Author: صدف ابرار

سابق سینیٹر فرحت اللہ بابر نے سوشل میڈیا پلیٹ فارم ”ایکس“ پر جاری ایک پیغام میں لکھا، ’امید تھی کہ عمران خان (نتائج کے بعد) سیاسی جماعتوں سے رابطے کریں گے تاکہ ان کے حمایت یافتہ آزاد امیدواروں کے مینڈیٹ کو یقینی بنایا جا سکے اور مسئلے کو حل کیا جاسکے۔ لیکن افسوس، انہوں نے ان سب کو جھڑک دیا۔ آج پھر پی ٹی آئی نے دوسری جماعتوں سے بات نہیں کی۔ یہ اقدام انتہائی تفرقہ انگیز، غیر دانشمندانہ اور خود کو تباہ کرنے والا ہے‘۔
فرحت اللہ بابر کے اس بیان سے با آسانی یہ اندازہ لگایا جا سکتا ہے کہ شاید پیپلز پارٹی کو کہیں کوئی چھوٹی سی امید تھی کہ پی ٹی آئی کی قیادت حکومت سازی کیلئے ان سے رابطہ کرے گی، لیکن ایسا نہ ہونے پر افسوس کا اظہار کیا جارہا ہے۔اپنے ایک اور پیغام میں فرحت اللہ بابر نے لکھا کہ ’ووٹرز نے مشکلات کے باوجود پی ٹی آئی کی حمایت یافتہ آزاد امیدواروں کو مینڈیٹ دیا، ڈیموکریٹس اس مینڈیٹ کا احترام کرنا چاہتے تھے، لیکن خان کا کہنا ہے کہ وہ نہ تو پیپلز پارٹی سے بات کریں گے اور نہ ہی مسلم لیگ ن سے، جو کہ حیران کن اور انتہائی مایوس کن ہے۔ مزید یہ کہ پی ٹی آئی میں یقیناً بہت سمجھدار لوگ ہیں‘۔ واضح رہے کہ اس سے قبل سابق صدر آصف علی زرداری نے بھی کہا ہے کہ اگر پی ٹی آئی ہمارے ساتھ مل کر چلے گی تو یہ ملک کے لئے خوش آئند ہو گا،

متحدہ قومی موومنٹ (ایم کیو ایم) پاکستان کے وفد اور صدر مسلم لیگ ن شہباز شریف کی ملاقات میں ایک بار پھر بلدیاتی نظام سے متعلق آئینی ترمیم کی تجاویز رکھ دیں۔ذرائع کا اس حوالے بتانا ہے کہ شہباز شریف نے آئینی ترمیم پر ایم کیو ایم کے مطالبے پر عمل درآمد کی یقین دہانی کرائی۔ ذرائع کا مزید کہنا ہے کہ ملاقات میں فیصلہ کیا گیا کہ حکومت سازی کےحوالے سے ملاقات کا ایک اور مرحلہ جلد ہوگا۔ایم کیو ایم وفد کی پارٹی کنوینر ڈاکٹر خالد مقبول صدیقی نے کی جبکہ گورنر سندھ کامران ٹیسوری، ڈاکٹر فاروق ستار، مصطفیٰ کمال شامل تھے۔ملاقات میں ن لیگی رہنما اسحاق ڈار، ایاز صادق اور ملک محمد احمد خان بھی موجود تھے۔ملاقات میں سیاسی صورتحال اور حکومت سازی سے متعلق مشاورت اور باہمی تعاون سے آگے بڑھنے پر اتفاق کیا گیا۔

متحدہ قومی موومنٹ پاکستان کے سربراہ ڈاکٹر خالد مقبول صدیقی نے مسلم لیگ (ن) کے ساتھ ملاقات میں حکومت سازی کے حوالے سے بات چیت کی تردید کردی ہے تو دوسری جانب ذرائع نے دعویٰ کیا ہے کہ سندھ سے کامیاب آزاد امیدواروں کی ایک بڑی تعداد نے ایم کیو ایم میں شمولیت کیلئے رابطہ کمیٹی سے رابطہ کیا ہے۔ رائے ونڈ میں مسلم لیگ کے قائد محمد نواز شریف اور پارٹی کے صدر محمد شہباز شریف سے ملاقات کے بعد ایک بیان میں خالد مقبول صدیقی نے کہا کہ اس وقت ملک کی بات کرنا زیادہ اہم ہے۔ ریاست اور جمہوریت کو بچانے کی ضرورت ہے اور اِسی کو ترجیح دی جانی چاہیے۔خالد مقبول صدیقی نے مسلم لیگ (ن) کی قیادت ساتھ ہوئی ملاقات کے بعد بتایا کہ لیگی قیادت سے ملاقات خاصی بار آور ثابت ہوئی ہے تاہم اس میں حکومت سازی کے حوالے سے کوئی بات نہیں ہوئی۔
اسکے علاوہ خالد مقبول صدیقی نے دعویٰ کیا ہے کہ سندھ میں مضبوط سیاسی اتحاد بنانے کی تیاری شروع کردی گئی ہیں اور اس کیلئے نومنتخب آزاد ارکان سندھ اسمبلی کی ایم کیو ایم سے ملاقاتیں ہوئی ہیں۔ذرائع کےمطابق عام انتخابات میں سندھ سے کامیاب 10 سے زائد آزاد ارکان نے ایم کیو ایم سے رابطہ کیا ہے۔ ایم کیو ایم نومنتخب ارکان سندھ اسمبلی کو مشاورات کے بعد فیصلے سے آگاہ کرے گی۔
ایم کیوایم کی جانب سے بھی نومنتخب آزاد ارکان سے رابطے کی تصدیق کردی گئی ہے۔خالد مقبول صدیقی نے کہا کہ ہم نے مسلم لیگ ن کی قیادت سے حکومت سازی پر کوئی بات نہیں کی۔ گِلے شِکوے کرنے کی اطلاع بھی درست نہیں۔ ملک کے حوالے سے خطرات اور اندیشے ہیں جنہیں دور کرنے کی ضرورت ہے۔ واضح رہے کہ ایم کیو ایم پاکستان کے وفد نے اتوار کی صبح کنوینر ڈاکٹر خالد مقبول صدیقی کی قیادت میں رائے ونڈ میں مسلم لیگ ن کی قیادت سے ملاقات کی تھی۔اس ملاقات کے حوالے سے خبریں آئی تھیں کہ حکومت سازی کے حوالے سے ابتدائی نوعیت کی گفتگو ہوئی ہے۔ عام انتخابات کے بعد کی صورتِ حال پر تبادلہ خیال کے دوران دونوں جماعتوں کی قیادت نے رابطے جاری رکھنے پر اتفاق کیا تھا۔

سوشل میڈیا اکاؤنٹ پر جاری بیان میں صدر پاکستان کا کہنا تھا کہ میں پاکستان کے عوام کو مبارکباد پیش کرتا ہوں، خاص طور پر خواتین کو جو شدید مشکلات کے باوجود بڑی تعداد میں باہر نکلیں اور جمہوریت کی مضبوطی کے لیے ووٹ دیا۔عوام کے مینڈیٹ کا احترام کرنا چاہیے اور اسے تسلیم کرنا چاہیے، صدر عارف علوی نے پُر امن الیکشن کے انعقاد پر قوم کو مبارکباد دے دی۔ووٹنگ کے عمل سے متعلق صدر پاکستان کا کہنا تھا کہ نوجوان بھی بلخصوص داد کے مستحق ہیں کہ انہوں نے ووٹنگ کے عمل میں پرامن طریقے سے حصہ لے کر ملک کی باگ ڈور سنبھالنے کا فیصلہ کیا ہے۔ انکا جمہوریت پر یقین، ولولہ اور تعمیر ملت کا عظم انشاللہ تاریخ رقم کرے گا۔ شدید مالی بحران سے نکلنے، مشکل فیصلے کرنے اور ماضی کی تلخیوں کو دور کرنے کے لیے ایک حقیقی مینڈیٹ ضروری تھا جو نظر آرہا ہے۔

I must congratulate the people of Pakistan, specially the women for coming out in huge numbers, withstanding all pressures and standing up for democracy. The youth deserve a special mention, and I praise them for having decided to take charge of the country by participating…

— Dr. Arif Alvi (@ArifAlvi) February 11, 2024

صدر پاکستان نے مزید کہا کہ ہمیں اس پُرجوش جذبے کا جشن منانا چاہیے اور دنیا کو پاکستان کا یہ خوبصورت چہرہ دکھانا چاہیے۔ ہمارے شاندار مستقبل میں میرا اعتماد مضبوط ہوا ہے کیونکہ لوگوں نے کُھل کر بڑی تعداد میں اپنی مرضی کا اظہارکیا ہے۔جبکہ ملک میں جاری سیاسی گرما گرمی پر ڈاکٹر عارف علوی نے کہا کلہ میرے شہریوں کے اس عظیم مینڈیٹ کا احترام ہونا چاہیئے اور اسے کھل کر تسلیم کرنا چاہیئے۔ سیاست دانوں، ان کی جماعتوں اور ہمارے اداروں کو اللہُ کی طرف سے بھیجے ہوئے اس موقع کو قبول کر کے اس کا فائدہ اٹھانا چاہیے۔ بے شک اللہ پاکستان پر بہت مہربان ہے۔ آؤ میرے لوگو، اٹھو اورمتحد ہو جاؤ، سب کچھ جوڑ کر تعمیر نو کا کام شروع کرو۔ دنیا آپ کی منتظر ہے۔

ضلع خیبر میں سیکیورٹی فورسز نے ہائی پروفائل دہشت گرد کی خفیہ اطلاع پر آپریشن کے دوران شدید فائرنگ کے تبادلے میں داعش کے دہشتگرد سورت گل عرف سیف اللّٰہ کو ہلاک کر دیا۔آئی ایس پی آر کے مطابق ہلاک دہشت گرد کمانڈر سے اسلحہ، گولا بارود اور دھماکا خیز مواد بھی برآمد ہوا ہے۔ آئی ایس پی آر نے کہا کہ دہشتگرد کمانڈر قانون نافذ کرنے والے اداروں کو انتہائی مطلوب تھا، علاقے میں موجود دوسرے دہشت گرد کے خاتمے کے لیے کلیئرنس آپریشن جاری ہے۔آئی ایس پی آر کا کہنا ہے کہ دہشت گرد کمانڈر شہریوں کی ٹارگٹ کلنگ، بھتا خوری اور متعدد دہشت گرد سرگرمیوں میں ملوث تھا۔انٹر سروسز پبلک ریلیشنز کا کہنا ہے کہ علاقہ مکینوں نے آپریشن کو سراہا اور دہشت گردی کے خاتمے کے لیے بھرپور تعاون کا اظہار کیا۔