Author: صدف ابرار

خیبرپختونخوا میں سکیورٹی فورسز کے 2 مختلف آپریشنز میں فورسز پر حملوں میں ملوث2 دہشتگرد ہلاک ہو گئے۔پاک فوج کے شعبہ تعلقات عامہ آئی ایس پی آر کے مطابق سکیورٹی فورسز کی جانب سے پہلا آپریشن ضلع خیبر میں کیا گیا،جہاں شدید فائرنگ کے تبادلے میں دہشتگرد شمروز عرف شانے ماراگیا، جبکہ ڈی آئی خان میں آپریشن کے دوران دہشتگرد منصور مارا گیا۔آئی ایس پی آر کے مطابق ہلاک دہشت گردوں سے اسلحہ و بارودی مواد برآمدہوا، مارے جانیوالے دہشت گرد فورسز پر حملوں، بے گناہ شہریوں کے قتل میں ملوث تھے۔

وزیراعظم شہباز شریف سے چیئرمین جوائنٹ چیف آف اسٹاف کمیٹی جنرل ساحر شمشاد مرزا نے ملاقات کی۔ چیئرمین جوائنٹ چیف آف اسٹاف کمیٹی نے وزیر اعظم شہباز شریف کو وزارت عظمیٰ کا منصب سنبھالنے پر مبارکباد دی۔ چیئرمین جوائنٹ چیف آف اسٹاف کمیٹی نے اس موقع پر وزیر اعظم شہباز شریف کیلئے نیک خواہشات کا اظہار بھی کیا۔ ملاقات میں پاکستان کی مسلح افواج کے پیشہ ورانہ اور سیکیورٹی امور سے متعلق بات چیت کی گئی۔

اسلام آباد ہائیکورٹ میں بشریٰ بی بی کی بنی گالہ سے اڈیالہ جیل منتقلی کےلیے درخواست کی سماعت ہوئی۔ اسلام آباد ہائیکورٹ نے انتظامیہ کے سینئر افسر کو سب جیل بنی گالہ کا دورہ کرنے کا حکم دے دیتے ہوئے بشریٰ بی بی کی سب جیل میں موجودگی سے متعلق رپورٹ طلب کرلی۔ اس دوران بشریٰ بی بی کے وکیل نے کہا کہ بشریٰ بی بی کو بنی گالہ کے گھر کے ایک کمرہ میں بند کر کے رکھا گیا ہے، عدالت بیلف مقرر کردے اور وہ جا کر دیکھ کر آج ہی رپورٹ دے۔ انہوں نے کہا کہ جب بشریٰ بی بی اڈیالہ پہنچ گئی تھیں تو سپرنٹنڈنٹ جیل کو بنی گالہ منتقلی کا اختیار نہیں تھا۔اسٹیٹ کونسل کے وکیل نے کہا کہ بشریٰ بی بی سابق خاتون اول ہیں، ان کی سیکیورٹی کےلیے بنی گالہ منتقل کیا گیا ہے۔عدالت نے سپرنٹنڈنٹ جیل کے آرڈر کی رپورٹ رجسٹرار کے پاس جمع کروانے کی ہدایت کرتے ہوئے کہا کہ عمران خان اور بشریٰ بی بی کی ملاقات سے متعلق سپرنٹنڈنٹ جیل آرڈر پاس کرے.

ریٹنگ ایجنسی کے مطابق پاکستان میں 2024 میں معاشی ترقی کی شرح 2 فیصد تک ہوسکتی ہے، افراط زر گزشتہ سال کے مقابلے 29 فیصد سے کم ہو کر 23 فیصد رہے گی۔موڈیز کا کہنا ہے کہ بینکنگ سیکٹر کا منافع آئندہ سال شرح سود اور بلند ٹیکسز کی وجہ سے کم ہوسکتا ہے یعنی عالمی ریٹنگ ایجنسی موڈیز نے پاکستان کے بینکنگ سیکٹر کی ریٹنگ مستحکم کردی۔
بینکنگ سیکٹر کی آوٹ لک پہلے منفی تھی موڈیزنے بینکنگ میں اچھے منافع کی وجہ سے آوٹ لک مستحکم کردی۔موڈیز کے بقول پاکستان کی معاشی شرح نمو دو فیصد رہنے کی توقع ہے،مہنگائی کی شرح اس مالی سال میں 23 فی صد رہنے کا امکان ہے،گزشتہ مالی سال مہنگائی کی شرح 29فی صد تھی ۔عالمی ریٹنگ ایجنسی کے مطابق پاکستان نے مشکل وقت میں بینکوں کی مدد کی، ڈیپازٹرز کا نقصان نہیں ہوا۔موڈیز کے مطابق بینکوں کے منافع سے بہتر فنڈنگ، لیکویڈیٹی، معاشی چیلنجز، سیاسی بحران سے نمٹنے میں مدد ملی۔اسکا کہنا تھا کہ پاکستانی بینکنگ نظام پر معاشی اور مالیاتی دباؤ کم ہو رہا ہے۔ مستحکم بینک ڈیپازٹ پر مبنی فنڈنگ مالی استحکام کو سپورٹ کرتی رہے گی۔

وزیراعظم محمد شہبازشریف نے ہدایت کی ہے کہ نجکاری کا عمل تیز تر بنایاجائے تاکہ معیشت کی بحالی اور عوام کو ریلیف کی فراہمی کا عمل تیز ہو، نجکاری کے ذمہ دار ادارے صلاحیت بڑھانے اور مطلوبہ استعداد حاصل کرنے کے فوری اقدامات کریں، حائل رکاوٹوں کو جلد ازجلد دور کیاجائے تاکہ ملک وقوم کو اربوں روپے کے خساروں سے نجات ملے اور پاکستان کی معاشی حالت بہتر ہو۔ وزیراعظم نے نجکاری کے عمل میں شامل تمام اداروں کی مکمل فہرست اورپیش رفت کی رپورٹ پیش کرتے ہوئے ہدایت کی کہ وقت کے واضح تعین کے ساتھ اقدامات اور اہداف کی تفصیل پیش کی جائے۔ وزیراعظم ہاﺅس میں نجکاری کے حوالے سے منعقدہ اعلی سطحی اجلاس میں وزیراعظم شہبازشریف نے نجکاری کمیشن اور وزارت نجکاری کو ہدایت کی کہ کابینہ کی تشکیل کے ساتھ ہی پرائیویٹائزیشن سے متعلق زیرالتوا حل طلب مسائل پیش کئے جائیں تاکہ کابینہ ان پر فیصلہ کرے اور یہ معاملہ حل ہو۔پہلے ہی اس معاملے میں بہت تاخیر ہوچکی ہے۔ مزید تاخیر کی گنجائش نہیں۔ وزیراعظم نے بجلی کمپنیوں کو صوبوں کے حوالے کرنے کی تجویز پر ایک جائزہ کمیٹی بھی تشکیل دینے کی ہدایت کی جو وزیراعظم کواپنی تجاویز پیش کرے گی۔ وزیراعظم نے واضح کیا کہ نجکاری کے عمل کی تمام ذمہ داری نجکاری کمیشن اور وزارت نجکاری پر عائد ہوتی ہے۔ اگر کہیں مسائل ہیں تو انہیں دور کرنا بھی وزارت اور نجکاری کمیشن کی ذمہ داری ہے۔ اگر صلاحیت اور استعداد کے مسائل ہیں تو انہیں فی الفور دور کیا جائے۔ وزیر اعظم نے کہاکہ نجکاری کے عمل کی ادارہ جاتی سطح پر شفافیت یقینی بنائیں اور نگرانی کے عالمی معیار کے موثر اور آزمودہ طریقے اختیار کئے جائیں تاکہ کوئی انگلی نہ اٹھا سکے۔
اجلاس سے خطاب کرتے ہوئے وزیراعظم نے کہاکہ خسارے میں چلنے والے اداروں کی بھاری قیمت ملک اور عوام ادا کرنے پر مجبور ہیں۔ خدا کی رضا اور ملک وقوم کی فلاح کی نیت سے ان خساروں سے قوم کو نجات دلانے میں سب اپنا مخلصانہ کردار ادا کریں تاکہ آنے والی نسلیں ہمارا نام عزت اور احترام سے لیں۔ وزیراعظم نے واضح کیا کہ معیار، شفافیت اور پاکستان کے مفاد کے پیمانے پر چلنا ہوگا۔ وزیراعظم نے کہاکہ ملک میں کاروباری مقابلے اور عوام کو بہترین خدمات کی فراہمی کے مقابلے کی فضا بنانا ہوگی تب ہی یہاں بہتری آئے۔ وزارتیں اور ادارے پروفیشنل ازم اور جذبے کا مظاہرہ کرتے ہوئے حل تجویز کریں۔ یہ پاکستان کی بہتری کا سوال ہے۔
اجلاس میں پی آئی اے، ہاﺅس بلڈنگ فنانس کارپوریشن، فرسٹ وومن بینک، روز ویلٹ ہوٹل، ہیوی الیکڑیکل کمپلیکس، بجلی کے کارخانوں اور تقسیم کار کمپنیوں، پاکستان سٹیل ملز کارپوریشن سمیت خساروں میں چلنے والے دیگر اداروں کی نجکاری کے عمل پر تازہ ترین صورتحال، اب تک کی پیش رفت اور حائل رکاوٹوں کا تفصیلی جائزہ لیاگیا۔ سیکریٹری وزارت نجکاری اور دیگر متعلقہ حکام نے بریفنگ دی۔اجلاس کو بتایاگیا کہ نجکاری کے عمل میں تاخیر کی ایک بڑی وجہ عدالتوں سے جاری ہونے والے حکم امتناع ہیں ۔ وزیراعظم نے ہدایت کی کہ اس معاملے میں حکومت کی جانب سے پیش ہونے والی قانونی ٹیم کو موثر بنایاجائے اور وزارت قانون مناسب اقدامات تجویز کرے۔ اجلاس کو بتایاگیا کہ ائیر پورٹس کی آﺅٹ سورسنگ کے لئے 5 مارچ بولیوں کی وصولی کی آخری تاریخ تھی۔ اجلاس میں سینیٹر اسحاق ڈار، ،مصدق ملک،شزہ فاطمہ خواجہ، رومینہ خورشید عالم، احد چیمہ، علی پرویز ملک ، رانا احسان افضل ، ڈپٹی چئیرمین پلاننگ کمیشن ڈاکٹر جہانزیب، گورنرسٹیٹ بینک، چئیرمین ایف بی آر، سیکریٹری نجکاری ، سیکریٹری قانون سمیت اعلی حکام شریک تھے. ممتازبینکارمحمد اورنگزیب نے وڈیو لنک کے ذریعے اجلاس میں شرکت کی۔