Author: صدف ابرار

جمعیت علماء اسلام (ف) کے سربراہ مولانا فضل الرحمان نے کہا ہے کہ ایک بار پھر ہماری خواہش اور آرزو کو کچل دیا گیا۔اسلام آباد میں اجلاس سے خطاب کرے ہوئے مولانا فضل الرحمان کا کہنا تھا کہ فکر اس بات کی ہے کہ ایک الیکشن کے بعد مسلسل دوسرا الیکشن متنازع ہو تو پارلیمان کی کیا اہمیت ہوگی۔ان کا کہنا تھا کہ جس کو مخالف دیکھا اس کے خلاف کرپشن کے کیسز کردیے، اس الیکشن میں 75 سالہ کرپشن کے ریکارڈ توڑ دیے گئے، جے یو آئی اس کردار سے لاتعلقی کا اظہار کرتی ہے۔
انہوں نے کہا کہ ہم اپنا تفصیلی فیصلہ مرکزی مجلس عاملہ میں دے چکے ہیں، ہم جمہوریت کےعلمبردار ہیں ہمارے بزرگ آئین کے بانی ہیں، آئین کا تحفظ کرنا ہم اپنی ذمہ داری سمجھتے ہیں۔ مولانا فضل الرحمان نے کہا کہ ہمیں الیکشن مہم نہیں چلانے دی گئی، میں الیکشن سے پہلے کہتا رہا کہ ہم الیکشن مہم نہیں چلا پا رہے، پارلیمان ہماری اتنی مجبوری نہیں کہ ہم بوٹ چاٹتے رہیں۔
ان کا کہنا تھا کہ مسلم لیگ ن کے ساتھ مل کر ہم نے تحریک چلائی ہے، ہمارے کارکن سڑکوں پر ہوتے تھے مسلم لیگ ن کی قیادت کنٹنیر پر ہوتی تھی، لیکن سال 2018 اور آج کی تینوں بڑی جماعتوں کی سیٹیوں کی تعداد ایک ہے، کل بھی یہ کہتے تھے کہ دھاندلی ہوئی آج بھی دھاندلی کہتے ہیں۔انہوں نے کہا کہ اقتدار مل جائے تو الیکشن ٹھیک نہ ملے تو دھاندلی ہوئی ہے، پی ٹی آئی مسلم لیگ ن اور پی پی پی سب کے پیمانے ایک جیسے ہیں۔سربراہ جے یو آئی نے یہ بھی کہا کہ پارلیمنٹ ہمارے ملک کا سپریم ادارہ ہے۔انہوں نے کہا کہ ہم فوج کو صرف ملکی دفاع کی صلاحیت دینا چاہتے ہیں، تیس سال سے دہشتگردی ہے اور بڑھتی جارہی ہے، پھر ناراض ہوتے ہیں کہ دفاعی قوت پر تنقید نہ کریں، جب وہ دفاعی قوت سے سیاسی قوت بن جائے گی تو سیاسی قوت پر بات کرنا ہوگی، وہ دفاعی قوت رہیں تو آنکھوں پر پلکوں کے طور پر ہوں گے، جب آنکھوں کی پلکیں آنکھ میں لگیں تو نکالنا پڑتی ہیں۔

3 مارچ کو ہونے والے انٹراپارٹی الیکشن میں علی ظفر چیئرمین کے امیدوار ہوں گے، جبکہ عمر ایوب جنرل سیکریٹری کیلئے امیدوار ہوں گے۔ راولپنڈی میں میڈیا سے گفتگو کرتے ہوئے بیرسٹر گوہر نے کہا کہ بانی پی ٹی آئی کا جیل میں ہونا غیر قانونی اور غیر آئینی ہے، تحریک انصاف پارلیمنٹ کا حصہ بنے گی اور آگے بڑھے گی۔پی ٹی آئی رہنما نے کہا کہ ہم چاہتے ہیں معیشت بہتری کی طرف جائے، اگر الیکشن صاف و شفاف نہیں ہوں گے تو معیشت کو نقصان ہوگا، عدالت سے تیزی کے ساتھ ہونے والے فیصلوں کو ساری دنیا نے دیکھا ہے۔ بیرسٹر گوہر نے مزید کہا کہ تحریک انصاف پارلیمنٹ کا حصہ بنے گی اور آگے بڑھے گی، جن کے پاس حق حکمرانی نہیں ہے وہ غاصب کےطور پر کرسیوں پر بیٹھیں گے۔

دوسری جانب پاکستان تحریک انصاف (پی ٹی آئی) کے بانی رہنما اکبر ایس بابر کا کہنا ہے کہ وہ پی ٹی آئی کا نیا انٹرا پارٹی الیکشن کرانے کا فیصلہ چیلنج کریں گے۔اکبر ایس بابر کا کہنا ہے کہ تمام موجودہ پی ٹی آئی قیادت کالعدم ہوچکی ہے، اس لیے کسی نئی مہم جوئی کا بھرپور قانونی اور سیاسی مقابلہ کیا جائے گا۔انہوں نے کہا کہ کالعدم قیادت کی جانب سے پی ٹی آئی وسائل کا استعمال غیر قانونی ہے، اس پر پابندی عائد کی جائے۔خیال رہے کہ پاکستان تحریک انصاف نے 3 مارچ کو انٹرا پارٹی انتخابات کروانے کا اعلان کیا ہے۔واضح رہے کہ الیکشن کمیشن نے 22 دسمبر 2023 کو انٹرا پارٹی انتخابات کالعدم قرار دیتے ہوئے پی ٹی آئی سے بلے کا انتخابی نشان واپس لے لیا تھا۔

پاکستان پیپلز پارٹی کے رہنما ندیم افضل چن کا کہنا ہے کہ پی ڈی ایم کا تجربہ اچھا نہیں رہا، الیکشن میں ہمارا بیانیہ ن لیگ کے خلاف تھا، ن لیگ کے ساتھ کئی معاملات پرنظریاتی اختلافات بھی ہیں، پیپلزپارٹی کا فیصلہ ہے کہ وہ وفاقی کابینہ کا حصہ نہیں بنے گی۔ ندیم افضل چن نے دعویٰ کیا ہے کہ بلوچستان میں حکومت پی پی بنائے گی اور مسلم لیگ ن اُن کی اتحادی ہوگی۔ انہوں نے کہا کہ ن لیگ والے کہتے رہے ہیں کہ اتحادی بلیک میل کرتے ہیں اب ان کو فری ہینڈ ہے اپنی کابینہ بنائیں،ندیم افضل چن نے کہا کہ صدر پاکستان کا عہدہ مسلم لیگ ن کی ڈیمانڈ پر لے رہے ہیں، بلوچستان میں حکومت پی پی بنائے گی اور مسلم لیگ ن اُن کی اتحادی ہوگی۔ رہنما مسلم لیگ ن مصدق ملک نے ندیم افضل چن کے دعوے کی تصدیق کی۔

پیپلز پارٹی اور ن لیگ کے درمیان معاملات طے پا گئے،بلاول بھٹو کچھ دیر میں زرداری ہاؤس میں پریس کانفرنس کرے گے . ذرائع کے مطابق سینیٹراسحاق ڈار کی رہائش گاہ پر صدر ن لیگ شہبازشریف اور چیئرمین پیپلزپارٹی بلاول بھٹو زرداری کی ملاقات ہوئی ۔ حکومت سازی سے متعلق امور پر تبادلہ خیال کیاگیا۔ملاقات میں اسحاق ڈار ، مراد علی شاہ، قمر زمان کائرہ اور احسن اقبال،مراد علی شاہ،اعظم نذیرتارڑ،سردار ایاز صادق بھی موجود تھے۔ذرائع کے مطابق پیپلز پارٹی کابینہ کا حصہ نہیں بنے گی۔صدر پاکستان اور چیئرمین سینیٹ،گورنر پنجاب اور گورنر خیبرپختونخوا کا عہدہ پیپلزپارٹی کو ملے گا۔سپیکر قومی اسمبلی ن لیگ کا ہو گا ۔ پاکستان مسلم لیگ نواز اور پاکستان پیپلز پارٹی کے درمیان حکومت سازی کی تشکیل کے معاملات طے پانے پر دعائے خیربھی کی گئی۔

بلاول بھٹو زرداری کچھ دیر میں زرداری ہاؤس میں پریس کانفرنس کریں گے۔حکومت سازی میں بڑا بریک تھرو سامنے آگیا۔نامزد وزیراعظم شہبازشریف کی چیئرمین پیپلزپارٹی بلاول بھٹو سے ملاقات جاری ہے ۔ذرائع کے مطابق شہبازشریف اور بلاول بھٹو زرداری ملاقات اہم شخصیت کی رہائش گاہ پرہورہی ہے۔دونوں رہنما اپنے اپنے موقف میں لچک دکھانے،اتفاق کی صورت میں حکومت سازی کیلئے حتمی معاہدہ کریں گے۔ واضح رہے کہ شہبازشریف نے بلاول بھٹو سے ملاقات سے قبل مری میں سابق وزیراعظم نوازشریف سے اہم ملاقات کی جس میں رابطہ کمیٹی نے مذاکرات کے حوالےسے خصوصی بریفنگ دی ۔

مسلم لیگ (ن) اور پیپلز پارٹی کی بات چیت میں تعطل آگیا ہے جبکہ ن لیگ کے سامنے ایم کیو ایم نے بھی اپنی شرائط رکھ دیں۔دوسری طرف شہباز شریف نے اسلام آباد میں حکومت سازی کے معاملے پر اپنی مشاورتی کمیٹی کے ساتھ بیٹھک لگالی ہے۔وفاق میں شمولیت کیلئے ایم کیو ایم نے تین مطالبات ن لیگ کے سامنے رکھ دیے، ن لیگ کی رابطہ کمیٹی کے اجلاس میں شہباز شریف کو پیپلز پارٹی اور ایم کیو ایم کے ساتھ ہونے والے مذاکرات پر بریفنگ دی گئی۔ شہباز شریف کی دونوں جماعتوں کی قیادت سے آج ملاقات متوقع ہے جبکہ بلوچستان اسمبلی کے 2 نومنتخب آزاد ارکان نے شہباز شریف سے ملاقات کی۔