Author: صدف ابرار

وزارت خزانہ نے 17 اگست 2023 سے 31 جنوری 2024 تک نگراں حکومت کی جانب سے لیے گئے مقامی قرضوں کی تفصیلات جاری کردی گئیں۔اس حوالے سے جاری اعلامیے میں کہا گیا کہ نگراں دور حکومت میں 19 ہزار 830 ارب روپے کا ڈومیسٹک قرض لیا گیا۔ یکم فروری تا 16 اگست 2023 کی مدت میں 19 ہزار 862 ارب روپے قرض لیا گیا تھا۔ نگراں دور میں مقامی قرض کا نیٹ فلو 1796 ارب روپے ریکارڈ کیا گیا، گزشتہ مدت میں نیٹ فلو 5 ہزار 831 ارب روپے ریکارڈ کیا گیا تھا۔ گزشتہ اسی مدت کے مقابلے قرضوں میں 67 فیصد کمی ہوئی۔
نگراں دور میں 17 ہزار 934 ارب روپے کا مقامی قرض واپس کیا گیا، گزشتہ اسی مدت میں 14 ہزار 31 ارب روپے قرض واپس کیا گیا تھا۔وزارت خزانہ کے مطابق نگراں حکومت کو 22 فیصد کا پالیسی ریٹ ورثے میں ملا، گزشتہ مدت کے دوران پالیسی ریٹ کی اوسط شرح 19.5 فیصد تھی۔نگراں حکومت نے مقامی قرض کی پروفائل بہتر کرنے کے اقدامات کیے۔ نگراں دور میں ٹریژری بلز کا حجم 1.6 ٹریلین روپے تک آگیا، سابقہ مدت میں ٹریژری بل کا حجم 3.3 ٹریلین روپے تھا۔ حجم کم ہونے سے حکومتی مالیاتی ضروریات کم کرنے میں مدد ملی۔اعلامیہ میں کہا گیا کہ نگراں حکومت نے 3.9 ارب ڈالر کا بیرونی قرض لیا، سابقہ مدت میں 8.4 ارب ڈالر کا غیر ملکی قرض لیا گیا۔نگراں حکومت نے 3.6 ارب ڈالر کا غیر ملکی قرض واپس کیا، سابقہ مدت میں 5.4 ارب ڈالر کا غیر ملکی قرض واپس کیا گیا۔

نگران وفاقی وزیر مرتضیٰ سولنگی نے کہا کہ کچھ لوگ سوشل میڈیا پلیٹ فارمز کو تشدد پر اکسانے کیلئے استعمال کررہے ہیں۔مرتضیٰ سولنگی نے کہا کہ سوشل میڈیا کے پلیٹ فارم پر لوگ اربوں ڈالر کما رہے ہیں، سوشل میڈیا پلیٹ فارمز کو کردار کشی کیلئے بھی استعمال کیا جاتا رہا ہے، ہم سوشل میڈیا پلیٹ فارم کو منفی پراپیگنڈے کیلئے استعمال نہیں ہونے دیں گے، پاکستان ایک پرامن ملک ہے، یہاں قانون کی حکمرانی ہے۔نگران وفاقی وزیر نے مزید کہا کہ پاکستان میں کسی کو امن خراب کرنے کی اجازت نہیں دی جائے گی، سوشل میڈیا پلیٹ فارمز کمپنیاں پراپیگنڈے کی روک تھام کیلئے اقدامات کریں۔

پاکستان مسلم لیگ (ن) کے رہنما عطاء اللّٰہ تارڑ کا کہنا ہے کہ ایک ٹولا ملکی معیشت کو برباد کرکے ملک کو تباہ کرنا چاہتا ہے، اسی ٹولے نے 9 مئی کے حملے کیے، انہی لوگوں نے سوشل میڈیا پر زہر پھیلایا، ان کے مذموم مقاصد کے خلاف قانونی کارروائی ہونی چاہیے۔ پی ٹی آئی والوں نے ماضی میں بھی آئی ایم ایف کو خط لکھنے کی کوشش کی تھی، پچھلی بار بھی ان کی سازش پکڑی تھی۔نجی ٹی وی سے گفتگو کرتے ہوئے عطاء تارڑ نے بانی پاکستان تحریک انصاف (پی ٹی آئی) کی طرف سے انٹرنیشنل مانیٹری فنڈز (آئی ایم ایف) کو خط لکھنے کے فیصلے پر رد عمل دے دیا۔
انہوں نے یہ بھی کہا کہ کے پی اور بلوچستان میں جو سیٹیں ملیں کیا وہاں دھاندلی نہیں ہوئی، ملک کی معیشت کو نقصان پہنچانے کی کوشش کی جارہی ہے، یہ لوگ ملک میں جمہوریت کو ڈی ریل کرنا چاہتے ہیں، ان لوگوں کو چند سیٹیوں پر کامیابی ملی، ملک میں انتشار چاہتے ہیں۔ عطاء تارڑ نے مزید کہا کہ ایک قیدی کی حیثیت سے آپ آئی ایم ایف کو خط لکھیں گے۔عطاء تارڑ نے مزید کہا کہ ملک میں انتشار کی اجازت نہیں دی جائے گی، ہم نے ملک کی معیشت بہتر کرنی ہے، بے روزگاری ختم کرنی ہے۔

وزیراعظم کے نمائندہ خصوصی برائے مذہبی ہم آہنگی حافظ محمد طاہر محمود اشرفی نے کہا ہے کہ اللہ نے قرآن میں فرمایا ہم نے ہی اس قرآن کو اتارا اور ہم ہی حفاظت کریں گے، ہمارے سپہ سالار بھی حافظ قرآن ہیں، پنجاب گورنمنٹ بھی ابہامات کو دور کرنے کیلئے ریویو پٹیشن داخل کرے، جس نے بھی کلمہ پڑھا وہ عقیدہ ختم نبوت کا چوکیدار ہے۔ کسی کو تحریف قرآن کی کی اجازت نہیں دی جاسکتی، حکومت پنجاب سے گزارش ہے کہ وہ سپریم کورٹ میں 6 فروری کو ہونے والے فیصلے میں ابہام کو دور کرنے کے لئے نظر ثانی کی اپیل دائر کرے یا سپریم کورٹ کی طرف سے اس کی وضاحت کردی جائے، ختم نبوت ہر مسلمان کا معاملہ ہے ، ہر مسلمان حضور ﷺ سے محبت رکھتا ہے۔ طاہر اشرفی نے کہا کہ 6 فروری کو سپریم کورٹ کا ایک فیصلہ آیا تھا، اس حوالے سے وکلاء، علماء اور مشائخ سے رابطہ تھا، عقیدہ ختم نبوت ہر مسلمان کا معاملہ ہے ، کچھ لوگوں نے یہ معاملہ بھی سیاست کے طور پر استعمال کرنے کی کوشش کی۔انہوں نے کہا کہ حکومت پنجاب سے بھی گزارش ہے کہ ابہامات کو دور کرنے کے لئے سپریم کورٹ میں نظر ثانی اپیل دائر کردے تا کہ انتشار پھیلانے والے کامیاب نہ ہوسکیں۔ ہم کسی کو بھی اجازت نہیں دے سکتے وہ حضور ﷺ یا مقدسات کا نام لے کر انتشار پھیلانے کی کوشش کرے۔ان کا کہنا تھا کہ پاکستان مختلف مذاہب اور مسالک کے ماننے والوں کا ملک ہے، پاکستان کا آئین، قانون، قرآن و سنت کے تابع ہے، پاکستان کے اندر رہنے والوں کی مذہبی آزاد ی آئین نے طے کر دی ہے۔