امریکا نے ایران کے ساتھ دو ہفتوں کی جنگ بندی میں توسیع کی درخواست سے متعلق خبروں کو مسترد کر دیا ہے۔
وائٹ ہاؤس کی پریس سیکریٹری نے میڈیا بریفنگ کے دوران کہا کہ ایسی رپورٹس درست نہیں ہیں جن میں دعویٰ کیا گیا کہ امریکا نے باضابطہ طور پر جنگ بندی میں توسیع مانگی ہے۔انہوں نے کہا کہ آج صبح کچھ غلط رپورٹس سامنے آئیں جن میں کہا گیا کہ امریکا نے جنگ بندی کی مدت بڑھانے کی رسمی درخواست کی ہے، لیکن یہ بات سراسر غلط ہے۔اس وقت امریکا ایران کے ساتھ مذاکرات اور بات چیت میں مصروف ہے۔ ان کے مطابق نائب صدر جے ڈی وینس اور صدر نے بھی حالیہ دنوں میں واضح کیا ہے کہ یہ رابطے مثبت انداز میں جاری ہیں اور پیش رفت ہو رہی ہے۔وائٹ ہاؤس کی ترجمان کا کہنا تھا کہ امریکا کو ایران کے ساتھ کسی ممکنہ معاہدے کے امکانات کے حوالے سے اچھا احساس ہے اور امید ہے کہ مذاکرات کامیاب نتیجے تک پہنچ سکتے ہیں۔
