Author: صدف ابرار

قومی اسمبلی کااجلاس طلب کرنے کے معاملے پر وفاقی حکومت نے صدرمملکت کے اعتراضات کا جواب دیدیا۔ذرائع کے مطابق وفاقی حکومت نے صدر مملکت کواپنے فیصلے پرنظرثانی کرتے ہوئے آئین کے مطابق ایک بارپھر قومی اسمبلی کا اجلاس طلب کرنے کی درخواست کردی ۔وفاقی حکومت کاجواب میں کہنا تھاکہ آئین کے آرٹیکل 91 کی شق دو کے تحت الیکشن تاریخ کے 21 ویں دن تک اجلاس بلایا ناگزیر ،آرٹیکل میں کہیں نہیں لکھا کہ ایوان نامکمل ہو تو اجلاس نہیں بلایا جاسکتا ۔صدر کی صوابدید اور استحقاق ہے ہی نہیں کہ وہ 91 کے تحت اجلاس روک سکیں ۔صدر صرف آرٹیکل 54 کے تحت معمول کے اجلاس کو روک سکتے ہیں ۔یہ معمول کا نہیں غیر معمولی اجلاس آئینی تقاضا ہے ۔کہیں بھی نہیں لکھا کہ مخصوص نشستیں نہ ہوں تو اجلاس نہیں ہوسکتا ۔29 فروری کو ہر حال میں صبح دس بجے اجلاس ہوگا تیاریاں مکمل ہیں ۔نگران حکومت کا جواب میں کہنا تھا کہ صدر مملکت 29فروری کو اجلاس بلا لیں اگر نہیں بھی بلاتے تو اجلاس 29فروری کو ہی ہوگا ۔

خانپور کے علاقے سربروٹ میں مسافر بس گہری کھائی میں گر گئی۔ریسکیو حکام کے مطابق افسوسناک حادثے میں 8 افراد جاں بحق جبکہ 15 زخمی ہو گئے، ہلاکتوں میں مزید اضافہ ہو سکتا ہے۔پولیس حکام کے مطابق مسافر بس ہلی سے راولپنڈی جارہی تھی، مسافر بس میں بچے اور خواتین بھی سوار تھیں۔

سابق نگراں وفاقی وزیر داخلہ اور سینیٹر سرفراز بگٹی سینیٹ کی نشست سے مستعفی ہوگئے۔سرفراز بگٹی نے اپنا استعفی چیئرمین سینیٹ صادق سنجرانی کو پیش کیا۔چیئرمین سینیٹ صادق سنجرانی نے سینیٹر سرفراز بگٹی کا استعفی منظور کرلیا۔واضح رہے کہ سرفراز بگٹی بلوچستان اسمبلی میں بطور ایم پی اے حلف اٹھائیں گے۔یاد رہے کہ سرفراز بگٹی نے دو ماہ قبل پیپلزپارٹی میں شمولیت اختیار کی تھی، اور وزیر اعلیٰ بلوچستان کے لئے پیپلزپارٹی کی جانب سے انھیں نامزد کیا جاسکتا ہے۔خیال رہے کہ آصف علی زرداری نے بلوچستان میں حکومت سازی سے متعلق معاملات پر پیپلز پارٹی کی چار رکنی کمیٹی قائم کی ہے اس کمیٹی میں بھی میر سرفراز بگٹی شامل ہیں۔ کمیٹی کے دیگر ارکان میں نواب ثناء اللہ خان زہری ، میر چنگیز جمالی اور علی حسن زہری شامل ہیں۔

پاکستان تحریک انصاف (پی ٹی آئی) کے رہنما بیرسٹر گوہر نے مریم نواز کے بطور وزیراعلیٰ پنجاب انتخاب پر ردعمل دیتے ہوئے کہا کہ مریم نواز کی بطور وزیراعلیٰ پنجاب سلیکشن جمہوریت کے دامن پر ایک بدنما داغ ہے۔ بیرسٹرگوہر نے کہا ہے کہ مریم نواز کو قانون و ضوابط کی خلاف ورزی کرتے ہوئے وزیراعلیٰ ’سیلیکٹ‘ کروانے کی شدید مذمت کرتے ہیں۔ ایک بیان میں انھوں نے کہا کہ ‏8 فروری کو انتخاب میں بری طرح شکست کھانے والے کرداروں کو پنجاب اسمبلی میں جمع کیا گیا۔ رہنما پی ٹی آئی نے کہا کہ پنجاب کے عوام کے غم و غصّے میں اضافہ ہوگا، ہم مریم نواز کی سلیکشن کو مکمل طور پر مسترد کرتے ہیں۔ ان کا کہنا تھا کہ مریم نواز کی غیر آئینی ’سلیکشن‘ سے صوبے میں استحکام کے امکانات کو شدید دھچکہ پہنچے گا۔