیشل کونسل استعفی کو عہدے سے برطرف کرنے میں کیسے تبدیل کر سکتی ہے؟سابق جج مظاہر نقوی کا مزید کہنا تھا کہ میرے خلاف شکایات سیاسی نوعیت کی تھیں اور شکایت کنندگان کا تعلق مسلم لیگ ن سے تھا،میرے خلاف بے بنیاد کاروائی 18 مئی 2022 کے نوٹ کے بعد شروع ہوئی،میں نے نوٹ میں کہا تھا کہ مسلم لیگ ن کے کرپشن کیسز میں تفتیشی افسران کے تبادلوں پر از خود نوٹس لینا چاہئے، چیف جسٹس پاکستان ایک متعصب شخص ہے جو احترام کے قابل نہیں،چیئرمین جوڈیشل کونسل نے کاروائی کے دوران حقائق کو غلط انداز میں پیش کیا۔ چیئرمین جوڈیشل کونسل نے جسٹس سردار طارق مسعود،جسٹس امیر بھٹی کی ریٹائرمنٹ اور جسٹس نعیم افغان کی سپریم کورٹ تقرری سے پہلے کونسل کی کاروائی مکمل کی، یہ سب اس لیے کیا گیا کیونکہ جوڈیشل کونسل کی نئی تشکیل کو کنٹرول کرنا اتنا آسان نہ ہوتا،میں نے کون سا مس کنڈکٹ کیا ہے عہدے کے غلط استعمال کے شواہد کہاں ہیں؟یہ ریکارڈ کی بات ہے کہ تمام گواہان نے میرے حق میں گواہی دی، جب مسلم لیگ ن کا میڈیا ونگ میرے خلاف مہم چلا رہا تھا تو اسے روکا کیوں نہ گیا؟۔

چیئر مین پاکستان پیپلز پارٹی پارلیمنٹیرینز (پی پی پی پی )اور صدر پاکستان کیلئے مضبوط امیدوار آصف علی زرداری نے وزیر اعظم شہباز شریف کو ملکی ترقی کا فارمولہ بتا دیا ۔ اسلام آباد میں ہونے والے عشائیہ سے خطاب کرتے ہوئے سابق صدر کا کہنا تھا کہ آئن سٹائن مشکل سے نہیں ڈرا تو شہبازشریف بھی نہیں ڈرے گا، زراعت و آب پاشی بہتر بنا کراور ڈیم بنا کر ترقی کرسکتے ہیں، چیلنجز درپیش ہیں لیکن ناممکن کچھ نہیں ہے، سپریم کورٹ نے تسلیم کیا کہ شہید بھٹو کا عدالتی قتل ہوا۔سابق صدر نے کہا کہ ہم شہباز شریف کے پیچھے کھڑے ہوں گے، جہاں ضرورت پڑی اپنا زور بازو بھی دیں گے۔آصف زرداری نے کہا کہ ہم چین کےلیے فورس ملٹی پلائر بن جائیں، پورا بلوچستان خالی پڑا ہے صرف پانی لانا ہے، مشکل ضرور ہے مگر ناممکن نہیں، محنت کریں گے کام کریں گے آپ دوستوں کی مدد سے پاکستان کو بنائیں گے۔انہوں نے مزید کہا کہ ایگلریکلچر بنیادی مسئلہ ہے اسے ٹھیک کریں اور ڈیمز بنائیں۔
اسی عشائے سے خطاب کرتے ہوئے پاکستان پیپلز پارٹی کے چیئرمین بلاول بھٹو نے کہا کہ صدر زرداری کے ایوانِ صدر مین واپس آنے سے معاشرے میں بحران اور تقسیم کا خاتمہ ہوگا۔ بلاول بھٹو نے کہا کہ آصف زرداری صدر بنے تو یہ نئی تاریخ بنے گی کہ سویلین نے دو بار پاکستان کو سنبھالا۔ تاریخ میں آئے گا کہ آصف زرداری طاقتور ترین سویلین صدر رہے۔بلاول بھٹو نے کہا کہ ۔ بلاول بھٹو نے کہا کہ حکومت کی ترجیح میثاقِ مفاہمت اور میثاقِ معیشت ہے۔ بلاول بھٹو نے کہا کہ ہم عدالتی اور انتخابی اصلاحات کا مشن مکمل کریں گے۔

وزیراعظم شہباز شریف نے کہا ہے کہ مل کر ملک و قوم کی تقدیر بدلیں گے، ملک کو ہمالیہ نما ہوشربا چیلنجوں کا سامنا ہے اور پوری دنیا کی نظریں ہم پر جمی ہیں کہ ہم اس مینڈیٹ میں رہتے ہوئے کس طرح سے ملک کی خدمت کرتے ہیں۔ وزیر اعظم شہباز شریف نے اتحادی جماعتوں کے اعزاز میں دیے گئے عشائیے سے خطاب کرتے ہوئے کہا کہ اتفاق رائے سے وفاق میں حکومت قائم ہوئی ہے، عوام کے فیصلے کا سب کو احترام کرنا ہے۔ ان کاکہنا تھا کہ وفاق میں ایک اتحادی حکومت دوبارہ معرض وجود میں آئی ہے اور صوبوں میں پیپلز پارٹی سندھ، پنجاب میں مسلم لیگ(ن) اور بلوچستان میں وفاق کی طرز پر ایک مخلوط حکومت معرض وجود میں آئی ہے۔انہوں نے کہا کہ یہ عوام کا فیصلہ تھا جس کا ہم سب کو احترام کرنا ہے جنہوں نے جس طریقے سے مختلف جماعتوں کو یہ مینڈیٹ دیا ہے تو پوری دنیا ہمیں باریک بینی سے ہمیں دیکھ رہی ہے کہ ان جماعتوں میں کتنی صلاحیت ہے کہ یہ اس مینڈیٹ کے اندر رہتے ہوئے کس طرح عوام کے مسائل اور چیلنجز کا مقابلہ کرتے ہیں۔ ملک مشکلات میں گھرا رہا تو تاریخ ہمیں اور ہماری نسلوں کو معاف نہیں کرے گی۔ا نہوں نے کہا کہ یہ ہوشربا چیلنجز ہیں اور ہمارا گیس اور بجلی کا گردشی قرضہ مجموعی طور پر 50 کھرب ہے، پی آئی اے کا قرضہ 825 ارب روپے ہے، بجلی کی چوری سالانہ 500ارب روپے ہے اور اسی سے اندازہ ہو جائے گا کہ صورتحال کتنی گمبھیر ہے۔وزیر اعظم شہباز شریف نے کہا کہ 500 ارب روپے سالانہ بجلی کی چوری ہے، ٹیکس ہمیں اب کم کرنا چاہیے، ٹیکس بیس کو بڑھانا چاہیے۔ پچھلے چار دنوں میں معاشی مسائل پر لگاتار اجلاس کیے ہیں۔شہباز شریف نے کہا کہ پاکستان کو ہوشربا چیلنجز درپیش ہیں، ہماری جڑیں معاشی طور پر کھوکھلی کی جارہی ہیں۔ ہمیں مل کر اس کشتی کو پار لگانا ہے، اگر یہ کشتی ہچکولے کھاتی رہی تو تاریخ ہمیں اور ہماری نسلوں کو معاف نہیں کرے گی۔

وزیراعظم شہباز شریف نے مسلم لیگ ن، اتحادی جماعتوں کے ارکان قومی اسمبلی و سینیٹ کے اعزاز میں عشائیہ دیا۔عشائیے میں مشترکہ صدارتی امیدوار آصف علی زرداری، پیپلز پارٹی کے چیئرمین بلاول بھٹو زرداری، یوسف رضا گیلانی، رضا ربانی، راجہ پرویز اشرف اور خورشید شاہ سمیت پیپلز پارٹی کے دیگر ارکان بھی شریک ہوئے۔
سینیٹر اسحاق ڈار، سینیٹر اعظم نذیر تارڑ اور دیگر لیگی ارکان قومی اسمبلی و سینیٹ نے بھی عشائیہ میں شرکت کی۔ کنوینر ایم کیو ایم پاکستان خالد مقبول صدیقی، فاروق ستار، مصطفیٰ کمال، استحکام پاکستان پارٹی کے رہنما عون چوہدری اور دیگر بھی شریک ہوئے۔ آصف زرداری کو صدارت کے عہدے کے لئے ایک بار پھر وزیر اعظم شہباز شریف نے نامزد کیا، تمام اتحادی جماعتوں کی جانب سے صدر کے لئے آصف علی زرداری کے نام کی توثیق کردی گئی۔ڈاکٹر طارق فضل چوہدری، خواجہ آصف، سعدرفیق، بلال اظہر کیانی، نوشین افتخار، خواجہ سعد رفیق بھی عشائیہ میں شریک تھے۔چیئرمین سینیٹ صادق سنجرانی، اسپیکر قومی اسمبلی سردار ایاز صادق، ڈپٹی اسپیکر مصطفیٰ شاہ نے بھی عشائیہ میں شرکت کی۔عشائیہ کے آغاز پر وزیراعظم شہباز شریف نے تمام ارکان کی آمد کا شکریہ ادا کیا.