Author: صدف ابرار

پاکستان تحریک انصاف کے رہنما بیرسٹر گوہر کا کہنا ہے کہ پیپلز پارٹی اور ن لیگ کے ساتھ کوئی رابطہ نہیں ، ان کے ساتھ مل کر حکومت بنانے کا کوئی ارادہ نہیں۔ بیرسٹر گوہر نے اپنے ایک بیان میں کہا ہے کہ انتخابات میں ہماری نشستیں 150 کے قریب ہیں، توقع ہے حکومت سازی کو پہنچ جائیں گے ۔ انہوں نے کہا کہ وفاق، پنجاب اور کے پی میں حکومت بنائیں گے ، آزاد امیدوار کسی پارٹی کو جوائن نہیں کریں گے ، اسی پارٹی میں رہیں گے جس کی ہدایت انہیں بانی پی ٹی آئی کریں گے ۔ دوسری جانب پاکستان تحریک انصاف ( پی ٹی آئی) کے ذرائع نے بتایا ہے کہ پارٹی کی اعلٰی قیادت نے پارٹی کے جیتے ہوئے آزاد اُمیدواروں کو دوسری جماعت میں شامل کرنے کے لیے باقاعدہ مشاورت مکمل کر لی ہے اور یہ فیصلہ سیاسی اور پارٹی کے بہتر مفاد کو مد نظر رکھتے ہوئے کیا جا رہا ہے۔ذرائع کا کہنا ہے کہ مشاورت مکمل کرنے کے بعد اب اس کی باقاعدہ منظوری کے لیے معاملہ کور کمیٹی کے سامنے پیش کیا جائے گا۔پارٹی ذرائع نے مزید بتایا ہے کہ اہم امور پر مشاورت اور فیصلےکے لیے کور کمیٹی کا اجلاس ہفتہ کے روز اسلام آباد میں طلب کیا گیا ہے، جس کے لیے بیرسٹر گوہر علی خان آبائی گاؤں بونیر سے اسلام آباد کے لیے روانہ ہو گئے ہیں۔

جو بھی حکومت آئے گی اس کو آئی ایم ایف کے ساتھ نیا معاہدہ کرنا ہو گا، محاذ آرائی کی سیاست ہوگی تو ملک کا نقصان ہو گا، زرداری کے اسلام آباد پہنچنے پر کوئی اعتراض نہیں ہے، پاکستان کا دارالحکومت ہے ہر کوئی آتا جاتا ہے.مسلم لیگ ن کے رہنما و سابق وفاقی وزیر احسن اقبال نے کہا کہ حکومت سازی ایک چیلنج ہے، قوم نے تقسیم مینڈیٹ دیا ہے، حالات کا تقاضا تھا ایک مستحکم مینڈیٹ دیا جاتا۔میڈیا سے گفتگو کرتے ہوئے احسن اقبال نے کہا کہ جن کو مینڈیٹ ملا ہے ان کی ذمہ داری ہے کہ ملک کے مفاد حکومت سازی کے عمل کو اچھی طرح سے پایہ تکمیل تک پہنچائیں، انتشار کی سیاست سے آگے بڑھیں گے تو ملک کا نقصان ہو گا۔احسن اقبال نے کہا کہ خرید و فروخت ہارس ٹریڈنگ والی بات نہیں، آزاد امیدواروں کی اپنی صوابدید ہے کس جماعت میں شامل ہونا چاہتے ہیں۔سابق وفاقی وزیر نے کہا کہ ن لیگ سب سے بڑی سیاسی جماعت بن کر ابھری ہے، آزاد امیدوار بھی بڑی سیاسی جماعت کے ساتھ آئیں گے، پنجاب میں ہماری حکومت قائم ہو گی۔